Marcos 10 - Tagbanwa

Panulduꞌ ni Jesus pasar it pablag it asawa

¹ Liminꞌid siꞌ na Jesus duꞌun it Galilea. Naꞌaduꞌun it rugar it Judea baw nanlangbus duꞌun it sang dipag it danum it Jordan. Ta riyamu siꞌ kanya duꞌun it dakel na nga mga taw. Ta, subung nat buwat yat kaꞌlay, tiyulduꞌan ya sira.

² May mga Pariseo nga naꞌaduꞌun it ki Jesus, ka antap it nakem nira nga sukda-sukdanan kanya kat ingkut nira ngaytung ituꞌun nga magꞌaat, “Unu, uyun duꞌun it urdin ni Moises nga pablagan it lalaki i asawa ya?”

³ Katubag si Jesus, maat ya, “Ay unuy ipiyagꞌurdin ni Moises it imyu?”

⁴ Maat siꞌ nira, “Ta, ipagꞌintulut naga bayan ni Moises nga pablagan it lalaki i asawa ya, basta may kasuratan nga katandaꞌ it nagbelag na sira.”

⁵ Temed pagtubag siꞌ ni Jesus, maat ya, “Sabap it kadsen it ulu mi, aypaꞌ ka may ipiyagsurat ya nga urdin nga atkaytu.

⁶ Ka daꞌga baꞌ garing it tagnaꞌ paꞌ, pagguna it Ampuꞌang Diyus it banwa, giyuna ya i babay baw lalaki?

⁷ Aypaꞌ ka tananan it lalaki i amaꞌ baw inaꞌ ya ka magsagpun na sira magꞌasawa.

⁸ Ta egay beken, subung na sirat sang kabilu-bilugan. Aypaꞌ ka subung it ega na maꞌaat sira nga duwang kataawan paꞌ, ka subung it sang kabilu-bilugan na sira.

⁹ Ta, it atkayan na, simpri ega mapakay nga belagen it taw i ipiyagsagpun it Ampuꞌang Diyus.”

¹⁰ Pagꞌabut nira duꞌut balay, mga alagad ya siꞌ ngayti i miningkut it kanya pasar it iti nga bagay.

¹¹ Tubagen sira ni Jesus, maat yat kanira, “In siyu-siyu nga lalaki i pablag it asawa ya ka mangasawa it beken, talagang nakapakun kanya nga kuntraꞌ it asawa ya ngayti.

¹² Ta, atkayan nagay babay nga pablag it asawa ya ka paꞌasawa it beken, talagang nakapakun kanya.”

May tiyaban nga dedekeyeng mangaꞌwaꞌ duꞌun it ki Jesus

¹³ Kaꞌsang aldaw may mga taw nga timnaban it dedekeyeꞌ nga mangaꞌwaꞌ duꞌun it ki Jesus ka isaꞌun panalanginan it pagtatapalen. Temed siyardaw sira it mga alagad.

¹⁴ Pagkamuya ni Jesus kayti, ega napakay ya. Maat yat mga alagad ya ngayti, “Ega sulang-sulangen mi i mangaꞌwaꞌ nga magpaꞌasitut aken. Pataꞌnan mi lamang. Sabap mga mapiyababaꞌ nga subung it mangaꞌwaꞌ ngaytu, sira i mapakay nga pasakep it kaꞌadiꞌan it Ampuꞌang Diyus.

¹⁵ Matuud tu i iꞌaat ku ngaytut imyu, nga in siyu i ega pasbung it waꞌwaꞌ nga dekeyeꞌ kat pagpasakep yat pamegbeg it Ampuꞌang Diyus, ega talaga makasled duꞌun it kaꞌadiꞌan ya ngaytu.”

¹⁶ Bawnga siyakem ni Jesus i mangaꞌwaꞌ ngayti, baw piyanalanginan ya sira it pamagtatapalen.

Makuriꞌ kasled duꞌun it kaꞌadiꞌan it Ampuꞌang Diyus

¹⁷ Iyan magpapanaw siꞌ si Jesus, may esang lalaki nga magpapalagyu i minlep duꞌut kanya. Nanluud duꞌut sarungaan ya baw miningkut, nga magꞌaat, “Magayen nga Manigtulduꞌ, unu bay dapat ku nga buwaten isaꞌun maꞌaken i kaꞌgenan nga egay kaskedan?”

¹⁸ Pagtubag ni Jesus, maat ya, “Talagang ega basta-bastang ipabetang mu it magayen i esang taw, maski aku ngaytu, in daꞌga sepsepen mu daꞌan i paꞌaaten nga ‘magayen’. Ka Ampuꞌang Diyus lamang i talagang magayen.

¹⁹ Siguru magkaꞌrutan mu i mga urdin. Kuydaw ka it pangimatay it masigkataw mu. Kuydaw ka it pamakun duꞌun it ega asawa mu. Kuydaw ka it panakaw. Kuydaw ka it panistigu it ega matuud. Ayaw kat pangangken. Galangen mu i amaꞌ baw inaꞌ mu.”

²⁰ “Manigtulduꞌ,” maat siꞌ it lalaki ngayti, “muꞌsa ngayan, pagsunudun ku nayan garing it pagwaꞌwaꞌ ku.”

²¹ May raras nga tiyermek ni Jesus it semyek, baw inaat kanya, “May esa paꞌ nga bagay nga magkakurangan mu. Muliꞌ ka na ka ipaꞌalang muy muꞌsang kusas mu bawnga itabang mu it mga makukuriꞌ i bayad ya. Ka in buwaten mu gaytu, siguradung may kamanggadan mu duꞌun it langit. Pagkabwat mut muꞌsa ngaytu, paꞌuliꞌ ka siꞌ situ, ka magbaya-bayaꞌ ka nat aken, nga alagad ku na.”

²² Pagkagneg it lalaki ngayti, nanrusarem i rupa ya. Napanaw na kanyat pagsesmeken, sabap talagang manggaden kanya.

²³ Liniling ni Jesus i mga alagad ya bawnga inaat ya sira, “Talagang makuriꞌ makaꞌuyut i manggaden duꞌun it kaꞌadiꞌan it Ampuꞌang Diyus.”

²⁴ Naliluꞌ i mga alagad it iti nga ampang. Bawnga inaat siꞌ ni Jesus, “Mga bilang anak ku, talagang ega basta-basta makaꞌuyut i taw duꞌun it kaꞌadiꞌan it Ampuꞌang Diyus.

²⁵ Yay matuud, marway paꞌ makalapas i dakulang ramu-ramu nga kamelyo duꞌun it erek it dagum, ega gat manggaden nga kasled duꞌun it kaꞌadiꞌan it Ampuꞌang Diyus.”

²⁶ Naliluꞌ talaga i mga alagad. Aypaꞌ miningkut sira nga magꞌaat, “Ta in atkayan nga makuriꞌ maribri i mga manggaden nga dakulay kaya nira, ta siyu gay maribri? Daꞌga ega na?”

²⁷ Tiyermek sira ni Jesus it semyek baw maat yat kanira, “Talagang egay maski unu nga mabwat it taw nga ipagkaribri it kanya. Temed in Ampuꞌang Diyus, mabwat yay muꞌsang bagay. Kanyay magkaribri it mga taw.”

²⁸ Miyampang si Pedro, maat ya, “Ta amen ngaytu, Agalen, daꞌga baꞌ tiyananan namen nay muꞌsa ka magbaya-bayaꞌ kami nat imu?”

²⁹ Katubag si Jesus, maat yat kanira, “Kamatuudan tu nga iꞌaat kut imyu, nga daꞌgay-daꞌga tumbasan i maski siyu nga magkatanan it pamalay-balay ya, mga sulsug ya, giyaringan baw mga anak ya, u pagngatanan ya, sabap it pagsirbi yat aken baw palkep it Magayeng Baritaꞌ.

³⁰ Ka siguradu talaga nga sang gatus nga dubli i matanggap ya kat itu nga kaꞌgenan, mga balay, mga giyaringan, mga sulsug, mga anak baw pagngatanan, temed ega mawaraꞌ tu i pakuriꞌ it beken. Bawnga in duꞌun nat ikadwang kaꞌgenan, makanya i kaꞌgenan nga egay kaskedan.

³¹ Temed yay matuud, dakel i mataꞌas kayti kat pabetang it taw nga baraꞌan nira raꞌyat pagꞌabut it iting aldaw. Baw dakel sira kayti nga raꞌyat lamang kat pabetang it taw, temed baraꞌan nira mataꞌas duꞌun it kaꞌadiꞌan it Ampuꞌang Diyus.”

Saꞌup nga isiyugid ni Jesus i pasar it kamataynen ya

³² Magpanaw na sira nga paꞌaduꞌut Jerusalem. Magꞌuuꞌna si Jesus it mga kaꞌibaan ya. Kat mga alagad ya, magkaliluꞌan nira. Mga taw nga magdadasun it kanira, mamagꞌiꞌlam, ka in unuy mabetangan ni Jesus duꞌun. Ta it atkayti, ipiyapinpin siꞌ ni Jesus i sang puluꞌ baw duwa ngayting mga alagad ya baw isiyugid ya sit kanira i mabetangan ya.

³³ Maat ya, “Kayti magpaꞌaduꞌun tamit Jerusalem. In duꞌun na, aku nga Taga Langit nga Ipiyanganak it Taw, idagang duꞌun it mga pagbayaꞌen it mga sasirduti baw mga manigpaꞌyag it urdin. Betanganan nira aku it ukuman nga kamataynen. Baw iꞌintergaꞌ aku duꞌun it mga taw nga ega Judio.

³⁴ Talagang teger-tegeren nira aku, supraan, ripdasan, baw imatayen paꞌ. Temed magꞌegen aku nagat paꞌuliꞌ pagꞌikatlung aldaw.”

May pagꞌangutun ni Santiago baw ni Juan

³⁵ Bawnga nagpatpad duꞌut ki Jesus si Santiago baw si Juan, nga mga anak ni Zebedeo, baw maat nira, “Agalen, may kuꞌangutun namen baꞌ sana situt imu. In mapakay, parigaan mut muwat.”

³⁶ “Unu bay kuꞌangutun mi ngayan?” maat ni Jesus.

³⁷ Tumubag i duwa ngayti, maat nira, “Sana iꞌildaw mut amen i pudir nga duꞌut umid mu i adungan namen duꞌun it kabantugan mu. Esay kat iwanan mu nga ayun, esay kat gibang.”

³⁸ “Subuk ega magkaꞌrutan mi i pagꞌangutun mi ngayan,” maat ni Jesus it kanira. “Unu, kaya mi nga labayen i kakuriꞌan nga labayen ku? Unu, masagkaꞌan mi i subraꞌ na nga panriga-riga nga ipasagkaꞌ it aken?”

³⁹ “Aaꞌ, kaya namen,” maat i tubag it duwa ngayti. “Yay matuud,” maat ni Jesus, “kakuriꞌan nga labayen ku, labayen mi gasiꞌ. Baw betanganan kamu naga it subraꞌ na nga panriga-riga nga subung it ibetangan it aken.

⁴⁰ Temed ega manggaring it aken i pabetang-betang nga in siyuy madung kat iwanan ku nga ayun baw kat gibang. Iyan mga araꞌdungan nga paꞌaaten, may pagꞌaꞌargan yan.”

⁴¹ Pagkaꞌrut it sang puluꞌ ngayting mga alagad, miniseg sirat ki Santiago baw si Juan.

⁴² Aypaꞌ ka tiningped sira ni Jesus baw maat yat kanira, “Magkaꞌrutan mi nga iyan pagkilalaen nga mga pagbayaꞌen it mga taw nga ega magkilalat Ampuꞌang Diyus, maꞌigpit i pamegbeg nira it mga pagsasakpen nira ngayti. Subraꞌ nay buwat it mga piyakamataꞌas nga punuꞌan nira.

⁴³ Temed ega sana atkayan i adaten situt imyu. In daꞌga, in siyu manggid it imyu i magꞌireg magmabantug, kaꞌilangan manigsirbi kanya it kaꞌibaan ya.

⁴⁴ Baw in siyuy magꞌireg it magbaraꞌ nga piyakamataꞌas, kaꞌilangan pasbung kanya nga uripen it muꞌsa.

⁴⁵ Ka yay matuud, maski aku nga Taga Langit nga Ipiyanganak it Taw, ega maat iyan i inasitu ku, isaꞌun masirbiyan it beken, in daꞌga aku i magsirbi baw ipagtas kuy ginawa ku nga yay itanggung it kasalaꞌan it kadaklan.”

Piyagayen ni Jesus i beleg nga si Bartimeo

⁴⁶ Nakaꞌbut na si Jesus duꞌun it Jerico, kaꞌibaan ya nagay mga alagad ya ngayti. Paggaring nira siꞌ duꞌun, daꞌga magbugtuꞌ i bulyug it taw nga dimnasun it kanira. May napsagan nira nga beleg, magꞌaꞌdung duꞌun it binit it dalan ka magpaꞌildaw-ildaw. Ngaran ya si Bartimeo, amaꞌ ya si Timeo.

⁴⁷ Iyan naꞌrutan ya nga duꞌun si Jesus nga taga Nazaret, ipaggaꞌu-gaꞌuy ya na nga magꞌaat, “Jesus, nga tungtung-inapuꞌ it adiꞌ nga si David, sanguꞌan mu naga aku!”

⁴⁸ Siyuraraw kanya it mga taw baw pagꞌaaten nga ega sumarit tingeg. Temed diyadakulaꞌ ya gat meget, “Tungtung-inapuꞌ it adiꞌ nga si David, beteꞌ sanguꞌan mu naga aku nga matuud!”

⁴⁹ Timnindeg si Jesus ngayti nga magpanaw baw maat ya, “Paꞌasituun mi kanya.” Aypaꞌ tiyaꞌwagan nira i beleg ngayti, nga magꞌaat, “Paksegen muy nakem mu. Tindeg! Ka pagpaꞌaduꞌunun ya ikaw.”

⁵⁰ Egay beken, inilkas yay gulamen ya. Nagpatitigdaw i timnindeg baw minlep duꞌut ki Jesus.

⁵¹ Maat ni Jesus it kanya, “Unuy ireg mu nga buwaten kut imu?” “Agalen, abaa, ireg ku baꞌ magkalteg aku!” tubag it beleg ngayti.

⁵² “Ta in atkayan,” maat ni Jesus, “mapanaw ka na. Kalteg ka nayan sabap it pamayaꞌ mut aken.” Iti nga lagi, magkalteg na kanya, langkuy dimnasun na kanyat ki Jesus.