Mateo 14 - Tagbanwa

Inimatay si Juan nga uꞌna-uꞌnang magpamawtis

¹ Kat iti nga timpu, nakaꞌbut duꞌun it adiꞌ ngaytit Galilea nga si Herodes i baritaꞌ sabap it ki Jesus.

² Maat ni Herodes it mga katimbang ya, “Ega yay belag, si Juan ngayan nga magpamawtis. Naꞌgen yan it paꞌuliꞌ. Aypaꞌ yan magkabwat it mga kalililuꞌan ngayan nga bagay.”

³ Miyampang si Herodes it atkayti sabap tagnaꞌ, kanya nagay nagpadakep, nagpabayuk baw nagpapirisu it ki Juan, sabap it ki Herodias nga asawa ni Felipe nga sulsug ni Herodes ngayti.

⁴ Sabap pirmi nga pagꞌaaten kanya ni Juan nga maat ya, “Ega mapakay nga magsagpun kamu, ka kuntrat urdin i agawun muy ipag mu ngayan.”

⁵ Kuꞌimatayen sana ni Herodes si Juan ngayti, temed magꞌiꞌlam kanya it pagsasakpen ya nga mga Judio sabap pagkilalaen nira nga prupitaꞌ si Juan ngayti nga magpamawtis.

⁶ Takaꞌ iyan naꞌbut siꞌ i kaꞌaldawan ni Herodes, miyayliꞌ duꞌun it adapan it mga taw nga inimbitar i babay nga anak ni Herodias ngayti, nga anak naga ni Felipe. Talagang siyagyaan nga banar ni Herodes.

⁷ Aypaꞌ ka isiyanggup ni Herodes nga uyut i sumpa ya nga ibgay ya it babay ngayti i maski unu nga angutun duꞌun it kanya.

⁸ Ta, it pagꞌiꞌinduꞌan na kanya nga lagi it inaꞌ ya, maat ya, “Iyan talagay ireg ku nga ibgay mut aken kayti, pinggan nga pagdadaꞌtunan it ulu ni Juan ngayan nga magpamawtis.”

⁹ Nasmek i adiꞌ ngayti, temed sabap it sumpa ya nga pagdedngegen it mga inimbitar ya ngayti, isingkat ya it mga manigsirbi ya nga ibgay nirat babay ngayti.

¹⁰ Aypaꞌ ka isingkat ya nga punggutan nat ulu si Juan ngayti duꞌun it pirisuwan.

¹¹ Pagkapunggut, idiyaꞌtun duꞌun it pinggan bawnga ibinggay duꞌun it babay ngayti. Dayun it tiyaban ya na duꞌun it inaꞌ ya.

¹² Pagkaꞌrut it mga alagad ni Juan ngayti, naꞌaduꞌun sira ka pinsiꞌ niray bilug ni Juan ka ilimbeng nira. Bawnga ibiyaritaꞌ nira duꞌun it ki Jesus.

Subrat limang ribu i kadakel it napakaꞌen ni Jesus kat keseg it guna ya

¹³ Pagkaꞌrut ni Jesus it inimatay na ngayti si Juan, liminꞌid kanya duꞌun it kadakel it mga taw ka simnakay, nga paꞌaduꞌun it esang rugar nga kapupuyangtan. Temed pagkabaritaꞌ it mga katataawan duꞌut mga lansangan ngayti, napanaw sira nga timnundug it ki Jesus ngayti.

¹⁴ Aypaꞌ pagpanlampud ni Jesus duꞌut inabutan ya ngayti nga rugar, yay piyagꞌaꞌandaꞌan it mata ya, dakel na nga mga taw. Siyanguꞌan ya sira. Piyagayen ya i mga may sarut nga taba-taban it mga taw ngayti.

¹⁵ Iyan apu-apun na, nagpatpad duꞌun it ki Jesus i mga alagad ya. Maat nira, “Tabiꞌ it imu, kapupuyangtan nga rugar i sikaytu baw ungaytu na, ega na maꞌlay semdep i aldaw. In mapakay sana, papanawun mu nay mga taw ngayan nga paꞌaduꞌun sirat mga baryu ka isaꞌun makapangalang sirat makaꞌen nira.”

¹⁶ Katubag si Jesus, maat ya, “Ega na kaꞌilangan nga papanawun paꞌ sira. Kamu nay megay it makaꞌen nira.”

¹⁷ Katubag i mga alagad ya ngayti, maat nira, “Ampuꞌan, ta, magꞌuꞌunu yan it ega talagay situ, puyrat limang batu i tina-tinapay baw duwang batuy seda-sedaꞌ?”

¹⁸ “Tabanen mi sinit aken,” maat ni Jesus.

¹⁹ Piyaꞌdung ya i mga taw ngayti. Pinsiꞌ ni Jesus i limang batu ngayti nga tina-tinapay baw duwang batu ngayting seda-sedaꞌ. Yimnaꞌngad kanya duꞌut langit ka nagpasalamat duꞌun it Ampuꞌang Diyus. Pagkatupus ya, biyagiꞌ-bagiꞌ yay tina-tinapay ngayti bawnga ipiyakawaꞌ yat mga alagad ya ka ipanundul nira duꞌun it mga taw ngayti.

²⁰ Kimnaꞌen i muꞌsa ngayti seked it naꞌgen sira. Rininut it mga alagad i naꞌpedan, napnuꞌ i sang puluꞌ may duwang kabaꞌayan it pagbabagiꞌ-bagiꞌen na ngayting tinapay.

²¹ Kadakel it kimnaꞌen ngayti, lalaki lamang may limang ribu, puyray mga babay baw mangaꞌwaꞌ.

Napanaw si Jesus duꞌut sagpaw it danum

²² Bawnga piyasakay na nga lagi ni Jesus i mga alagad ya, ka muꞌna na duꞌut sang dipag it lapnaw ngayti. Nagpatuduꞌ it kanya ka pagpagaringen ya pay mga taw.

²³ Pagkapagaring yat mga katataawan ngayti, nanungul kanyat esa-esa ya duꞌun it mungsuꞌ ka manalangin duꞌun. Dinlem na si Jesus duꞌun it mungsuꞌ ngayti it esa-esa ya lamang.

²⁴ Sakayan ngayti nga pagsasakayan it mga alagad ya, duꞌun na it tenga-tengat lapnaw. Magkakuriꞌ-kuriꞌan sira ka masbeg i deres nga sungsungun.

²⁵ Iyan kukuꞌ-aldaw na, timnundug na si Jesus it kanira. Magpanaw lamang kanya duꞌun it sagpaw it danum.

²⁶ Piyangingiraꞌbutan it iꞌlam i mga alagad nga nakalteg it magpanaw ngayti duꞌut sagpaw it danum. “Idek!” maat nira, “miyatay bayan!”

²⁷ Miyampang nga lagi si Jesus, nga magꞌaat, “Ayaw kamut iꞌlam. Si Jesus aku naga bayni. Paksegen mi lamang i nakem mi.”

²⁸ Pagkagneg ni Pedro, miyampang kanya nga magꞌaat, “Ampuꞌan, in talagang ikaw yan, papanawun mu aku kat sagpaw it danum nga sumusmu it imu.”

²⁹ “Eeꞌ,” maat ni Jesus, “daliꞌ na.” Egay beken, limnampud na si Pedro duꞌut sakayan, diri-diritsu nga napanaw kanya duꞌut sagpaw it danum nga magsusmut ki Jesus.

³⁰ Temed pagkamuya ni Pedro it mabakat, miniꞌlam kanya. Unupat magsaredsed na. Nangabang kanya, “Tabang, Ampuꞌan! Sagepen mu aku!”

³¹ Diyaliꞌan kanya ni Jesus, nga singkel ya nga lagi. “Pedro,” maat ya, “kadekeyeꞌ it pamayaꞌ mut aken. Unuka inalab-alab ka?”

³² Pagkasakay it duwa ngayti, yimnengyeng nay deres.

³³ Siyamba si Jesus it muꞌsa ngayting magsasakay baw maat nira, “Kamatuudan nga Anak ka talaga it Ampuꞌang Diyus.”

³⁴ Pagkadipag nira, duꞌut Genesaret i piyadungguꞌan nira.

³⁵ Nakilalaan si Jesus it mga taw duꞌun. Ipiyamaritaꞌ-baritaꞌ nirang lagi duꞌun it mga katepadan nira nga miyabut si Jesus. Aypaꞌ ka nagsigꞌabut i mamagtataban it mga magsarut.

³⁶ Nagpasanguꞌ-sanguꞌ sira duꞌut ki Jesus nga maski diꞌkit, papadiꞌkiten it ipagkabit kat sagyaden it gulamen ya i mga magsarut ngayti. Talagang muꞌsa nga magkapadiꞌkit, gimnayen nga matuud ka mindek nay sarut nira.