Marcos 3 - Tagbanwa

Piyagayen ni Jesus i esang kimay i alima

¹ Siminled sit sumaꞌup si Jesus duꞌun it papagsambaan. Abutan ya may esang lalaki duꞌun nga kimay i alima ya.

² May duꞌun gasiꞌ nga in pirang kataawan nga magtulus it in unuy mapatikdan nira nga masalaꞌan nira it ki Jesus. Aypaꞌ pagniidan nira kanya it pagayen-gayen, in unu, pagayenen yay taw ngayti it Aldaw ngaytit Kapaꞌnaan.

³ Tiyaꞌwagan ni Jesus i kimay ngayti. Maat ya, “Paꞌasini kat uꞌnaan ngayni.”

⁴ Bawnga iningkut yay mga taw ngayti, maat ya, “Ari manggid i uyun kat urdin, muwat it magayen u muwat it maraꞌe-raꞌet in Aldaw it Kapaꞌnaan? Unu, rimibri it ginawa u mimatay?” Temed daꞌgay timnubag it kanya nga mga taw ngayti.

⁵ Sinyekan ni Jesus i kadakel ngayti duꞌun it linibut ya. Sang peꞌtek nga nakem ya, magꞌiseg. Sang peꞌtek magkasmek sabap it kadsen it ulu nira. Piyalingdanan yay kimay ngaytit semyek baw inaat ya, “Ibtir muy alima mu.” Ibintir ya nga matuud, langkuy it kimay ya ngayti, gimnayen it gayen banar.

⁶ Namagliꞌwan nga lagi i mga Pariseo, nangupakat sira it mga kakampiꞌ ni Herodes. Namagrunding sira in magꞌuꞌunu maꞌimatay si Jesus ngayti.

Dakel nga taw i timnundug it ki Jesus duꞌut tambing it Lapnaw it Galilea

⁷ Kana Jesus baw mga alagad ya, ega naga nagtinir duꞌun. Naꞌaduꞌun sira it tambing it lapnaw. Dakel nga taga Galilea i timnundug it kanira. May beken pang mga taw nga nagsigꞌabut. May garing duꞌun it Judea,

⁸ duꞌun it Jerusalem, duꞌun it Idumea baw duꞌut mga rugar nga duꞌut sang dipag it Jordan. Iyan beken, garing duꞌun it sakep it Tiro baw Sidon. Talagang dimnakel nat atkayti i nagsigꞌabut sabap nabaritaꞌan nira i muꞌsang magayen nga buwat ni Jesus.

⁹ Ta it atkayti, singkat ni Jesus i mga alagad ya nga manu it sakayan ka barang kaꞌilangan ya nga may masakayan ya, isaꞌun ega madiꞌret kanya it mga taw ngayting magꞌaꞌabut-aꞌabut nga daꞌna magbugtuꞌ i bulyug.

¹⁰ Ka dakel nay mga may sarut nga piyagayen ni Jesus. Aypaꞌ ka pagrubu-rubuwan na kanya it beken nga mga may sarut ka isaꞌun maski tapal, makatapal sirat bilug ni Jesus.

¹¹ Kada pagpapulpugun it maraꞌe-raꞌet nga makalteg it kanya, mamagkeleb duꞌun it sarungaan ya. Pagpagaꞌuyun sirat mga maraꞌe-raꞌet ngayti, nga magꞌaat, “Ikaw i Anak it Ampuꞌang Diyus!”

¹² Temed pagsardawun sira ni Jesus, nga ipagbenge-bengel yat kanira nga ega isugid nira in siyu kanya.

Piniliꞌ ni Jesus i sang puluꞌ may duwa nga alagad ya

¹³ Bawnga naꞌaduꞌun si Jesus it mamungsuꞌun. Kaꞌibaan ya it naꞌaduꞌun, mga piyabayaꞌ ya nga naꞌirgan ya.

¹⁴ Duꞌun it mga kaꞌibaan ya ngayti, miniliꞌ si Jesus it sang puluꞌ may duwa nga kataawan. Tiyaꞌwag ya sira nga mga apustul, ka sira ngayti i mga kaꞌiba-iba ya nga pirmi baw sira i taꞌgen ya nga mangadal.

¹⁵ Baw begayan ya sira it kakayaan nga makaꞌimugaw it mga mararaꞌe-raꞌet.

¹⁶ Itu may itu i sang puluꞌ may duwa nga piniliꞌ ya. Si Simon nga piyangaranan yat Pedro,

¹⁷ si Santiago baw si Juan nga mga anak ni Zebedeo, nga panaꞌwag yat kanira, Boanerges, nga ireg sugiden, maꞌiꞌiseg nga subuk duldug.

¹⁸ Mga beken, si Andres, si Felipe, si Bartolome, si Mateo, si Tomas, si Santiago nga anak ni Alfeo, si Tadeo, si Simon nga Cananeo,

¹⁹ baw si Judas Iscariote nga iti na nga taw, mabut i timpu nga kanyay bayaꞌen it mga kuꞌimatay it ki Jesus.

Kakayaan ni Jesus, garing duꞌun it Espiritu Santo, ega garing duꞌun it ki Satanas

²⁰ Pagkaꞌuliꞌ siꞌ na Jesus duꞌut balay, dakel siꞌ nga pagtaw i nanramu. Aypaꞌ ka maski kaꞌen, daꞌna magkakaꞌen si Jesus baw mga alagad ya.

²¹ Pagkabaritaꞌ it beken nga mga kaduguꞌan ni Jesus, inaduꞌun nira ka pagpisiꞌen, ka maat nira, “Magpulpug na bayan kanya!”

²² Maat it mga manigpaꞌyag it urdin nga miyabut garing duꞌut Jerusalem, “Talagang pagpapulpugun kanya ni Beelzebub nga pagbayaꞌen it muꞌsang mararaꞌe-raꞌet. Iyan, yan i nagbegay it kanya it kakayaan nga makaꞌimugaw it mga maraꞌe-raꞌet.”

²³ Pagkamuya ni Jesus kayti, piyapaꞌadeꞌdeng yay mga taw, ka may inampang ya nga pirang alimbawa. Maat ya, “Magꞌuꞌunu pagꞌimugawun ni Satanas i mga pagsasakpen ya nga maraꞌe-raꞌet, nga subuk diri ya naga i pagkuntraꞌen ya?

²⁴ Ka basta magkuntraꞌ-kuntraꞌen i mga sinakepan it esang kaꞌadiꞌan, siguradu nga ega maneꞌteꞌ i iyan nga kaꞌadiꞌan.

²⁵ Atkayan naga i mabetangan it sang kabalayan nga mga taw. Basta nabagiꞌ-bagiꞌ ka magdaꞌe-daꞌegen sira, simpri ega yan maneꞌteꞌ nga magsagpu-sagpunun sira.

²⁶ Aypaꞌ in kuntraꞌen ni Satanas i sadili ya, ka magraꞌe-raꞌeten sira it mga sakepan ya, talagang ega maneꞌteꞌ i pamegbeg ya. Daꞌga in atkayan, subuk diyaꞌeg na kanya?

²⁷ Temed diyaꞌeg ku na si Satanas, aypaꞌ ka magkaꞌimugaw akut maraꞌe-raꞌet. Ka egay makasled duꞌun it balay it esang taw nga makseg nga manrangpas it kusas ya, basta ega bayukun ya daꞌan i iyan nga taw. Ta, simpri in pagbabayukun na, marangpasan nay balay ya.

²⁸ Matuud talagay iꞌaat kut imyu, nga pasinsiyaen naga i mga katataawan it maski unu nga kalasit kasalaꞌan baw panibabaꞌ nira in magsinguliꞌ baw indiꞌan na nira.

²⁹ Temed in siyu-siyu nga timibabaꞌ it Espiritu Santo, talagang ega pasinsiyaen. Kasalaꞌan ya ngaytu nga ituꞌun, egaytuy kaꞌawaꞌan seked it kaꞌnu-kaꞌnu.”

³⁰ Miyampang si Jesus it atkayti sabap pagꞌaaten it beken nga pagpapulpugun kanya it maraꞌe-raꞌet. Ta it atkayti, ipagpabetang nira nga maraꞌe-raꞌet i Espiritu Santo nga magsasarum duꞌun it ki Jesus.

Mga inaꞌ baw sulsug ni Jesus kat pamayaꞌ

³¹ Bawnga miyabut i inaꞌ baw mga ariꞌ ni Jesus ngayti. Duꞌun na lamang sira it liꞌwan. Piyasugidan nira si Jesus nga pagꞌelaten nira kanya duꞌun it liꞌwan,

³² ka sageksek it taw i duꞌun it seled. Dakel talaga i magꞌaꞌdung duꞌut linibut ni Jesus ngayti. Egay beken, siyugidan si Jesus nga duꞌun it liꞌwan i inaꞌ ya baw mga ariꞌ ya. Pagpaliꞌwanen kanya.

³³ Pagkagneg ni Jesus, maat ya, “Eeꞌ, mabway mana.” Bawnga miyampang kanya nga magꞌaat, “Sepsepen mi, siyuy inaꞌ ku baw siyu may siyu i mga sulsug ku?”

³⁴ Bawnga tiyermek yat semyek i kadakel ngayti it mamagꞌaꞌdung duꞌun it linibut ya, baw miyampang siꞌ nga magꞌaat, “Sira ngaytu i bilang inaꞌ baw mga sulsug ku.

³⁵ Sabap yay matuud, in siyu-siyu nga magsunud nga banar it kaꞌirgan it Ampuꞌang Diyus, sira i bilang inaꞌ ku baw mga sulsug ku.”