Marcos 7 - Tagbanwa

Mga siyubli-subli nga panulduꞌ nga ega uyun it urdin it Ampuꞌang Diyus

¹ Kaꞌsa may mga Pariseo baw mga manigpaꞌyag it urdin, nga garing duꞌut Jerusalem, nga naꞌaduꞌun it ki Jesus.

² Naltegan nira nga iyan beken nga mga alagad ni Jesus, mamagkaꞌen it ega nakapangugas it alima nga uyun duꞌun it siyubli-subli nirang ipagpanulduꞌ, nga maat magpalimpiyuꞌ kat panleteg it Ampuꞌang Diyus.

³ Ka mga Judio, subraꞌ na in mga Pariseo, ega kumaꞌen basta ega nakapangugas it alima uyun duꞌun it kaꞌugaliꞌan nga siyubli-subli nira kat mga kamagugurangan nira.

⁴ Ega gasiꞌ basta-basta kumaꞌen sira in garing duꞌun it mga manigdagang it ega daꞌan mangugas it alima it atkayti naga ngayti, ka barang nakadiꞌkit sirat ipagkapabetang it kanira nga maraꞌway kat panleteg it Ampuꞌang Diyus. Baw dakel paꞌ nga mga kaꞌugaliꞌan nga siyubli-subli nira nga dapat gasiꞌ nga sunudun, nga subung it in magꞌuꞌunuy pangugas it mga iꞌimnan, mga pitsel baw mga kurun.

⁵ Aypaꞌ ka iningkut si Jesus it mga Pariseo baw mga manigpaꞌyag ngaytit urdin. “Unuka,” maat nira, “ega pagsunudun it mga alagad mu ngayan i mga siyubli-subli tami nga kaꞌugaliꞌan? Kimnaꞌen sira it ega daꞌan nangugas it alima uyun duꞌun it siyubli-subli ta ngayti.”

⁶ Katubag si Jesus, “Talagang matuud i isiyugid ni Isaias ngayting prupitaꞌ it tagnaꞌ pasar it imyu. Magbete-beteꞌ kamu lamang nga magpamayaꞌ it Ampuꞌang Diyus, subung nat isiyurat ya ngayan nga ampang it Ampuꞌang Diyus nga magꞌaat, ‘Pagsirbi baw pagsamba it aken it itung mga taw, kat munung nira lamang, nga egay kamatuudan nga pagmaꞌal nirat aken.

⁷ Talagang egay kapulusan it pagsamba nirat aken. Ka iyan ipiyagꞌurdin it taw lamang, ipagpabetang na nira nga urdin na kunuꞌ it Ampuꞌang Diyus.’

⁸ Matuud nga pagꞌindiꞌan mi na i mga urdin it Ampuꞌang Diyus, ka yanay ipiyatindeg mi nga pagsunudun, mga siyubli-subli mi ngaytu nga ipagpanulduꞌ, nga paꞌiguꞌ-iguꞌ lamang it taw.”

⁹ Maat pay beken nga inaat ni Jesus, “Kagayen it paꞌiguꞌ-iguꞌ mi, nga in magꞌuꞌunu magkaꞌawaꞌ mi i keseg it urdin it Ampuꞌang Diyus isaꞌun lamang masunud mi i ipagpanulduꞌ nga siyubli-subli mi.

¹⁰ Ka subung nat inaat it itung urdin it Ampuꞌang Diyus nga isiyurat ni Moises, ‘Galangen muy amaꞌ baw inaꞌ mu,’ baw, ‘In siyu-siyuy mampang it maraꞌe-raꞌet kat amaꞌ u inaꞌ ya, u limibak it kanira, bagay it kanya imatayen.’

¹¹ Temed ipagpanulduꞌ mi nga basta inaat it esang taw i amaꞌ u inaꞌ ya, ‘Ta, ega na bay makabgay ku nga ipagꞌepet kut imyu, ka Corban na yan,’ nga ireg sugiden, begay ku duꞌun it Ampuꞌang Diyus,

¹² ega na ipagpaꞌintulut mi nga mepet paꞌ kanya it mga giyaringan ya.

¹³ Kat iyan nga kaꞌulugan, talagang ampang it Ampuꞌang Diyus, paggantiyan mi na it mga siyubli-subli mi ngaytu. Baw talagang dakel paꞌ nga mga bagay nga subung nat mga iyan ngayan nga pagbuwaten mi.”

¹⁴ Piyatpad siꞌ ni Jesus i kadakel baw maat ya, “Pagneg kamu nga muꞌsa baw sepsepen mi i pagꞌaaten ku.

¹⁵ Ega iyan magseled kat baꞌbaꞌ it taw i magparaꞌway it kanya kat panleteg it Ampuꞌang Diyus, in daꞌga iyan ampang nga maraꞌe-raꞌet nga magliꞌwan kat baꞌbaꞌ ya.

¹⁶ Ta it pagꞌargan it talinga, ipagpagneg, kaꞌilangan nga pagnegan mit magayen i pagꞌaaten ngaytu.”

¹⁷ Pagkatupus ni Jesus, timnanan na duꞌut mga taw ngayti. Iyan duꞌun na sirat mga alagad ya ngaytit balay, iningkut nira kanya sabap it alimbawa ya ngayti.

¹⁸ “Unu baꞌ, pati kamu,” maat ni Jesus, “ega gasiꞌ i kasepsep? Unu, ega magkaꞌrutan mi nga ega magparaꞌway it taw kat panleteg it Ampuꞌang Diyus i pagkaꞌnen ya?

¹⁹ Sabap ega naga magseled yan kat nakem ya, in daꞌga duꞌun yan it tinaꞌi ya, bawnga limiꞌwan siꞌ.” Kat iti nga sugi-sugid ni Jesus, subuk ipagpatantu ya na nga mapakay nang kaꞌnen i muꞌsang pangaꞌen.

²⁰ Ipiyasigi na ni Jesus i ampang ya, nga maat ya, “Iyan karaꞌe-raꞌetan nga kat nakem nga magliꞌwan kat baꞌbaꞌ it taw, yanay magparaꞌway it kanya kat panleteg it Ampuꞌang Diyus.

²¹ Sabap magpanggaring kat nakem it taw i muꞌsang maraꞌe-raꞌet nga pagpikiren, nga magtaban it taw kat mga itu ngaytung pagbuwaten. Esa, iyan pagbuwaten nang lagi it ega paꞌ nagꞌasawa i nagꞌasawa lamang i mapakay nga muwat. Baw mga itu paꞌ gasiꞌ, panakaw, pangimatay,

²² pamakun duꞌun it ega asawa mu, kaꞌingarum baw beken pang karaꞌe-raꞌetan nga subuk pangakal, pagsumbayaꞌ it kaꞌiꞌirgan nga maraꞌway it egay maski unu nga pagsupil it sadili, kaꞌinggit, panibabaꞌ, pataꞌas-taꞌas, baw ega pagpaꞌabwatayen i pikir.

²³ Muꞌsa ngaytu, magpanggaring kat nakem it taw, baw iyan nay magparaꞌway it kanya kat panleteg it Ampuꞌang Diyus.”

Nandangep i esang babay nga ega Judio, ka pagpapulpugun it maraꞌe-raꞌet i anak ya

²⁴ Liminꞌid siꞌ na Jesus duꞌun kayti. Naꞌaduꞌun sira it rugar nga adeꞌdeng it Tiro. Pagꞌabut nira duꞌun, may napaꞌabutan nira nga balay. Ega sana ireg ya nga maꞌrutan it maski siyu nga duꞌun kanya. Temed ega maat atkayti i biyaraꞌan.

²⁵ Ka nabaritaꞌan nga lagi it esang babay, nga babay ngayti, pagpapulpugun it maraꞌe-raꞌet i anak yang baa-babay. Pagkabaritaꞌ ya, naꞌaduꞌun kanya nga lagi it ki Jesus. Pagꞌabut ya, nanluud kanya duꞌun it sarungaan ni Jesus.

²⁶ Iti nga babay, ega Judio. Duꞌun i siyakitan ya it Sirofenicia. Ipagꞌabang ya it ki Jesus nga imugawun i maraꞌe-raꞌet nga magpapulpug it anak ya ngayti.

²⁷ Temed katubag si Jesus, “Kaꞌilangan nga paꞌgenan daꞌan i mga anak. Ega mapakay nga agawun i pagkaꞌnen it mga anak ka ibuntal duꞌun it mga keꞌdeng nira.” Ireg yang sugiden, mga Judio daꞌan i pagꞌaduꞌunan ya. Ega paꞌ mga ega Judio.

²⁸ “Matuud bayan, Ampuꞌan,” tubag it babay ngayti. “Temed daꞌga baꞌ mga keꞌdeng nga duꞌut sirib it papangaꞌnan, mamagpanimuruk it muꞌmuꞌ nga magkaꞌulug in magkaꞌen i mga anak?”

²⁹ Mampang siꞌ si Jesus, maat ya, “Sabap it inampang mu ngayan, mapakay na nga muliꞌ ka. Linꞌidan nat maraꞌe-raꞌet i anak mu.”

³⁰ Pagkagneg it babay ngayti, miyuliꞌ na. Abutan ya, magpaeꞌpey na duꞌun it irigaꞌan i waꞌwaꞌ ngayti, ka nagliꞌid nay magpapulpug ngayting maraꞌe-raꞌet.

Piyagayen ni Jesus i esang taw nga bengel baw usal paꞌ

³¹ Iyan panguliꞌ na ni Jesus nga garing ngayti duꞌut rugar nga sakep it Tiro, namsag kanya duꞌun it Sidon, bawnga limnangbus duꞌun it Lapnaw it Galilea. Pinsag ya gasiꞌ i rugar nga pagpangaranat Decapolis.

³² Tiyaban duꞌun it ki Jesus i esang lalaki nga bengel baw usal paꞌ. Ipagꞌabang it kanya nga tapalen yay iti nga taw.

³³ Binwat ni Jesus, diyaran ya duꞌun it ala-alaid it kadadaklan bawnga iriyuꞌuk yay tutulduꞌ ya duꞌun it talinga it taw ngayti. Bawnga mimbur, ka piyaꞌidan yay dilaꞌ.

³⁴ Yimnaꞌngad si Jesus duꞌut langit baw nangginawa it maꞌber kat kadakulat sanguꞌ ya. Baw maat yat taw ngayti, “Effrata!” nga ireg sugiden, “Paꞌabriyen!”

³⁵ Ta, liminngaw nga matuud, magkagneg nay taw ngayti. Baw naꞌawaꞌ nay magpaꞌusal it kanya. Taranꞌuy nay ampang ya.

³⁶ Ipiyagbenge-bengel ni Jesus it kanira nga egay maski siyu nga sugidan. Temed subraꞌ ga nga ipiyamaritaꞌ-baritaꞌ it mga biyenge-bengelan ya ngayti.

³⁷ Talagang mamagkaliluꞌ i mamagkagneg. Maamaatan sira, “Magayen talaga i muꞌsa nga pagbuwaten ya! Magkapalngaw ya i talinga it bengel baw magkapaꞌampang yay buyun!”