Mateo 25 - Tagbanwa

Sang puluꞌ nga umbay paꞌ nga babay i piyaꞌalimbawaan ni Jesus

¹ Magꞌaat pay beken nga ipiyanulduꞌ ni Jesus, “Kaꞌalimbawaan it kaꞌadiꞌan it Ampuꞌang Diyus, subung it itu ngaytu. May sang puluꞌ nga umbay paꞌ nga mga babay. Kaꞌsang apu-apun, uyun it adat ta, napanaw sira ka sumusmu it lalaki nga papagsaduun na. Kada esat kanira, may taban nga titidawan.

² Iyan lima, mga engel-engel. Lima, mga mapipikir.

³ Iyan mga engel-engel ngayti, egay aliꞌ nira nga ibtang it kanira ngayti nga titidawan.

⁴ Temed iyan mga mapipikir ngayti, puyrat betang it titidawan nira, may aliꞌ paꞌ nirang ibtang in maꞌubus.

⁵ It naꞌatrasut abut i lalaki ngayti nga papagsaduun, kimnuꞌigaꞌ nay mga babay ngayti. Namagkaꞌigaꞌ na.

⁶ Iyan lubuk nat delem, may gimnaꞌuy na nga magꞌaat, ‘Magꞌaꞌabut nay lalaki nga papagsaduun! Susmuun mi na kanya!’

⁷ Namagbangun nga lagi i sang puluꞌ ngayting kababayan. Tiyuriyan niray mga titidawan nira ngayti.

⁸ Maat i mga engel-engel ngayti, ‘Bilaꞌ, begayan kami it maski dekeyeꞌ nga ibtang namen it amen ngayning titidawan. Ka ungayni baꞌ, magkedyep-kedyep mana, ka ega nay bebetang.’

⁹ ‘Bilaꞌ, ega bayni mabagiꞌ it imyu. In yan pasinsiya kamu. Magayen paꞌ siguru, mangalang kamu daꞌan duꞌun it magkaꞌalangan, isaꞌun may ibtang mi it imyu ngayang titidawan.’

¹⁰ Egay beken, napanaw i lima ngayting engel-engel. Pagkagaring nira, miyabut nay lalaki ngayti nga papagsaduun. Ta, yan lima ngayti nga alistu siray kanira, iba nat lalaki ngaytit siminled duꞌun it pagsaduwan ngayti. Pagkasled nira, ipiyagsiradu na i talaꞌep.

¹¹ Ega naꞌlay, miyabut nay namagpangalang ngayti. ‘Agalen, pasleden kami nagay amen,’ maat i pataꞌwag nira.

¹² Temed katubag i piyataꞌwagan ngayti, ‘Yay matuud, ega bayan kilala ku kamu nga kaꞌuyutan ku.’

¹³ Aypaꞌ ka magꞌaꞌalistu kamu nga pirmi,” maat i paꞌugdun ni Jesus, “ka ega magkaꞌrutan mi i aldaw u uras nga pamaꞌuliꞌ ku.”

Mga uripen nga siyanaꞌan it pirak i piyaꞌalimbawaan siꞌ

¹⁴ Maat siꞌ ni Jesus, “Kaꞌalimbawaan gasiꞌ it kaꞌadiꞌan it Ampuꞌang Diyus, subung it itu ngaytu. May esang taw nga magpana-panaw it alaid. Egay beken, tiyaꞌwagan ya i mga uripen ya ka isiyanaꞌ it kanira i muꞌsang kusas ya.

¹⁵ Tiyuduꞌan yat pirak i kada esa uyun kat kanya-kanyang kaya. Ibinggay yat sang kataawan, kantidad it limang ribu, kat sang kataawan duwang ribu, baw kat sang kataawan sang ribu. Bawnga napanaw na kanya.

¹⁶ Napanaw nga lagi i tiyuduꞌan ngaytit limang ribu ka ipiyagꞌangkat ya nat dagangan. Nakatubuꞌ kanya it limang ribu naga.

¹⁷ Atkayti nagay binwat it tiyuduꞌan ngaytit duwang ribu. Duwang ribu naga gasiꞌ i kanya nga natubuꞌ.

¹⁸ Temed iti, tiyuduꞌan ngaytit sang ribu, binwat ya, ilimbeng yay pirak ngaytit agalen ya.

¹⁹ Naꞌlay nga naꞌlay nga timpu i ipiyagꞌuliꞌ it agalen it mga uripen ngayti. Pagꞌabut ya, iningaiꞌ yay itiyuduꞌ ya ngayti.

²⁰ Uꞌnang nangintergaꞌ i tiyuduꞌan ngayti it limang ribu. Maat ya, ‘Agalen, waytu nagay limang ribu mu ngayan. Nadungagan tu it limang ribu gasiꞌ nga natubuꞌ ku, ka ipiyagꞌanu kut dagangan.’

²¹ ‘Magayen! Talagang magkasarigan ka nga uripen. Ta, it magkasarigan ka kat dekeyeꞌ nga kantidad, kayti papamaalaꞌen ku ikaw it dakulaꞌ nga kantidad. Mabagiꞌan ka it kasagyaan ku.’

²² Nangintergaꞌ gasiꞌ i tiyuduꞌan it duwang ribu. Maat ya, ‘Agalen, waytu nagay duwang ribu ngayan nga itiyuduꞌ mu. Nadungagan gasiꞌ tu it duwang ribu naga, nga natubuꞌ ku.’

²³ Maat it agalen ya ngayti, ‘Magayen gasiꞌ! Magkasarigan ka gasiꞌ palan. Ta it magkasarigan ka kat dekeyeꞌ ngayan nga kantidad, aypaꞌ ka papamaalaꞌen ku ikaw it dakulaꞌ nga kantidad. Mabagiꞌan ka paꞌ it kasagyaan ku.’

²⁴ Nangintergaꞌ gasiꞌ i tiyuduꞌan ngayti it sang ribu. Maat ya, ‘Agalen, magkaꞌrutan ku nga maꞌigpit ka. Magkayeg ka it ega ikaw i nagpakariga. Magpisiꞌ ka it tubuꞌ it ega ikaw i nagpaꞌres.

²⁵ Ta, it magꞌiꞌlam akut dumalaꞌ ka in magnisan i baiꞌen mu ngaytu situt aken, aypaꞌ ka ilimbeng ku na lamang i pirak mu ngaytu. Waytu nagay sang ribu mu ngaytu.’

²⁶ ‘Maraꞌe-raꞌet talagay adat mu baw garusan ka nga uripen!’ maat it agalen ya ngayti. ‘Magkaꞌrutan mu na palan nga magkayeg akut ega akuy nagpakariga, baw magpisiꞌ akut tubuꞌ it ega aku i nagpaꞌres.

²⁷ Ta, unuka ega iꞌinlug mu duꞌun it mga manigpaꞌutang? In iꞌinlug mu paꞌ, daꞌga kayti may napisiꞌ ku na nga tubuꞌ ya?’

²⁸ Bawnga maat it agalen ngayti it mga uripen yang beken, ‘Sigi, pisiꞌen mi i sang ribu ngayan asat kanya, ka idungag duꞌun it nakasang puluꞌ ngayting ribu.

²⁹ Sabap iyan magkasarigan baw mapiyaꞌres, tumbasan kanyat dungagan i kaya yat kanya. Temed iyan ega magkasarigan baw garusan, maꞌilang talaga i maski yan sang dekeyeꞌ nga kaya yang lagi.

³⁰ Iyan ega ngayay kapulusan nga uripen, ibuntal mi nayan duꞌun it ega basta-bastang kadleman nga duꞌut liꞌwan. Gumarwak yan kanya duꞌun baw gemeget i pati nipen ya.’”

Panulduꞌ pasar it aldaw it pangukuman

³¹ Ipiyasigi ni Jesus, nga maat ya, “In mabut aku nga Taga Langit nga Ipiyanganak it Taw, nga maꞌyag nay kabantugan ku baw kaꞌibaan kuy muꞌsang mga anghil, madung aku na duꞌun it ega basta-bastang araꞌdungan it adiꞌ.

³² Bawnga matingped kat adapan ku i muꞌsang taw, ka pinpinen ku yan sira subung it pagbuwaten it manigꞌeper it mga tupa baw kambing.

³³ Iduꞌun kut ayun it iwanan ku i paꞌaaten nga mga tupa, kat gibang kung ayun i paꞌaaten nga mga kambing.

³⁴ Bawnga aku nga Adiꞌ nira, aaten ku yan i kat iwanan ku nga ayun, maat ku yan, ‘Daliꞌ kamu na, mga inildawan it Amaꞌ ku. Semled kamu na ka duꞌun nay taꞌidan mi it kaꞌadiꞌan ku nga ipiyagꞌareg it imyu garing it pagguna it banwa.

³⁵ Sabap iyan ginteman aku, piyakaꞌen mi aku, kimnuꞌinum, piyaꞌinum mi, dumadayuꞌ aku, inistimar mi akut magayen.

³⁶ Ta, yan ega nay pakayan ku, piyapakayan mi aku. Pagbaꞌnawun mi aku nga magsarut. Pagkapirisu ku, inaduꞌun mi aku.’

³⁷ Maat yan i tubag it mga taw ngayan nga mataldeng kat panleteg it Ampuꞌang Diyus, ‘Ampuꞌan, kaꞌnu bayan naꞌanuꞌan namen ikaw nga paggetmanan nga napakaꞌen namen ikaw, u kimnuꞌinum nga napaꞌinum namen?

³⁸ Kaꞌnu yan nga subung ka it dayuꞌan nga inistimar namen ikaw, u lebas ka na nga piyapakayan namen ikaw?

³⁹ Baw kaꞌnu gasiꞌ namuyaan namen nga simnarut ka u pagpipirisuun ka nga biyaꞌnaw namen ikaw?’

⁴⁰ Bawnga aaten ku yan nga Adiꞌ nira, ‘Matuud talagay iꞌaat kut imyu. Iyan binwat mi i mga itu ngaytu kat maski piyakatimawaꞌ nga bilang mga sulsug ku, simpri aku na i binwatan mi.’

⁴¹ Bawnga aaten ku siꞌ i kat gibang ku ngaytung ayun, ‘Imyu, paꞌalaid kamu situt aken, mga pagꞌaꞌargan it panriga. Duꞌun kamu na it apuy nga ega magpugda-pugdaw, nga panriga nga ipiyagꞌareg it ki Satanas baw mga taraꞌgen ya.

⁴² Sabap iyan ginteman aku, ega piyakaꞌen mi aku. Daꞌku piyaꞌinum mi it kimnuꞌinum aku.

⁴³ Iyan dayuꞌan aku, ega inistimar mi aku. Iyan lebas aku na nga egay pakayan, ega piyapakayan mi aku. Simnarut aku baw duꞌun it pirisuwan, daꞌku biyaꞌnaw mi.’

⁴⁴ Ta, egay beken, tumubag gasiꞌ yan sira, ‘Subuk ega nagay namuyaan namen nga paggetmanan ka, kimnuꞌinum, miyabut ka nga subuk dayuꞌan, lebas na nga egay pakayan, simnarut u duꞌun it pirisuwan nga ega napagsirbiyan namen ikaw.’

⁴⁵ Tubagen ku yan sira, ‘Matuud talagay iꞌaat ku ngaytut imyu. Iyan ipiyagꞌimet mi i panabang mi it mga piyakatimawaꞌ nga bilang mga sulsug ku, aku yan i inimtanan mi.’

⁴⁶ Ta, egay beken, idedeg na sira duꞌun it panriga nga egay katupusan. Temed iyan mga mataldeng ngaytu kat panleteg it Ampuꞌang Diyus, tumanggap sirat kaꞌgenan nga egay kaskedan.”