Marcos 14 - Tagbanwa

Namagꞌupa-upakaten i mga pagbayaꞌen it mga Judio it in magꞌuꞌunu maꞌimatay nira si Jesus

¹ Duwang aldaw mana, ipagpistaꞌ na nira it Pistaꞌ it Tiyaꞌliban baw Pistaꞌ it Tinapay nga Egay Ipagpaꞌalsa. Iyan mga pagbayaꞌen it sasirduti baw mga manigpaꞌyag it urdin, sigi nga pagrundingen nira in magꞌuꞌunu maꞌakalan nira si Jesus isaꞌun madakep nira kanya baw maꞌimatay.

² Temed maat nira, “Ega itakaꞌ it pistaꞌ ka barang mangiseg baw magkagulu i kadakel it mga taw.”

Biyuꞌbuꞌan it babangluun i bilug ni Jesus

³ Iyan duꞌun paꞌ na Jesus it Betania, naꞌaduꞌun sira it balay ni Simon ngayti nga piyagayen i bangbang ya. Iyan mamagkaꞌen na sira, miyabut i esang babay nga may taban nga ega basta-bastang berebtangan nga punuꞌ it piyakamarga na nga babangluun ka pirmira, nga pagpangaranan it nardo. Pagꞌabut it babay ngayti, tiyukaban yay babangluun ngayti baw ibiyuꞌbuꞌ ya duꞌun it ulu ni Jesus.

⁴ Nangiseg i mga beken nga duꞌun. Maamaatan sira, “Unuka pagꞌaduꞌadutun i babangluun ngayan?

⁵ In beteꞌ ipiyaꞌalang lamang yan, ega bayan kumurang it balit sang taꞌun i tangdanan. Ta simpri bayad ya, makatabang it mga makukuriꞌ.” Talagang pagbasulun nira i babay ngayti.

⁶ Temed kaꞌampang si Jesus, maat ya, “Unuka pagsasawun mi i babay ngaytu? Pataꞌnan mi na lamang kanya. Magayen talaga i binwat ya ngaytut aken.

⁷ Seked it kaꞌnu-kaꞌnung timpu kaꞌibaan mi i mga makukuriꞌ baw magkaꞌildawan mi sira it maski unu nga uras i iꞌireg mi. Temed aku, ega kaꞌibaan mi it maꞌlay nga timpu.

⁸ Kanya ngaytu, binwat ya nay kanya nga kaya. Ka biyuꞌbuꞌan ya na nga lagi i bilug ku it babangluun nga bilang pagꞌayusun ya nga lagi i parabir aku ilbeng.

⁹ Matuud talagay iꞌaat ku ngaytut imyu. Maski ariyen i pangadalan it Magayen ngaytung Baritaꞌ situt sinirungat langit, masangpit nagaytu i binwat ya ngaytut aken, nga yanay piyakaꞌarandeman it kanya.”

Nagpakiꞌupakat si Judas Iscariote duꞌun it mga kudakep ngaytit ki Jesus

¹⁰ Ta, si Judas Iscariote, esa kat sang puluꞌ baw duwa ngayting mga alagad, naꞌaduꞌun na kanyat mga pagbayaꞌen it sasirduti ka idagang ya na si Jesus duꞌun it kanira.

¹¹ Pagkagneg it mga piyaꞌaduꞌunan ngayti ni Judas, namagkasagya sira, baw simnanggup sira nga begayan nira kanya it pirak. Ta gimnaring sikayti, timnulus na si Judas it timpu nga makapaꞌalima ya si Jesus duꞌun it mga kudakep ngayti.

Magkaraꞌnen na Jesus it pangiyapun nga Pistaꞌ it Tiyaꞌliban

¹² Miyabut nay aldaw nga papuꞌun nat Pistaꞌ it Tinapay nga Egay Ipagpaꞌalsa, aldaw nga ipagꞌimatay it uꞌuybun it tupa nga kaꞌadatan it Pistaꞌ it Tiyaꞌliban. Iningkut si Jesus it mga alagad ya, “Agalen,” maat nira, “ari ireg mu nga pagsimpanan namen it adat it pangiyapun ngaytu nga Pistaꞌ it Tiyaꞌliban?”

¹³ Katubag si Jesus, nga duwang kataawan nga alagad i pagtaꞌgen ya, nga magꞌaat, “Paꞌaduꞌun kamu it siyudad. May maꞌanuꞌan mi yan nga esang lalaki nga magtitibeng it bangaꞌ nga sasaꞌgeban. Dasunun mi na kanya seked duꞌut balay nga abutun ya.

¹⁴ Baw aaten mi i tagbalay, ‘Ipagpaꞌingkut bayat amen it Manigtulduꞌ namen in ari seled nga mapakay nga pangaꞌnan yat pangiyapun ngaytu nga Tiyaꞌliban, nga sang siraan nagat mga alagad ya.’

¹⁵ Ta, itulduꞌ ya nayan it imyu i esa nga malayaw nga seled duꞌun it dibwat, nga kumplitu nat garamiten. Duꞌun nat iyan nga seled i pagsimpanan mit pangiyapun tami.”

¹⁶ Napanaw nay duwa ngayti, naꞌaduꞌun it siyudad ngaytit Jerusalem. Naꞌanuꞌan nira nga matuud duꞌun i kumpur inaat ngayti ni Jesus it kanira. Egay beken, nagsimpan na sira duꞌun it pangiyapun nga adat it iti nga pistaꞌ.

¹⁷ Pagdelem, namagꞌabut na na Jesus, sang siraan nagat sang puluꞌ baw duwa ngayting mga alagad ya.

¹⁸ Iyan mamagkaꞌen na sira, mampang si Jesus. Maat ya, “Matuud tuy isugid ku ngaytut imyu, nga esat imyu i bayaꞌen it mga kuꞌimatay it aken. Eeꞌ baꞌ, esa nagat imyu nga kaꞌibaan ku ngaytut magkaꞌen kayti.”

¹⁹ Pagkagneg it mga alagad ngayti, nasmek sirang banar. Miningkut sira nga muꞌsa, “Barang aku na, Ampuꞌan, i paꞌaaten mu ngayan?”

²⁰ Tubagen sira ni Jesus, maat ya, “Esa nagat imyu nga sang puluꞌ baw duwa, esa naga nga kaꞌibaan kut magdiꞌtil situt karung, yanagay bayaꞌen ngayan.

²¹ Talagang maꞌimatay aku nga Taga Langit nga Ipiyanganak it Taw, ka simpri matuman i duꞌun it isiyurat nga ampang it Ampuꞌang Diyus. Temed talagang subraꞌ nga makuriꞌ i magꞌaꞌareg it bayaꞌen it mga kuꞌimatay ngayan it aken. Magayen pay ega na lamang ipiyanganak i iyang taw.”

Piyapuꞌnan naga ni Jesus i pamwat it apunan nga pagdemdem it kamataynen ya

²² Iyan mamagkaꞌen na ngayti sira, kimnuꞌmit si Jesus it tinapay bawnga nagpasalamat duꞌun it Ampuꞌang Diyus. Pagkapasalamat ya, biyagiꞌ ya na bawnga ibinggay duꞌun it mga alagad ya ngayti. Maat ya, “Iya, kawaꞌen mi ka kaꞌnen mi, ka bilug kuytu.”

²³ Bawnga iꞌimnan siꞌ i singkel ya. Pagkatupus it panalangin nga pasalamat ya, ibinggay ya sit kanira. Mininum nga muꞌsa i mga alagad ya.

²⁴ “Iyan ngayan,” maat ni Jesus, “duguꞌ ku yan nga keseg it pakiꞌupakat it Ampuꞌang Diyus kat mga taw. Ka ipaturuꞌ kuy duguꞌ ku isaꞌun dakel i mapasinsiya.

²⁵ Matuud i iꞌaat kut imyu, nga daꞌku na minum it pagꞌimnun ngayan nga letes it ubas seked it aldaw nga baꞌgu na nga pagꞌimnun i imnun ku duꞌun it kaꞌadiꞌan it Ampuꞌang Diyus.”

²⁶ Pagkatupus ni Jesus it pagꞌampangen ya ngayti, namagkantaꞌ sirat sangbat, bawnga napanaw na sira ka paꞌaduꞌun it Mungsuꞌ it Olibo.

Ipagsugid ni Jesus nga payluwan kanya ni Pedro

²⁷ Uyut it mga inampang ni Jesus it iting delem i sasar ya nga magꞌaat, “Kayti nga delem, muꞌsa kamu, kumurang i pamayaꞌ mit aken. Tananan mi nayan aku. Ka subung nat inaat ngayan duꞌun it isiyurat nga ampang it Ampuꞌang Diyus ngayan, nga magꞌaat, ‘Imatayen ku i manigꞌeper. Aypaꞌ baraꞌan it mga tupa, matari-tariwanak na.’

²⁸ Temed pagꞌegen ku it paꞌuliꞌ, muꞌna aku nat imyu duꞌun it Galilea.”

²⁹ Mampang si Pedro, maat ya, “Maski kumurang i pamayaꞌ nira nga muꞌsa it imu, temed aku, talagang ega tananan ku ikaw.”

³⁰ Pagtubag ni Jesus, maat ya, “Kamatuudan tuy iꞌaat kut imu, Pedro, nga kayti ngaytu nga delem, parabir tumaraꞌuk i manuk it ikadwa, tulu na nga paylu mu sabap it aken.”

³¹ Temed maseked-seked talagay ampang ni Pedro, nga magꞌaat, “Maski baꞌ imatayen aku nga iba mu, ega talaga ipaylu ku ikaw!” Atkayti nagay inampang it muꞌsa ngayting beken nga mga alagad.

Nanalangin si Jesus duꞌut Getsemani

³² Naꞌaduꞌun na Jesus it esang rugar nga pagpangaranat Getsemani. Pagꞌabut nira duꞌun, inaat ni Jesus i mga alagad ya ngayti, “Sikaytu kamu na daꞌan, ka manalangin aku duꞌun kayti.”

³³ Temed piyabayaꞌ ya naga si Pedro, si Santiago baw si Juan. Nagpapuꞌun it rumaꞌe-raꞌet i nakem ya baw talagang magkasusa kanya.

³⁴ Inaat yay tulu ngayti, “Talagang magkasusa aku nga banar nga subung it ipatay ku na. Esa-esa ga, melat kamu na daꞌan sikaytu baw ayaw kamut igaꞌ. Paꞌlek kamu daꞌan.”

³⁵ Nagpaꞌala-alaid si Jesus duꞌut kanira. Kiminleb kanya bawnga nanalangin nga in mapakay lamang, ega ipatabus i labayen ya ngayting kakuriꞌan.

³⁶ “Amaꞌ, Amaꞌ ku,” maat ya, “talagang mabwat mu i muꞌsang bagay. Sana ega na ipatabus muy pagdadarapaꞌen ku ngaytu nga kakuriꞌan. Temed ega aken nga kaꞌirgan i masunud, in daꞌga imu nga kaꞌirgan.”

³⁷ Pagkapanalangin ya, nagpaꞌuliꞌ duꞌun it tulu ngayti. Abutan ya, mamagꞌigaꞌ na. Siyulag ya sira bawnga maat yat ki Pedro, “Simon, unuka magꞌigaꞌ ka na? Unu, talaga nga ega makapaꞌlek ka it maski sang uras na lamang?

³⁸ Magayen indaꞌegen mi i kuꞌigaꞌ baw manalangin kamu, isaꞌun daꞌkamu daꞌgen it maraꞌe-raꞌet in sukdanan i pamayaꞌ mit aken. Sabap kat nakem mi, kupamayaꞌ kamu nga matuud, temed yay magꞌenget, kaꞌirgan it bilug mi nga subuk ega kupamayaꞌ ka malubay.”

³⁹ Nagpaꞌala-alaid siꞌ si Jesus ka nanalangin siꞌ, nga atkayti nagay ipiyanalangin ya.

⁴⁰ Pagkatupus ya, nagpaꞌuliꞌ siꞌ duꞌun it tulu ngayting mga alagad ya. Abutan ya, mamagꞌigaꞌ siꞌ ka kuꞌigaꞌ na sirang kuꞌigaꞌ. Ega na magkaꞌrutan nira in unu nay iꞌaat nirat ki Jesus.

⁴¹ Ikatlu nga paꞌuliꞌ ni Jesus, maat yat kanira, “Unu, magꞌigaꞌ kamu paꞌ, kupapaꞌna ga lamang? Tamaꞌ na bayan! Naꞌbut nay uras nga nakadagang aku na nga Taga Langit nga Ipiyanganak it Taw. Ipaꞌalima aku na duꞌun it mga taw nga makasalaꞌan.

⁴² Bangun kamu na ka tami na. Wayan nay dimnagang ngayan it aken!”

Diyakep na si Jesus

⁴³ Magꞌampang paꞌ si Jesus, miyabut na si Judas nga kaꞌuyutan naga it sang puluꞌ baw duwa ngayting mga alagad. Pagbabayaꞌen na kanya it dakel na nga pagtaw nga rangkap it basiꞌ, nga kat beken, pupukul i sekel. Tiyaꞌeg sira it mga pagbayaꞌen it sasirduti, mga manigpaꞌyag it urdin baw mga mataꞌas nga ginuꞌu.

⁴⁴ Duꞌun paꞌ sirat pagpanawan, ipiyagꞌaat na nga lagi ni Judas it mga kaꞌibaan ya ngayti i buwaten ya. Maat ya, “Iyan in siyuy arkan ku, iyan nay enged ta. Dakpen mi nga lagi kanya baw pabayaꞌen mi nat pagayen-gayen.”

⁴⁵ Pagꞌabut ni Judas, diri-diritsu kanya duꞌun it ki Jesus. “Agalen!” maat ya, bawnga inarkan ya nga subung it dakulaꞌ i pagmaꞌal ya.

⁴⁶ Ta, riyusuban nat mga taw ngayti si Jesus ka diyakep na nira.

⁴⁷ Pagkalteg it sang kataawan nga alagad, pagbarut it yuꞌgut, pagtigbas. Uripen it Piyakamataꞌas nga Sasirduti i tinigbasan ya. Napalung i talinga nga naꞌiguꞌ.

⁴⁸ Inaat ni Jesus i mga taw ngayti, “Unuytu, adimaat magpangukus aku nga kuntraꞌen i gubirnu, ka rangkap kamu nat basiꞌ, nga kat beken pupukul na, i miyabut ngaytu nga magpandakep it aken?

⁴⁹ It aldaw-aldaw magpanulduꞌ aku duꞌun it Templo, temed ega naga diyakep mi aku duꞌun. Takaꞌ kaꞌilangan nga matuman i isiyurat nga ampang it Ampuꞌang Diyus.”

⁵⁰ Egay beken, nagsigpalagyu nay mga alagad ya ngayti. Tiyananan na kanya.

⁵¹ Temed may duꞌun paꞌ nga esang lalaki nga mangaꞌwaꞌen paꞌ, nga dimnasun it ki Jesus, nga iyan lamang i kat bilug ya, rambay nga giyulamen ya. Pagkamuyat mga taw ngayti, riyusuban nira kanya ka kudakpen.

⁵² Temed naꞌawaꞌ i giyulamen ya ngayti. Lebas na kanya i miyalagyu.

Siyumarya si Jesus it Piyakamataꞌas nga Sasirduti baw mga kaꞌuyutan it Sanedrin

⁵³ Tiyaban si Jesus it mga dimnakep ngaytit kanya duꞌun it balay it Piyakamataꞌas nga Sasirduti. Tingped na duꞌun i muꞌsa nga pagbayaꞌen it sasirduti, mga mataꞌas nga ginuꞌu baw mga manigpaꞌyag it urdin.

⁵⁴ Ki Pedro, nagparurumbayaꞌ naga. Nanlangbus kanya seked duꞌun it pagkakaliputputan nga kamaꞌyagan it balay it Piyakamataꞌas ngayti nga Sasirduti. Miyadung kanya duꞌun it tepad it apuy, nagpakidagpiꞌ na duꞌun it mga guwardiya.

⁵⁵ Ta mga pagbayaꞌen it sasirduti baw muꞌsa ngayting kaꞌibaan nirang kaꞌuyutan it Sanedrin, sigi nga tulus nira it panistigu nga katuud it ki Jesus ngayti, isaꞌun maꞌimatay nira kanya. Temed egay magkaparagan nira.

⁵⁶ Sabap maski dakel na nga nanistigu it kaꞌambutan kuntraꞌ it ki Jesus, temed namelag-belagen it ipagsugid pasar it kanya.

⁵⁷ Naꞌlay na, may timnindeg nga beken nga magpanistigu it kaꞌambutan kuntraꞌ it kanya. Maat nira,

⁵⁸ “Maat bay nagnegan namen nga inaat ya, ‘Ranggaꞌen kuytuy Templo ngaytu nga piyaꞌresat mga taw it muwat. Takaꞌ seledan it tulung aldaw, patindeg akut belag nga Templo nga ega taw i muwat.’”

⁵⁹ Takaꞌ ega ga lamang magparag-paragen i ipagpamatuud nira ngayti.

⁶⁰ Pagkagneg it Piyakamataꞌas ngayting Sasirduti, timnindeg kanya duꞌun it sarungaan it kadakel, baw iningkut ya si Jesus, nga magꞌaat, “Unu, may katubag mu it nasugid nira ngaytung panistigu kuntraꞌ it imu?”

⁶¹ Temed egay tetet ni Jesus. Aypaꞌ iningkut siꞌ kanya it Piyakamataꞌas ngayting Sasirduti. “Unu,” maat ya, “ikaw na talaga i isiyanggup ngayan nga Cristo nga Anak it Ampuꞌang Diyus nga Piyakamataꞌas?”

⁶² “Eeꞌ, aku na,” tubag ni Jesus. “Baw talagang mamuyaan mi aku, nga Taga Langit nga Ipiyanganak it Taw, nga magꞌaꞌdung duꞌun it iwanan nga ayun it landaw nga gunaan nga Ampuꞌang Diyus. Baw beken, mabut nga maltegan mi aku nga magꞌaꞌabut nga gumaring duꞌut langit, nga magpangindelangan it kunum.”

⁶³ Pagkagneg it Piyakamataꞌas ngayting Sasirduti, piyanrarasik yay sadili yang pakayan it pangise-iseg. Miyampang kanya, nga magꞌaat, “Ta, unuka kaꞌilangan tami paꞌ i manistigu?

⁶⁴ Ka nagnegan mi na nga muꞌsa i inampang ya ngaytu nga magpasbung kanya it Ampuꞌang Diyus. Ta kayti, unuy makaꞌukuman mi?” Ukuman nirang muꞌsa, bagay talagat kanya, imatayen.

⁶⁵ Egay beken, binwat it beken, siyariyan nat supra si Jesus ngayti. Tiyagnepan niray rupa ya baw siyari nat suntuk, uyut i ampang nga magꞌaat, “Pintuꞌun mu in siyuytu!” Bawnga siyariyan nat tiꞌkul it mga guwardiya.

Piyayluwan ni Pedro si Jesus

⁶⁶ Ki Pedro ngayti nga nagparurumbayaꞌ naga, yanayti duꞌun lamang it kamaꞌyagan. Miyabut duꞌun i esang babay nga manigsirbi it Piyakamataꞌas ngayting Sasirduti.

⁶⁷ Naltegan ya si Pedro ngayti nga magdagpiꞌ. Pagkalteg ya, liniling yat magayen baw inaat ya, nga magꞌaat, “Kaꞌibaan ka nagay imu ni Jesus ngayang Nazaretanen!”

⁶⁸ Temed piyayluwan ni Pedro, nga magꞌaat, “Bilaꞌ, ega! Taꞌway, ega bayan magkaꞌrutan ku baw ega magkasepsepan kuy paꞌaaten mu ngayan.” Nagpaꞌugad si Pedro duꞌun it puwirtaꞌan. Bawnga may timnaraꞌuk nga manuk.

⁶⁹ Naltegan siꞌ kanya it esang manigsirbi nga babay. Maat ya it beken ngayti duꞌun, “Kaꞌibaan nira baytuy itung taw.”

⁷⁰ Nandaꞌga-daꞌga siꞌ si Pedro it sumaꞌup. Ega naꞌlay, inaat siꞌ si Pedro it mga mamagtitindeg duꞌun, “Iba ka naga baꞌ nira, ka taga Galilea ka baytu.”

⁷¹ “Bilaꞌ, ega baꞌ! Ibet na baꞌ nga matay aku,” maat ni Pedro, “talagang ega kilala kuy iyang taw nga paꞌaaten mi.”

⁷² Sakaliꞌ nga timnaraꞌuk siꞌ i manuk. Nademdeman na ni Pedro i inaat ngayti ni Jesus it kanya, nga magꞌaat, “Parabir tumaraꞌuk i manuk it ikadwa, tulu na nga paylu mu sabap it aken.” Pagkademdem ya kayti, siminggaw na kanya.