Mateo 3 - Tagbanwa

Magpangadal baw magpamawtis si Juan

¹ Kat iti nga timpu, si Juan nga uꞌna-uꞌnang namawtis, nagpapuꞌun na kanyat mangadal, duꞌun it rugar nga kapupuyangtan nga duꞌut Judea.

² Ipagsugid yat mga taw, nga magꞌaat, “Singuliꞌan baw indiꞌan mi na i mga kasalaꞌan mi, sabap adeꞌdeng nay kaꞌadiꞌan it Ampuꞌang Diyus.”

³ Si Juan na ngaytu i pagpaꞌiguꞌan it isiyugid it prupitaꞌ nga si Isaias, nga magꞌaat, “May magpanggaꞌmaran duꞌun it rugar nga kapupuyangtan, nga magꞌaat i pagꞌaaten, ‘Buwatan mit dalan i Ampuꞌan. Diritsuun baw gayen-gayenen mi i panawan ya ngaytu.’”

⁴ Inabel nga bulbul it ramu-ramu nga kamelyo i pakayan ni Juan ngayti, baw sambut ya binwat nga kulit it bakaꞌ. Payaꞌtung nga apan baw deges it putyukan i pangaꞌen ya.

⁵ Mamagpuꞌsa-puꞌsa it paꞌaduꞌut kanya i taga Jerusalem baw mga taw duꞌut beken nga mga lansangan nga sakep gasit Judea, pati kat padipag-dipag it Jordan.

⁶ Pamagsinguliꞌan nira i mga kasalaꞌan nira baw magpabawtis na sirat ki Juan duꞌut danum it Jordan ngayti, nga magpamatuud it indiꞌan na niray kasalaꞌan.

⁷ Temed ta, namuyaan ni Juan nga dakel i mga Pariseo baw mga Saduceo nga magpaꞌaduꞌut kanya ka magpabawtis gasiꞌ. Maat yat kanira, “Unuka situ kamu nga mga mapiyandayaꞌ nga subung it adat it dukul? Siyuy miyaat nga mapalagyuwan mi i panriga nga magꞌaꞌabut?

⁸ Kaꞌilangan nga ipamatuud mi kat pangaꞌgenan mi nga magsinguliꞌ kamu na nga matuud.

⁹ Ega kesgat nakem mi nga maat mi mga tungtung-inapuꞌ kamu naga ni Abraham, aypaꞌ ka sagyaan kamu nagay imyu it Ampuꞌang Diyus. Ka isugid kut imyu nga talagang kaya it Ampuꞌang Diyus nga, garing kat mga batu ngaytung ituꞌun, mapabaraꞌ ya nga mga tungtung-inapuꞌ ni Abraham.

¹⁰ Ka kayti, magbebreꞌ na i kapa duꞌun it gamut it magpupꞌun nga kayu, ka kada kayu nga ega magbuwaꞌ it magayen, pukanen bawnga idaꞌpug duꞌut apuy. Ta, magꞌadeꞌdeng na nga atkayan i panriga it imyu.

¹¹ Pagbawtisen ku kamu situt danum, bilang tandaꞌanan lamang it pagsinguliꞌ baw pangindiꞌ mit mga kasalaꞌan mi. Temed yay matuud, iyan mabut nga magsusunud it aken, kanya nga ibawtis it imyu, Espiritu Santo baw apuy. Talagang landaw paꞌ kanya it aken. Maski mawaꞌ it talumpaꞌ ya, ega mapakay nga mabwat ku, ka subrang banar i kataꞌasan ya.

¹² Kanya ngaytu i mukuman it mga taw. Ka subung it pagseskelen ya i aꞌawꞌaw ya, nga iꞌawꞌaw ya it kuꞌut. Bulunun ya i legas ka idawaꞌ duꞌut lagkaw. Temed iyan kuꞌut ngaytu, idaꞌpug duꞌun it apuy nga ega magpugda-pugdaw seked it kaꞌnu-kaꞌnu.”

Nagpabawtis si Jesus

¹³ Ega naꞌlay miyabut na gasiꞌ si Jesus duꞌut Jordan ngayti. Giyaringan ya, duꞌun naga it Galilea. Naꞌaduꞌun kanyat ki Juan ka pabawtis gasiꞌ.

¹⁴ Siyabar kanya ni Juan nga magꞌaat, “Tabing galang it imu, unuka baliswaꞌ, nga akuy mawtis it imu, it aku talagay kaꞌilangan nga bawtisen mu?”

¹⁵ Temed katubag si Jesus, “Pataꞌnan mu lamang i magꞌabut ngaytu kayti. Sabap itu naga i mapakay nga buwaten ta, ka dapat ta nga buwaten i muꞌsang kataldengan nga ipagpabwat it Ampuꞌang Diyus.” Yapay pamayaꞌ ni Juan ngayti.

¹⁶ Iyan nabawtis na si Jesus, nga magpatingdal na, sakaling miyabri i langit. Naltegan ya i Espiritu Santo it Ampuꞌang Diyus nga magpapasalu duꞌun it kanya, nga subung it kalapatiꞌ i pamabilug.

¹⁷ Dengan it may ampang nga duꞌut langit i garing, nga magꞌaat, “Itu i pagmaꞌa-maꞌalen ku nga Anak nga talagang kasasagyaan ku.”