Mateo 1 - Tagbanwa

Kagiyaringanan ni Jesu-Cristo

¹ Itu i kagiyaringanan ni Jesu-Cristo nga nanggaring kat mga tungtung-inapuꞌ ni David, nga egay beken nga kiyaꞌapuꞌ-apuꞌan, si Abraham.

² Si Abraham i amaꞌ ni Isaac. Si Isaac i amaꞌ ni Jacob, nga iyan i amaꞌ ni Juda sang siraan magsusulsug.

³ Makaꞌasawa si Juda, si Tamar. Manganak sira, si Fares baw si Zara. Si Fares i amaꞌ ni Esrom, baw si Esrom i amaꞌ ni Aram.

⁴ Si Aram i amaꞌ ni Aminadab. Si Aminadab i amaꞌ ni Naason, nga iyan i amaꞌ ni Salmon.

⁵ Makaꞌasawa si Salmon, si Rahab. Manganak sira, si Booz. Makaꞌasawa si Booz, si Ruth. Manganak sira, si Obed. Ta si Obed i amaꞌ ni Jesse,

⁶ nga si Jesse i amaꞌ it adiꞌ nga si David. Anak ni David, si Solomon, duꞌun it siyubli ya nga asawa ni Urias.

⁷ Si Solomon i amaꞌ ni Roboam. Si Roboam i amaꞌ ni Abias, baw si Abias i amaꞌ ni Asa.

⁸ Si Asa ngaytu i amaꞌ ni Josafat, nga iyan i amaꞌ ni Joram. Amaꞌ ni Ozias si Joram ngaytu.

⁹ Baw siꞌ nga amaꞌ ni Jotam si Ozias. Amaꞌ ni Acaz si Jotam, baw si Acaz i amaꞌ ni Ezequias.

¹⁰ Si Ezequias, amaꞌ ni Manases baw si Manases, amaꞌ ni Amos, nga amaꞌ ni Josias.

¹¹ Si Josias i amaꞌ ni Jeconias sang siraan magsusulsug. Iting timpu, diyakepan it mga taga Babilonia i mga Israelita.

¹² Pagkadakepan ngaytit mga Israelita, nga piyabayaꞌ na sira duꞌun it Babilonia, nanganak na Jeconias it ki Salatiel, nga amaꞌ ni Zorobabel.

¹³ Si Zorobabel ngaytu i amaꞌ ni Abiud, nga iyan i amaꞌ ni Eliaquim, baw si Eliaquim i amaꞌ ni Azor.

¹⁴ Si Azor i amaꞌ ni Sadoc, nga iyan i amaꞌ ni Aquim. Si Aquim ngaytu i amaꞌ ni Eliud.

¹⁵ Bawnga si Eliud, amaꞌ ni Eleazar. Si Eleazar i amaꞌ ni Matan. Baw si Matan, amaꞌ ni Jacob.

¹⁶ Si Jacob, amaꞌ ni Jose nga asawa ni Maria. Si Maria i inaꞌ ni Jesus nga pagtaꞌwagen it Cristo.

¹⁷ Aypaꞌ kapuꞌsaan, sang puluꞌ may epat nga pagtungtung-pagꞌinapuꞌ garing it ki Abraham seked it ki David. Sang puluꞌ may epat gasiꞌ garing it ki David seked it diyakepan it mga taga Babilonia i mga Israelita. Baw sang puluꞌ may epat gasiꞌ garing it pagkadakepan ngayti seked it ipiyanganak nay Cristo.

In magꞌuꞌunu ipiyanganak si Jesu-Cristo

¹⁸ Atkaytu yan i kapanganakan it ki Jesu-Cristo. Si Maria ngayti nga yanay paꞌaaten nga inaꞌ ya, naꞌupakat nay pagꞌasawa nira duwa ni Jose temed ega paꞌ naꞌubus, alwan paꞌ. Ta lamang daꞌsira paꞌ nakapagdemket, mamuyaan, magdarugmatiꞌ na si Maria ngayti. Miyatkayti ka kat keseg it Espiritu Santo.

¹⁹ Ta, si Jose ngayting magpangasawa, makubuwat it mataldeng, aypaꞌ ka pasurutan ya na lamang. Temed paribasay nakman kanya nga taw, nga ega ireg yang maꞌeyaꞌan si Maria, pagpikiren ya nga ega na ipadakel-dakel.

²⁰ Iyan pagpikiren na ni Jose i iti ngayti, nga in unuy magayeng buwaten ya, nanagaynep kanya, nga sakaling may miyabut nga anghil it Ampuꞌang Diyus. Magpaꞌa-paꞌaat it kanya, “Jose, nga tungtung-inapuꞌ ni David, ayaw kat pasurut. Tabusun muy pangasawa mut ki Maria. Ka iyan pagdarugmatiꞌen ya ngayan, kat keseg yan it Espiritu Santo.

²¹ Lalaki yan i sumakit. Si Jesus i ipangaran mu, sabap kanya i rimibri it mga taawan ya kat mga kasalaꞌan nira.”

²² Nagꞌabut tuy muꞌsa ngaytu isaꞌun matuman i ipiyasugid it Ampuꞌang Diyus it esang prupitaꞌ, nga magꞌaat,

²³ “Dumarugmatiꞌ i esang umba-umbay paꞌ nga ega paꞌ nakalabay it lalaki. Sumakit nga anak ya, lalaki. Taꞌwagen kanya nga Emmanuel (nga ireg sugiden, kaꞌiba-iba tami na i Ampuꞌang Diyus).”

²⁴ Pagkasulag ni Jose, piyamayaꞌ ya naga i inaat ngaytit anghil it Ampuꞌang Diyus. Tiyabus ya nagang inasawa si Maria ngayti.

²⁵ Temed ega riniꞌe-riꞌeng ni Jose si Maria seked it ega paꞌ simnakit i pagbebtengen ya ngayti, nga si Jesus na ngayti i ipiyangaran ya.