Mga Bilang 14 - Tagbanwa

Biyasul it mga Israelita na Moises, pati Ampuꞌang Diyus

¹ Egay beken, nasmek i kadakel ngaytit mga Israelita. Naglinag sirat garwak.

² Biyasul na nira si Moises baw si Aaron. Maat nira, “Magayen pay natay ta na duꞌut Egipto u situt pagpanawan ta ngaytung rugar nga kapupuyangtan!

³ Unuka maka papaꞌaduꞌunun tami gasit AMPUꞌANG DIYUS it iting banwa? Itu, baraꞌan ta kaytu, sariyen ta nayat pangimatay it mga kalaban ta! Iyan mga anak, asawa ta, dakepanen na nira. Magayen pay paꞌuliꞌ tami naga duꞌut Egipto!”

⁴ Ta unupat nagrunding-rundingen siꞌ sira nga miliꞌ it esang pagbayaꞌen nga manguꞌna it kanira it paꞌuliꞌ ngayti.

⁵ Namagkeleb na Moises duwa ni Aaron, nga pagleltegan it kadakel ngayti, ka nangabang duꞌun it AMPUꞌANG DIYUS.

⁶ Kana Josue, duwa ni Caleb, nga uyut sira it mga sunda ngayti, piyamagrasik niray pakayan nira ka nasmekan niray buwat it mga kaꞌibaan nira ngayti.

⁷ Maat nira it kadakel ngayti nga mga Israelita, “Talagang subraꞌ nga magayen i banwa nga siyundaan namen.

⁸ In talagang pagsagyaan tami it AMPUꞌANG DIYUS, ibgay ya bayan it aten i iting banwa nga sakyan i muꞌsang bagay.

⁹ Ega kalabanen mi i AMPUꞌANG DIYUS. Ayaw kamut iꞌlam it mga taga duꞌun ngayti. Madali-daliꞌ tami yan sira mapasukuꞌ sabap iba tat aten i AMPUꞌANG DIYUS. Iyan kanira, egay kanira nga magkapalingban.”

^10a Temed pagkubuntalan ga sirat batu it kadakel ngayti.

Mga magpamasul ngayti, ega na kaꞌbut sira duꞌut rugar ngayti nga pagꞌabutun nira

²⁶ Iyan atnakayti, maat it AMPUꞌANG DIYUS it ki Moises baw ki Aaron,

²⁷ “Talagang maraꞌe-raꞌet i adat it iyang mga taw. Seked kayti talagang sigi-sigi pang basul nira it aken. Kaꞌnu paꞌ bayan i ipdek nira?

²⁸ Aypaꞌ aaten mi sira nga ituy ipagꞌaat ku it kanira. ‘Iyan talagay matuud, buwaten ku it imyu i nagnegan ku ngayan nga pagrundingen mi.

²⁹ Situ nat rugar ngaytung kapupuyangtan i patayan mi, muꞌsa nga nasinsus nga garing kat idad nga duwang puluꞌ nga taꞌun padibwat. Kumpur magpamasul it aken.

³⁰ Egay maski esa nga makaꞌbut duꞌun it banwa ngayan nga isiyanggup ku, magpuyra it kana Caleb nga anak ni Jefone baw si Josue nga anak ni Nun.

³¹ Temed mga anak mi ngayan nga inaat mi nga dakepanen it mga kalaban mi, sira i tabanen ku duꞌun. Sira lamang i makapamanwa duꞌut banwa ngayan nga pagdaꞌgaen mi.

³² Temed kamu, matay kamuy imyu situt rugar ngaytung kapupuyangtan.

³³ Iyan mga anak mi, magluꞌug-luꞌug it seledat epat nga pulung taꞌun, seked it matay kamu na nga muꞌsa. Paliꞌ mi naga i karigaan nira ngaytu ka daꞌkamu na naneꞌteꞌ it aken.

³⁴ Kat epat nga pulung aldaw nga kaꞌlay it mga simnunda duꞌut rugar ngayting piyasundaan mi, pablesan kuytu it epat nga puluꞌ nga taꞌun it pakuriꞌ it imyu. Ituy tumbas it kasalaꞌan mi, isaꞌun matanudan mi nga banar i iseg ku it imyu.’

³⁵ Aku nga AMPUꞌANG DIYUS i miyampang kaytu. Talagang buwaten kuytu kat mga taw ngaytu nga mararaꞌe-raꞌet i adat, nga namagꞌisun-isunun nga kumuntraꞌ it aken. Matay sira situt rugar ngaytu nga kapupuyangtan.”