Mateo 11 - Tagbanwa

Ingkut ni Juan baw tubag ni Jesus

¹ Pagkatupus ni Jesus it kumpur ipagkuꞌaat ya it sang puluꞌ may duwa ngayting mga alagad ya nga papanawun ya ngayti, napanaw na si Jesus it kanya ka mangadal siꞌ duꞌun it mga lansangan nga adeꞌdeng duꞌun.

² Ta si Juan ngayting uꞌna-uꞌnang namawtis nga pagpipirisuun na, nabaritaꞌan ya i mga bagay nga pagbuwaten ngayti ni Cristo. Aypaꞌ ka may piyapaꞌaduꞌun ni Juan nga mga alagad ya,

³ ka ipiyaꞌingkut ya nga magꞌaat, “Unu baꞌ, ikaw na i isiyanggup ngayan nga papaꞌasituun u melat kami paꞌ it beken?”

⁴ Katubag si Jesus, maat ya, “Muliꞌ kamu na duꞌun it ki Juan baw isugid mi duꞌut kanya i nagnegan mi baw naltegan mi,

⁵ nga magkalteg nay mga beleg, mamagkapanaw na i mga pilay, mindek nay bangbang it mga babangbangen, mamagkagneg nay mga bengel, mamagꞌegen it paꞌuliꞌ i maski patay na, baw ipagpangadal duꞌun it mga raꞌyat i Magayen ngaytu nga Baritaꞌ.

⁶ Talagang magkasagya nga banar i taw nga ega magduwa-duway pikir sabap it aken.”

⁷ Pagkagaring it mga alagad ngayti ni Juan, may inaat ni Jesus it kadaklan ngaytit mga taw pasar it ki Juan. Maat ya, “Iyan namagpaꞌaduꞌun kamu it ki Juan duꞌun it rugar nga kapupuyangtan, unuy pagtulusun mi duꞌun? Taw nga alang-alang, nga subuk rabung nga magduyug-duyug ka pagpesagen it deres? Simpri ega.

⁸ Unu baꞌ talagay kultegan mi duꞌun? Esang taw nga piyakamagayen i pakayan ya? Simpri ega gasiꞌ, sabap iyan baꞌ, atkaytu ngaytu nga taw, duꞌun lamang it pamalay-balay it adiꞌ.

⁹ Ta, unu baꞌ nga talaga i ireg mi nga maltegan duꞌun? Unu, esang prupitaꞌ? Eeꞌ baꞌ, temed ega desang prupitaꞌ kanya. Matuud tu i iꞌaat ku ngaytut imyu nga subraꞌ paꞌ talaga kanya it esang prupitaꞌ.

¹⁰ Sabap si Juan na ngaytu i pagpaꞌiguꞌan it ampang it Ampuꞌang Diyus ngayan nga isiyurat, nga magꞌaat, ‘Yay matuud, may taꞌgen ku nga makauꞌna it imu, ka asikasuun ya i panawan mu.’

¹¹ Matuud talagay iꞌaat ku ngaytut imyu, nga kat muꞌsa nga piyapagtaw situt banwa, ega pay limniꞌwan seked kayti nga kasubraꞌ it kataꞌasan ni Juan ngaytu nga uꞌna-uꞌnang namawtis. Temed kayti, maski raꞌyat basta pasakep kanyat kaꞌadiꞌan it Ampuꞌang Diyus, talagang kasubraꞌ paꞌ kanyat ki Juan ngaytu.

¹² Ka garing it pagpangadal ni Juan ngaytu nga uꞌna-uꞌnang namawtis seked kayti, talagang pagꞌapasen namen nga banar nga makalkep i kaꞌadiꞌan it Ampuꞌang Diyus, baw pagpatikesegan it mga taw i kapasakep kaytu.

¹³ Sabap iyan mga prupitaꞌ it tagnaꞌ baw iyan mga urdin nga garing duꞌun it Ampuꞌang Diyus, talagang magsugid sabap it kaꞌadiꞌan ya seked it may si Juan na ngaytu.

¹⁴ Baw in ireg mi nga pamayaꞌnen i kamatuudan, matantuwan mi nga si Juan ngaytu, pagtumanen yay isiyugid it prupitaꞌ nga paꞌuliꞌ siꞌ situ si Elias.

¹⁵ Ta it pagꞌargan it talinga, ipagpagneg, kaꞌilangan pagnegan mit magayen i pagꞌaaten ku ngaytu.

¹⁶ Ta unuy mapasbungan ku it mga taw kayti? Subung sira it mangaꞌwaꞌ nga mamagꞌaꞌdung duꞌun it kakalabtaꞌan baw paggaꞌuyan niray mga iba-iba nirat mamagkalabtaꞌ.

¹⁷ Pagꞌaaten nira, ‘Maski unuy buwaten namen, ega bayan mapakay mi. Pagtugtugan namen kamu temed daꞌkamu mamagbayliꞌ. Magkantaꞌ kami it pagkantaꞌen in magpanlebeng temed daꞌkamu mamagsugaw.’

¹⁸ Subung kamuy imyu it kanira, ka ega gasiꞌ magkapakay mi i maski unu. Sabap si Juan, magpuwasa kanya baw ega magꞌinum it irimnun nga kalalangu. Ta, pagꞌaaten it katataawan nga pagpapulpugun kanyat maraꞌe-raꞌet.

¹⁹ Bawnga aku, nga Taga Langit nga Ipiyanganak it Taw, magpakikaraꞌnen baw magꞌinum it pagꞌimnun ta. Ta, pagꞌaaten it katataawan, ‘Letganan mi bay iyang taw, saꞌbangan baw makuꞌinum, iba-iba kanya it mga malulupig nga manigpabayad it barayadan baw beken nga mga makasalaꞌan.’ Temed lamang atkayan, matanyag nga tamaꞌ naga i panulduꞌ namen ni Juan sabap it tanaꞌan ya kat pangaꞌgenan it mga magpamayaꞌ.”

Biyasul ni Jesus i mga ega namayaꞌ it kanya, maski naltegan niray mga kalililuꞌang bagay nga binwat ya

²⁰ Bawnga biyasul ni Jesus i mga taw duꞌun it mga lansangan nga binwatan yat dakel nga kalililuꞌang mga bagay. Biyasul ya sabap daꞌsira nagsinguliꞌ baw nangindiꞌ it mga kasalaꞌan nira.

²¹ Maat ya, “Abaa, subrang makuriꞌ talagay magꞌaꞌareg it imyu, nga mga taga Corazin baw taga Betsaida. Sabap in beteꞌ duꞌun lamang it Tiro baw Sidon, nga taw ya ega Judio, i binwatan it mga kalililuꞌan ngaytu nga binwat situt imyu, matuud nga naꞌlay na nga namagpakay it maꞌerep baw mamagꞌadung duꞌun it kaꞌabuwan i mga taga duꞌun, isaꞌun ipakilala nga magsinguliꞌ sira nga matuud.

²² Matuud tu talaga i iꞌaat ku ngaytut imyu, nga in asan nat aldaw nga ipangukuman, talagang subraꞌ paꞌ nga mabeꞌgat i ibetangan nga ukuman it imyu, subraꞌ paꞌ kat mga taga Tiro baw taga Sidon.

²³ Baw kamu, mga taga Capernaum, daꞌga baꞌ subuk nakarapat it langit i kataꞌasan mi? Temed ta, iꞌlug kamu lamang duꞌun it egay pasubraꞌ nga karigaan. Ka in beteꞌ duꞌun lamang it Sodoma it tagnaꞌ paꞌ i binwatan it mga kalililuꞌan ngaytung bagay nga binwat situt imyu, nagsinguliꞌ na sira it kasalaꞌan nira isaꞌun ega ranggaꞌen it Ampuꞌang Diyus i siyudad nira ngayti, naneꞌteꞌ paꞌ it seked kayti.

²⁴ Temed kamatuudan tu talagay iꞌaat ku ngaytut imyu, nga in asan nat aldaw nga ipangukuman, subraꞌ pang mabeꞌgat i panriga it imyu, subraꞌ paꞌ kat mga taga Sodoma.”

Siguradung begayan it kaꞌimbengan it nakem i mga pasakep it ki Jesus

²⁵ Kat iti nga timpu, nanalangin si Jesus nga maat ya, “Pagpasalamatan ku ikaw, Amaꞌ, ikaw nga Ampuꞌan it langit baw banwa, sabap itiyagu-taguꞌ muy itu nga mga kamatuudan isaꞌun ega matantuwan it mga magpataꞌas-taꞌas it sadiling kiyaꞌrutan baw pasepsep. Iyan i piyaꞌyagan mu, mga raꞌyat lamang nga may palulus.

²⁶ Matuud tu, Amaꞌ, ka iyan i ipiyabetang-betang mu nga kaꞌirgan mu.”

²⁷ Pagkapanalangin, maat ya siꞌ, “Ipiyagꞌintergaꞌ it aken it Amaꞌ ku i muꞌsang mga bagay. Egay magkakilala nga banar it Anak in daꞌga Amaꞌ lamang. Baw ega gasiꞌ i magkakilala it Amaꞌ in daꞌga Anak, baw in siyu-siyu nga piliꞌen it Anak ngaytu nga paꞌyagan ya pasar it Amaꞌ.

²⁸ Padangep kamu situt aken, kamung muꞌsa nga nalpuꞌan baw magkakuriꞌan ka subuk mabeꞌgat nga pirisiꞌen i mga ugaliꞌ baw pagliꞌyan mi. Mamayaꞌ baw sumarig it aken ka papaꞌnaen ku kamu.

²⁹ Pasakep kamut aken nga manigtulduꞌ mi baw magꞌadal kamu situt aken, sabap mapiyalulus baw mapiyababaꞌ aku. Basta aku i pagpamayaꞌnen mi, siguradung maꞌimyu i kaꞌimbengan it nakem.

³⁰ Sabap talagang ega magpakuriꞌ it imyu i mga panulduꞌ ku baw ega naga makuriꞌ nga buwaten i mga ipagsekat ku.”