Marcos 16 - Tagbanwa

Nagꞌegen it paꞌuliꞌ si Jesus

¹ Pagkasdep it aldaw it Aldaw ngaytit Kapaꞌnaan, si Maria Magdalena, si Maria nga inaꞌ ni Santiago, baw si Salome, miyalang sira it babangluun ka buꞌbuꞌan niray bilug ni Jesus.

² Pagꞌeyag, naꞌadle-adlem sira nga napanaw. Kamatuudan, pagꞌabut nira duꞌun it lebeng ngayti, yapay lebat it aldaw, nga aldaw nat Linggo.

³ Siging runding nira duꞌun it dalan, “Bilaꞌ, siyu nayan i maꞌabang ta nga pabaliling it batu ngayan nga ilimpen?”

⁴ It yanayang kadakulat batu, iti nay pagrundingen nira it mamagpanaw. Temed malawag nira, magbabaliling na i ilimpen ngayti nga batu.

⁵ Pagꞌabut nira, pagseled duꞌun it piyadayagan ngaytit ki Jesus. May naltegan nira nga esang mangaꞌwaꞌen nga lalaki, nga magꞌaꞌdung duꞌun it iwanan nga ayun it piyadayagan ngayti, magpapakay it maputiꞌ. Pagkalteg it mga babay ngayti, miniꞌlam sira.

⁶ “Ayaw kamut iꞌlam,” maat i lalaki ngayti. “Siguru pagtulusun mi si Jesus nga Nazaretanen nga iriyansang duꞌut krus. Ega nay kanya situ, ka inggen na kanya it paꞌuliꞌ. Letganan mi ga i piyadayagan ngayan it kanya.

⁷ Aypaꞌ mapanaw kamu siꞌ ka isugid mi duꞌun it mga alagad ya, nga uyut naga si Pedro. Aaten mi sira nga muꞌna na si Jesus duꞌun it Galilea. Makitaan nira yan kanya duꞌun, subung nat ipiyagꞌaat ya ngayat kanira.”

⁸ Mamagyegyeg nay mga babay ngayti baw talagang magkalibeg i pikir nira. Limniꞌwan sira duꞌun it lebeng ngayti dayun it miyalagyu. Ta it ereꞌeret ngayti nga iꞌlam nira, ega pay siyugidan nira nga maski siyu.

Nagpakikita si Jesus. Singkat yay mga alagad ya, bawnga miyuliꞌ duꞌun it langit

⁹ Kadedelman pang banar it Aldaw it Linggo, iyan nagꞌegen nat paꞌuliꞌ si Jesus, uꞌna-uꞌnang kinita ya, si Maria Magdalena. Iti nga babay, pituy inimugaw ni Jesus nga mararaꞌe-raꞌet duꞌun it kanya.

¹⁰ Piyaꞌaduꞌunan ni Maria ngayti i mga alagad ni Jesus nga mamagkasmek paꞌ nga banar, nga sigi paꞌ nga sugaw nira. Itiyuturan ya duꞌut kanira nga nagpakikita nat kanya si Jesus.

¹¹ Temed daꞌsira magpamayaꞌ it pagsugiden ngayti ni Maria nga egen siꞌ si Jesus, nagpakikita nat kanya.

¹² Nagpakikita gasiꞌ si Jesus it duwang kataawan nga mga alagad nga mamagpanaw, nga gimnaring duꞌun it siyudad, temed belag i pagkinataw ya.

¹³ Nagpaꞌuliꞌ duꞌut Jerusalem i duwa ngayti ka isiyugid duꞌut mga kaꞌibaan nira i naꞌanuꞌan nira ngaytit magpanaw. Temed maski sira ngayti, daꞌsira pagpamayaꞌnen.

¹⁴ Baw siꞌ nga nagpakikita na si Jesus it sang puluꞌ may esa ngayti nga mga alagad ya. Mamagkaꞌen i tiyakaꞌ ya. Siyardaw ya sira sabap kurang pay pamayaꞌ nira, baw sabap it kadsen it ulu nira nga daꞌsira ngayti magpamayaꞌ it mga piyakikitaan ya, pagꞌegen ya na ngaytit paꞌuliꞌ.

¹⁵ Bawnga maat ni Jesus it kanira, “Lekpen mi i muꞌsang banwa ka ipangadal mi i Magayen nga Baritaꞌ kat muꞌsang mga taw situt sinirungat langit.

¹⁶ Siyu-siyu nga pakimatuud baw mamayaꞌ baw pabawtis, siguradu yan nga maribri. Temed in siyuy ega mamayaꞌ, siguradu yan nga ukumanan it panriga.

¹⁷ Baw mamuyaan kat mga magpamayaꞌ i atkaytu na nga mga tandaꞌanan. May maꞌimugaw nira nga mga maraꞌe-raꞌet kat keseg it ngaran ku. May mga kaꞌampang it ega kanira nga ampang.

¹⁸ May mga ega naga maꞌunu maski semkel sira it dukul u minum it kaꞌiꞌilu. May tapalen nira nga mga magsarut, nga mapagayen nira.”

¹⁹ Pagkatupus it pagꞌampangen ngaytit Ampuꞌan nga si Jesus duꞌun it mga alagad ya, piyapatibung na kanya duꞌun it langit baw miyadung na kat iwanan nga ayun it Ampuꞌang Diyus.

²⁰ Nanlekep-lekep na nga matuud i mga alagad ngayti, ka nangadal na kat paꞌari-aring rugar. Talagang pagtabangen naga sira it Ampuꞌan it iti nga buwaten. Ipagpamatuud yay ampang ngayti nga ipagpangadal it mga alagad kat kakayaan nga magkabwat it mga kalililuꞌan nga bagay, nga ipiyagꞌildaw yat kanira.