Mateo 24 - Tagbanwa

Mga isiyugid ni Jesus pasar it panranggaꞌ it Jerusalem baw pasar it umur it banwa

¹ Nanliꞌwan na si Jesus duꞌun it Templo. Iyan magpapanaw na kanya, nagpatpad i mga alagad ya baw itiyulduꞌ it kanya i kagayen it mga kabalayan it Templo ngayti.

² Temed maat ya, “Iyan pagletganan mi ngayan nga mga kabalayan ya, maranggaꞌ yan nga muꞌsa. Dedemdemen mi tu, mabut i aldaw nga egay maꞌped nga batu kat pagruruknuꞌan ya nga batu. Ipapuꞌran yan nga muꞌsa.”

³ Bawnga iyan duꞌun na Jesus it Mungsuꞌ it Olibo, nga magꞌaꞌdung na kanya, tiyeꞌe-teꞌeng it mingkut it mga alagad ya. Maat nira, “Kaꞌnu bayan magꞌabut i paꞌaaten mu ngayan nga maranggaꞌ i Templo ngayti? Unuy mga tandaꞌanan nga magdadarapaꞌ nay pamaꞌuliꞌ mu situ baw umur it banwa?”

⁴ Katubag si Jesus, maat ya, “Magꞌintur kamu nga ega mateꞌag-teꞌag kamu it maski siyu.

⁵ Sabap dakel yan nga mabut nga mangambuꞌ it ngaran ku, nga maat yan, ‘Aku na ngaytu baytu i Cristo ngayan nga siyarigan it Ampuꞌang Diyus.’ Talagang dakel yan i mateꞌag-teꞌag nira.

⁶ Makabaritaꞌ kamu yan it mga kaguluwan baw gira-giraen. Takaꞌ ega palibegan it pikiran mi, sabap talagang magꞌabut i mga itu ngaytu temed ega payan umur it banwa.

⁷ Sabap magira-giraen yan i mga bangsa, mga kaꞌadiꞌan kuntraꞌ it beken nga kaꞌadiꞌan. Gemtem it masaki-sakit na nga mga getem baw yemegyeg i lugtaꞌ kat paꞌari-aring rugar.

⁸ Takaꞌ muꞌsa ngaytu, papuꞌun lamang tu it kakuriꞌan.

⁹ Talagang isgan kamu it kadakel sabap it pamayaꞌ mit aken. Idimanda kamu isaꞌun mapakuriꞌan baw maꞌimatay.

¹⁰ Kat timpu ngayan, dakel nayan nga mangindiꞌ it pamayaꞌ nirat aken baw mamagkuntra-kuntraꞌen na. Ilangen nat esa may esa i masigkataw ya.

¹¹ Dakel nayan i manluꞌsut nga magpapru-prupitaꞌ. Dakel nayan i teꞌag-teꞌagen nira nga pamayaꞌ it mga taw.

¹² Lemkep talaga it banwa i karaꞌe-raꞌetan. Aypaꞌ baraꞌan ya, dakel na i demekeyeꞌ nga pagmaꞌal nirat aken.

¹³ Temed iyan maneꞌteꞌ i pagsarig baw pamayaꞌ yat aken seked it maꞌbut nay umur, siguradu yan nga maribri.

¹⁴ Baw ilkep nga ipangadal kat sinirungat langit i Magayen ngaytung Baritaꞌ pasar it kaꞌadiꞌan it Ampuꞌang Diyus, isaꞌun matantuwan it muꞌsang bangsa. Bawnga iyan paꞌ i umur nat banwa.

¹⁵ Maltegan mi yan duꞌun it ega basta-bastang rugar i talagang maraꞌway kat panleteg it Ampuꞌang Diyus nga pagtibabaꞌ it kanya, nga pagpaꞌiguꞌan it isiyugid it prupitaꞌ nga si Daniel. Sepsepen tu it magbasa kaytu!

¹⁶ Basta maltegan mi tu, iyan mga taga Judea, kaꞌilangan nga malagyu duꞌun it kabubukidan.

¹⁷ Iyan duꞌun it mapatag nga atep it balay ya, ega na pasasaw nga semled paꞌ duꞌun it balay ka mamisiꞌ it mga betang, in daꞌga pagkalampud, dayun na nga malagyu.

¹⁸ Baw iyan duꞌun it uma, ega na muliꞌ nga mamisiꞌ paꞌ it gulamen ya.

¹⁹ Kaꞌildaw-ildaw talaga i iyan magbebteng baw may paduduꞌun it iyan nga mga aldaw.

²⁰ Kaꞌilangan nga ipanalangin mi nga ipalagyu mi ngaytu, ega katakaꞌ it timpu nga panagramig u Aldaw it Kapaꞌnaan.

²¹ Sabap dakulaꞌ talaga nga kakuriꞌan i malabayan it katataawan. Eeꞌ baꞌ, mabut i timpu nga lumabay talagay mga taw it ega basta-basta nga kakuriꞌan nga ega paꞌ nalabayan garing it pagguna it banwa seked kayti ngaytu, baw ega na gasiꞌ tu malabayan paꞌ it seked it kaꞌnu-kaꞌnu.

²² Baw in kumaꞌlay i iyan nga timpu, mapuuꞌ talagay muꞌsang taw. Temed sabap it mga piniliꞌ it Ampuꞌang Diyus, ega yan pakaꞌlayen ya.

²³ Aypaꞌ, in beteꞌ may maat it imyu, ‘Situ na bayan i Cristo!’ u ‘Duꞌun na bayti kanya!’ ayaw kamu it pamayaꞌ.

²⁴ Sabap dakel talaga yan i mangambuꞌ it Cristo na kanya, baw may manluꞌsut payan nga magpapru-prupitaꞌ. Palteg sira it mga tandaꞌanan baw muwat sira it mga kalililuꞌan nga mga bagay, isaꞌun nga in mapakay lamang, mateꞌag-teꞌag niray pati mga piniliꞌ it Ampuꞌang Diyus.

²⁵ Dedemdemen mi tu. Ipagsugid ku naytung lagi it imyu i mga itu ngaytu isaꞌun daꞌkamu naga mateꞌag-teꞌag.

²⁶ Aypaꞌ in aaten nirat imyu, ‘Duꞌun na bayan i Cristo it rugar nga kapupuyangtan,’ ega maat miyanu-anu kamu maduꞌun. In aaten nira nga ‘Duꞌun bayan kanya it seled it balay,’ ayaw kamu it pamayaꞌ.

²⁷ Sabap in magꞌuꞌunu maꞌyagan i langit garing it lebatan seked duꞌun it sedpan basta magkilat, atkayan naga yan i pamaꞌuliꞌ ku situ, aku nga Taga Langit nga Ipiyanganak it Taw. Talagang mamuyaan tu it muꞌsang katataawan.

²⁸ Maat i sambatan, in ariyen i miyatay, duꞌun naga yan magtingped-tingped i mga tarwangin.

²⁹ Pagkatupus it iyan nga kakuriꞌan, demlem nay aldaw baw ega na gasiꞌ meyag i bulan. Masari nat kaꞌulug i mga bituꞌun duꞌun it langit, sabap payegyegen i muꞌsang langit it keseg it guna it Ampuꞌang Diyus.

³⁰ Bawnga maltegan duꞌut langit i tandaꞌanan nga pangabut ku na nga Taga Langit nga Ipiyanganak it Taw. Sumgaw nay muꞌsang mga bangsa ka magꞌadeꞌdeng nay pangukuman. Ka maltegan nira aku, nga Taga Langit nga Ipiyanganak it Taw, nga magpangindelangan it kunum, nga maꞌyag i ega basta-bastang guna ku baw kadakulaꞌ it kabantugan ku.

³¹ Basta piyatingeg nat dadakulaꞌ i taburi, taꞌgen ku nay mga anghil ku nga lekpen niray banwa ngaytu, ka tingpeden nira nay mga piniliꞌ nga taawan ku nga gumaring kat paꞌari-aring rugar.

³² Kaꞌilangan sepsepen mi baw pangadalan mi i kayu nga igos, nga basta magpamulus baw magpandaꞌun siꞌ, magkaꞌrutan mi nga adeꞌdeng nay panginit nga timpu.

³³ Atkayan naga yan, basta mamuyaan mi nga magꞌabut na i mga bagay ngaytu, magkaꞌrutan mi na nga adeꞌdeng nay timpu nga pamaꞌuliꞌ ku, magpapuꞌun nayan.

³⁴ Kamatuudan talagaytu, nga ega mapuuꞌ i itung bangsat taw seked it ega paꞌ natuman i muꞌsa ngaytu.

³⁵ Mabut i timpu nga maꞌawaꞌ i langit baw banwa, temed talagang egay kaꞌawaꞌan it mga ampang ku, matuman nga muꞌsa.

³⁶ Temed egaytu i magkaꞌrut it aldaw u uras nga iꞌabut kaytu, maski mga anghil duꞌun it langit u maski aku nga Anak it Ampuꞌang Diyus. Iyan Amaꞌ lamang, kanya i magkaꞌrut kaytu.

³⁷ In magꞌuꞌunu ega kat ulu it mga taw kat timpu ni Noe i panriga nga mabut it kanira, atkayan naga kat pamaꞌuliꞌ situ it aku nga Taga Langit nga Ipiyanganak it Taw.

³⁸ Sabap iyan ega paꞌ miyabut i lenep nga ikiyatunaw it banwa, ega pagdedemdemen it mga taw i mabetangan nira. In daꞌga mamagkaraꞌnen-karaꞌnen, mamagꞌinum-inum baw mamagꞌasa-asawaen i katataawan seked it nagpasakay na si Noe duꞌun it binwat ya nga sakayan.

³⁹ Aypaꞌ pagꞌabut it lenep ngayti, egay tiya-tiyakap it katataawan. Ta unupat biyaraꞌan, namagkalmes sira nga muꞌsa ka isiyari nat belbeg. Atkayan naga yan i magꞌabut in pangabut na ngayan it Taga Langit nga Ipiyanganak it Taw.

⁴⁰ Kat timpu ngayan nga iyanꞌen, mapinpin nay mga taw. Barang may duwang kataawan nga magbuwat duꞌun it uma, temed in ega nagsubung sira nga taawan ku, matuduꞌ i esa, esa lamang i pisiꞌen.

⁴¹ May duwang kababayan nga nagsaꞌud i maglebek, temed in ega nagsubung sira nga taawan ku, matuduꞌ i esa, esa lamang i pisiꞌen.

⁴² Aypaꞌ ka magrigen-rigen kamu nga pirmi, sabap ega magkaꞌru-kaꞌrutan mi in kaꞌnung aldaw paꞌasitu i Ampuꞌan mi.

⁴³ Dedemdemen mi tu. In beteꞌ magkaꞌrutan lamang it tagbalay in unung uras it delem mabut i mananakaw, simpri sipiꞌan ya. Ega yan pataꞌnan ya na lamang nga masled i balay ya.

⁴⁴ Aypaꞌ magꞌaꞌalistu kamu nga pirmi, sabap mabut aku nga Taga Langit nga Ipiyanganak it Taw kat uras nga ega pagsisiguruun mi.”

Mga manigsirbi it Ampuꞌang Diyus, kaꞌilangan nga pirming pagsarungaen nirat magayen i katengdanan nira

⁴⁵ “Iyan magkasarigan baw nakman nga uripen, kanya i pagbebgayan it agalen ya it pamaalaꞌ kat beken nga mga uripen kat pamalay-balay ya. Kanya i manigpamgay it pangaꞌen nga makasuwituꞌ.

⁴⁶ Makasagya talaga i iyan nga uripen in abutan it agalen ya, atkayan nga matuud i buwat ya.

⁴⁷ Matuud tuy iꞌaat ku ngaytut imyu. Kanya siꞌ i begayan it agalen ya nga mamaalaꞌ it muꞌsang kusas it agalen ya ngayti.

⁴⁸ Temed in beteꞌ maraꞌe-raꞌet i adat it uripen ngayti, yay kat nakem ya, ‘Siguru maꞌlay baytuy iꞌuliꞌ it agalen ku ngaytu.’

⁴⁹ Ta, sariyan ya nat pasakit i mga ipiyagkaꞌuripen ya. Sumari nat palaꞌuk it in unu-unu nga pagkaraꞌnen, pakiꞌinum na duꞌun it mga baraꞌinum.

⁵⁰ Mabut i agalen ya kat aldaw nga ega pagsisiguruun ya baw kat uras nga ega magkaꞌrutan ya.

⁵¹ Baraꞌan ya, rigaen kanya it ega pateng it agalen ya ngayti. Ipaꞌiba na kanya it mga taw nga ‘magbete-beteꞌ nga magpamaya’ it Ampuꞌang Diyus, duꞌun it kakuriꞌan nga egay kaskedan. Baraꞌan ya duꞌun, gumarwak baw gemeget nay nipen ya.”