Mateo 17 - Tagbanwa

Nagsiyang i kinataw ni Jesus

¹ Nagtaꞌlib i enem nga aldaw, piyabayaꞌ ni Jesus si Pedro baw duwa ngayti magsulsug nga si Santiago baw si Juan. Timnungul sira duꞌun it esang matindeg nga bukid.

² Iyan duꞌun na sira, naltegan it tulu ngayti nga nagsiyang i kinataw ni Jesus. Simningkar nga subung it singkar it aldaw i rupa ya baw pakayan ya, magsinggat nat pamuti-putiꞌ.

³ Sakaliꞌ nga naltegan it tulu ngayting mga alagad si Moises duwa ni Elias, nga magpakisugi-sugid it ki Jesus ngayti.

⁴ Kaꞌampang si Pedro, maat yat ki Jesus, “Magayen talaga nga situ tami na. In ireg mu, muwat akut tulung ardung. Esay imu, esay ki Moises baw esay ki Elias.”

⁵ Magꞌampang paꞌ si Pedro ngayti, inlungan sira it esang magsilaw na nga kunum. Duꞌun it kunum ngayti i sinraꞌan it ampang nga magꞌaat, “Itu i pagmaꞌa-maꞌalen ku nga Anak, nga talagang kasasagyaan ku. Pagnegan mi kanya it magayen.”

⁶ Miniꞌlam talagang banar i mga alagad ngayti, pagkagneg nirat ampang ngayti. Nakasuꞌsub sira langkuy.

⁷ Temed inlep sira ni Jesus ka piyamagtapal. “Tindeg kamu,” maat ya. “Ayaw kamut iꞌlam.”

⁸ Pagleteg it mga alagad ngayti, ega nay naltegan nira nga beken. Si Jesus mana ngayti.

⁹ Iyan magpanadsad na sira, ipiyagbenge-bengel ni Jesus it kanira nga magꞌaat, “Iyan ega isugi-sugid mit maski siyu i nagpasar ngayan kat mata mi, seked it ega paꞌ naꞌgen aku it paꞌuliꞌ, aku nga Taga Langit nga Ipiyanganak it Taw.”

¹⁰ Iningkut si Jesus it tulu ngayting alagad ya, maat nira, “Unuka pagꞌaaten it mga manigpaꞌyag it urdin nga kaꞌilangan kunuꞌ nga paꞌuliꞌ daꞌan si Elias ngayan nga prupitaꞌ it tagnaꞌ paꞌ, nga muꞌna kanyat isiyanggup nga Cristo?”

¹¹ Katubag si Jesus, maat ya, “Matuud yan nga paꞌasitu daꞌan si Elias ka simpanen yay muꞌsang bagay.

¹² Temed matuud tu talagay iꞌaat ku ngaytut imyu, nga miyabut na situ si Elias, temed ega nakilalaan kanyat mga taw. Talagang binwat nirat kanya i kumpur naꞌirgan nira, subung nagat buwaten nira nga pakuriꞌan nira aku nga Taga Langit nga Ipiyanganak it Taw.”

¹³ Duꞌun nasepsepan it tulu ngayting mga alagad nga si Juan ngayting namawtis i pagpaꞌiguꞌan ya.

Piyagayen ni Jesus i esang waꞌwaꞌ nga magkaꞌlamat nakem

¹⁴ Abutan it epat ngayti duꞌut mga kaꞌibaan nira, dakel siꞌ nga pagtaw i duꞌun. May minlep it ki Jesus nga esang lalaki baw nanluud duꞌun it sarungaan ya.

¹⁵ Miyampang kanya, nga magꞌaat, “Agalen, sanguꞌan mu sana i anak ku ngayti nga laa-lalaki. Makuriꞌ talagay sarakiten ya, ka basta rimnanget, maꞌlamat nakem. Magpagbaꞌ-magpagbaꞌ na lamang yan kanya duꞌun it apuy, in daꞌga duꞌun it danum.

¹⁶ Ipiyagꞌabang ku na kanya it mga alagad mu, temed ega magkapdek nira.”

¹⁷ Katubag si Jesus, maat ya, “Kamung mga taw kayti, kamaliꞌ talagay muꞌsang pagpikiren mi baw kurang talagay pamayaꞌ mi. Kaꞌnu mana baytuy ipamayaꞌ mi nga banar it naꞌlay na nga kaꞌiba-iba mi aku? Seked it kaꞌnu kaꞌilangan nga pagsagkaꞌen kuy adat mi ngaytu? Ipaꞌasini mi nat aken i waꞌwaꞌ ngayan.”

¹⁸ Nakapanliꞌwan i maraꞌe-raꞌet duꞌun it bilug it waꞌwaꞌ ngayti ka inimugaw na ni Jesus. Langkuy mindek nay sarakiten it waꞌwaꞌ ngayti nga atkayti.

¹⁹ Iyan sira-sira mana, iningkut si Jesus it mga alagad ya ngayti. Maat nira, “Unuka ega naꞌimugaw namen i iyan nga maraꞌe-raꞌet?”

²⁰ Katubag si Jesus, maat ya, “Sabap kurang pay pamayaꞌ mit aken. Sana makasbung i pamayaꞌ mi it dekeyeng alit it mustasaꞌ nga sigi-siging pangseg seked it dakulaꞌ nang luwak. Ka ituy matuud nga iꞌaat kut imyu, in atkaytu i pamayaꞌ mit aken, talagang maski mungsuꞌ ngayan i aaten mi nga paꞌugad, siguradu nga mamayaꞌ it imyu. Egay bagay nga ega makayaan mi basta magꞌuꞌunay situt aken i pagsarig baw pamayaꞌ mi.

²¹ Temed atkayan nga kalasit maraꞌe-raꞌet, ega yan maꞌimugaw in daꞌga magpaꞌres kamut panalangin baw pagpuwasa.”

Siyangpit siꞌ ni Jesus i kamataynen ya

²² Kaꞌsa nga duꞌun sirang muꞌsa it Galilea nga mamagpanaw-panaw siꞌ, maat ni Jesus it mga alagad ya ngayti, “Magꞌabut talaga nga subuk idagang aku nga Taga Langit nga Ipiyanganak it Taw. Ipaꞌalima aku duꞌun it mga punuꞌan,

²³ ka imatayen nira aku. Temed maꞌgen aku it paꞌuliꞌ, pagꞌikatlung aldaw.” Nasmek nga banar i mga alagad, pagkagneg nira kayti.

Nagbayad si Jesus duwa ni Pedro it barayadan duꞌun it Templo

²⁴ Pagkaꞌbut nira duꞌun it Capernaum, may miningkut it ki Pedro nga mga manigpabayad it barayadan duꞌun it Templo. Maat nira, “Unu bayan, magbayad it barayadan ngayan duꞌun it Templo i manigtulduꞌ mi ngayan?”

²⁵ “Aaꞌ, eeꞌ,” maat i tubag ni Pedro. Pagkaꞌuliꞌ ni Pedro duꞌut balay nga pagꞌiꞌistaran nira, iningkut nga lagi kanya ni Jesus. “Unuy kat pikir mu, Simon? Siyuy pagpabayaden it mga adiꞌ situt banwa it mga barayadan duꞌun it kanira? Sira nga kat pamalay-balay nira u iyan mga sinakepan nira?”

²⁶ “Mga sinakepan siguru,” maat i tubag ni Pedro. “Ta in atkayan,” maat ni Jesus, “daꞌga ega pagpabayaden i mga kat pamalay-balay?

²⁷ Takaꞌ maski atkayan,” maat siꞌ ni Jesus, “isaꞌun egay maꞌaat nirat aten, paꞌaduꞌun ka it lapnaw ka magbanit ka. Seklen muy uꞌnang kumaꞌen nga sedaꞌ. Ipanganga mu, may asan yan it baꞌbaꞌ ya nga pirak. Pisiꞌen mu ka tamaꞌ-tamaꞌ yan it barayadan ta nga duwa.”