Marcos 5 - Tagbanwa

Piyagayen ni Jesus i esang Geraseno nga pagpapulpugun it maraꞌe-raꞌet

¹ Nagpadungguꞌ na Jesus duꞌun it sang dipag it Lapnaw ngaytit Galilea. Mga Geraseno i mga taw ya duꞌun kayti.

² Magkalampud si Jesus duꞌun it sakayan, pagsusmuun kanya it taw nga garing duꞌun it kalelbengan nga pagpapulpugun it maraꞌe-raꞌet.

³ Duꞌun nat kalelbengan i taꞌid it iting taw. Baw talagang maski kadina i ibayuk it kanya, daꞌga magkaꞌaid.

⁴ Kapira-pira na kanya panglawan baw yanayti pagbayukun nat kadina, temed pagbugtuꞌ-bugtuꞌun yay kadina baw pagbariꞌ-bariꞌen yay ipagpanglaw ngaytit kanya. Talagang ega nay magkaꞌaid it kanya.

⁵ Delem-aldaw i kurisang ya duꞌut kalelbengan baw duꞌun it kamumungsuꞌan, baw pagbungadan ya nat batu i bilug ya.

⁶ Alaid paꞌ, nalawag nat taw ngayti si Jesus. Magpapalagyu kanya nga minlep. Pagꞌabut ya, simnuꞌsub kanya duꞌut sarungaan ni Jesus.

⁷ Ipiyaggaꞌuy ya na, nga magꞌaat, “Jesus, nga Anak it Ampuꞌang Diyus nga Subrang Piyakamataꞌas, unuy lalabeten mut aken? Sumumpa ka it pagdedngegen it Ampuꞌang Diyus nga ega pakuriꞌan mu aku!”

⁸ Inampang yay atkayti ka inaat na ni Jesus i maraꞌe-raꞌet ngayting magpapulpug, “Magliꞌid ka na situt taw ngaytu!”

⁹ Iningkut kanya ni Jesus, maat ya, “Siyuy ngaran mu?” Maat i tubag it maraꞌe-raꞌet ngayti, “Sangbulyugan, ka talagang dakel kaming magpapulpug kaytu.”

¹⁰ Bawnga sigi nga magpasanguꞌ-sanguꞌ nay maraꞌe-raꞌet ngayti duꞌun it ki Jesus nga daꞌsira naga imugawun duꞌut iti nga rugar.

¹¹ Ta, duꞌun it langbus nga mungsuꞌ may pagpasarapen it mga manigꞌeper nga paenan nat beyeꞌ.

¹² Nagpasanguꞌ-sanguꞌ siꞌ duꞌut ki Jesus i mga maraꞌe-raꞌet ngayti. Maat nira, “Pataꞌnan mu lamang kami nga manindak duꞌut mga beyeꞌ ngayti.”

¹³ Piyalugtan sira ni Jesus. Egay beken, nagliꞌid na sira duꞌun it taw ngayti, baw nagpaꞌugad na duꞌut paenan ngaytit mga beyeꞌ. Ta, unupat namagpalagyu nay mga beyeꞌ ngayti, nga mga duwang ribu i kadakel nira, it nandiritsu duꞌun it matingpas nga tambing it lapnaw ngayti. Namagkataptap na, napuꞌsa sirat kalmes.

¹⁴ Pagkamuyat mga manigꞌeper it mga beyeꞌ ngayti, mamagpapalagyu i magpanugid-sugid duꞌun it lansangan baw duꞌut mga babalayan nga adeꞌdeng. Pagkaꞌrut it mga taw, namagꞌaduꞌun na sira isaꞌun maltegan niray kamatuudan it pagsugiden ngayti.

¹⁵ Pagꞌabut nira, minlep sira duꞌut ki Jesus. Naltegan nira nga magꞌaꞌdung na i taw ngayti nga pagpapulpugun it maraꞌe-raꞌet. Magpapakay na baw tarunus nay pikir. Inabut it iꞌlam i kadakel ngayti baw naliluꞌ sirang banar.

¹⁶ Ipiyagtuturan it mga namagkalteg i biyaraꞌan it taw ngayti nga pagpapulpugun it maraꞌe-raꞌet, baw nabetangan it mga beyeꞌ gasiꞌ.

¹⁷ Pagkagneg it mga katataawan ngayti, inupakat nira si Jesus it maseked-seked nga ega magtinir kanya duꞌun it rugar nira ngayti.

¹⁸ Iyan maggagaring na na Jesus nga sumakay, inupakat kanya it taw ngayti nga piyagayen ya nga pabayaꞌen na kanya.

¹⁹ Temed ega minireg si Jesus. Maat gay inaat ya, “Magayen siguru, muliꞌ ka na duꞌut imyu, ka ituturan mu nat mga kaꞌibaan mu duꞌun i muꞌsa nga binwat it imu it Ampuꞌan baw in magꞌuꞌunu siyanguꞌan ya ikaw.”

²⁰ Aypaꞌ napanaw nay taw ngayti. Ipiyanuturan-tuturan ya na duꞌun it sang puluꞌ nga kalansanganan duꞌut rugar nga pagpangaranan it Decapolis i binwat ngayti ni Jesus it kanya. Mamagkaliluꞌ i muꞌsa nga magkatuturanan ya.

Piyagayen ni Jesus i esang babay nga may sarakiten baw inggen yay esang waꞌwaꞌ nga natay

²¹ Ta, na Jesus ngayti, simnakay siꞌ it nagpaꞌuliꞌ duꞌut sang dipag it lapnaw ngayti. Magkategday kanya duꞌun it binit, riyamu siꞌ kanyat katataawan.

²² May miyabut nga esang taw nga pagpangaranat ki Jairo. Esa kanya nga magpamaalaꞌ it papagsambaan. Pagkalteg yat ki Jesus, pagdarmuk, nanluud kanya duꞌun it sarungaan ni Jesus ngayti,

²³ baw nagpasanguꞌ-sanguꞌ nga magꞌaat, “Kubugtuꞌ-bugtuꞌ na bayti i ginawat anak kung babay. In mapakay lamang it imu, mayaꞌ ka it aken, ka tapalen mu kanya isaꞌun medek nagay sarut ya, nga maꞌgen naga kanya.”

²⁴ Egay beken, miyayaꞌ si Jesus it kanya. Dimnasun nagay kadaklan ngayti it taw, nga mamagdiꞌre-diꞌreten na sira, nga magkadedeg nira na si Jesus.

²⁵ May esa gasing babay duꞌun nga sang puluꞌ may duwang taꞌun na nga pagduguꞌun it ega na ugaliꞌ.

²⁶ Talagang makuriꞌ nay kabetangan ya. Dakel na nga manigꞌubaꞌubat i piyaꞌubaꞌubat ya. Talagang dakulaꞌ nang pagsagkaꞌen ya kat mga pangubaꞌubat ngayti, baw magkaꞌubus nay kusas ya it katatangdan. Temed imbis nga gumayen, magꞌeget ga.

²⁷ Nagne-nagnegan ya i pamagrundingen it mga katataawan pasar it ki Jesus. Aypaꞌ binwat ya, inres ya nga nakapaꞌadeꞌdeng duꞌut talikudan ni Jesus. Ipiyadiꞌkit yay alima ya duꞌun it pakayan ni Jesus.

²⁸ Sabap kat nake-nakem ya nga, “Maski diꞌkit, makadiꞌkit akut pakayan ya ngayan, siguradung medek naytuy sarakiten ku ngaytu.”

²⁹ Pagkadiꞌkit yang matuud, subuk tiyabtab i duguꞌ ya ngayti. Natanudan ya nga mindek nay sarakiten ya ngayti.

³⁰ Temed natanudan ni Jesus nga may keseg it guna ya nga gimnaring duꞌut kanya. Naglised kanya baw miningkut it mga taw ngayti. Maat ya, “Siyuy nagpadiꞌkit sinit pakayan ku?”

³¹ “Taꞌway,” maat it mga alagad ya ngayti. “Takaꞌ unu bayan ka ingkutun mu paꞌ in siyuy nagpadiꞌkit it pakayan mu, it ungaytu na, mamagdiꞌre-diꞌreten nay mga taw ngaytu?”

³² Temed daꞌga, sigi nagang panigmata ni Jesus. Pagsigmataen ya in siyuy nagpadiꞌkit ngayti duꞌut pakayan ya.

³³ Paribasay urut it babay ngayti i nagꞌabut it kanya, magyeyegyeg kanyat iꞌlam nga nagpaꞌadeꞌdeng duꞌun it ki Jesus. Nanluud kanya baw isiyugid yay kamatuudan.

³⁴ Pagkagneg ni Jesus, kaꞌampang kanya. Maat ya, “Edeꞌ, piyagayen ka sabap it pamayaꞌ mut aken. Masagya ka nayang muliꞌ. Mindek nayang banar i sarut mu ngayan.”

³⁵ Ega paꞌ natupus i pagꞌampangen ngayti ni Jesus, may miyabut na nga magtundug it ki Jairo ngayti. Maat nira it ki Jairo, “Mingget na bayti i anak mu. Siguru maski ega na palangbusun duꞌun it balay i Manigtulduꞌ ngaytu.”

³⁶ Ega nataguꞌ it ki Jesus i inaat nira ngayti. Maat yat manigpamaalaꞌ ngayti, “Ayaw kat kasmek. Mamayaꞌ baw sumarig ka lamang it aken.”

³⁷ Bawnga inaat yay kadakel ngayti nga patuduꞌ na sira. Yamanay piyabayaꞌ ya, si Pedro baw duwa ngayting nagsulsug nga si Santiago baw si Juan.

³⁸ Abutan nira duꞌut balay it manigpamaalaꞌ ngayti, naltegan ni Jesus, dakel na nga pagtaw i duꞌun, nga atnat bagrung i mamagsuga-sugawun na nga pagdadakulaꞌen nira na nga nguynguy.

³⁹ Pagkasled ni Jesus ngayti, inaat ya sira, “Unu nay magkasgawan mi ngaytu nga atnakaytu, it ega bayan patay i waꞌwaꞌ ngayan. Magꞌigaꞌ lamang yan.”

⁴⁰ Temed sinleman ga kanya it mga taw ngayti. Mga taw ngayti, piyaliꞌwan daꞌan sira ni Jesus. Yamanay naꞌped nga iba ya duꞌut seled, mga giyaringan it waꞌwaꞌ baw tulu ngayting mga alagad ya. Siminled sira duꞌut pagdadayagan it waꞌwaꞌ ngayti.

⁴¹ Singkel ni Jesus i alima it waꞌwaꞌ ngayti baw miyampang kanya nga magꞌaat, “Talita kumi!” Ireg sugiden kayti, “Edeꞌ, sigi, magbangun ka!”

⁴² Subuk piyuraw-puraw i waꞌwaꞌ ngayti, langkuy it nagbangun, dayun it timnindeg baw nagpanaw-panaw, ka magꞌidad nat sang puluꞌ baw duwang taꞌun. Talagang namagkaliluꞌ i kaꞌibaan ya ngayti.

⁴³ Ipiyagbenge-bengel ni Jesus it kanira nga ega ipanugid-sugid i iti nga binwat ya. Baw maat yat kana Jairo ngayti nga pakaꞌnen na niray waꞌwaꞌ ngayti.