Mateo 22 - Tagbanwa

Piyaꞌalimbawaan siꞌ ni Jesus, pagkaraꞌnen nga pagsadu

¹ Saꞌup siꞌ nga miyampang si Jesus it inalimbawa ya naga. Maat ya,

² “Iyan kaꞌadiꞌan it Ampuꞌang Diyus, subung it itu ngaytu. Dakulang pagkaraꞌnen i binwat it esang adiꞌ, pagsadu it anak ya nga lalaki.

³ Iyan simpan na, singkat ya nay mga uripen ya nga pamaꞌrutan nay kumpur inimbitar, temed daꞌsira kuparagiꞌ.

⁴ Tiyaꞌeg ya siꞌ i beken nga mga uripen ya, baw tinggunan ya nga magꞌaat, ‘Sugidan mi i mga inimbitar ngayan nga nasimpan nay pagkaraꞌnen. Naꞌimatay ku na i mga bakaꞌ ku nga piyatabaꞌan ku. Talagang simpan nay muꞌsa. Aypaꞌ ka pagpisiꞌen kamu na.’

⁵ Temed belag gay daeng-daeng it mga inimbitar ngayti. Daꞌsira nagpasasaw it kanya-kanyang kupanawun. Sang kataawan naꞌaduꞌut uma. Iyan sang kataawan, simnarunga it pagdagang ya.

⁶ Iyan beken, riyusuban niray mga uripen ngayti, tinibabaꞌ bawnga inimatay.

⁷ Pagkaꞌrut it adiꞌ ngayti, ereꞌeret talagay iseg ya. Piyapaꞌaduꞌun yay mga sundaluꞌ ya, ipiyapuuꞌ i mga mangingimatay ngaytit masigkataw, baw piyasuriban paꞌ i siyudad nira.

⁸ Baw maat ya siꞌ it beken nga mga uripen ya, ‘Talagang simpan naytu i pagkaraꞌnen ngaytu, takaꞌ mga inimbitar ngayan, ega bagay it kanira i paragiꞌen. Daꞌsira na mapakay.

⁹ Aypaꞌ paꞌaduꞌun kamu it mga dalan nga mataawun. Kumpur makitaan mi, pangimbitaren mi sira it pagkaraꞌnen ngaytu.’

¹⁰ Napanaw nay mga uripen ngayti. Naꞌaduꞌun na sira it mataawun nga dalan. Piyabayaꞌ niray kumpur magkakitaan nira, nakman baw mga buwal. Unu paꞌ it magꞌitek-itek it kadakel it taw i pagkaraꞌnen ngayti.

¹¹ Siminled i adiꞌ ngayti duꞌun ka pakikita it mga naꞌimbitar ngayti. May naltegan ya duꞌun nga sang kataawan nga ega magpapakay it pakayan nga ipiyamgay yat kanira, nga bagay it pagkaraꞌnen ngayting pagsadu.

¹² Maat i adiꞌ ngayti, ‘Bilaꞌ, unuka siminled kay imu situ it daꞌka magpapakay it pakayan nga bagay it pagkaraꞌnen nga pagsadu?’ Daꞌga nakariꞌe-riꞌeng i taw ngayti.

¹³ Aypaꞌ ka maat it adiꞌ ngayti it mga manigsirbi ya, ‘Bayukun mi i alima baw aꞌay ya baw ibuntal mi duꞌun it ega basta-bastang kadleman nga duꞌun it liꞌwan. Gumarwak kanya duꞌun baw gemeget i nipen ya.’”

¹⁴ Paꞌugdun paꞌ ni Jesus, maat ya, “Dakel talaga i pagtaꞌwagen it Ampuꞌang Diyus, temed ega dakel i napiliꞌ ya.”

Ingkut pasar it barayadan duꞌun it Impiradur nga Romano

¹⁵ Namagliꞌid nay mga Pariseo nga mamagpagneg duꞌun, ka rundingen nira in magꞌuꞌunu nira masigapul si Jesus kat mga pagꞌampangen ya.

¹⁶ Binwat nira, may piyapaꞌaduꞌun nira nga mga manigsunud nira, sang siraan it beken nga kakampiꞌ ni Herodes. Pagꞌabut, maat nira, “Manigtulduꞌ, magkaꞌrutan namen nga purus matuud i imu, baw kamatuudan talagay ipagpanulduꞌ mu nga kaꞌirgan it Ampuꞌang Diyus. Kamatuudan, mataꞌas u raꞌyat nga taw, surubung i panulduꞌ mu.

¹⁷ Ta, unu beteꞌ i imu nga kat nakem? Unu, uyun duꞌun it ipiyagꞌurdin ni Moises nga mayad it barayadan nga ipagpabayad it Romano ngayting Impiradur nga magsasakep it aten? Unu yan, mapakay u ega?”

¹⁸ Temed pagꞌuꞌrutan ni Jesus i maraꞌe-raꞌet nga antap it nakem nira. Aypaꞌ ka maat ya, “Matuud nga magbete-beteꞌ kamu nga magpamayaꞌ it Ampuꞌang Diyus. Unuka pagtinggelen mi i liꞌeg ku?

¹⁹ Isini mit aken i pirak ngayan.” Ta, piyakawaꞌan kanya it pirak nga Romano ka yanay paggamiten it mga Judio.

²⁰ Pagkakawaꞌ ya, maat ya, “Ta, kasiyuytu nga rikratu baw ngaran i situt pirak ngaytu?”

²¹ “Ta, kat Impiradur,” maat i tubag nira. “Ta, in atkayan,” maat ni Jesus, “kaꞌilangan nga in unuy bagay duꞌun it Impiradur, simpri ibgay mi. Atkayan naga i duꞌun it Ampuꞌang Diyus.”

²² Pagkagneg it mga tiyaꞌeg ngayti, daꞌsira namagkariꞌe-riꞌeng ka naliluꞌ sira. Aypaꞌ ka namagꞌuliꞌ na sira.

Ingkut pasar it pagꞌegen siꞌ it mga miyatay

²³ Iti naga nga aldaw, may naꞌaduꞌun gasiꞌ it ki Jesus nga mga Saduceo, ka iningkut nira si Jesus. Mga Saduceo ngaytu, pagpanindegan nira nga ega talaga egnen i mga miyatay na nga taw.

²⁴ Pagꞌabut, maat nira, “Manigtulduꞌ, ipiyanulduꞌ ni Moises nga in matay i esang lalaki nga magꞌaꞌasawa na nga ega pay anak nira magꞌasawa, subliyen it sulsug ya it masawa. Ka in manganak sira, ipabetang nga bilang anak naga it natay ngayti.

²⁵ Ta, paꞌaaten namen ka katꞌesa, may pitung nagsulsu-sulsugun nga mga lalaking bulun situt amen. Ta, nangasawa nay panganay. Natay kanya nga egay aꞌanak. Aypaꞌ ka siyubli it sunud ya i asawa ya ngayti.

²⁶ Temed atkayti nagay simnubli ngayti. Atkayan naga it ikatlu seked it napuꞌsa nay pitu ngayti.

²⁷ Pagpuꞌsat patay it pitu ngayti, natay na gasiꞌ i babay ngayti.

²⁸ Ta kayti, siyu yan duꞌun it pitu ngayti i asawa ya in egnen na ngayan i mga miyatay, it nakaꞌasawa na ngayting muꞌsat kanya?”

²⁹ Katubag si Jesus, “Talagang kamaliꞌ i pasepsep mi, paribasay ega magkaꞌrutan mi i isiyurat nga ampang it Ampuꞌang Diyus, baw keseg it guna ya.

³⁰ Sabap pagꞌegen it paꞌuliꞌ, iyan mga taw, ega na magꞌasa-asawaen. Subung na sira it mga anghil duꞌun it langit.

³¹ Ta, sabap gasiꞌ it pagꞌegen ngaytu it paꞌuliꞌ it mga miyatay, unu, ega paꞌ nabasa mi duꞌun it isiyurat nga ampang it Ampuꞌang Diyus i inaat yat imyu? Daꞌga baꞌ maat ya, maski naꞌlay na nga miyatay si Abraham, si Isaac baw si Jacob,

³² ‘Aku i Ampuꞌang Diyus ni Abraham, ni Isaac baw ni Jacob.’ Simpri ega Ampuꞌang Diyus kanya it taw nga patay, in daꞌga egen. Sikayan maꞌyag nga egen siꞌ na Abraham ngayti, maski miyatay na sira.”

³³ Naliluꞌ i mga taw, pagkagneg nirat iti nga ipiyanulduꞌ ni Jesus.

Ingkut nga in ari manggid i piyakamataꞌas nga urdin

³⁴ Ta it atkayti, natingped-tingped duꞌun i mga Pariseo, pagkabaritaꞌ nirat nabwat ni Jesus nga subuk piyamagtiꞌpekan i mga Saduceo.

³⁵ Sang kataawan it kanira, inadalan yat pagayen-gayen i pasar it mga urdin ni Moises. Iti i miningkut it ki Jesus, nga sukda-sukdan it kanya, nga magꞌaat,

³⁶ “Manigtulduꞌ, ari manggid nga urdin i piyakamataꞌas it muꞌsa ngayan nga urdin?”

³⁷ Katubag si Jesus, maat ya, “Iyan magꞌaat nga, ‘Kaꞌilangan maꞌalen mu i Ampuꞌang Diyus mu it ega desang awam, in daꞌga talagang kat nakem baw kat pikir mu nga tingled.’

³⁸ Ituytu i piyakamataꞌas nga urdin.

³⁹ Ikadwa ya, ‘Rarasan mu i masigkataw mu it subung nagat raras mu it sadili mu nga bilug.’

⁴⁰ Ta, duwa ngaytung ituꞌun nga urdin, itu nay pagꞌuliꞌan it muꞌsa ngayan nga urdin nga isiyurat ni Moises baw mga ipiyanulduꞌ it mga prupitaꞌ.”

Ingkut pasar it Cristo, in unu, tungtung-inapuꞌ lamang it adiꞌ nga si David u Anak it Ampuꞌang Diyus

⁴¹ Mintras duꞌun pay mga Pariseo ngayti nga natingped, iningkut sira ni Jesus, nga magꞌaat,

⁴² “Unuy magkaꞌrutan mi pasar it paꞌaaten ngaytu nga Cristo? Kasiyu talagaytu nga anak?” “Ki David bayan,” maat i tubag nira.

⁴³ “Ta, in beteꞌ atkayan,” maat siꞌ ni Jesus, “unuka tiyaꞌwag ni David i Cristo nga Ampuꞌan ya, iyan piyanakman kanya it Espiritu Santo? Ka daꞌga baꞌ maat ya,

⁴⁴ ‘Maat it Ampuꞌang Diyus duꞌun it Ampuꞌan ku nga Cristo, “Kayti madung ka na sinit iwanan ku nga ayun, seked it iyan mga kalaban mu, paꞌampuꞌun ku na nga tutungtungan mana sira it aꞌay mu.”’

⁴⁵ Kayti si David naga i timnaꞌwag it kanya it Ampuꞌan ya. Ta, in atkayan, daꞌga maꞌyag nga ega desang tungtung-inapuꞌ ni David i Cristo ngaytu?”

⁴⁶ Egay nakatubag nga maski esat kanira, baw gimnaring sikayti, ega nay nangaas mingkut it ki Jesus.