Mateo 5 - Tagbanwa

Panulduꞌ ni Jesus pasar it matuud nga kasagyaan

¹ Kaꞌsa nga namuyaan ni Jesus nga dakel nang dakel siꞌ i mga taw duꞌun nga miyabut, timnungu-tungul kanya duꞌut esang bulud bawnga miyadung. Nagpatpad naga duꞌut kanya i mga alagad ya.

² Bawnga tiyulduꞌan ya sira, nga magꞌaat,

³ “Magkasagya i mga taw nga, ipagpabetang nira nga talagang egay sadiling kakayaan nga masarigan, in daꞌga Ampuꞌang Diyus lamang, sabap kaꞌuyut sira duꞌun it kanyang kaꞌadiꞌan.

⁴ Magkasagya i mga magkasmek sabap it nabwat nga kasalaꞌan, ka banga-bangayen sira it Ampuꞌang Diyus.

⁵ Magkasagya i mga mapiyalulus, ka siguradu nga tanggapen nira i muꞌsa nga isiyanggup it Ampuꞌang Diyus.

⁶ Magkasagya i mga talagang kubwat nga pirmi it kaꞌirgan it Ampuꞌang Diyus, sabap talagang ibgay ya it kanira nga mabwat nira.

⁷ Magkasagya i mga maꞌildaw, ka ildawan naga gasiꞌ sira it Ampuꞌang Diyus.

⁸ Magkasagya i mga taw nga egay antap it nakem nira nga ega magayen, in daꞌga purus mataldeng kat panleteg it Ampuꞌang Diyus. Sabap siguradung makitaan nira kanya.

⁹ Magkasagya i mga magkabwat it dalan nga ipagkagayen, sabap ipabetang sira it Ampuꞌang Diyus nga mga anak ya.

¹⁰ Magkasagya i mga pagpakuriꞌan sabap it kanira nga pagsunud it kaꞌirgan it Ampuꞌang Diyus, sabap talagang kaꞌuyut sira duꞌun it kanyang kaꞌadiꞌan.

¹¹ Magkasagya kamu in pagsawayen kamu it beken, in pagpakuriꞌan baw pagꞌampangan kamu it muꞌsang maraꞌe-raꞌet nga pamuwat-buwat nirat imyu sabap it magpamayaꞌ baw magsarig kamu nat aken.

¹² Sumagya kamu! Talagang sagyaan mi tu nga banar, sabap ega talaga basta-basta i itumbas it imyu duꞌut langit. Demdemen mi nga atkayan nagay pabetang it mga kagiyaringanan nira it mga prupitaꞌ ngaytit tagnaꞌ.”

Kaꞌalimbawaan it mga magpamayaꞌ, asin baw tidaw

¹³ Ipiyasigi ni Jesus i panulduꞌ ya, nga maat ya, “Kamu nga magsunud it kaꞌirgan it Ampuꞌang Diyus, kaꞌalimbawaan mi, asin, nga yay talagang pagkaꞌilanganen situt banwa. Ta in beteꞌ tumaꞌbang i asin ngaytu, magꞌuꞌunu paꞌ mapaꞌuliꞌnan i palaꞌ ya? Daꞌga ega nay kapulusan? Simpri ibuntal na lamang. Baraꞌan ya tetegday-tegdayan na lamang it mga taw.

¹⁴ Kaꞌalimbawaan mi gasiꞌ, tidaw situt sinirungat langit, ka eyagan mi i pikiran it katataawan. Ta, demdemen mi nga siyudad nga duꞌun it siyagpawan it bulud, ega magkataguꞌ ka magkaltegan i sayaꞌ.

¹⁵ Dedemdemen mi tu gasiꞌ, nga simpri egay magket it tidaw nga pagkapagket ya, sukruban ya it alupan. In daꞌga iduꞌun ya talaga it dadaꞌtunan, isaꞌun maꞌyagan i muꞌsang seled it balay.

¹⁶ Aypaꞌ ega itaguꞌ mi i pamayaꞌ mi. Sana masgu nga pirmi i imyu nga tidaw kat panleteg it kadakel, isaꞌun maꞌyag it kanira i magagayen nga buwat mi, baw bantugun nira i Amaꞌ mi nga duꞌun it langit.”

Panulduꞌ pasar it pagtuman it mga urdin it Ampuꞌang Diyus

¹⁷ Maat siꞌ ni Jesus, “Iyan ega pikiren mi nga inasitu ku, ranggaꞌen ku i mga urdin it Ampuꞌang Diyus baw mga ipiyasugid ya it mga prupitaꞌ. Ega talaga iyan i enged ku, manranggaꞌ, in daꞌga isaꞌun matuman i muꞌsa.

¹⁸ Ka ituy matuud nga iꞌaat kut imyu. Talagang maꞌawaꞌ i langit baw banwa, takaꞌ talagang egay kaꞌawaꞌan it maski piyakadekeyeꞌ nga bagiꞌ it mga urdin it Ampuꞌang Diyus seked it ega matuman i muꞌsa.

¹⁹ Aypaꞌ in siyu-siyu nga ega pagsunudun ya i maski dekeyeꞌ lamang nga inaat it mga urdin ngaytu, baw gasiꞌ nga ipanulduꞌ ya it beken nga taw nga ega gasiꞌ sunudun nira, ipabetang kanya nga timawaꞌ duꞌun it kaꞌadiꞌan it Ampuꞌang Diyus. Temed iyan magsunud it mga urdin baw tulduꞌan ya gasiꞌ i beken it sumunud sira, ipabetang kanya nga matanug duꞌun.

²⁰ Matuud tu talaga i ipagꞌaat ku ngaytut imyu nga, in pagsunud mi it kaꞌirgan it Ampuꞌang Diyus subung na lamang it pagsunud it mga Pariseo baw mga manigpaꞌyag it urdin, talagang daꞌkamu kasled duꞌun it kaꞌadiꞌan it Ampuꞌang Diyus ngaytu.”

Panulduꞌ pasar it iseg

²¹ Maat siꞌ ni Jesus, “Nagnegan mi i ipiyagꞌurdin kat mga taw it tagnaꞌ nga, ‘Kuydaw ka it pangimatay, ka in siyu-siyu nga getasen yay ginawa it masigkataw ya, may turubagen ya duꞌun it ukuman.’

²² Temed kayti aku na i magꞌaat it imyu, maski desang miseg ka it maꞌiba mu, siguradu nga turubagen mu na duꞌun it Ukuman. Ka basta manregda-regda ka, mapakay nga ukumanan ka it manigsurugiden. Aaten muy iba mu, ‘Magpulpug ka!’ mapakay nga iduꞌun ka it apuy nga ega magpamu-pamugdaw, nga panriga it Ampuꞌang Diyus.

²³ Aypaꞌ maski duꞌun ka na it Templo nga magtataban it pagbuwaten nga ipagpasalamat mu duꞌun it Ampuꞌang Diyus, in mademdeman mu nga may pagraꞌe-raꞌetan it nakem it maꞌiba mu it imu,

²⁴ tananan mu daꞌan i taban mu ngayti. Paꞌaduꞌun ka daꞌan it kanya ka magꞌayusan kamu. In nagkagayen kamu na, bawnga paꞌuliꞌan muy taban mu ngayti nga pagbuwateng ipagpasalamat duꞌun it Ampuꞌang Diyus.

²⁵ Ta, in beteꞌ gasiꞌ may kudimanda it imu duꞌun it ukuman, mintras may timpu paꞌ pakiꞌayus ka nga lagi it kanya, parabir makapaꞌapyat yay dimanda ya ngayti. Ka in ega buwaten muy atkaytu, barang daꞌgen ka. Ta daꞌga iꞌintergaꞌ ka it manigꞌukuman duꞌun it mga guwardiya, ka iduꞌun ka it pirisuwan.

²⁶ Talagang matuud tuy iꞌaat ku ngaytut imu, nga egay kaliꞌwanan mu duꞌun seked it ega paꞌ napwas mu i muꞌsang ipiyagbetangan it imu nga ukuman.”

Panulduꞌ pasar it pamakun baw pagbelag it nagꞌasawa

²⁷ “Nagnegan mi tu gasiꞌ nga ipiyagꞌurdin it tagnaꞌ, nga magꞌaat, ‘Kuydaw kat pamakun duꞌun it ega asawa mu.’

²⁸ Temed kayti, aku na i magꞌaat it imyu, in siyu-siyuy panenyekan yat esang babay may antap it nakem ya, subung it napakunan ya na.

²⁹ Aypaꞌ in mata mu i pagpanggaringan it ipagkasalaꞌan mu, luwaten mu na lamang bawnga ibuntal. Ka magayen pay may magnis na nga bagit bilug mu, ega gat kumplitu pay bilug mu nga italpak duꞌun it apuy nga ega magpamu-pamugdaw, nga panriga it Ampuꞌang Diyus.

³⁰ Atkayan nagay alima mu, maski iwanan manggid, peꞌteken mu in magkapisiꞌan mu na lamang it kasalaꞌan, ka ibuntal. Ka magayen paꞌ talaga i may ginis nat bilug, ega gat kumplitu ngayan i italpak duꞌun it apuy nga egay kapugdawan ya, nga panriga it Ampuꞌang Diyus.

³¹ May panulduꞌ it tagnaꞌ nga magꞌaat, ‘In pablagan it lalaki i asawa ya, kaꞌilangan nga begayan ya it kasuratan nga katandaꞌ it nagbelag na sira.’

³² Temed kayti aku na i magꞌaat it imyu, nga nagkasalaꞌan i esang lalaki nga pablagan yay asawa ya nga ega naga nasalaꞌ it beken nga lalaki. Simpri nagkasalaꞌan kanya, ka ipiyakursud yay asawa ya ngaytu it mamakun in paꞌasawa siꞌ kanyat beken. Baw in siyu-siyuy mangasawa it babay ngaytu nga piyablagan, kanya gasiꞌ i nakapakun.”

Panulduꞌ pasar it pangibet

³³ “Nagnegan mi naga gasiꞌ i urdin ngaytit tagnaꞌ nga magꞌaat, ‘Iyan ega palipasen mu i siyumpaan mu nga sanggup mu, in daꞌga talagang tumanen mu i isiyanggup mu duꞌun it Ampuꞌang Diyus.’

³⁴ Temed kayti aku na i magꞌaat it imyu, nga ega na magsumpa kamu. Ega na aaten mu nga, ‘Sistigu ku i langit,’ ka langit ngaytu i bilang pagꞌadungan it Ampuꞌang Diyus kat pagkaꞌadiꞌ.

³⁵ U aaten mu nga ‘Sistigu ku i banwa,’ sabap bilang pagtutungtungan tu it aꞌay ya. Ega gasiꞌ aaten mu nga, ‘Sistigu ku i Jerusalem,’ sabap siyudad tu it mabantug nga Adiꞌ.

³⁶ Eeꞌ baꞌ, talagang ega na mapakay nga aaten mu, ‘Ibet na bang mapunggut i ulu ku,’ sabap maski sang naay nga buꞌuk it ulu mu, ega mabwat mu nga mapaputiꞌ u mapaꞌitem i tumubuꞌ.

³⁷ Yay magayen nga ampangen mi, in eeꞌ, eeꞌ. In ega, ega. Tamaꞌ naga yan basta kamatuudan, ka maraꞌe-raꞌet nay maski unu nga idungag mu nga pangibet, sabap si Satanas na i garing.”

Panulduꞌ nga yay magayen nga ibles ta it mga magpakuriꞌ, magayen nga adat

³⁸ “Nagnegan mi gasiꞌ i itu nga inaat it urdin, ‘Kaꞌilangan ukuman nga ipagsubung. In nakarindi kat matat iba mu, yanagay buwaten it imu. In nakapungaꞌ ka it nipen it beken, pungaꞌan ka nagay imu.’

³⁹ Temed kayti aku na i magꞌaat it imyu, nga kaꞌilangan egay kat nakem mi nga kubles in pakuriꞌan it beken. Pataꞌnan mu na lamang. In beteꞌ may tumampaling it imu kat iwanang ayun nga basingil mu, pataꞌnan mu na lamang nga tampalingen ya gasiꞌ i sang bali.

⁴⁰ Baw in may rimikramu it imu, ka kupasurung yay badyuꞌ mu, magayen isurung mu nay pati gulamen mu.

⁴¹ Ta, in regesen ka gasiꞌ, nga ipapirisiꞌen it esang sundaluꞌ i pirisiꞌen ya it sang kilumitru, magayen in ustuꞌun mu nay mga duwang kilumitru.

⁴² Talagang iyan i magayen, begayan mu i magꞌangut asat imu, baw ega daꞌgaen mu i magpanlebas gasiꞌ asan it imu.

⁴³ Daꞌga baꞌ nagnegan mi i sambatan it mga taw nga, ‘Rarasan mu i mga kaꞌibaan mu, temed isgan mu i kakuntraꞌ mu.’

⁴⁴ Temed kayti aku na i magꞌaat it imyu, rarasan mi i pati mga kakuntraꞌ mi, baw ipanalangin mi nga ildawan i mga magpanumpa it imyu.

⁴⁵ Ka basta atkayan i buwat mi, maꞌyag nga kamu, matuud nga mga anak it Amaꞌ mi nga duꞌun it langit. Sabap pagpalbaten yay aldaw isaꞌun eyagan i muꞌsang katataawan, maski mararaꞌe-raꞌet u magagayen i adat. Atnaga pagpaꞌuranen ya kat mga mataldeng baw daꞌga.

⁴⁶ Ka in iyan lamang, mga magraras it imyu i rarasan mi, unu paꞌ i tumbas nga pagꞌeꞌlaten mi? Ka daꞌga baꞌ pagbuwaten nay atkaytu it maski mga malulupig nga manigpabayad it barayadan duꞌut gubirnu?

⁴⁷ Baw in iyan lamang i pagpakiꞌiba-ibaan mi, mga magpakigayen-gayen it imyu, ta unuy nabwat mi nga subraꞌ paꞌ it beken? Ka pagbuwaten gasiꞌ tu it pati sira nga ega taawan it Ampuꞌang Diyus.

⁴⁸ Aypaꞌ kaꞌilangan pasbung kamu it Amaꞌ mi nga duꞌun it langit, nga kagayen it buwat ya, egay kakurangan.”