Mateo 2 - Tagbanwa

Pagꞌabut it mga mapipikir nga mamimintuꞌ nga garing duꞌut lebatan

¹ Piyanganakan it ki Jesus ngayti, duꞌun it Betlehem nga sakep it Judea, timpu nga si Herodes i adiꞌ nga magsasakep duꞌun. Ega naꞌlay nga timpu, may miyabut duꞌun it Jerusalem nga mga mapipikir nga mga mamimintuꞌ, nga garing kat lebatan nga ayun.

² Pagꞌabut nira duꞌut Jerusalem ngayti, sigi nang ingkut-ingkut nira in ariyen i ipiyanganak nga magꞌadiꞌ, nga Adiꞌ it mga Judio. “Sabap naltegan namen,” maat nira, “i baꞌgung bituꞌun nga limimbat duꞌut lebatan nga ayun, nga tandaꞌanan it simnakit na kanya. Ituytu i panaw namen ngaytu, sambaen namen kanya.”

³ Pagkaꞌrut it adiꞌ ngayti nga si Herodes, nalibeg nga banar i pikir ya. Atnagay kadakel ngayti duꞌut Jerusalem.

⁴ Binwat ni Herodes, ipiyatawag ya nga matingped i muꞌsa nga mga pagbayaꞌen it mga sasirduti baw mga manigpaꞌyag it isiyurat nga mga urdin it Ampuꞌang Diyus. Ka iningkut ya sira, nga magꞌaat, “Ariyen bayan i panganakan it Cristo ngayang isiyanggup it Ampuꞌang Diyus nga magꞌadiꞌ?”

⁵ Katubag sira, maat nira, “Kagalang-galang it imu, maat baꞌ kunuꞌ duꞌun it Betlehem nga sakep it Judea. Ka iyan i duꞌun it isiyurat it esang prupitaꞌ, nga inaat it Ampuꞌang Diyus,

⁶ ‘Lansangan it Betlehem, nga sakep it Judea, ega naga yan matuduꞌ it beken, in daꞌga magbalyu talagang matanug. Sabap iyan i liꞌwanan it pagbayaꞌen nga marigra it mga taawan ku nga bangsa nga Israel.’”

⁷ Pagkagaring it tiningped ya ngayti, iyan siꞌ i piyapaꞌaduꞌun ni Herodes it kanya it egay nakaꞌrut nga beken, mga mapipikir ngayti nga miyabut. Ka tiyeꞌe-teꞌeng ya sirat mingkut, in kaꞌnu talaga i ipiyaglebat it paꞌaaten nira ngayting bituꞌun.

⁸ Iyan naꞌrutan ya na, piyapanaw ya na sira nga paBetlehem. Maat ya, “Gayen-gayenen mit tumulus i waꞌwaꞌ ngayan. Pagkaparag mi, ipaꞌrut mit aken, isaꞌun masamba ku gasiꞌ kanya.”

⁹ Ta napanaw nay mga mapipikir ngayti. Kat uꞌnaan nira, naltegan nira siꞌ i bituꞌun ngayting paꞌaaten nira nga baꞌgung limimbat, nga naltegan nira duꞌut lebatan nga ayun. Nanguꞌnat kanira i bituꞌun ngayti. Yapaꞌ temeꞌyeng, duꞌun nat patuꞌ it balay nga duꞌun nay waꞌwaꞌ ngayti.

¹⁰ Pagkalteg nira sit bituꞌun ngayti, talagang nakasagya sirang banar.

¹¹ Pagkasled nira duꞌut balay ngayti, naltegan nira i waꞌwaꞌ nga pagsasakbutun it inaꞌ ya nga si Maria. Siyamba nira kanya it magtetꞌem i rupa duꞌun it daꞌtag. Bawnga inukad nira nay mga marerga nga taban nira nga bulawan, pirmirang kamangyan baw marga nga babangluun nga mira, nga ibgay nirat waꞌwaꞌ ngayti.

¹² Iyan panguliꞌ na nira, pagdelem ipiyatagaynep it kanira it Ampuꞌang Diyus nga magꞌaat, daꞌsira na mamsag duꞌun it ki Herodes. Aypaꞌ ka duꞌun nat belag nga dalan i piyanawan nirat miyuliꞌ.

Piyalagyuwan na Jose, naꞌaduꞌun it Egipto

¹³ Pagkagaring it mga mapipikir ngayti, nanagaynep si Jose. Tagaynep ya, miyabut i esang anghil it Ampuꞌang Diyus, nga magpaꞌa-paꞌaat it kanya, “Jose, magbangun kamu na, ka magliꞌid kamung lagi situ. Tabanen muy waꞌwaꞌ ngayan duwa magꞌinaꞌ baw malagyu kamu duꞌut Egipto. Baw ayaw kamut liꞌi-liꞌid duꞌun mintras ega pay aat kut imu, sabap ipatulus ni Herodes i waꞌwaꞌ ngaytu ka imatayen.”

¹⁴ Egay beken, nagbangun si Jose, dayun it siyulag ya si Maria ka namagpanaw na sirat delemen ngayti, ka tabanen ya nay waꞌwaꞌ ngayti duwa magꞌinaꞌ duꞌun it Egipto.

¹⁵ Timnaꞌid sira duꞌun seked it natay na si Herodes. Nagꞌabut i atkayti isaꞌun matuman i ampang it Ampuꞌang Diyus nga ipiyaꞌampang yat esang prupitaꞌ, nga magꞌaat, “Tiyaꞌwagan ku i Anak ku garing duꞌun it Egipto.”

¹⁶ Iyan namuyaan ni Herodes nga palan nalabawan i pikir ya, ka ega tiyuman it mga mapipikir ngayti i pakiꞌupakat ya ngaytit kanira, miniseg kanyat iseg banar. Ipiyagꞌurdin ya nga pangimatayen i muꞌsa nga mangaꞌwaꞌ nga lalaki duꞌun it Betlehem ngayti, pati duꞌun it linibut ya, garing it mga madaragen sareg it magꞌidad nat duwang taꞌun, isaꞌun siguradung makaꞌuyut nga maꞌimatay si Jesus ngayti nga paꞌaaten, ka ega magkalipatan ni Herodes i inaat it mga mapipikir ngayti sabap it paglebat it iting bituꞌun.

¹⁷ Ta it atkayti na, natuman i ipiyagsugid ni Prupitaꞌ Jeremias it tagnaꞌ paꞌ, nga magꞌaat,

¹⁸ “Magkagnegan duꞌun it Rama i garwak nga daꞌna pateng. Ka magkasgawan ni Raquel i mga anak ya. Talagang daꞌga magpabangay kanya sabap it kasmek yat mga anak ya nga piyuuꞌ na.”

Nazaret na i tiyakenaꞌan na Jose, pagꞌuliꞌ nira

¹⁹ Iyan natay na si Herodes, piyatagaynep siꞌ si Jose ngayti nga duꞌut Egipto. Tagaynep ya, sakaling miyabut i esang anghil it Ampuꞌang Diyus.

²⁰ Magpaꞌa-paꞌaat siꞌ it kanya, “Magbangun kamu na. Tabanen muy waꞌwaꞌ ngayan duwa magꞌinaꞌ, ka muliꞌ kamu siꞌ duꞌut Israel, ka natay nay kuꞌimatay it waꞌwaꞌ ngaytu.”

²¹ Pagkaꞌanu kayti, yapaꞌ nga matuud i uliꞌ na Jose duꞌut Israel.

²² Temed pagkabaritaꞌ ya it si Arquelao naga i simnubli it amaꞌ ya nga si Herodes, nga yanay magsasakep duꞌut rugar it Judea, miniꞌlam kanya muliꞌ duꞌut Betlehem nga sakep it Judea ngayti. Ta it piyatagaynep siꞌ kanyat sumaꞌup, nga in unuy magayeng buwaten ya, aypaꞌ ka duꞌut Galilea i inaduꞌunan nira, nga esa gasing rugar it Israel.

²³ Piyaꞌabutan nira duꞌun it lansangan it Nazaret, nga sakep it Galilea, ka duꞌun i taꞌidan nira. Duꞌun natuman i isiyugid it mga prupitaꞌ, nga magꞌaat, “Taꞌwagen kanya nga Nazaretanen.”