Lucas 2 - Tagbanwa

Simnakit na si Jesus

¹ Kat iting timpu, ipiyagꞌurdin it Romano nga Impiradur nga si Agusto nga sinsusun i muꞌsang taw nga sakep it Roma.

² Binwat tuy uꞌna ngaytu nga paninsus iyan si Cirenio i gubirnadur it Siria.

³ Aypaꞌ ka muꞌsang taw, naꞌaduꞌun it in unu nga lansangan i lansangan it giyaringan nira ka pasinsus duꞌun.

⁴ Ta napanaw na gasiꞌ si Jose it kanya. Garing duꞌun it Nazaret nga sakep it Galilea, naꞌaduꞌun kanyat Betlehem nga sakep it Judea, lansangan nga siyakitan it adiꞌ it tagnaꞌ nga si David, sabap si Jose, tungtung-inapuꞌ it adiꞌ ngayti.

⁵ Iba ya it naꞌaduꞌun, si Maria nga inasawa ya, lamang ega paꞌ nagdemket sira. Kusasakiten nay beteng ni Maria ngayti.

⁶ Nadnganan nat duꞌun sira i pagsakit.

⁷ Ipiyanganak ya na i anak ya nga panganay nga lalaki. Bawnga uyun it adat nirat iting timpu, biyedbedan yat magayen it mga ramba-rambay i waꞌwaꞌ ngayti. Ipiyaliꞌtid ya duꞌun it papakaꞌnan it ayep, ka duꞌun mana ngayti i kanirang napaꞌabutan, it papaꞌlungan it mga ayep, sabap daꞌnay rugar nira duꞌun it pagpaꞌabutan nga mga seled nga duꞌut dibwat. Talagang sageksek na.

Ipiyaꞌrut it anghil duꞌut mga manigꞌeper it tupa nga simnakit na si Jesus

⁸ Iting delem, may mga manigꞌeper nga magtatandaꞌ it tupa nira duꞌun it pagpakaꞌnan nga rugar.

⁹ Sakaling minyag i pagꞌaꞌanuꞌan nira ngayti ka miyabut i esang anghil it Ampuꞌang Diyus. Binisaraꞌ sirat singkar ngaytit kabantugan it Ampuꞌang Diyus. Unupat namagꞌiꞌlam na sira.

¹⁰ Temed inaat sirat anghil ngayti, “Ayaw kamut iꞌlam. May magayeng baritaꞌ nga taban ku nga isugid kut imyu, nga megay it dakulaꞌ nga kasagyaan kat muꞌsang taw.

¹¹ Sabap ipiyanganak kayti duꞌun it lansangan ni David i Manriribri mi. Kanya i isiyanggup nga Cristo nga Ampuꞌan.

¹² Kamatuudan, maparagan mi i esang madaragen nga biyedbedan it ramba-rambay, nga papakaꞌnan lamang it ayep i piyaliꞌtidan it kanya.”

¹³ Sakaling dimnakel nay anghil ka nagsinabut nay garing duꞌut langit. Pagbantugun niray Ampuꞌang Diyus, nga magꞌaat,

¹⁴ “Bantugun i Ampuꞌang Diyus nga duꞌun it dibwat it langit. Baw situt sinirungat langit, kaꞌimbengan it nakem i ibgay ya kat mga taw nga pagsagyaan ya.”

¹⁵ Iyan nagsipat nay mga anghil ka miyuliꞌ na duꞌun it langit, maamaatan i mga manigꞌeper ngayti, “Bilaꞌ, paꞌaduꞌun tami baytu it Betlehem. Baꞌnawun tami i ipiyaꞌrut ngaytu it aten it Ampuꞌang Diyus.”

¹⁶ Pagkarunding nira kayti, miyereg-ereg na sirat paꞌaduꞌun. Naparagan nira na Maria duwa ni Jose baw madaragen ngayti nga magliliꞌtid duꞌun it papakaꞌnan it ayep.

¹⁷ Pagkalteg it mga manigꞌeper, itiyuturan nira i kumpur inaat it anghil ngayti pasar it iti nga waꞌwaꞌ.

¹⁸ Naliluꞌ i muꞌsa nga nakagneg it itiyuturan it mga manigꞌeper ngayti.

¹⁹ Ki Maria, idiyawaꞌ ya nga banar kat ulu ya i muꞌsa ngayti, nga pirmi nga pagdedemdemen ya.

²⁰ Pagꞌuliꞌ it mga manigꞌeper ngayti, siging pagbantug nira it Ampuꞌang Diyus. Pagsaꞌu-saꞌupun nira i kanyang kabantugan sabap it mga nagnegan baw naltegan nira ngayti, nga uyun it ibiyaritaꞌ it kanira it anghil.

Piyangaranan si Jesus

²¹ Pagꞌikawalung aldaw, nga aldaw nga ituriꞌ baw ipangaran it waꞌwaꞌ, si Jesus i ipiyangaran it kanya, ka iti i inaat it anghil nga ipangarat kanya, parabir diyarugmatiꞌ i waꞌwaꞌ ngayti.

Tiyaban si Jesus duꞌun it Templo nga duꞌut Jerusalem

²² Ta, yan naꞌbut na gasiꞌ i aldaw nga ipagpanlimpiyuꞌ it kanira kat panleteg it Ampuꞌang Diyus, nga uyun it ipiyagꞌurdin ni Moises pasar it panganak, nagpaJerusalem na na Jose duwa ni Maria. Tiyaban nira i waꞌwaꞌ ngayti duꞌun it Templo, sabap kat iting timpu ipaꞌadap na nirat Ampuꞌang Diyus.

²³ Sabap inaat it urdin nga basta panganay, in lalaki, kabilangan ya, ambuꞌ it Ampuꞌang Diyus, aypaꞌ ka kaꞌilangan nga subuk lekaten nira kanyat pirak.

²⁴ Langkuy nagbuwat sira it ipagpanlimpiyuꞌ ngayti kat panleteg it Ampuꞌang Diyus, nga yan gasiꞌ i inaat it urdin, nga ibgay nira nga antengen, duwang batu i manu-manuk nga kalapatiꞌ, u maski punay, basta uꞌuybun, nga duwang batu naga.

²⁵ Kat iting timpu, may esang lalaki duꞌut Jerusalem nga si Simeon i ngaran. Mataldeng kanya kat panleteg it Ampuꞌang Diyus baw masiyambaen paꞌ. Talagang maꞌlat kanyang banar it isiyanggup nga Cristo nga rimibri it bangsa nira nga Israel. Baw pagsasaruman kanya it Espiritu Santo.

²⁶ Ta, natantuwan ya kat panakem it Espiritu Santo ngayti nga ega paꞌ matay kanya seked it ega paꞌ naltegan ya i Cristo ngayting isiyanggup it Ampuꞌang Diyus.

²⁷ Kat iti nagang aldaw, piyanakman it Espiritu Santo si Simeon ngayti nga paꞌaduꞌun it Templo. Aypaꞌ abutan na Jose duwa ni Maria nga muwat it ipiyagꞌurdin it Ampuꞌang Diyus, duꞌun na si Simeon ngayti.

²⁸ Kiyapuꞌput ni Simeon i waꞌwaꞌ ngayti baw biyantug yay Ampuꞌang Diyus, nga magꞌaat,

²⁹ “Agalen ku, aku ngayni nga manigsirbi mu, maski baiꞌen mu nay ginawa ku, uyun kat isiyanggup mut aken.

³⁰ Ka naltegan nat duwang mata ku i siyarigan mu nga Manriribri,

³¹ nga pabetang-betang mu ngaytu, matantuwan tu it muꞌsang katataawan.

³² Maꞌyagan yay mga bangsa nga ega Judio pasar it dalan it karibriyan. Baw sabap it kanya ngaytu, dumakulaꞌ i kabantugan nameng mga Judio nga mga taawan mu, nga tungtung-inapuꞌ ni Israel.”

³³ Naliluꞌ na Jose duwa ni Maria it mga inaat ngayti ni Simeon pasar it waꞌwaꞌ nira ngayti.

³⁴ Bawnga piyatdekan ni Simeon it ampang nga paꞌildaw na Jose ngayti duwa ni Maria, baw maat pay paꞌugdun ya, “Maria, matuud i iꞌaat ku pasar it itung waꞌwaꞌ. Talagang ipiyabetang-betang it Ampuꞌang Diyus nga sabap it waꞌwaꞌ ngaytu, dakel tami nga mga Judio nga maribri, temed dakel nagay beken nga maꞌilang ka daꞌsira kupasakep it kanya. Sabap kanyay bilang tandaꞌanan nga magtulduꞌ it dalan nga magpaꞌaduꞌun it Ampuꞌang Diyus, temed ta, dakel i pakiꞌambut it panulduꞌ ya ngaytu.

³⁵ Ta sikayan matantuwan i kat nakem it katataawan. Baw yay matuud, mapurun bay nakem mu nga subung it sakit it nasudyuk i pusuꞌ mu it madaꞌun nga karis.”

³⁶ May duꞌun gasiꞌ it Templo nga esang babay nga prupitaꞌ nga si Ana. Anak kanya ni Fanuel, nga tungtung-inapuꞌ ni Aser. Gurang na kanyang banar. Pitung taꞌun lamang i kaꞌlay it aꞌasawat kanya, nabalu na.

³⁷ Ta, kat iting timpu, walung puluꞌ may epat na nga taꞌun i idad it balu ngayti. Yanay pirmi ya duꞌun it Templo, ka delem-aldaw magsamba kanya, magpuwasa baw magpanalangin duꞌun it Ampuꞌang Diyus.

³⁸ Ega paꞌ natupus i ampang ni Simeon ngayti, minlep na duꞌut kana Jose si Ana ngayti. Nagpasalamat kanya duꞌun it Ampuꞌang Diyus. Bawnga siging tuturan ya pasar it waꞌwaꞌ ngayti duꞌun it maski siyung beken nga maꞌlat nagat panribri it kanira nga mga Judio.

Miyuliꞌ na Jose duꞌun it Nazaret

³⁹ Iyan natuman na na Jose i muꞌsang isiyurat duꞌun it ampang it Ampuꞌang Diyus pasar it waꞌwaꞌ ngayti, miyuliꞌ siꞌ sira duꞌun it Nazaret ngayti nga sakep it Galilea.

⁴⁰ Dimnakulaꞌ si Jesus ngayti nga makulaꞌsi baw ega basta-bastay kasepsep ya, ka pirming pagtabangen it Ampuꞌang Diyus.

Iyan sang puluꞌ may duwa na i idad ya, naꞌaduꞌun siꞌ na Jesus it Jerusalem

⁴¹ Taꞌun-taꞌun, kada maꞌbut i Pistaꞌ it Tiyaꞌliban, magpaJerusalem i mga giyaringan ngayti ni Jesus.

⁴² Iyan sang puluꞌ baw duwa na nga taꞌun i idad ni Jesus ngayti, piyabayaꞌ na nirat nagparagiꞌ siꞌ it pistaꞌ nga pagbuwaten nirat kaꞌlay.

⁴³ Pagkatiwas it pistaꞌ, napanaw na na Jose ka muliꞌ na. Ega namuyaan nira nga palan nagpatuduꞌ duꞌut Jerusalem si Jesus.

⁴⁴ Ta, it tanud tu na Jose, maggugubuk-gubuk na si Jesus duꞌun it reet-reet it mga kaꞌibaan nira ngaytit mamagpanaw, sigi na nga panaw nira it nagꞌapun. Ta magkaleg-kaleg sira, egay si Jesus. Aypaꞌ tiyulus nira duꞌut mga kaꞌibaan nira ngaytit mamagpanaw nga mga kaduguꞌan baw kakilala nira.

⁴⁵ Ta it egay magkaparagan nira, egay beken, nagpaꞌuliꞌ sira duꞌut Jerusalem i magtulus.

⁴⁶ Ikatlung aldaw, bawnga naparagan nira si Jesus duꞌun it Templo, magꞌaꞌdung nga kaꞌibaan it mga manigtulduꞌ it urdin. Magpagneg kanya baw magꞌingkut gasiꞌ it kanira.

⁴⁷ Talagang naliluꞌ i muꞌsa nga nakagneg it kanya sabap it kasepsep ya baw kagayen it mga tubag ya.

⁴⁸ Pagkalteg na Jose, naliluꞌ gasiꞌ sirat kanira. Maat it inaꞌ ya ngayti, “Dunguꞌ, unuka atkaytuy pabetang mut amen, it masyadu nay keber-keber it seled namen it amaꞌ mu it magtulus it imu? Tanud namen in naꞌunu ka na.”

⁴⁹ Katubag si Jesus, nga maat ya, “Inaꞌ, unuka pagtulusun mi aku? Unu, daꞌga naꞌrutan mi nga kaꞌilangan situ aku it balay ngaytut Amaꞌ ku?”

⁵⁰ Temed ega nasepsepan it mga giyaringan ya i paꞌaaten ya ngayti.

⁵¹ Ta yapay katabus it kanirang uliꞌ duꞌut Nazaret. Talagang mapiyamayaꞌ si Jesus ngayti it kanira. Muꞌsa ngayti nga magkamuyaan ni Maria, ipagdawaꞌ yang banar duꞌun it ulu ya.

⁵² Magdakulaꞌ si Jesus ngayti, magdungag gasiꞌ i kasepsep ya. Talagang pagsagyaan kanya it Ampuꞌang Diyus baw mga taw gasiꞌ.