Marcos 4 - Tagbanwa

Piyaꞌalimbawaan ni Jesus i esang nanaꞌbug nga manigꞌuma nga isiyaꞌbug i panluwak ya

¹ Nanulduꞌ siꞌ si Jesus it sumaꞌup duꞌun it tambing it Lapnaw it Galilea ngayti. Talagang dakel siꞌ i taw nga nanramu. Binwat ni Jesus, nagpasakay kanya duꞌun it sakayan nga maglultaw. Kadaklan ngaytit taw, duꞌun nat binit it lapnaw ngayti.

² Dakel nga bagay i ipiyanulduꞌ ni Jesus, nga ipagpaꞌalimbawa ya lamang. Maat ya,

³ “Pagnegan mit magayen. May esang manigꞌuma nga nanaꞌbug it lulwaken ya.

⁴ Pagsaꞌbug ya, may nakasaꞌbug na duꞌun it padalan. Magkatalikud kanya, pagpasubliyan it mga manu-manuk ka kiyaꞌen na nira.

⁵ Iyan beken, duꞌun i nasaꞌbugan it mabatuun. Timnubuꞌ nga lagi ka magsasagpa-sagpaw lamang i lugtaꞌ duꞌun it mga batu.

⁶ Temed iyan siminggaꞌ i init, namagpangkerep na, ka egay piyatꞌedan it gamut nira.

⁷ Maresaen i nasaꞌbugan it beken. Aypaꞌ ka pagkeseg it ilamunun ngayti, nalmes nay mga luwak. Daꞌna nakabwaꞌ.

⁸ Temed iyan nakasaꞌbug duꞌun it magayen nga lugtaꞌ, pagtubuꞌ nangseg it magayen. Nanggayen gasiꞌ i buwaꞌ baw mabuburun paꞌ. Sang kuway may tagtutulung puluꞌ i batꞌunun it legas ya. May tagꞌeꞌenem nga puluꞌ baw iyan beken, tagasang gatus.”

⁹ Paꞌugdun ni Jesus, maat ya, “Ta it pagꞌargan it talinga, ipagpagneg, kaꞌilangan pagneg kamu it magayen it pagꞌaaten ku ngaytu.”

¹⁰ Iyan nakagaring nay kadaklan it taw, may pira mana nga natuduꞌ nga kaꞌibaan it mga alagad. Namagpatpad sira duꞌun it ki Jesus ka iningkut kanya sabap it mga inalimbawa ya.

¹¹ Katubag si Jesus, maat ya, “Talagang ipiyagꞌildaw it imyu nga maꞌrutan mi i patagu-taguꞌ nga panulduꞌ pasar it kaꞌadiꞌan it Ampuꞌang Diyus. Temed iyan beken nga ega kupamayaꞌ it aken, muꞌsang bagay nga ipanulduꞌ it kanira, purus pagꞌalimbawaen.

¹² Atkaytuytu ka isaꞌun maski temegel sirat semyek, ega makilalaan niray pagletganan nira. Baw maski manamar nat pagneg, daꞌsira makasepsep. Ka in daꞌga atkayan, barang magsinguliꞌ sira baw pasinsiyaen it Ampuꞌang Diyus.”

¹³ Maat paꞌ ni Jesus, “Ay unu bayan, ega magkasepsepan mi i inalimbawa ku ngayan? Ta daꞌga ega masepsepan mi in may beken siꞌ nga alimbawa?

¹⁴ Ituytu i ireg sugiden kayan. Iyan ipagsaꞌbug nga biꞌni, ampang it Ampuꞌang Diyus nga ipagpanulduꞌ.

¹⁵ Pagpaꞌiguꞌan it nasaꞌbugan nga padalan, mga taw nga makagneg it panulduꞌ ngaytu temed yanagang malipatan nira ka madali-daliꞌ mapisiꞌ ni Satanas.

¹⁶ Iyan beken nga subung it mabatuun i nasaꞌbugan, mga taw nga pagkagneg nirat ampang it Ampuꞌang Diyus, pamayaꞌnen nirang lagi it masagya.

¹⁷ Temed ega ipagdawaꞌ nirat magayen kat ulu nira. Aypaꞌ ka daꞌsira magpaneꞌteꞌ kat pamayaꞌ nira, nga subuk luwak nga ega maggagamut. In abutun it kakuriꞌan u pakuriꞌan sira sabap it pamayaꞌ nira ngaytut ampang it Ampuꞌang Diyus, mangindiꞌ sira nga lagi.

¹⁸ Beken ngaytu, nga maresaen i nasaꞌbugan, iyan mga taw nga mamagpagneg it ampang it Ampuꞌang Diyus,

¹⁹ temed sasaw i pikir kat mga bagay nga kanget it nakem situt banwa. Subung it kupadakulaꞌ it kamanggadan ngaytu nga magpangakal lamang baw maꞌirak sirat beken paꞌ nga mga bagay. Unupat ampang ngaytut Ampuꞌang Diyus, magkadaꞌgan na it itu nga kat pikir nira. Aypaꞌ ka egay buwaꞌ it pamayaꞌ kat pangaꞌgenan nira.

²⁰ Baw itu, paꞌaaten ngaytu nga nasaꞌbugan nga magayeng lugtaꞌ, mga taw nga pagpamayaꞌnen nirat kamatuudan i nagnegan nira nga ampang it Ampuꞌang Diyus. Ta it ipagdawaꞌ na duꞌun it ulu, aypaꞌ ka magbuwaꞌ i pamayaꞌ nirat kanira, nga subung it mabuburun ngaytung kuwayen nga tagtutulung puluꞌ, tagꞌeꞌenem nga puluꞌ baw tagasang gatus i legas ya.”

Ega sukruban i tidaw, in daꞌga paꞌyagen

²¹ Ipiyasigi ni Jesus i ampang ya. Maat ya, “Unu, pagketan muy tidaw isaꞌun lamang sukruban it alupan u itaguꞌ duꞌun it sirib it irigaꞌan? Siguru ega. Simpri duꞌun i daꞌtunan it talagang dadaꞌtunan isaꞌun maꞌyagan i muꞌsa.

²² Ta, daꞌgay ipagtaguꞌ nga daꞌga mapangrutan baw ipatantu i maski unu nga ega paꞌ natantuwan.

²³ Aypaꞌ it pagꞌargan it talinga, ipagpagneg, kaꞌilangan nga pagnegan mit magayen i pagꞌaaten ngaytu.”

²⁴ Paꞌugdun paꞌ ni Jesus, maat ya, “Kaꞌilangan nga pasepsepan mit magayen i magkagnegan mi nga panulduꞌ ku. Ka in unuy pangukuman mi, nga sunudun it magayen u baliwalaꞌen na lamang, yanagay iꞌukuman it Ampuꞌang Diyus it imyu, u subraꞌ paꞌ.

²⁵ Sabap iyan taw nga pagsepsepen yay nagnegan ya situt aken, dungagan it Ampuꞌang Diyus i kasepsep ya seked magbastanti nay magkaꞌrutan ya. Temed iyan ega pagsepsepen yay nagnegan ya ngaytu, awaꞌen nat Ampuꞌang Diyus i maski iyan nga nasepsepan ya na isaꞌun egay lapusan ya.”

Piyaꞌalimbawaan siꞌ ni Jesus, biꞌni nga magtubuꞌ

²⁶ Maat pay beken nga inampang ni Jesus, maat ya, “Subung it itu ngaytu i kaꞌadiꞌan it Ampuꞌang Diyus. May esang taw nga nakatugdaꞌ nat uma ya.

²⁷ Pagkatugdaꞌ ya, subuk piyabayaꞌan ya na, ka ipiyasigi ya lamang i aldaw-aldaw nga pagbuwaten. Temed timnubuꞌ naga baw kiminseg i itiyugdaꞌ ya ngayti, it ega magkaꞌrutan ya in magꞌuꞌunu.

²⁸ Ka lugtaꞌ, iyan i magpatubuꞌ baw magpabwaꞌ it in unu-unu nga luwak. Simpri mangseg bawnga muwaꞌ it makukway baw mabuburun paꞌ.

²⁹ Ta, in lutuꞌ na, simpri ipakayeg na, ka kakaygen na.”

Alit sit mustasaꞌ i piyaꞌalimbawaan ni Jesus

³⁰ “Ta, unu gasiꞌ i pasbungan ta it kaꞌadiꞌan it Ampuꞌang Diyus?” maat siꞌ ni Jesus. “Unu siꞌ i paꞌalimbawaan tami isaꞌun makaladawan it magayen?

³¹ Subung tu it alit it mustasaꞌ, nga yanay piyakadekeyeꞌ kat muꞌsa nga lulwaken.

³² Temed in nakalwak na, pagtubuꞌ kemseg, mapꞌun paꞌ it beken nga inglay. Sumanga it manayak-sayak. Egay beken, pugadan na it mga manu-manuk.”

³³ Ipagpangadal ni Jesus i ampang it Ampuꞌang Diyus it may dakel nga pagpaꞌalimbawaan nga subung nat mga itu ngaytu, basta kaya nira nga masepsepan.

³⁴ Daꞌgay itiyulduꞌ ya nga daꞌga alimbawa i paggamiten ya. Temed in sira-sira mana it mga alagad ya, ipagsugid ya naga i pagpaꞌiguꞌan.

Piyalantap ni Jesus i miyakat nga lapnaw

³⁵ Iyan magdelem na it iti nagang aldaw, maat ni Jesus it mga alagad ya, “Paꞌaduꞌun tami it sang dipag it lapnaw ngaytu.”

³⁶ Ta yanayti, sakayan ngayti nga duꞌun nga lagi si Jesus magsasakay, i siyakayan nira. May mga sakayan gasiꞌ nga beken nga kadengan nira. Kadakel ngaytit taw, duꞌun na sira natuduꞌ.

³⁷ Sakaliꞌ nga diminres it masbeg. Yamanay daꞌga mapnuꞌan sira it magpamkas nga bakat nga pagtabanen it deres ngayti.

³⁸ Temed ki Jesus, maꞌigaꞌ duꞌut buliꞌ nga ayun, magꞌuꞌulun duꞌun it uꞌulunan. Siyulag kanya it mga alagad ya ngayti. Maat nira, “Agalen, unuka maꞌigaꞌ ka gay imu it matgeb tami na baytu?”

³⁹ Egay beken, nagbangun si Jesus. Pagkabangun ya, biyugrakan yay deres, maat ya, “Yemengyeng na!” Baw inaat ya gasiꞌ i lapnaw, “Lantap!” Ta sakaling yimnengyeng i deres baw limnantap nat atna.

⁴⁰ Bawnga maat ni Jesus it mga alagad ya ngayti, “Unu nay magkaiꞌlaman mi nga atnakayan, it aku naga i iba mi? Unu, ega pay pamayaꞌ baw pagsarig mit aken?”

⁴¹ Pagkamuya it mga alagad kayti, inabut sirat iꞌlam baw naliluꞌ sirang banar. Maamaatan sira, “Siyu kanya baytu nga matuud nga maski deres baw lapnaw, magsunud na it kanya?”