Mateo 28 - Tagbanwa

Nagꞌegen it paꞌuliꞌ si Jesus

¹ Iyan nagtaꞌlib nay Aldaw it Kapaꞌnaan, pagkade-kadedelman it aldaw it Linggo, naꞌaduꞌun ka namaꞌnaw it lebeng ni Jesus si Maria Magdalena, iba ya ipiyagkaMaria ya naga.

² Sakaling yimnegyeg i lugtaꞌ it yanay keseg, ka limnampud garing duꞌun it langit i esang anghil it Ampuꞌang Diyus. Ipiyabaliling yay batu ngayting ilimpen it lebeng bawnga miyadung duꞌun it sagpaw.

³ Rupa ya magsilaw na nga subuk kilat. Pakayan ya maputiꞌ nga subung nat namukaꞌ na nga langeb.

⁴ Nanyegyeg it iꞌlam i mga piyatandaꞌ ngayti. Namagsuꞌsub sira nga kaꞌaat ka patay na, pagkalteg nirat anghil ngayti.

⁵ Temed kat mga babay ngayti maat ya, “Ayaw kamut iꞌlam, ka magkaꞌrutan ku nga si Jesus nga iriyansang duꞌun it krus i pagꞌengden mi.

⁶ Ega nay situ nga kanya, sabap inggen na kanya it paꞌuliꞌ, subung nat inaat ya ngayan it imyu. Daliꞌ kamu ga, letganan mi i piyadayagan it kanya.

⁷ Bawnga mapanaw kamu nga lagi, ka ituturan mi duꞌun it mga alagad ya nga inggen na kanyat paꞌuliꞌ, baw muꞌna nayan kanya duꞌun it Galilea. Makitaan mi yan kanya duꞌun. Ta, nasugid ku nat imyu.”

⁸ Pagkagneg na Maria ngayti, napanaw na sira. Nagragit iꞌlam baw sagya i kat nakem nira. Mamagpapalagyu sira nga naꞌaduꞌut mga alagad, nga manuturan it iti ngayti.

⁹ Temed sakaliꞌ nga siyusmu sira ni Jesus, baw kiyumusta sira. Inlep kanya it duwa ngayting kababayan. Nanluud sira ka siyakem i aꞌay ya baw siyamba nira kanya.

¹⁰ Maat ni Jesus it kanira, “Ayaw kamut iꞌlam. Mapanaw kamu na ka sugidan mi i mga alagad ku nga ipagpabetang ku na nga mga sulsug ku. Aaten mi nga paꞌaduꞌun sirat Galilea. Makitaan nira yan aku duꞌun.”

Panuturan it mga piyatandaꞌ ngayti

¹¹ Pagkagaring it mga babay ngayti, iyan beken nga mga sundaluꞌ nga piyatandaꞌ ngayti, naꞌaduꞌun it siyudad ka itiyuturan nira duꞌut mga pagbayaꞌen it mga sasirduti i muꞌsa ngayti nga nagꞌabut.

¹² Mga pagbayaꞌen ngaytit mga sasirduti baw mga mataꞌas nga ginuꞌu, nagtiringpeden sira ka nagꞌupa-upakaten. Liꞌwan ya, binggayan nirat dakulaꞌ nga pirak i mga sundaluꞌ ngayti.

¹³ Baw ipiyagꞌaat it kanira nga atkayti-atkayti i ipanugid-sugid nira. Aaten nira nga “Kat delem, iyan magꞌigaꞌ kami na, miyabut i mga alagad ya ka tiyakaw niray bilug ya ngayan.”

¹⁴ Baw inaat paꞌ sira, “Ayaw kamut iꞌlam, ka maski tu kaꞌbut duꞌut gibirnadur, kami nay baalaꞌ. Siguruun namen nga ega yan maꞌunu kamu.”

¹⁵ Tiyanggap it mga sundaluꞌ i pirak ngayti baw siyunud i ipiyagbenge-bengel ngaytit kanira. Seked kayti, itu naga i ipagpanugid-sugid it mga Judio.

Pagsekaten ni Jesus i mga alagad ya

¹⁶ Naꞌaduꞌun it Galilea i sang puluꞌ may esa mana ngayting mga alagad. Duꞌun i inabut nira it esang bukid nga ipiyagꞌaat ni Jesus.

¹⁷ Pagkalteg nirat ki Jesus, siyamba nira kanya. Temed iyan beken, magduwa-duwa i kat nakem nira.

¹⁸ Inlep sira ni Jesus baw maat yat kanira, “Ibinggay nat aken i kapuꞌsaan it pudir duꞌun it langit baw situt banwa.

¹⁹ Aypaꞌ buwaten mi, lekpen mi i muꞌsang mga bangsa, nga ipanulduꞌ mit kanira it eꞌres nga panulduꞌ i pasar it Magayeng Baritaꞌ isaꞌun masepsepan nirang banar baw kapasakep it aken it kamatuudan. Bawtisan mi i pasakep ngaytu, kat ngaran it Amaꞌ baw kat Anak baw kat Espiritu Santo.

²⁰ Baw itulduꞌ it kanira nga sunudun i muꞌsa nga ipiyagꞌurdin ku it imyu. Baw dedemdemen mi nga iba mi aku nga pirmi seked it umur nat banwa.”