Marcos 1 - Tagbanwa

Magpangadal baw magpamawtis si Juan

¹ Itu, magsugid tu it Magayen nga Baritaꞌ pasar it ki Jesu-Cristo, nga kanya i Anak it Ampuꞌang Diyus.

² Nagpapuꞌun tu it iyan natuman i isiyurat it mga prupitaꞌ it tagnaꞌ, nga magꞌaat, “Yay matuud, may taꞌgen ku nga makauꞌna it imu, ka asikasuun ya i panawan mu.”

³ “May magpanggaꞌmaran duꞌun it rugar nga kapupuyangtan, nga magꞌaat i pagꞌaaten, ‘Buwatan mit dalan i Ampuꞌan. Diritsuun baw gayen-gayenen mi i panawan ya ngaytu.’”

⁴ Natuman tu iyan nanluꞌsut na si Juan. Namawtis na kanya duꞌun it rugar nga kapupuyangtan baw nangadal, nga magꞌaat, “Singuliꞌan baw indiꞌan mi na i mga kasalaꞌan mi baw pabawtis nga pamatuud it indiꞌan mi na, isaꞌun pasinsiyaen kamu naga it Ampuꞌang Diyus.”

⁵ Mamagpuꞌsa-puꞌsa it paꞌaduꞌut kanya i mga taw duꞌun it mga lansangan nga sakep it Judea, pati mga taga Jerusalem. Pamagsinguliꞌan nira i mga kasalaꞌan nira baw magpabawtis na sirat ki Juan duꞌut danum it Jordan, nga magpamatuud it indiꞌan na niray kasalaꞌan.

⁶ Inabel nga bulbul it ramu-ramu nga kamelyo i pakayan ni Juan ngayti, baw sambut ya, binwat nga kulit it bakaꞌ. Payaꞌtung nga apan baw deges it putyukan i pangaꞌen ya.

⁷ Pirmi yang ipagsugid in magpangadal kanya nga magꞌaat, “Mabut nga magsusunud it aken i landaw paꞌ it aken. Maski muꞌbad it seget it talumpaꞌ ya ka awaꞌen na, ega mapakay nga mabwat ku, ka subrang banar i kataꞌasan ya.

⁸ Kayti pagbawtisen ku kamu situt danum, temed kanya, Espiritu Santo i ibawtis yat imyu.”

Nagpabawtis si Jesus

⁹ Kat iting timpu miyabut si Jesus nga garing duꞌun it Nazaret nga sakep it Galilea. Pagꞌabut ya duꞌun, biyawtis kanya ni Juan duꞌun it danum it Jordan ngayti.

¹⁰ Desang magpatingdal na si Jesus, naltegan ya nga sakaling miyabri i langit, baw nagpasalu duꞌun it kanya i Espiritu Santo it Ampuꞌang Diyus, nga subung it kalapatiꞌ i pamabilug.

¹¹ Dengan it may ampang nga duꞌut langit i garing, nga magꞌaat, “Ikaw talagay pagmaꞌa-maꞌalen ku nga Anak. Talagang pagsagyaan ku ikaw nga banar.”

Siyukdanan ni Satanas si Jesus ka kupakursud ya

¹² Ta pagkabawtis it ki Jesus ngayti, tiyaban kanya nga lagi it nagpasarum ngayti duꞌun it kanya nga Espiritu Santo, tiyabanat kanya duꞌun it rugar nga kapupuyangtan.

¹³ Epat nga pulung aldaw i kaꞌlay ya duꞌun. Siyukdanan kanya ni Satanas, in unu makapakursud ya. Duꞌut rugar ngayti, may maꞌiꞌiseg nga mga ramu-ramu, temed pagsirbiyan si Jesus it mga anghil.

Tiyaꞌwagan ni Jesus i epat nga mga manigsedaꞌ ka alagaden ya na

¹⁴ Iyan pinirisu na si Juan, miyuliꞌ na si Jesus duꞌun it Galilea. Ipiyangadal ya duꞌun i Magayeng Baritaꞌ nga garing duꞌun it Ampuꞌang Diyus.

¹⁵ Ipagpangadal ya nga magꞌaat, “Naꞌbut nay ipiyabetang-betang nga timpu. Adeꞌdeng nay kaꞌadiꞌan it Ampuꞌang Diyus. Singuliꞌan mi nay mga kasalaꞌan mi baw indiꞌan mi na. Pamayaꞌnen mi i Magayen ngaytung Baritaꞌ.”

¹⁶ Kaꞌsa nga magpanaw si Jesus duꞌun it tambing it Lapnaw it Galilea, napsagan ya i duwang namagsulsug nga manigsedaꞌ, si Simon baw si Andres. Mamaglaya sira.

¹⁷ Maat ni Jesus it kanira, “Mayaꞌ kamu nat aken, ka buwaten ku na kamu nga taw na i subuk paglugitmen mi.”

¹⁸ Pagkagneg it duwa ngayti, tiyananan nira nay lugitem nira ngayti, ka miyayaꞌ nang matuud it ki Jesus.

¹⁹ Sigi nga panaw ni Jesus ngayti, desang duꞌut langbus napsagan ya i duwa gasiꞌ nga namagsulsug nga si Santiago baw si Juan. Mga anak sira na Zebedeo. Mamagꞌayus sira it lambat nira duꞌut sakayan.

²⁰ Tiyaꞌwagan sira gasiꞌ ni Jesus. Dimnasun na gasiꞌ i duwa ngayti. Amaꞌ nira, duꞌun nagat sakayan ngayti, natuduꞌ. Mga taawan nira manay kaꞌibaan ya.

Inimugaw i maraꞌe-raꞌet nga magpapulpug it esang taw

²¹ Naꞌaduꞌun sira it Capernaum. Iyan Aldaw nat Kapaꞌnaan, siminled sira duꞌun it papagsambaan bawnga nanulduꞌ si Jesus duꞌun.

²² Naliluꞌ i mga taw, sabap maꞌyag kat ampang ya nga kanya i may kamatuudang kasepsep it ipagtulduꞌ. Ega subung it mga manigpaꞌyag it urdin nga mamagsangpit nga pirmi it ipiyangadal it beken.

²³ Sakaliꞌ nga may nanggaꞌmaran duꞌut papagsambaan ngayti nga esang taw nga pagpapulpugun it maraꞌe-raꞌet.

²⁴ Maat ya, “Unuy labe-labet mut amen, Jesus nga taga Nazaret? Unuy inasitu mu? Muuꞌ ka nat amen? Talagang magkaꞌrutan ku in siyu ka. Ikaw i ega basta-basta ngayan nga siyarigan it Ampuꞌang Diyus!”

²⁵ Pagkagneg ni Jesus, siyuraraw ya. Maat ya, “Ayaw kat sarit tingeg! Magliꞌid ka na asat kanya ngayan!”

²⁶ Piyapangingsil siꞌ i taw ngayti it maraꞌe-raꞌet ngayti nga magpapulpug it kanya. Bawnga nangurisang i nagliꞌid duꞌut bilug ya.

²⁷ Talagang namagkaliluꞌ i kadakel ngayti. Ingku-ingkutun i buwat nira, “Unu baytu? Baꞌgung ipagpangadal? Ka ungaytu, may pudir ya nga sekaten yay pati maraꞌe-raꞌet bawnga pagpamayaꞌnen kanya.”

²⁸ Yanay dali-daliꞌ it manlekep it muꞌsang rugar it Galilea i baritaꞌ pasar it ki Jesus ngayti.

Dakel nga mga magsarut i piyagayen ni Jesus

²⁹ Pagliꞌwan nira duꞌut papagsambaan, naꞌaduꞌun na Jesus it balay it duwa ngayti magsulsug nga si Simon baw si Andres. Kaꞌibaan nira nagat naꞌaduꞌun, si Santiago baw si Juan.

³⁰ Abutan nira, magbubuntul i punyangan ni Simon nga babay ka pagramigan. Isiyugid nira nga lagi it ki Jesus.

³¹ Inlep ni Jesus i babay ngayti, singkel yay alima ka biyangun. Minibwan nga lagi i ramig it babay ngayti baw nagsimpan na kanyat itarakan yat kana Jesus ngayti.

³² Pagsedep it aldaw, tiyaban duꞌut ki Jesus i muꞌsa nga mamagsarut baw pagpapulpugun it maraꞌe-raꞌet.

³³ Punuꞌ it taw i duꞌun it sarungaan it balay ngayti ka miyuꞌsa nay sang kalansanganan nga taw.

³⁴ Dakel nga piyagayen ni Jesus nga may sarut, maski unu nga kalasit sarut i ipagꞌabang nira. Dakel gasiꞌ nga inimugaw ya nga mga maraꞌe-raꞌet. Ega piyataꞌnan ya nga makaꞌampang i mga maraꞌe-raꞌet ngayti sabap urut na nira in siyu talaga kanya.

Lingkep ni Jesus it pangadal i Galilea

³⁵ Kukuꞌ-aldaw paꞌ, nagbangun na si Jesus. Naꞌaduꞌun kanya it esang rugar nga egay tataw, ka nanalangin duꞌun.

³⁶ Tiyulus kanya ni Simon baw mga kaꞌibaan ya ngayti.

³⁷ Pagkaparag nirat ki Jesus, maat nira, “Pagtulusun ka bat kadaklan it taw.”

³⁸ Temed katubag si Jesus, maat ya, “Kaꞌilangan nga paꞌaduꞌun tami gasiꞌ it mga katepad nga lansangan, isaꞌun kapangadal aku gasiꞌ duꞌun. Sabap ituy enged ku situt banwa.”

³⁹ Egay beken, liyekep-lekep yay muꞌsang Galilea, nga magpangadal duꞌun it mga papagsambaan baw magpangimugaw it mga maraꞌe-raꞌet.

Piyagayen ni Jesus i esang babangbangen

⁴⁰ Kaꞌsa may esang taw nga babangbangen nga nandangep duꞌun it ki Jesus. Nanluud kanya nga nagpasanguꞌ-sanguꞌ. Maat ya, “In beteꞌ ireg mu, talagang mapagayen mu aku.”

⁴¹ Nakasanguꞌ nga matuud si Jesus it kanya. Tiyapal ya i taw ngayti, dengan it miyampang nga magꞌaat, “Talagang ireg ku. Kayti nga lagi, gumayen ka naytu!”

⁴² Sakaliꞌ nga nagsipat i bangbang it taw ngayti ka mindek na.

⁴³ Piyapanaw kanya nga lagi ni Jesus, takaꞌ ipiyagbenge-bengel it kanya nga magꞌaat,

⁴⁴ “Iyan ega daꞌay sugidan mu nga maski siyu, in daꞌga paꞌaduꞌun ka nga lagi it sasirduti, ka paꞌeket-eket ka it kanya. Bawnga megay ka it ipagpasalamat, uyun kat mga ipiyagꞌurdin ni Moises, nga bilang pamatuud kat mga taw nga magayen ka na.”

⁴⁵ Temed pagpanaw it taw ngayti, ipiyanugid-sugid ya in magꞌuꞌunu mindek i sarut ya ngayti. Aypaꞌ biyaraꞌan, ega na magkapalansangan si Jesus it magparayag-rayag sabap gandur nat taw i mamagpaꞌaduꞌut kanya. Duꞌun na lamang kanya it liꞌwan it lansangan, kat mga rugar nga kapupuyangtan. Pagꞌaduꞌunun na kanya it mga taw nga maggaring kat paꞌari-aring rugar.