Mateo 21 - Tagbanwa

Pagbantugun it mga taw si Jesus, pagꞌabut ya duꞌun it Jerusalem

¹ Iyan adeꞌdeng na sira duꞌun it Jerusalem, pagꞌabut nira duꞌut Betfage nga duꞌun it Mungsuꞌ it Olibo, may itiyaꞌeg ni Jesus it duwang kataawan nga mga alagad ya.

² Maat yat duwa ngayti, “Paꞌaduꞌun kamu daꞌan it baryu ngayti. Maltegan mi yan nga lagi asan i magsesget nga inaꞌan it kabayuꞌ nga asno. Iba yay uꞌuybun ya. Uꞌbaden mi ka tabanen mi situt aken.

³ In may mimraw it imyu, tubagen mi nga ‘Kaꞌilangan baytut Ampuꞌan.’ Ta, ega nayan rimiꞌe-riꞌeng kanya.”

⁴ Nagꞌabut tu i atkaytu isaꞌun matuman i isiyugid it prupitaꞌ it tagnaꞌ paꞌ, nga magꞌaat,

⁵ “Sugidan mi i mga taga Sion, aaten mi, ‘Lawagen mi. Magdadarapaꞌ nay magꞌadiꞌ situt imyu. Talagang mapiyalulus tu kanya. Esang kabayuꞌ nga asno i pagsasakayan ya. Esang uꞌuybun nga uꞌuybun it asno.’”

⁶ Napanaw nay duwa ngayti nga mga alagad. Siyunud nira i itiyaꞌeg ngayti ni Jesus.

⁷ Tiyaban nira duꞌut ki Jesus i inaꞌan ngayti nga asno baw uꞌuybun ya ngayti. Ipiyagꞌampilu niray mga gulamen nira bawnga simnakay na si Jesus.

⁸ Talagang dakel i miyamlad it gulamen nira duꞌun it dalan. Iyan beken, nanigbas it palakpak it luwak nga subuk badangan, ka yanayti ipiyagduꞌun nirat dalan, nga tandaꞌ it paggalang baw pagꞌistimar nira it ki Jesus.

⁹ Atnat giyaw-giyaw i mga taw duꞌut uꞌnaan baw duꞌun it giyaringan ya. Maat i ipagpanggagaꞌuy na nira, “Bantugun i tungtung-inapuꞌ ngaytut adiꞌ nga si David! Mabantug kanya ngaytu nga tiyaꞌeg it Ampuꞌang Diyus! Bantugun i Ampuꞌang Diyus nga duꞌun it dibwat it langit!”

¹⁰ Pagꞌabut ni Jesus duꞌun it Jerusalem, nakeba-kebaan i taga siyudad ngayti. Maamaatan sira, “Bilaꞌ, siyu na baytu?”

¹¹ Tumubag i kadakel ngayti nga mamagbayaꞌ it ki Jesus, “Bilaꞌ, si Jesus ngayan bang prupitaꞌ nga taga Nazaret nga sakep it Galilea.”

Mga binwat ni Jesus duꞌun it Templo

¹² Siminled si Jesus duꞌun it Templo. Piyangimugaw yay mga manigpaꞌalang baw mamagpangalang nga duꞌun it piyakakamaꞌyagan ya. Baw ipiyamagpakleb yay mga lamisaan it mga maniggantit pirak baw mga araꞌdungan it mga manigpaꞌalang it kalapatiꞌ.

¹³ Maat ya it kanira, “Magbebtang duꞌun it isiyurat nga ampang it Ampuꞌang Diyus, ‘Iyan balay ku nga pagsambaan it aken, taꞌwagen nga balay nga papanalanginan.’ Temed binwat mi na nga pugad nat mga mananakaw!”

¹⁴ Duꞌun nagat Templo ngayti, may mga beleg baw mga pilay nga minlep duꞌun it ki Jesus. Piyagayen ya sira nga muꞌsa.

¹⁵ Temed miniseg i mga pagbayaꞌen it mga sasirduti baw mga manigpaꞌyag it urdin, pagkalteg nirat mga kalililuꞌan ngayting bagay nga binwat ya baw mangaꞌwaꞌ nga mamaggaꞌuy-gaꞌuy duꞌun it piyakakamaꞌyagan it Templo ngayti, nga magꞌaat, “Bantugun i tungtung-inapuꞌ it adiꞌ nga si David!”

¹⁶ Maat nira it ki Jesus, “Unu, magkagnegan muy pagꞌampangen nira ngayan?” “Eeꞌ, magkagnegan ku,” maat ni Jesus. “Unu, ega paꞌ nabasa mi duꞌun it isiyurat nga ampang it Ampuꞌang Diyus ngayan nga magꞌaat, ‘Gumaring kat baꞌbaꞌ it mga dedekeyeꞌ nga mangaꞌwaꞌ pati mga paduduꞌun paꞌ, ipagpatlaꞌ muy pagbantug it imu.’ ”

¹⁷ Gimnaring na si Jesus, nanliꞌwan duꞌun it siyudad ngayti. Nagpaꞌaduꞌun kanya it Betania ka duꞌun i inigaꞌan ya.

Siyumpaan i sang puꞌun nga igos

¹⁸ Pagꞌeyag it aldaw, iyan magpaꞌuliꞌ siꞌ si Jesus duꞌun it siyudad, ginteman kanya.

¹⁹ May naltegan ya nga sang puꞌun nga igos duꞌun it tepad it dalan. Inlep ya, temed egay naltegan ya nga mga buwaꞌ, bulun nga daꞌun. Aypaꞌ ka inaat yay igos ngayti, “Daꞌka na muwaꞌ it seked kaꞌnu-kaꞌnu.” Ta, sakaling nalaꞌun na.

²⁰ Naltegan it mga alagad i iti nga kaꞌulugan. Namagkaliluꞌ sira. Nakaꞌampang nga magꞌaat, “Bilaꞌ, magꞌuꞌunu nalaꞌun nga lagi i igos ngayti?”

²¹ Mampang si Jesus, maat ya, “Dedemdemen mi tu. In talagang matuud i pamayaꞌ mit Ampuꞌang Diyus, nga ega alab-alaben, mabwat mi gasiꞌ i binwat kut igos ngaytu. Ega lamang yan desang iyan ngayan, in aaten mi i itu nga mungsuꞌ, ‘Limꞌid ka asan, pasugba ka duꞌun it dagat,’ magbaraꞌ yan i inampang mi ngayan.

²² Baw in unu-unuy ipanalangin mi nga angutun mi, matanggap mi yan, basta magpamayaꞌ kamu nga matuud.”

Pagꞌintakeden i pudir ni Jesus

²³ Siminled siꞌ si Jesus duꞌun it Templo. Desang magpanulduꞌ na kanya, minlep duꞌut kanya i mga pagbayaꞌen it mga sasirduti baw mga mataꞌas nga ginuꞌu it mga Judio. Iningkut kanya nga magꞌaat, “Unuy pudir mu nga muwat ka it mga itu ngaytu? Siyuy minggay it imu it itung pudir?”

²⁴ Tumubag si Jesus, maat ya, “Ingkutun ku gasiꞌ kamu. In matubag mi, bawnga isugid kut imyu in unuy pudir ku nga muwat it itu nga mga bagay.

²⁵ Ari giyaringan it pudir ni Juan nga mamawtis? Unu, duꞌun it Ampuꞌang Diyus u duꞌun it mga taw?” Pagkagneg nira kayti, remeteng-retengan sira, “In aaten ta, ‘Garing duꞌun it Ampuꞌang Diyus,’ aaten ya siꞌ kita, ‘Ta unuka ega pagpamayaꞌnen mi kanya?’

²⁶ Temed in aaten ta gasiꞌ, ‘Garing it taw,’ barang unuy buwaten it aten it mga katataawan? Sabap pagkilalaen it puꞌsa nga si Juan ngayti, esa nga prupitaꞌ.”

²⁷ Aypaꞌ ka katubag sirat ki Jesus, maat nira, “Ega bayan magkaꞌrutan namen.” “Ta, in atkayan,” maat ni Jesus, “ega gasiꞌ isugid kut imyu i pudir ku nga muwat it mga pagbuwaten ku ngaytu.”

Duwang anak nga lalaki i piyaꞌalimbawaan ni Jesus

²⁸ Maat siꞌ ni Jesus it kanira, “Unuy pasepsep mi it itu ngaytu nga alimbawa? May esang taw nga duway anak ya nga lalaki. Singkat yay akaꞌ, maat ya, ‘Anak, muwat ka duꞌun it ubasan tami kayti.’

²⁹ ‘Bilaꞌ, maggarus aku,’ tubag ya. Temed nagbaꞌgu nagay pikir ya. Naꞌaduꞌun naga kanya nga minwat.

³⁰ Singkat ya gasiꞌ i sunud. ‘Eeꞌ,’ maat i tubag, temed ega naga naꞌaduꞌun nga minwat.

³¹ Ta siyu manggid it duwa ngayti i simnunud it kaꞌirgan it amaꞌ nira?” “Iti, akaꞌ ngayti,” maat i tubag nirat ki Jesus. “Matuud talagay iꞌaat kut imyu,” maat siꞌ ni Jesus, “nga iyan mga malulupig nga mga manigpabayad it barayadan baw iyan mga babay nga ipagpanulus niray bilug nira, mauꞌnaan nira paꞌ kamu nga kapasakep it kaꞌadiꞌan it Ampuꞌang Diyus.

³² Sabap naꞌasitu nat imyu si Juan ngayan nga magpamawtis baw ipiyatantu yat imyu i mataldeng nga pangaꞌgenan. Takaꞌ ega pagpamayaꞌnen mi kanya. Temed piyamayaꞌ kanya it mga manigpabayad ngayti it barayadan baw mga babay nga ipagpanulus i bilug. Namuyaan mi nagay namayaꞌ na sira, temed daꞌkamu namayaꞌ it panulduꞌ ya.”

Mga siyanaꞌan nga manigꞌuma i piyaꞌalimbawaan ni Jesus

³³ “Pagnegan mi gasiꞌ i esa paꞌ nga alimbawa,” maat siꞌ ni Jesus. “May esang taw nga liminwak it luwak nga ubas duꞌun it uma ya. Kiyaliputput yat malad. Bawnga kimnali kanya it buwatan yat kikilangan it ubas ngayti baw nagpatindeg paꞌ kanya it abwatay nga tatandaꞌan. Pagkaꞌman yat muꞌsa ngayti, isiyanaꞌ yat pirang kataawan nga manigꞌuma i ubasan ya ngayti, ka naꞌaduꞌun kanya it belag nga rugar.

³⁴ Iyan naꞌbut nay timpu nga pararanas nat ubas, tiyaꞌeg it tagpuꞌun ngayti i mga uripen ya ka pisiꞌen nira i kanya nga kabagiꞌan.

³⁵ Temed riyusuban gat mga siyanaꞌan ngayti i mga uripen ngayti nga tiyaꞌeg. Piyukul niray sang kataawan, inimatay i ikadwa, ikatlu tiyegelan nirat buntal it batu.

³⁶ Pagkamuya it tagpuꞌun ngayti, may tiyaꞌeg ya sing beken, nga dakel pat uꞌna ngayti nga mga uripen. Temed atkayti naga i binwat it mga siyanaꞌan ya ngayti.

³⁷ Kiyaꞌpusan nga tiyaꞌeg ya, anak ya na nga lalaki. Kat nakem ya, ‘Siguradu yan nga istimaren nirat magayen i anak ku ngaytu.’

³⁸ Arit pagkalteg it mga siyanaꞌan ya ngayti it anak ya na i miyabut, maamaatan sira, ‘Bilaꞌ, wayan nay manunubliyen ngayan! Sigi! Imatayen tami, isaꞌun maꞌaten nay ubasan ngaytu nga subliyen ya.’

³⁹ Egay beken, riyusuban nira, riyayak duꞌun it liꞌwan it ubasan ngayti bawnga inimatay.

⁴⁰ Ta, pagꞌuliꞌ it tagpuꞌun ngayti, unu yan i buwaten yat mga manigꞌuma ngayting siyanaꞌan ya?” maat i ingkut ni Jesus it mga magpagneg ngaytit kanya.

⁴¹ Katubag sira, “Siguradu yan nga puuꞌun yay iting mga taw, atna ngayting kararaꞌe-raꞌet it adat, baw ipaꞌarigra ya siꞌ it beken nga mga manigꞌuma, nga iyan i megay it kanya nga kabagiꞌan in timpu nat pararanas.”

⁴² Miningkut siꞌ si Jesus it kanira. “Unu, ega paꞌ nabasa mi i itu nga ipiyagꞌaat duꞌun it isiyurat nga ampang it Ampuꞌang Diyus ngayan nga magꞌaat, ‘Iyan batu nga ega napakay it mga manigpatindeg it balay, palan yanagay giyamit nga piyakapakseg it balay. Talagang binwat tu it Ampuꞌang Diyus, baw kalililuꞌan talaga.’

⁴³ Aypaꞌ ka pagꞌaaten ta kamu, ega na kamu nga mga Judio i sakep it kaꞌadiꞌan it Ampuꞌang Diyus, in daꞌga iyan mga taw nga magsirbi it kanya it kamatuudan.

⁴⁴ Sepsepen mi tu. Kada temdag situt pakseg ngaytu nga batu, siguradu nga mabekar-bekar. Temed iyan tedagan it batu ngaytu, talagang maremek-remek.”

⁴⁵ Pagkagneg it mga pagbayaꞌen it mga sasirduti baw mga Pariseo it mga alimbawa ngayti ni Jesus, nasepsepan nira nga sira i pagpapuntuꞌan ya kayti.

⁴⁶ Egay beken, kudakpen na nira si Jesus. Temed magꞌiꞌlam sira it kadakel it mga taw ngayti, sabap pagkilalaen it kadakel ngayti nga prupitaꞌ si Jesus.