Mateo 10 - Tagbanwa

Piyapanaw ni Jesus i sang puluꞌ may duwa nga mga alagad ya ka mangadal sira

¹ Kaꞌsa, tiningped ni Jesus i mga alagad ya, ka piyamgayan ya sira it pudir nga ipagkaꞌimugaw it mararaꞌe-raꞌet kat mga taw nga pagpapulpugun, baw makapagayen it maski unu nga kalasit sarakiten.

² Ituy mga ngaran it sang puluꞌ baw duwa ngayting mga alagad ni Jesus. Si Simon nga esang paggetaꞌen nga ngaran ya, si Pedro, baw si Andres nga sulsug ni Simon ngayti, si Santiago baw si Juan nga mga anak ni Zebedeo,

³ si Felipe, si Bartolome, si Tomas baw si Mateo nga manigpabayad na ngayti it barayadan duꞌut gubirnu, si Santiago nga anak ni Alfeo, si Tadeo,

⁴ si Simon nga Cananeo baw si Judas Iscariote, nga iti na nga taw, mabut i timpu nga kanyay bayaꞌen it mga kuꞌimatay it ki Jesus.

⁵ Piyapanaw ni Jesus i sang puluꞌ may duwa ngayting mga alagad ya baw tinggunan ya, nga magꞌaat, “Iyan ayaw kamut aduꞌun it rugar it mga taw nga ega Judio, u maski ari nga lansangan it mga Samaritano.

⁶ In daꞌga iyan i aduꞌunun mi, mga kabanwa ta nga Judio, nga kabilangan nira, tupa nga naꞌlam.

⁷ Mapanaw kamu ka ipangadal mi i adeꞌdeng na ngaytu nga kaꞌadiꞌan it Ampuꞌang Diyus.

⁸ Pagayenen mi i mga magsarut baw egnen mi i maski patay na. Pagayenen mi i mga babangbangen baw pangimugawun mi i mga mararaꞌe-raꞌet kat pagpapulpugun nira. Ta it tiyanggap mi i atkaytung ildaw it egay babayad, ipamgay mi gasiꞌ i tabang mi it ega kaꞌman bayadan.

⁹ Ayaw kamut pagbalun it ipagꞌalang, maski bulawan, pirak u tumbaga.

¹⁰ Ayaw kamu gasiꞌ it pamiri-pirisiꞌen kat panaw mi ngaytu. Ayaw kamut taban it iꞌimaraꞌnan, u panggaganti it talumpaꞌ baw sungkud. Arigraen kamu yan it mga pagtabangen mi ngaytu, sabap bagay it manigbuwat i gastuꞌan.

¹¹ Ta maski ari nga lansangan u baryu i abutan mi, iyan i tulusun mi, taw nga magayen i adat nga magꞌistimar it imyut magayen. Duꞌun i istaran mi mintras duꞌun kamu it iti nga rugar.

¹² Pagseled mi kat balay, aaten mi nga, ‘Sana maꞌimyu i kaꞌimbengat nakem nga ipagbegay it Ampuꞌang Diyus.’

¹³ Ta, makaniraytu nga matuud basta pamayaꞌnen niray panulduꞌ mi, temed in ega, ta ega naga.

¹⁴ Baw in siyu-siyu nga ega tumanggap it imyu baw pagneg it ipagpanulduꞌ mi, paggaring mi duꞌun it iti nga balay u lansangan, tagtagen mi i kapu-kapu asat mga aꞌay mi, nga imandaꞌan it, mga taw duꞌun nga ega namayaꞌ, ipagpabetang nat Ampuꞌang Diyus nga ega na taawan ya.

¹⁵ Talagang matuud tuy iꞌaat ku ngaytut imyu nga in asan nat aldaw nga ipangukuman, subraꞌ paꞌ nga mabeꞌgat i panriga it iti nga mga taw duꞌun it iti nga lansangan, subraꞌ paꞌ kat labayen it mga taga Sodoma baw taga Gomorra.”

Mga mamagsunud it kaꞌirgan it Ampuꞌan, pakuriꞌan sira it mga ega namayaꞌ

¹⁶ Maat paꞌ ni Jesus, “Ta kayti, pagtaꞌgen ku kamu nga subung kamu it mga tupa kat reet-reet it mga bunglun. Aypaꞌ kaꞌilangan maꞌulu kamu nga subung it mga dukul baw magnek nga subung it mga kalapatiꞌ.

¹⁷ Magꞌintur kamu nga banar, sabap may mga taw yan nga dumakep it imyu ka iꞌintergaꞌ duꞌun it mga manigꞌukuman. Bawnga ripdasan kamu duꞌun it papagsambaan nira.

¹⁸ Talagang sabap it pagsunud mit aken, ipaꞌadap kamu yan duꞌun it mga gubirnadur baw duꞌun it mga adiꞌ. Ta pamatuud kamu yan it Magayeng Baritaꞌ duꞌun it adapan nira baw duꞌun it mga taw nga ega Judio.

¹⁹ Basta pagsumaryaen kamu na, ayaw kamut kasusa in unuy itubag mi u ampangen mi. Ka siguradu yan nga tumbaw kat nakem mi i ampangen mi.

²⁰ Sabap ega yan kamu i mampang kat sadili mi, in daꞌga Espiritu Santo nga taꞌgen it Amaꞌ mi nga duꞌut langit, kanya yan i panakem it imyu it in unuy ampangen mi.

²¹ Talagang sabap it aken, sulsug ya nga namayaꞌ na ipaꞌimatay it sulsug ya nga egay pamayaꞌ. Atkayan naga i buwaten it amaꞌ it sadili ya nga anak. Baw labanen it anak i giyaringan ya nga namayaꞌ na. Ega desang labanen, ipaꞌimatay ya paꞌ.

²² Talagang isgan kamu it muꞌsang taw sabap it pamayaꞌ mit aken. Temed in siyu-siyuy maneꞌteꞌ i pamayaꞌ yat aken seked naꞌbut nay umur, siguradung maribri yan kanya.

²³ Ta in pakuriꞌan kamu duꞌun it esa nga lansangan, malagyu kamu duꞌun it sunud ya. Sabap matuud talagay iꞌaat ku ngaytut imyu, nga ega paꞌ natiwas mi i buwat mi nga magpangadal duꞌun it kada lansangan it mga Judio, mabut aku na nga Taga Langit nga Ipiyanganak it Taw.

²⁴ Dedemdemen mi tu, nga basta alagad, simpri ega mataꞌas paꞌ kanya it manigtulduꞌ ya. Atkayan nagay uripen, ega gasiꞌ mataꞌas kat agalen ya.

²⁵ Ta, it aku nga Ampuꞌan mi, pagtaꞌwagen nira nga si Beelzebub, nga pagbayaꞌen it mga mararaꞌe-raꞌet, ta simpri kamu nga mga taawan ku, magꞌuꞌunu paꞌ ipabetang nira it magayen? Talagang regda-regdaen nira nayan kamu.

²⁶ Temed ayaw kamut iꞌlam it mga magpakuriꞌ ngaytut imyu. Sabap maski ipagtagu-taguꞌ nga pagbuwaten, daꞌgay-daꞌga ipalbaw in asan nat pangukuman. Eeꞌ baꞌ, egay pagbuwaten kat lingeb nga ega mayagyag.

²⁷ Iyan mga ipagꞌaat kut imyu nga kamu lamang i pagtulduꞌan ku, kaꞌilangan nga ipatantu mi kat muꞌsang katataawan. Mga panulduꞌ ku nga kamu lamang i nakagneg, ipangadal mi na duꞌun it kadaklan.

²⁸ Ayaw kamut iꞌlam it taw nga magꞌimatay it bilug, temed ega magkaꞌimatay it kiyarurwa. Iyan talagay iꞌlaman mi, Ampuꞌang Diyus, nga kanya i magkaranggaꞌ it kiyarurwa baw bilug duꞌun it apuy nga ega magpamu-pamugdaw.

²⁹ Ka daꞌga baꞌ ipagpaꞌalang i dignes it pirang sintabus lamang i duwang batu? Ta maski atkayan na nga kabaratu, maski esa it kanira egay magkaꞌulug situt lugtaꞌ in ega pabetang-betang it Amaꞌ mi nga duꞌun it langit.

³⁰ Temed subraꞌ nga pagrarasan ya kamu. Kamatuudan, maski buꞌuk mi, pagbibilangen ya na nga muꞌsa.

³¹ Aypaꞌ ayaw kamut iꞌlam, ka subraꞌ kamu paꞌ it sang paenan nga dignes.

³² Yay matuud, in siyu-siyu nga magkilala it aken kat adapan it kadadaklan it taw, kilalaen ku gasiꞌ kanya duꞌun it adapan it Amaꞌ ku nga duꞌun it langit.

³³ Temed in payluwan ya aku kat adapan it mga taw, payluwan ku naga kanya duꞌun it adapan it Amaꞌ ku nga duꞌut langit.

³⁴ Kaꞌilangan ega pikiren mi nga inasitu ku, tumaban akut kaꞌimbengan nga isaꞌun urunyun nay katataawan situt banwa. Sabap may mamayaꞌ it aken, iyan beken ega. Aypaꞌ subuk basiꞌ i taban kut naꞌasitu ngaytu, ka daꞌe-daꞌegen i liꞌwan ya.

³⁵ Sabap inasitu ku isaꞌun papagkuntraꞌen i namayaꞌ na baw daꞌga, anak nga lalaki baw amaꞌ ya, anak nga babay baw inaꞌ ya, miyagad baw punyangan ya.

³⁶ Talagang kalaban it esang taw, kat seled naga it pamalay-balay ya.

³⁷ Iyan taw nga subrang pagmaꞌalen yay amaꞌ u inaꞌ ya, nga subraꞌ paꞌ it pagmaꞌal yat aken, ega mapakay kanya nga taawan ku. Baw iyan magmaꞌal it anak ya nga subraꞌ paꞌ it pagmaꞌal yat aken, ega mapakay kanya nga taawan ku.

³⁸ Baw in siyu nga ega pasaꞌnen yay kanyang krus ka sumunud nat aken, talagang ega mapakay kanya nga taawan ku.

³⁹ Ka iyan magraras nga banar it kaꞌgenan ya, maꞌlam nagaytu it kanya, temed iyan temeꞌteꞌ it aken maski maat ikagtas na it ginawa ya, makanya talagay kaꞌgenan nga ega basta-basta.”

Tumbasan i kumpur magtabang it mga mamagsunud it kaꞌirgan it Ampuꞌang Diyus

⁴⁰ Pangiyaꞌpusan it ipagpanulduꞌ ngaytu ni Jesus, maat ya, “Iyan talaga magtanggap baw mistimar it imyu, magtanggap gasiꞌ yan it aken. Baw iyan magtanggap it aken, pagtanggapen ya gasiꞌ i Ampuꞌang Diyus nga nagtaꞌeg it aken it paꞌasitu.

⁴¹ Iyan tumanggap it esang manigpangadal it ampang it Ampuꞌang Diyus sabap pagkilalaen ya nga Ampuꞌan nagay nagtaꞌeg it kanya it mangadal, siguradung tumbasan kanya nga subung it itumbas it manigpangadal ngayti. Baw iyan gasiꞌ tumanggap it esang taw nga magayen i adat baw istimaren yat magayen sabap pagkilalaen ya nga itung taw, makusunud it kaꞌirgan it Ampuꞌang Diyus, siguradung tumbasan kanya it itumbas kat taw nga magayen i adat.

⁴² Talagang in siyu nga megay it maski sang basung danu-danum na lamang nga maꞌinum it esa nga magsunud it aken, maski maat raꞌyat na lamang i paꞌimnun ya ngayti, kamatuudan tu nga iꞌaat kut imyu, nga siguradung tumanggap kanya it tumbas.”