Lucas 3 - Tagbanwa

Magpangadal baw magpamawtis si Juan

¹ Ta it naꞌlay nang timpu, naꞌbut nay ikasang puluꞌ baw lima nga taꞌun i pagꞌimpiradur ni Tiberio. Si Poncio Pilato i gubirnadur it Judea. Si Herodes i adiꞌ duꞌun it Galilea baw sulsug ya nga si Felipe i adiꞌ duꞌun it Iturea baw Traconite. Si Lisanias i adiꞌ duꞌun it Abilinia.

² Si Anas baw si Caifas i mga Piyakamataꞌas nga Sasirduti. Ta, kat iting timpu, miyabut i ampang it Ampuꞌang Diyus duꞌun it ki Juan ngayting anak na Zacarias, nga duꞌun kanya it rugar nga kapupuyangtan.

³ Aypaꞌ binwat ya, liyekep-lekep ya i taawan kat padipag-dipag it danum it Jordan, ka nangadal na. Ipagpangadal ya nga magꞌaat, “Singuliꞌan baw indiꞌan mi na i mga kasalaꞌan mi baw pabawtis nga pamatuud it indiꞌan mi na, isaꞌun pasinsiyaen kamu naga it Ampuꞌang Diyus.”

⁴ Si Juan ngaytu i pagpaꞌiguꞌan it isiyurat it prupitaꞌ nga si Isaias, nga magꞌaat, “May magpanggaꞌmaran duꞌun it rugar nga kapupuyangtan nga magꞌaat i pagꞌampangen, ‘Buwatan mit dalan i Ampuꞌan. Diritsuun baw gayen-gayenen mi i panawan ya ngaytu.

⁵ Kaꞌilangan nga tambakan mi i mga magkekelnaꞌ baw pulinasen i kada mungsuꞌ baw bukid. Diritsuun i iyan mamagliliꞌut-liꞌut nga dalan baw pantayen i mabakutud.

⁶ Talagang maltegan it muꞌsang taw i panribri it Ampuꞌang Diyus.’”

⁷ Dakel i mga taw nga magꞌaduꞌun it ki Juan ngayti ka magpabawtis. Ipagrapar ni Juan it kanira, nga magꞌaat, “Unuka situ kamu nga mga mapiyandayaꞌ nga subung it adat it dukul? Siyuy miyaat nga mapalagyuwan mi i panriga nga magꞌaꞌabut?

⁸ Kaꞌilangan nga ipamatuud mi kat pangaꞌgenan mi nga magsinguliꞌ kamu na nga matuud. Ega kesgat nakem mi nga maat mi, tungtung-inapuꞌ kamu naga ni Abraham, aypaꞌ ka sagyaan kamu nagay imyu it Ampuꞌang Diyus. Ka isugid kut imyu nga talagang kaya it Ampuꞌang Diyus nga, garing kat mga batu ngaytung ituꞌun, mapabaraꞌ ya nga mga tungtung-inapuꞌ ni Abraham.

⁹ Ka kayti, magbebreꞌ na i kapa duꞌun it gamut it magpupꞌun nga kayu, ka kada kayu nga ega magbuwaꞌ it magayen, pukanen bawnga idaꞌpug duꞌut apuy. Ta, magꞌadeꞌdeng na nga atkayan i panriga it imyu.”

¹⁰ Pagkagneg it mga taw ngayti, miningkut sirat kanya nga magꞌaat, “Ta in atkayan, unuy magayen nga buwaten namen?”

¹¹ Pagtubag ni Juan, maat ya, “Ta, mga atkaytu i magayen nga buwaten mi. In beteꞌ nagduwa naga i badyuꞌ mu, kaꞌilangan tunggalan muy iyan talagang ega na. Subung nagay iyan may pangaꞌen, ega riga-rigaen yay iyan ega nay magkasikep.”

¹² May miyabut gasiꞌ nga mga manigpabayad it barayadan duꞌun it gubirnu ka pabawtis gasiꞌ. Miningkut sirat ki Juan nga magꞌaat, “Ta kami ngaytu, Manigtulduꞌ, unuy magayen nga buwaten namen?”

¹³ Katubag si Juan, maat ya, “Ayaw kamut pabayad it subraꞌ na kat rega it barayadan nga ipiyagꞌurdin.”

¹⁴ May mga sundaluꞌ gasiꞌ nga miningkut it ki Juan. Maat nira, “Ta, amen, unu gasiꞌ i magayen nga buwaten namen?” Maat gasiꞌ i tubag ni Juan it kanira, “Ayaw kamut panreges-reges it maski siyu u manistigu it ega matuud isaꞌun lamang kapamirak kamu. Yay magayen nga adaten mi, pagsagyaan mi na i suwildu mi.”

¹⁵ Ta it talagang maseked-seked i elat it mga taw it isiyanggup nga Cristo, kat nake-nakem it muꞌsa, “Barang si Juan na ngaytuy Cristo ngayang paꞌaaten.”

¹⁶ Pagkamuya ni Juan kayti, maat ya it mga taw ngayti, “Pagbawtisen ku kamu situt danum. Temed yay matuud, iyan mabut nga magsusunud it aken, kanya nga ibawtis it imyu, Espiritu Santo baw apuy. Talagang landaw paꞌ kanya it aken. Kamatuudan, maski muꞌbad it seget it talumpaꞌ ya, ega mapakay nga mabwat ku, ka subrang banar i kataꞌasan ya.

¹⁷ Kanya ngaytu i mukuman it mga taw. Ka subung it pagseskelen ya i aꞌawꞌaw ya, nga iꞌawꞌaw ya it kuꞌut. Bulunun ya i legas ka idawaꞌ duꞌut lagkaw. Temed iyan kuꞌut ngaytu, idaꞌpug ya duꞌun it apuy nga ega magpugda-pugdaw seked it kaꞌnu-kaꞌnu.”

¹⁸ Dakel paꞌ nga mga bagay i ipiyangadal ni Juan it mga taw ngayti kat paꞌyag ya it Magayeng Baritaꞌ.

¹⁹ Ega desang mga taw ngayti i pagraparan ni Juan, in daꞌga pati adiꞌ it Galilea nga si Herodes. Ka pagsardawun ya si Herodes ngayti sabap it inagaw ya i ipag ya nga si Herodias, nga asawa it sulsug yang si Felipe, baw beken paꞌ nga karaꞌe-raꞌetan nga pagbuwaten ya.

²⁰ Temed ta, diyungagan ga ni Herodes i kadakulat kasalaꞌan ya, ka miyabut i timpu nga ipiyapirisu ya si Juan ngayti.

Nagpabawtis si Jesus

²¹ Iyan ega paꞌ ngayti napirisu si Juan, reet-reet nat taw i magpabawtis duꞌut kanya. Nagpabawtis gasiꞌ si Jesus. Pagpanalangin ni Jesus it magpatingdal na, naltegan ya nga sakaling miyabri i langit.

²² Bawnga nagpasalu duꞌun it kanya i Espiritu Santo, nga subung it kalapatiꞌ i pamabilug. Dengan it may ampang nga duꞌut langit i garing, nga magꞌaat, “Ikaw talagay pagmaꞌa-maꞌalen ku nga Anak. Talagang pagsagyaan ku ikaw nga banar.”

Kagiyaringanan ni Jesus

²³ Mga magtutulung pulung taꞌun na i idad ni Jesus, nagpapuꞌun na kanyat buwaten ya nga magpangadal. Tanud it katataawan, ipiyagrasyaꞌ kanya ni Jose. Apuꞌ ya si Eli,

²⁴ nga anak ni Matat, nga si Matat, anak ni Levi nga anak ni Melqui. Si Melqui ngayti, anak ni Jana nga anak ni Jose.

²⁵ Si Jose ngayti, anak ni Matatias nga anak ni Amos. Nanganak it ki Amos si Nahum nga anak ni Esli. Si Esli ngayti, anak kanya ni Nage,

²⁶ nga anak ni Maat nga anak ni Matatias. Si Matatias ngayti, anak ni Semei nga anak ni Jose. Si Jose ngayti, anak ni Juda,

²⁷ nga anak ni Joana, nga si Joana, anak kanya ni Resa nga anak ni Zorobabel, nga anak ni Salatiel, nga anak gasiꞌ ni Neri.

²⁸ Si Neri ngayti, anak ni Melqui nga anak ni Adi. Nanganak it ki Adi, si Cosam nga anak ni Elmodam nga anak ni Er.

²⁹ Si Er, anak kanya ni Josue nga anak ni Eliazer nga anak ni Jorim, nga anak ni Matat, nga anak ni Levi,

³⁰ nga anak ni Simeon nga anak ni Juda. Nanganak it ki Juda si Jose, nga si Jose ngayti anak ni Jonan nga anak ni Eliaquim.

³¹ Si Eliaquim, anak ni Melea, nga si Melea ngayti, anak ni Mainan nga anak ni Matata, nga anak ni Natan nga anak ni David.

³² Si David, anak ni Jesse nga anak ni Obed. Si Obed, anak kanya ni Booz, nga si Booz ngayti, anak ni Salmon nga anak ni Naason,

³³ nga anak ni Aminadab nga anak ni Admin. Si Admin ngayti, anak kanya ni Arni nga anak ni Esrom nga anak gasiꞌ ni Fares. Si Fares, anak ni Juda,

³⁴ nga anak ni Jacob, nga si Jacob, anak ni Isaac ngayting anak ni Abraham, nga anak ni Tare nga anak ni Nacor.

³⁵ Si Nacor, anak ni Serug nga anak ni Ragau, nga anak kanya ni Peleg. Si Peleg ngayti, anak ni Heber, nga anak ni Sala.

³⁶ Si Sala, anak ni Cainan nga anak ni Arfaxad, nga anak gasiꞌ ni Sem. Si Sem, anak ni Noe nga anak ni Lamec,

³⁷ nga anak ni Matusalem, nga anak gasiꞌ ni Enoc, nga si Enoc anak ni Jared nga anak ni Mahalaleel, nga anak ni Cainan.

³⁸ Si Cainan ngayti, anak ni Enos nga anak gasiꞌ ni Set, nga si Set anak ni Adan nga bilang anak it Ampuꞌang Diyus.