Mga Bilang 20 - Tagbanwa

Liniꞌwanan it danum i esang batu temed nagkasalaꞌan na Moises, duwa ni Aaron

¹ Kat uꞌnang bulan it ikaꞌpat nga pulung taꞌun it panaw nira, nakaꞌbut i mga Israelita ngayti duꞌut rugar nga kapupuyangtan nga duꞌut Zin. Duꞌun sit Cades i piyagbalay-balayan nira. Miyatay duꞌun kayti si Miriam nga sulsug nga babay ni Moises. Duꞌun nay limbengan it kanya.

² Ta it egay dadanum duꞌun kayti, unupat biyasul siꞌ it mga taw na Moises, duwa ni Aaron.

³ Maat nira, “Magayen pay natay kami na, nga iba it mga kabilug namen ngayting beken nga naꞌulug kat panriga it AMPUꞌANG DIYUS nga kamataynen.

⁴ Unuka tiyaban-taban mi kami nga mga taawan it AMPUꞌANG DIYUS situt rugar ngaytu nga kapupuyangtan? Isaꞌun siguru matay kami, pati mga ayep namen!

⁵ Unuka piyaliꞌwan mi kami duꞌut Egipto bawnga giyuyu-guyud kami situt itung raꞌe-raꞌet it rugar nga maski unu mana, egay magkakaꞌen? Ka ungaytu, egay tirigu, egay buwat kayu, danum bang masked daꞌga!”

⁶ Tiyananan na Moises duwa ni Aaron i mga taw ngayti nga natingped. Naꞌaduꞌun sira it Tabirnakulu ngayti baw namagkeleb duꞌun it salakwatan ya. Sakaling naltegan nira siꞌ i magsilaw nga kabantugan it AMPUꞌANG DIYUS.

⁷ Maat it AMPUꞌANG DIYUS it ki Moises,

⁸ “Tabanen muy sungkud nga magbebtang situt Tabirnakulu. Pabayaꞌen mi ni Aaron i kapuꞌsaan it mga kaꞌibaan mi ngayan. Paꞌaduꞌun kamu it sarungaan it dakulaꞌ ngayti nga batu. Pagꞌabut mi duꞌun, pakisugidan muy batu ngayan it pagdedngegen it kadakel. May danum yan nga manliꞌwan, danum mi nga muꞌsa baw kat mga ayep mi.”

⁹ Egay beken, pinsiꞌ ni Moises i sungkud ngayti nga duꞌut Tabirnakulu, subung nat inaat it AMPUꞌANG DIYUS.

¹⁰ Bawnga tiningped na Moises duwa ni Aaron i kadakel ngayti duꞌun it sarungaan it batu ngayting dakulaꞌ. Pagkatingped, maat ni Moises, “Pagneg kamu, mga makusked. Unu, kaꞌilangan nga paliꞌwan kamit danum situt batu ngaytu?”

¹¹ Pagkaꞌampang ni Moises kayti, biyangkal ya nay batu ngayti it duwang bangkal it sungkud ngayti. Ta, egay beken, miyugasꞌas i danum. Nakaꞌinum i katataawan ngayti, pati mga ayep nira.

¹² Temed maat it AMPUꞌANG DIYUS it ki Moises baw ki Aaron, “Sabap it kimnurang i pamayaꞌ mi it aken, ka ega ipiyakilala mi i ega basta-bastang guna baw kabantugan ku kat adapan it kadakel, ega na kamu i tumaban it mga taw ngaytu duꞌun it banwa ngayan nga ibgay ku it kanira.”

¹³ Meriba i ipiyangaran it danum ngayti ka yanayti, nagpakusalaꞌ it AMPUꞌANG DIYUS i mga Israelita, baw ipiyakilala it AMPUꞌANG DIYUS i ega basta-bastang kabantugan ya.

Pagpatay ni Aaron

²³ Desang duꞌun na sirat Bukid it Hor, duꞌut seked it rugar nga pagpangaranat Edom, inaat it AMPUꞌANG DIYUS si Moises baw si Aaron.

²⁴ Maat ya, “Ega makasled si Aaron duꞌut rugar nga ibgay ku it mga Israelita. Matay na kanya sabap ega siyunud mi i inaat ku it imyu duꞌun it Meriba.

²⁵ Aypaꞌ kanya baw anak ya nga si Eleazar, pabayaꞌen mu it tumungul duꞌun it Bukid ngaytit Hor.

²⁶ Pagꞌabut mi duꞌun it siyagpawan, lebasen mu i pakayan ya nga pakayan it pagkasasirduti ya bawnga ipapakay mu it ki Eleazar nga sumubli it kanya. Duꞌun nayan i patayan ni Aaron.”

²⁷ Siyunud ni Moises i inaat ngaytit AMPUꞌANG DIYUS. Timnungul na sira duꞌut bukid ngayti. Paglalawagen naga sirat mga kaꞌibaan nira ngayting mga Israelita.

²⁸ Pagꞌabut duꞌut siyagpawan it bukid ngayti, inawaꞌ ya nay pakayan ngayti ni Aaron bawnga ipiyapakay yat ki Eleazar. Natay na nga matuud si Aaron duꞌun kayti. Kana Moises duwa ni Eleazar, namagpanadsad nay miyuliꞌ.

²⁹ Pagkaꞌrut it kadakel ngayti it natay na si Aaron, nagpulaw sirat tulung puluꞌ nga aldaw.