Lucas 19 - Tagbanwa

Nabaꞌgu talagay adat ni Zaqueo

¹ Nakaꞌbut na si Jesus duꞌut siyudad it Jerico ka yay pagpesagen it dalan nga pagpanawan ya.

² May esang manggaden duꞌun nga pagbayaꞌen it mga manigpabayad it barayadan duꞌut gubirnu, nga si Zaqueo i ngaran.

³ Talagang pagpaꞌresan ya nga maltegan ya si Jesus isaꞌun makilalaan ya in siyuyti i paꞌaaten ngayti. Temed ta, it si Zaqueo, ababaꞌ nga taw, ega magkaltegan ya si Jesus ka magkalingeb nat kadakel it taw.

⁴ Aypaꞌ binwat ya, miyalagyu kanya duꞌut uꞌnaan baw miyapyat duꞌut kayu nga sikomoro isaꞌun maltegan yat pagayen-gayen si Jesus nga tumaꞌlib.

⁵ Pagkapatuꞌ ni Jesus duꞌut kayu ngayti, timningaraꞌ kanya baw miyampang, nga magꞌaat, “Zaqueo, dali-daliꞌen mu nga lampud, ka duꞌut balay muy paꞌabutan ku kayti.”

⁶ Limnampud na kanyat padali-daliꞌ baw piyabayaꞌ ya si Jesus duꞌut balay ya it masagyang-masagya.

⁷ Egay beken, muꞌsa nga nakalteg kayti, remeteng-retengan nga maamaatan, “Bilaꞌ, magpaꞌabut kanya duꞌun it esa nga makasalaꞌan!”

⁸ Iyan mamagꞌaꞌdung na sira duꞌun it balay, timnindeg siꞌ si Zaqueo baw miyampang, nga magꞌaat, “Ampuꞌan, kayti, sang lubuk nga kusas ku, ipamgay ku na duꞌun it mga makukuriꞌ. Baw in unuy liyupigan ku duꞌut maski siyu, epaten ku nga dubli i iꞌuliꞌ ku.”

⁹ Pagkagneg ni Jesus kayti, miyampang kanya nga magꞌaat, “Talagang kayting lagi, miyabut situt itung pamalay-balay i panribri it Ampuꞌang Diyus. Sabap kat binwat ngaytu ni Zaqueo, nga tandaꞌ it nabaꞌgu nay adat ya, maꞌyag nga nakaꞌuyut na kanya it mga matuud nga tungtung-inapuꞌ ni Abraham, nga ega desang kat pagduguꞌ in daꞌga kat pamayaꞌ nirat Ampuꞌang Diyus.

¹⁰ Sabap aku nga Taga Langit nga Ipiyanganak it Taw, yay inasitu ku, pagtulusun kuy mga nateꞌag-teꞌag ka iribri ku sira kat panriga sabap it kasalaꞌan nira.”

Piyaꞌalimbawaan ni Jesus, sang puluꞌ nga kaꞌuripnan nga tiyuduꞌan it pirak it agalen nira

¹¹ Ta, mga taw ngayting duꞌun it balay na Zaqueo nga nakagneg it iti nga sugi-sugid ni Jesus, piyagnegan ya nat ipiyaꞌugdun ya nga esang alimbawa. Atkayti i buwat ya ka adeꞌdeng na kanya duꞌun it Jerusalem, baw tanud it kadakel, ipatindeg ya nat iting timpu i kaꞌadiꞌan it Ampuꞌang Diyus nga magꞌadiꞌ na kanyat banwa nira.

¹² Maat i alimbawa ya, “May esang mataꞌas nga taw nga naꞌaduꞌun it lekat nga banwa ka ipaꞌdung kanyat Impiradur kat pagkaꞌadiꞌ, bawnga muliꞌ kanya ka magꞌadiꞌ na.

¹³ Parabir kanya gimnaring, tiningped ya i sang puluꞌ kat mga uripen ya. Binggayan yay kada esa it kantidad it sang gatus kat kanirang pirak, baw maat yat kanira, ‘Ipanulus mi tu seked it mabut aku.’

¹⁴ Ta it pagꞌisgan kanya it beken nga mga kabanwa ya, aypaꞌ ka pagkagaring yang lagi, may ipiyalungbaꞌ nira duꞌun it paꞌdung ngaytit kanya kat pagkaꞌadiꞌ. Mangaat nga, ‘Iyan ega ireg namen nga magꞌadiꞌ sinit amen i iyang taw!’

¹⁵ Temed ipiyaꞌdung naga kanya kat pagkaꞌadiꞌ, bawnga pagkatiwas miyuliꞌ kanya, ka magꞌadiꞌ na duꞌut kanira. Pagꞌabut, tiningped ya siꞌ i piyamgayan ya ngayti it pirak isaꞌun maꞌrutan ya in sang unuy nakapatubuꞌ it kada esa.

¹⁶ Pagsigꞌabut, maat it sang kataawan, ‘Agalen, sang pulung dubli it itiyuduꞌ mu situt aken i natubuꞌ ku.’

¹⁷ ‘Magayen!’ maat it agalen ya ngayti. ‘Pagsagyaan kuy binwat mu ngayan. Kayti it namuyaan ku nga magkasarigan ka it maski dekeyeng bagay, papamaalaꞌen ku ikaw it sang puluꞌ nga kalansanganan.’

¹⁸ Maat siꞌ it sang kataawan, ‘Agalen, itiyuduꞌ mu ngayan situt aken, timnubuꞌ yan it lima paꞌ nga dubli.’

¹⁹ ‘Ta, in atkayan,’ maat it agalen ya ngayti, ‘pamaalaꞌan muy lima nga kalansanganan.’

²⁰ Sang kataawan siꞌ i nagpatpad baw maat ya, ‘Agalen, waytu nagay pirak mu ngayan. Biyuꞌtungan kuytut lages bawnga itiyaguꞌ ku isaꞌun ega magnisan.

²¹ Ka magꞌiꞌlam akut imu sabap maꞌigpit ka. Pagkubraen muy ega ikaw i minlug baw magkayeg ka it ega ikaw i nagpakariga.’

²² Tiyubag kanyat agalen ya ngayti, nga magꞌaat, ‘Maraꞌe-raꞌet talagay adat mu nga uripen! Kat sadili mu ngayan nga inampang, ukumanan ku ikaw. Ka magkaꞌrutan mu na palan nga maꞌigpit aku, nga pagkubraen kuy ega aku i minlug baw magkayeg aku it ega aku i nagpakariga.

²³ Ta, unuka ega iꞌinlug mu duꞌun it mga manigpaꞌutang? In iꞌinlug mu paꞌ, daꞌga kayti may napisiꞌ ku na nga tubuꞌ ya?’

²⁴ Bawnga singkat yay mga duꞌun ngayti. Maat ya, ‘Sigi, pisiꞌen mi i pirak ku ngayan asat kanya, ka idungag duꞌun it nakapatubuꞌ it sang puluꞌ ngayting dubli.’

²⁵ ‘Aa bilaꞌ,’ maat nira, ‘Agalen, unuka dungagan paꞌ it sang ribu nay kanya?’

²⁶ Pagtubag ya, maat ya, ‘Matuud tuy iꞌaat ku ngaytut imyu, nga iyan magkasarigan baw mapiyaꞌres, tumbasan kanya nga dungagan i kaya yat kanya. Temed iyan ega magkasarigan baw garusan, maꞌilang talaga i maski sang dekeyeꞌ nga kaya yang lagi.

²⁷ Baw iyan gasiꞌ nga magkuntraꞌ ngayan it aken, nga ega ireg nira nga pagꞌadiꞌan ku sira, pamisiꞌen mi sira kayti, ka pangimatayen situt adapan ku.’”

Pagbantugun it mga taw si Jesus pagꞌabut ya duꞌun it Jerusalem

²⁸ Napanaw siꞌ na Jesus nga lumangbus na duꞌut Jerusalem. Magꞌuuꞌna si Jesus it mga kaꞌibaan ya.

²⁹ Iyan adeꞌdeng na sira duꞌun it mga baryu it Betfage baw Betania, nga duꞌun na sira it Mungsuꞌ it Olibo, may itiyaꞌeg ni Jesus it duwang kataawan nga mga alagad ya.

³⁰ Maat ya it kanira, “Paꞌaduꞌun kamu daꞌan it baryu ngaytit Betfage. Pagꞌabut mi yan duꞌun, may maltegan mi nga uꞌuybun it kabayuꞌ nga asno nga magsesget, nga ega paꞌ mansu. Uꞌbaden mi ka tabanen mi situt aken.

³¹ In may mimraw it imyu in unuka pagꞌuꞌbaden mi, aaten mi nga, ‘Pagkaꞌilanganen baꞌ it Ampuꞌan.’”

³² Napanaw nay duwa ngayti nga tiyaꞌeg. Naparagan niray pagꞌaaten ngayti nga asno subung nat inaat ngayti ni Jesus.

³³ Desang pagꞌuꞌbaden na nira i seget, maat i mga tagpuꞌun, “Unuka pagꞌuꞌbaden mi i seget it asno ngayan?”

³⁴ Katubag i duwa ngayti, “Pagkaꞌilanganen baytu it Ampuꞌan.”

³⁵ Tiyaban na nira duꞌun it ki Jesus i uꞌuybun it asno ngayti. Pagꞌabut, ipiyagꞌampilu niray mga gulamen nira bawnga ipiyasakay na nira si Jesus.

³⁶ Magsasakay na si Jesus nga limnangbus duꞌun it Jerusalem. Buwat it mga taw, ipagꞌamlad nira i gulamen nira duꞌun it dalan, nga tandaꞌ it paggalang baw pagꞌistimar nira it ki Jesus.

³⁷ Iyan adeꞌdeng na duꞌut Jerusalem si Jesus nga magpanadsad na duꞌun it Mungsuꞌ it Olibo, atnat giyaw-giyaw i kadakel ngaytit mga taw. Pagbantugun nira i Ampuꞌang Diyus sabap it muꞌsang mga kalililuꞌan nga bagay nga namuyaan nira.

³⁸ Maat i ipaggaꞌuy-gaꞌuy nira, “Mabantug i Adiꞌ ngaytu nga tiyaꞌeg it Ampuꞌang Diyus! Nagkagayen tami siꞌ it Ampuꞌang Diyus nga duꞌut langit! Bantugun i Ampuꞌang Diyus nga duꞌun it dibwat it langit!”

³⁹ Temed inaat si Jesus it beken nga mga Pariseo nga magbabayat bulyug ngaytit magpaJerusalem, “Manigtulduꞌ, surarawun muy mga alagad mu ngayan!”

⁴⁰ Pagtubag ni Jesus, maat ya it kanira, “Matuud i iꞌaat kut imyu nga in papdeken sira, mga batu siꞌ i manggaꞌmaran.”

⁴¹ Iyan adeꞌdeng nang banar si Jesus duꞌun it Jerusalem, nga magkalawag ya nat magayen i siyudad, sakaliꞌ nga singgawan ya.

⁴² Baw miyampang kanya, nga magꞌaat, “Anin saꞌan, kamu nga mga taga Jerusalem! In maat talagang magkaꞌrutan mi kayti ngaytu in magꞌuꞌunu magkagayen kamu nga matuud duꞌun it Ampuꞌang Diyus! Temed it kaꞌlay ngaytu pagdaꞌgaen mi, aypaꞌ subuk ipagtaguꞌ nayan it imyu.

⁴³ Aypaꞌ liꞌwan ya, mabut talagay aldaw nga kaliputputun it mga kalaban mi i siyudad mi ngaytu. Kulungun kamu baw gipiten it pabali-bali, nga palinibut may sundaluꞌ na.

⁴⁴ Talagang ranggaꞌen nira i siyudad baw puuꞌun niray mga taw duꞌun. Baw maski sangbat nga batu, egay ipaꞌped nira duꞌun it pagruruknuꞌan ya. Pataꞌnan sirat Ampuꞌang Diyus nga muwat it atkayti ngayti sabap ega kinilala mi aku nga tiyaꞌeg ya nga rimibri it imyu.”

Pagpanindegan ni Jesus i papagsambaang balay it Ampuꞌang Diyus

⁴⁵ Pagꞌabut ni Jesus duꞌut Jerusalem, siminled kanya duꞌun it Templo. Piyangimugaw ya i mga manigdagang baw mamagpangalang nga duꞌun it piyakakamaꞌyagan ya.

⁴⁶ Maat ya it kanira, “Magbebtang duꞌun it isiyurat nga ampang it Ampuꞌang Diyus, ‘Iyan balay ku nga papagsambaan it aken, taꞌwagen nga balay nga papanalanginan.’ Temed binwat mi nga pugad nat mga mananakaw!”

⁴⁷ Bawnga aldaw-aldaw magpanulduꞌ si Jesus duꞌun it Templo ngayti. Temed mga pagbayaꞌen it sasirduti, mga manigpaꞌyag it urdin baw beken nga may mataꞌas nga katengdanan kat mga taw, magtulus sirat ikaꞌimatay nirat ki Jesus ngayti.

⁴⁸ Temed ega magkaparagan nira in unuy magayeng buwaten, ka puꞌsat taw, magkasaga sirang banar it mga panulduꞌ ngayti ni Jesus.