Mateo 19 - Tagbanwa

Panulduꞌ ni Jesus sabap it pablag it asawa

¹ Pagkatupus ni Jesus it iti nga panulduꞌ ya, liminꞌid siꞌ kanya duꞌun it Galilea ngayti. Naꞌaduꞌun it rugar it Judea nga duꞌun it sang dipag it danum it Jordan.

² Ega magbugtuꞌ i bulyug it taw nga dimnasun it kanya, baw piyagayen yay mga mamagsarut duꞌun.

³ May mga Pariseo nga naꞌaduꞌun it ki Jesus, ka antap it nakem nira nga sukda-sukdanan kanya kat ingkut nira ngaytung ituꞌun, nga magꞌaat, “Unu, uyun kat urdin nga pablagan it esang lalaki i asawa ya sabap it maski unu nga mapatikdan?”

⁴ Katubag si Jesus, maat ya, “Unu baꞌ, ega paꞌ nabasa mi kat isiyurat nga ampang it Ampuꞌang Diyus ngayan nga magꞌaat, ‘Puꞌun-puꞌun it taw, giyuna sira it Ampuꞌang Diyus, babay baw lalaki.’

⁵ Pagkaguna ya, maat ya, ‘Ta it atkaytuy giyuna ku, aypaꞌ ka tananan it lalaki i amaꞌ baw inaꞌ ya ka magsagpun na sira magꞌasawa. Ta egay beken, subung na sirat sang kabilu-bilugan.’

⁶ Aypaꞌ ka subung it ega na maꞌaat sira nga duwang kataawan paꞌ, ka subung it sang kabilu-bilugan na sira. Ta, it atkayan na, simpri ega mapakay nga belagen it taw i ipiyagsagpun ngaytu it Ampuꞌang Diyus.”

⁷ Iningkut siꞌ kanya it mga Pariseo, “Ta unuka ipiyagꞌurdin ni Moises nga begayan lamang it lalaki i asawa ya it kasuratan nga katandaꞌ it nagbelag na, bawnga mapakay na nga belagen sira?”

⁸ Katubag siꞌ si Jesus, maat ya, “Sabap it kadsen it ulu mi, aypaꞌ ka ipiyaꞌintulut ni Moises nga mapablagan mi i asawa mi. Temed ega talaga atkayan i puꞌun-puꞌun ya.

⁹ Aypaꞌ ka ituy ipagꞌaat kut imyu kayti, maski siyu nga lalaki i pablag it asawa ya kat in unu nga napatikdan, puyrat nasalaꞌ it beken nga lalaki, bawnga mangasawa kanya it beken, talagang nakapakun na kanya. Baw atkayan naga, siyu-siyuy mangasawa it babay nga piyablagan, nakapakun na gasiꞌ kanya.”

¹⁰ Kaꞌampang i mga alagad ni Jesus, maat nira, “Ta, in atkayan palan i lalaki kat asawa ya, daꞌga magayen paꞌ ega na lamang mangasawa.”

¹¹ Katubag si Jesus, maat ya, “Pagꞌaaten ngayan, matanggap lamang it iyan ipiyabetang-betang it Ampuꞌang Diyus nga makatanggap.

¹² Sabap may belag-belag nga bagay it in unuka may mga lalaki nga ega magpangasawa. Iyan beken, adat na ka sekad yay may kurang kat bilug. Beken, pamuwat-buwat it beken nga taw i ginis ngaytut bilug. May beken gasiꞌ nga ega magpangasawa isaꞌun masarunga nirang banar i pangadal nira sabap it kaꞌadiꞌan it Ampuꞌang Diyus. Ta, in siyu nga makatanggap it atkaytu nga pagꞌaaten, magayen tanggapen ya naga.”

May tiyaban nga dedekeyeng mangaꞌwaꞌ duꞌun it ki Jesus

¹³ Kaꞌsang aldaw may mga taw nga timnaban it dedekeyeꞌ nga mangaꞌwaꞌ duꞌun it ki Jesus, ka pagꞌangutun nira nga panalanginan it pagtatapalen. Temed siyardaw sira it mga alagad.

¹⁴ Takaꞌ mampang si Jesus, “Ega sulang-sulangen mi i mangaꞌwaꞌ nga magpaꞌasitut aken. Pataꞌnan mi lamang. Sabap mga mapiyababaꞌ nga subung it mangaꞌwaꞌ ngaytu, sira i mapakay nga pasakep it kaꞌadiꞌan it Ampuꞌang Diyus.”

¹⁵ Ta, piyanalanginan ya sira it pagtatapalen, bawnga napanaw.

Makuriꞌ kasled duꞌun it kaꞌadiꞌan it Ampuꞌang Diyus

¹⁶ Sunud siꞌ, may esa nga mangaꞌwaꞌen nga lalaki nga naꞌaduꞌut ki Jesus, miningkut nga magꞌaat, “Manigtulduꞌ, unu bayan i dapat ku nga buwaten isaꞌun maꞌaken i kaꞌgenan nga egay kaskedan?”

¹⁷ Katubag si Jesus, maat ya, “Unuka ipagꞌingkut mut aken in unuy magayen? Ampuꞌang Diyus lamang i talagang magayen. Aypaꞌ in ireg mung maꞌimuy kaꞌgenan nga egay kaskedan, sunudun muy mga ipiyagꞌurdin ya.”

¹⁸ “Unu may unu yan nga mga urdin?” ingkut it mangaꞌwaꞌen ngayti. “Itu may itu,” maat i tubag ni Jesus. “Kuydaw ka it pangimatay it masigkataw mu. Kuydaw ka it pamakun duꞌun it ega asawa mu. Kuydaw ka it panakaw. Kuydaw ka it panistigu it egay matuud.

¹⁹ Galangen mu i amaꞌ baw inaꞌ mu, baw rarasan muy masigkataw mu it subung nagat raras mu it sadili mu nga bilug.”

²⁰ Pagtubag it mangaꞌwaꞌen ngayti, maat ya, “Pagsunudun ku nayan nga muꞌsa i mga iyan ngayan. Ta unu paꞌ i dapat nga buwaten ku?”

²¹ “Magayen,” maat ni Jesus, “in talagang ireg mu nga masagyaan ka nga banar it Ampuꞌang Diyus, muliꞌ ka na ka ipaꞌalang muy muꞌsang kusas mu, bawnga itabang mu it mga makukuriꞌ i bayad ya. Ka in buwaten mu gaytu, siguradung may kamanggadan mu duꞌun it langit. Pagkabwat mut muꞌsa ngaytu, paꞌuliꞌ ka siꞌ situ, ka magbaya-bayaꞌ ka nat aken, nga alagad ku na.”

²² Pagkagneg it mangaꞌwaꞌen ngayti it iti ngayti, napanaw na kanyat pagsesmeken, sabap talagang manggaden kanya.

²³ Pagkagaring, maat ni Jesus it mga alagad ya, “Matuud talagay iꞌaat kut imyu. Talagang makuriꞌ makaꞌuyut i manggaden duꞌun it kaꞌadiꞌan it Ampuꞌang Diyus.

²⁴ Baw itu pay iꞌaat kut imyu. Marway paꞌ makalapas i dakulang ramu-ramu nga kamelyo duꞌun it erek it dagum, ega gat manggaden nga kasled duꞌun it kaꞌadiꞌan it Ampuꞌang Diyus.”

²⁵ Naliluꞌ talaga i mga alagad, pagkagneg nira kayti. Aypaꞌ miningkut sira, nga magꞌaat, “Ta in atkayan, nga makuriꞌ maribri i mga manggaden nga dakulay kaya nira, ta siyu gay maribri? Daꞌga ega na?”

²⁶ Tiyermek sira ni Jesus it semyek baw miyampang nga magꞌaat, “Talagang egay maski unu nga mabwat it taw nga ipagkaribri it kanya. Temed in Ampuꞌang Diyus, mabwat yay muꞌsang bagay. Kanyay magkaribri it mga taw.”

²⁷ Miyampang si Pedro, maat ya, “Ta amen ngaytu, nga tiyananan namen nay muꞌsa ka simnunud kami nat imu, ta unu nay itumbas it amen?”

²⁸ Katubag si Jesus, maat yat kanira, “Kamatuudan tu nga iꞌaat kut imyu, nga in asan nat mabaꞌgu it Ampuꞌang Diyus i langit baw banwa, magꞌadiꞌ aku na nga Taga Langit nga Ipiyanganak it Taw, kat ega na babasta-bastaeng kabantugan. Bawnga kamu ngaytung sang puluꞌ may duwang alagad ku, kaꞌibaan ku na kamu kat pamegbeg ku ngaytut mga taawan ku nga bilang mga tungtung-inapuꞌ it sang puluꞌ may duwang iriyasyaꞌ ni Israel.

²⁹ Baw maski siyu nga magkatanan it pamalay-balay ya, mga sulsug ya, giyaringan baw mga anak ya, u pagngatanan ya, nga sabap lamang it pagsirbi yat aken, talagang tumanggap kanyat sang gatus nga dubli, baw begayan paꞌ it kaꞌgenan nga egay kaskedan.

³⁰ Temed yay matuud, dakel i mataꞌas kayti kat pabetang it taw, nga baraꞌan nira raꞌyat pagꞌabut it iting aldaw. Baw dakel sira kayti nga raꞌyat lamang kat pabetang it taw, temed baraꞌan nira mataꞌas duꞌun it kaꞌadiꞌan it Ampuꞌang Diyus.”