Mga Bilang 13 - Tagbanwa

Inaat it AMPUꞌANG DIYUS si Moises nga pasundaan yay Canaan

¹ Pagꞌabut it mga Israelita duꞌun it rugar nga kapupuyangtan nga pagpangaranat Paran, inaat siꞌ it AMPUꞌANG DIYUS si Moises.

² Maat ya, “Piliꞌen mu i papanawun mu nga mga ginuꞌu. Kada kuyunan nga mga tungtung-inapuꞌ it mga anak ni Israel, sang kataawan i piliꞌen. Ka pasundaan muy Canaan, nga banwa ngayan nga ibgay ku it imyu.”

³ Atkayti nga matuud i binwat ni Moises.

¹⁷ Parabir napanaw i mga sunda ngayti, tinggunan sira ni Moises, nga magꞌaat, “Duꞌut Negeb i pamanaw mi, bawnga paꞌaduꞌun kamut mamungsuꞌun.

¹⁸ Tili-tiliyen mit magayen i rugar ngayan. Leteg-letegan mi in makekseg u malulubay i mga taw ya, baw in dadaklan u ega.

¹⁹ Leteg-letegan mi gasiꞌ in maꞌunu nga kalasit rugar, in magayen u daꞌga i lugtaꞌ ya, baw in maꞌuꞌunu i mga kababalayan ya, in may mapapaꞌgen nga kutaꞌ it mga siyudad ya u ega.

²⁰ Leteg-letegan mi gasiꞌ in magagayen u daꞌga i mga parangumaen ya, baw in unu makayuun baw daꞌga. Baw sana, pagꞌuliꞌ mi, tumaban kamut maski pira na lamang nga mga buwaꞌ it kayu duꞌun.” Iting timpu pabubwaꞌ it ubas.

²¹ Ta, pagꞌabut it mga piyapanaw ngayti duꞌut Canaan, liyeteg-letegan nira nay banwa ngayti, garing duꞌun it rugar nga kapupuyangtan nga duꞌut Zin seked duꞌun it Rehob nga adeꞌdeng duꞌut Hamat.

²³ Pagꞌabut nira duꞌun it mintang it Escol, minsiꞌ sira it sang parungpung i buwaꞌ it ubas, kiyantuwang na it duwang kataawan. May napisiꞌ nira gasiꞌ nga buwaꞌ it granada baw igos.

²⁴ Piyangaranan niray iting rugar it Escol, sabap duꞌun i pinsiꞌan nira it sang parungpung nga ubas.

²⁵ Epat nga puluꞌ nga aldaw i kaꞌlay it mga sunda ngayti bawnga miyuliꞌ sira.

Itiyuturan nat mga piyasunda ngayti i naltegan nira

²⁶ Pagꞌabut it mga piyasunda ngayti, miyadap sirat ki Moises, si Aaron baw kadakel ngaytit kaꞌibaan nira nga mga Israelita nga duꞌun pat Cades, nga sakep it Paran. Itiyuturan nira nga muꞌsa duꞌut kadakel ngayti i kumpur naltegan nira, baw ipiyalteg na niray buwaꞌ it mga luwak baw kayu ngayti nga taban nira.

²⁷ Maat i tuturan nira, “Talagang inabut namen i banwa ngayting piyasundaan mit amen. Magayen talaga i iting banwa. Sakyan i muꞌsang bagay duꞌun. Kamatuudan, ungaytu gay kagagayen it buwaꞌ ngaytu nga duꞌun naytuy garing.

²⁸ Temed makekseg i mga taw ya duꞌun. Dadakulaꞌ na nga siyudad baw mapapaꞌgen i mga kutaꞌ ya. Baw ta dungag ya paꞌ, may naltegan namen duꞌun nga mga tungtung-inapuꞌ ni Anac!

²⁹ Sakep it mga Amalecita i Negeb. Kat rugar nga mamungsuꞌun, yay taw ya duꞌun, mga Heteo, mga Jebuseo baw mga Amorreo. Duꞌut tambing it dagat baw kadanuman it Jordan, rugar it mga Cananeo it kanira.”

³⁰ Pagkatupus it tuturan nira, maat i esang sunda nga pagpangaranat ki Caleb, “Medek kamu daꞌat tingeg. Pagneg kamu. Unuka matrasu tami paꞌ ka ega paꞌ sakpen tami i banwa ngayti? Siguradu yan nga daꞌgen tami sira.”

³¹ Katubag i kaꞌibaan ya ngaytit simnunda, “Ega bayan kaya ta, ka subraꞌ sirang makekseg, subraꞌ paꞌ it aten.”

³² Ta unupat ega na magayen i ipagpanugid-sugid it beken ngayting sunda, ka maat nira, “Siyundaan namen ngayting banwa, talagang kaꞌiꞌilang baw kasasarut. Baw dadakulaꞌ bay mga taw ya duꞌun.

³³ Iyan beken, bilaꞌ, atnat laꞌu-laꞌun ka mga Nefilim, nga mga tungtung-inapuꞌ ni Anac. Pane-panemdem namen, subung kami na lamang it mga paya-payaꞌtung. Siguru barang atkayan gasiꞌ i panemdem nirat amen.”