Marcos 15 - Tagbanwa

Ipiyaꞌadap si Jesus duꞌut Romano nga gubirnadur

¹ Magpangyag, nagꞌupa-upakaten nga lagi i mga pagbayaꞌen it sasirduti, mga mataꞌas nga ginuꞌu, mga manigpaꞌyag it urdin baw beken paꞌ nga kumpur kaꞌuyutan it Sanedrin. Ipiyabayuk nira na si Jesus bawnga tiyaban na duꞌun it gubirnadur nga si Pilato.

² Pagꞌabut, siyumarya na kanya ni Pilato. “Unu, ikaw na i Adiꞌ it mga Judio?” Katubag si Jesus, “Eeꞌ, matuud i inaat mu ngayan.”

³ Dakel-dakel na nga ipagpaliꞌwan it mga pagbayaꞌen it sasirduti nga nasalaꞌan nirat ki Jesus ngayti.

⁴ Aypaꞌ iningkut siꞌ kanya ni Pilato, “Unu, egay makatubag mut kanira? Unu, ega magkagnegan muy dakel-dakel na ngayan nga nasalaꞌan nirat imu?”

⁵ Temed ega timnubag si Jesus, aypaꞌ ka naliluꞌ si Pilato.

Biyetanganan it ukuman nga kamataynen si Jesus

⁶ Inugaliꞌ nat gubirnadur nga kada Pistaꞌ it Tiyaꞌliban, may ipagpaliꞌwan ya nga sang kataawan kat pagkapirisu, in siyu-siyuy maꞌirgan it kadakel nga angutun nira.

⁷ Kat iting timpu may esang pirisu nga pagpangaranat ki Barrabas, kaꞌibaan it beken nga mga pirisu nga magkuntraꞌ naga it punuꞌan, nga nakaꞌimatay it taw it tagnaꞌ nga kaguluwan.

⁸ Minlep duꞌut ki Pilato i mga taw ka inangut nira nga buwaten ya nay kaꞌugaliꞌan ya ngayti.

⁹ “Unu,” maat ni Pilato, “ireg mi nga iyan i ipaliꞌwan ku, Adiꞌ ngaytut mga Judio?”

¹⁰ Atkayti inampang ni Pilato, ka natantuwan ya nga inggit i nakataban it mga pagbayaꞌen it sasirduti nga tabanen duꞌut kanya si Jesus ngayti.

¹¹ Temed ininduꞌan it mga pagbayaꞌen it sasirduti i katataawan nga yay angutun nira nga ipaliꞌwan kat pagkapirisu, si Barrabas ngayti.

¹² “Ta, in atkayan,” maat ni Pilato, “unuy buwaten kut kanya ngaytu nga pagtaꞌwagen mi nga Adiꞌ it mga Judio?”

¹³ Subung nat giyaw-giyaw i mga taw ngayti. Maat nira, “Iransang yan duꞌun it krus!”

¹⁴ “Kaꞌaiꞌ?” maat ni Pilato ngayti. “Unuy nabwat ya nga maraꞌe-raꞌet?” Temed subrang diyadakulaꞌ nirang gaꞌuy, “Iransang yan kanya duꞌut krus!”

¹⁵ Ta it kaꞌirgan naga ni Pilato nga pasagyaen yay mga taw ngayti, piyaliꞌwan ya na si Barrabas. Ki Jesus ngayti, piyaripdasan ya na bawnga ipiyagꞌintergaꞌ ya na duꞌun it mga rumansang nat kanya duꞌut krus.

Tiyeger-teger it mga sundaluꞌ si Jesus

¹⁶ Tiyaban si Jesus it mga sundaluꞌ duꞌut seled it balay it gubirnadur ngayti. Bawnga tiningped niray muꞌsang mga kaꞌibaan nira nga sundaluꞌ.

¹⁷ Binwat nira, piyagulamenan nira si Jesus it madarag nga subuk pakayan it adiꞌ. Bawnga naglikaw sira it dudugiyen nga luwa-luwak ka binwat nga kuruna, ka ipiyakuruna nat ki Jesus.

¹⁸ Bawnga pagteger-tegeren na nirat magsaluduꞌ nga magꞌaat, “Magayeng kadedelman it Adiꞌ it mga Judio!”

¹⁹ Ta, pagsariyan nira nat tiꞌkul i ulu ni Jesus it may kayu-kayu, pagsupraan na, baw mamagpanluu-panluud nga magbete-beteꞌ it magbegay it galang.

²⁰ Iyan naꞌyawan na sirat kateteger-teger, limbasan nira siꞌ si Jesus it ipiyagulamen nira ngaytit kanya, ka piyapakayan siꞌ it pakayan ya nga lagi. Bawnga tiyaban na nira duꞌut rugar nga papangimatayan ka iransang na duꞌut krus.

Iriyansang na si Jesus duꞌun it krus

²¹ Pagliꞌwan duꞌut siyudad it mga sundaluꞌ nga piyakarguꞌan it ki Jesus, naragpangan niray magpapasiyudad nga esang lalaki nga pagpangaranat ki Simon nga taga Cirene, nga amaꞌ na Alejandro duwa ni Rufo. Iriyeges nira nga pasaꞌnen yay krus nga ransangan nirat ki Jesus ngayti.

²² Tiyaban nira si Jesus ngayti duꞌut rugar nga pagpangaranan it Golgota, nga ireg sugiden, Rugar it Barungutan.

²³ Iyan duꞌun na, pagpaꞌimnun nira si Jesus it irimnun nga riyagiꞌan nirat mapaꞌit nga bagay, temed ega ininum ya.

²⁴ Egay beken, iriyansang na nira duꞌun it krus si Jesus ngayti. Bawnga binwat nira, piyagbagiꞌ-bagiꞌan nira i pakayan ya, pagkatiwas it pagpintuꞌan nira isaꞌun maꞌrutan in ari manggid i makaꞌaduꞌun it sang kataawan.

²⁵ Magꞌinlalakay nay aldaw, pagransang nirat ki Jesus duꞌun it krus.

²⁶ Kat dibwat nga ayun it krus ngayti, may ipiyakpel nga pagsusuratat dimanda it kanya, nga magꞌaat, “Adiꞌ tu it mga Judio”.

²⁷ Duwang kataawan nga mga manigpanrangpas i kadengan ya nga iriyansang duꞌut krus. Esay kat iwanan ya nga ayun i piyatindegan, esa, kat gibang ya nga ayun.

²⁸ Ta, duꞌun natuman i duꞌun it kasuratan nga magꞌaat, “Ipiyabetang kanya nga kaꞌuyutan it mga mamagbuwat it karaꞌe-raꞌetan.”

²⁹ Pagtibabaꞌen na si Jesus it mga mamagtaꞌlib. Mamagkekeyeng-keyeng sira, nga magꞌaat, “Daꞌga baꞌ ikaw i rumanggaꞌ ngayan it Templo, nga emanen mu it seledat tulung aldaw lamang?

³⁰ Ta kayti, iribri muy sadili mu, nga manlampud ka asan it krus ngayan.”

³¹ In kat mga pagbayaꞌen it sasirduti baw mga manigpaꞌyag it urdin, mamagpata-patay it selem. Maamaatan sira, “Magkaparibri yay beken, temed ega magkaribri yay sadili ya nga bilug.

³² Simpri, basta maltegan tami nga maglampud na asan it krus i Cristo ngayan nga Adiꞌ it Israel, simpri mamayaꞌ tami nat kanya.” Sigi gasiꞌ nga regda-regda it kanya it mga kadengan ya ngaytit iriyansang.

Kamataynen ni Jesus

³³ Desang nakasakay nat ugtuwan i aldaw, seledat tulung uras diminlem i muꞌsang banwa, miyabut it kabaling alaid.

³⁴ Iyan kabali na ngayting alaid, nanggaꞌmaran si Jesus nga magꞌaat, “Eloi, Eloi, lama sabachthani?” nga ireg sugiden, “Ampuꞌang Diyus ku, Ampuꞌang Diyus ku, unuka pagpabaya-bayaꞌan mu na aku?”

³⁵ Pagkagneg it mamagtitindeg paꞌ duꞌun, maat it beken, “Pagneg kamu! Magpangabang kanyat ki Elias ngayting prupitaꞌ it tagnaꞌ.”

³⁶ May miyalagyu ka namisiꞌ it maluꞌmit nga bagay. Piyasarepsepan yat maꞌagsem nga irimnun, tiyegbek it kayu-kayu bawnga idiyuꞌdul duꞌun it baꞌbaꞌ ni Jesus isaꞌun kaꞌinum kanya. Maat ya, “Pataꞌnan daꞌan. Letganan ta in mabut situ si Elias nga mawaꞌ it kanya asat krus ngayan.”

³⁷ Nanggaꞌmaran siꞌ si Jesus, langkuy it piyapalagsik ya nay kiyarurwa ya.

³⁸ Dengan it pagbugtuꞌ it ginawa ni Jesus, sakaliꞌ nga nagisay it karasik i maꞌpal nga kurtinaꞌ duꞌun it Templo nga maglingeb it Subraꞌ Na nga Ega Na Babasta-bastaeng Seled it Templo ngayti. Nagisay tu nga garing duꞌun it dibwat simnareg duꞌun it salu.

³⁹ Magtitindeg duꞌun it sarungaan it krus i esang kapitan nga pagbayaꞌen it mga sundaluꞌ ngayti. Namuyaan yang banar in magꞌuꞌunu natay si Jesus. Yanay naꞌampang ya, maat ya, “Talagang Anak nga matuud it Ampuꞌang Diyus i itu nga taw!”

⁴⁰ May mga babay nga duꞌun it alaid, mamaglalawag. Kaꞌuyutan nira, si Maria Magdalena, si Maria nga inaꞌ na Santiago duwa ni Jose, baw si Salome.

⁴¹ Magbaya-bayaꞌ nayting lagit ki Jesus i iting mga babay, garing paꞌ duꞌun it Galilea, ka mamagsirbi sirat kanya. Baw may beken paꞌ nga mga babay duꞌun nga miyayaꞌ it ki Jesus duꞌun it Jerusalem.

Pagpanlebeng nat ki Jesus

⁴² Iting aldaw, pagpangaranat Pagsimpan. Ta, paribasay pagsedep it aldaw, papuꞌun nat Aldaw it Kapaꞌnaan, aypaꞌ ka iyan apu-apun na,

⁴³ miyabut si Jose nga taga Arimatea, esang mabantug nga ginuꞌu nga pagkilalaen nga mataꞌas, nga kaꞌuyutan it Sanedrin. Subung it mga babay ngayti, esa kanya nga magpaꞌbut it kaꞌadiꞌan it Ampuꞌang Diyus. Nangaas kanya nga naꞌaduꞌun it ki Pilato ka inangut yay bilug ni Jesus.

⁴⁴ Pagkagneg ni Pilato, naliluꞌ kanya it in unuka yanay dali-dalit patay ni Jesus. Aypaꞌ ka ipiyatawag yay kapitan ngaytit sundaluꞌ, ka iningkut ya in patay na nga matuud si Jesus.

⁴⁵ Pagkaꞌrut ya duꞌut kapitan ngayti it matuud nga patay na, napakay kanya nga pisiꞌen ni Jose i bilug ngayti.

⁴⁶ Aypaꞌ nangalang si Jose it pirmirang abel. Bawnga pagkaꞌawaꞌ it bilug ni Jesus duꞌun it krus, biyuꞌtungan ya nat iti ngayti. Idiyuꞌun ya nat esang lelbengan nga piyalamunan nga batu. Pagkapadayag it ki Jesus duꞌun it seled, ipiyapabaliling yay dakulaꞌ nga batu ka ilimpen duꞌun it balaꞌbaꞌan it lebeng ngayti.

⁴⁷ Pagpapaꞌyunan naga na Maria Magdalena baw si Maria ngayting inaꞌ ni Jose. Aypaꞌ magkaꞌrutan nira in ari limbengan it ki Jesus.