Lucas 17 - Tagbanwa

Beken nga mga ipagpanulduꞌ ni Jesus it mga alagad ya pasar it pamayaꞌ

¹ Itu siꞌ i ipiyanulduꞌ ni Jesus it mga alagad ya, nga magꞌaat, “Talagang ega maꞌawaꞌ i mga magkapisiꞌan it ipagkasalaꞌan it taw. Temed kaꞌiꞌiraꞌbut nay mabetangan it mga taw ngaytung pagpanggaringan it ipagkasalaꞌan ngaytu.

² Magayen pay paribatuwan na lamang i esang taw it dakulaꞌ nga gigilingan nga batu ka itdag na lamang duꞌun it tengat laud. Magayen pat pakursud kanya it esang mapiyababaꞌ nga magpamayat aken.

³ Aypaꞌ magꞌintur kamu nga banar. In beteꞌ may esang sulsug mu kat pamayaꞌ nga may buwaten yat imu nga ega magayen, iꞌaat mut kanya. Ta, in magsinguliꞌ, pasinsiyaen mu kanya.

⁴ Maski magkasalaꞌan it pitung bisis it magꞌapun baw pitung bisis nga paꞌasat imu ka magꞌangut it pasinsiya, ega daꞌgaen mu. Pasinsiyaen mu.”

⁵ Ta, kaꞌampang i mga alagad ngayti, maat nira, “Ampuꞌan, paksegen muy pamayaꞌ namen it imu.”

⁶ Katubag i Ampuꞌan nga si Jesus, maat ya, “Sana makasbung i pamayaꞌ mi it dekeyeng alit it mustasaꞌ nga sigi-siging pangseg seked it dakulaꞌ nang luwak. Ka in atkaytu i pamayaꞌ mit aken, talagang maski kayu ngayan i aaten mu nga magabut, ka duꞌun siꞌ i tindegan yat dagat, siguradu nga mamayaꞌ it imyu.

⁷ Dedemdemen mi tu. In beteꞌ may esat imyu nga may uripen nga magꞌaradu u magꞌeper beteꞌ it mga tupa, unuy iskat mut kanya pagꞌuliꞌ ya nga garing duꞌut uma? Unu, aaten mu nga lagi kanya, ‘Daliꞌ na, kumaꞌen’?

⁸ Simpri ega. In daꞌga, iyan i iskat mu, aaten mu yan, ‘Sigi, tarakanan mu aku it pangiyapun ku baw magꞌimaraꞌ ka na ka aꞌarigraan mu aku nga magkaꞌen baw magꞌinum. Kumaꞌen ka manay imu in kakaꞌen aku na.’

⁹ Baw in nasunud nat uripen ngayti i muꞌsang isingkat it kanya, unu, pasalamatan kanya it agalen ya ngayti? Siguru ega.

¹⁰ Simpri atkayan naga i imyu. Basta nabwat mi na i kumpur isingkat it imyu it Ampuꞌang Diyus, ega pikiren mi nga subrang ikabantug mi i pagsunud mi ngayan. In daꞌga maat mi yan, ‘Uripen kami lamang baytu. Pagsunudun namen lamang i katengdanan namen.’”

Sang pulung kataawan nga babangbangen i piyagayen ni Jesus

¹¹ Kat panaw ngayti ni Jesus nga magpapaJerusalem, namsag kanya duꞌun it piyagtengaꞌan it mga rugar it Samaria baw Galilea.

¹² Desang magseled na kanya duꞌun it esa nga baryu, siyusmu kanya it sang puluꞌ nga babangbangen. Timneꞌyad sira duꞌun it ala-alaid,

¹³ bawnga nanggaꞌmaran nga magꞌaat, “Jesus nga Agalen, beteꞌ sanguꞌan mu naga kami!”

¹⁴ Pagkalteg ni Jesus it kanira, maat ya, “Sigi, paꞌaduꞌun kamu it mga sasirduti ka paꞌeket-eket it kanira.” Ta desang mamagpanaw na sira, sakaliꞌ nga mindek nay mga bangbang nira ngayti.

¹⁵ Pagkamuya it sang kataawan it mindek nay bangbang ya, nagpaꞌuliꞌ kanya, nga ipaggaꞌu-gaꞌuy ya na nga magbantug it Ampuꞌang Diyus.

¹⁶ Nanluud kanya duꞌun it sarungaan ni Jesus ka nagpasalamat. Iti nga taw, Samaritano.

¹⁷ Miningkut si Jesus, “Daꞌga baꞌ,” maat ya, “sang pulung kataawan i pindekan it bangbang? Ta ari nay siyam ngayan?

¹⁸ Unu, daꞌsira nagpaꞌuliꞌ nga bantugun niray Ampuꞌang Diyus? Unu, itu lamang, kanya ngaytung ega Judio?”

¹⁹ Bawnga inaat kanya ni Jesus, “Tindeg na. Dumayun-dayun ka nat panaw mu. Piyagayen ka naytu sabap it pamayaꞌ mut aken.”

Panulduꞌ pasar it pangabut it kaꞌadiꞌan it Ampuꞌang Diyus baw pamaꞌuliꞌ situ ni Jesus

²⁰ Kaꞌsa iningkut si Jesus it mga Pariseo in kaꞌnu ipatindeg i kaꞌadiꞌan it Ampuꞌang Diyus. Katubag si Jesus, “Ega baꞌ maltegan it mata i kaꞌadiꞌan ya in magꞌabut na.

²¹ Egay makasugid nga maat, ‘Waytu na baꞌ!’ u ‘Wayti na, magꞌaꞌabut na duꞌun!’ Sabap kaꞌadiꞌan it Ampuꞌang Diyus nga paꞌaaten, pagsakep ya it nakem it kumpur magsarig baw magpamayat kanya.”

²² Bawnga maat ni Jesus it mga alagad ya, “Mabut talagay timpu nga yay kat nakem mi, ‘In maat kayti na beteꞌ i timpu nga paꞌuliꞌ situ i Taga Langit nga Ipiyanganak it Taw ka magꞌadiꞌ na kat kabantugan ya!’ Temed ta, ega maltegan mi tu ka ega paꞌ timpu ya.

²³ Abutun kamu nayan it baritaꞌ nga maat yan, ‘Nagpaꞌuliꞌ siꞌ bayan kanya nga sini na!’ U maat it beken, ‘Duꞌun na bayti!’ Temed ayaw kamut pamayaꞌ nga maat mapanaw nga tumulus it aken.

²⁴ Sabap in magꞌuꞌunu maꞌyagan i langit garing it lebatan seked duꞌun it sedpan basta magkilat, atkayan naga yan i pamaꞌuliꞌ ku situ, aku nga Taga Langit nga Ipiyanganak it Taw.

²⁵ Temed kaꞌilangan lumabay aku daꞌan it dakel-dakel nga kakuriꞌan baw tibabaꞌen aku it mga taw it kayti na ngaytu.

²⁶ Yay matuud, in magꞌuꞌunu ega kat ulu it mga taw kat timpu ni Noe i panriga nga mabut it kanira, atkayan naga kat pamaꞌuliꞌ ku situ, aku nga Taga Langit nga Ipiyanganak it Taw.

²⁷ Sabap kat iting timpu, mamagkaraꞌnen-karaꞌnen, mamagꞌinum-inum baw mamagꞌasa-asawaen i katataawan seked it nagpasakay na si Noe duꞌun it binwat ya nga sakayan. Pagꞌabut it lenep nga ikiyatunaw it banwa, egay tiya-tiyakap it katataawan. Ta unupat biyaraꞌan, napuuꞌ sira nga muꞌsa.

²⁸ Atkayan naga it timpu ni Lot nga ega gasiꞌ i tiya-tiyakap it mga taw duꞌun it Sodoma baw katepad ya nga mga lansangan. Sabap iyan mga taw, mamagkaraꞌnen-karaꞌnen baw mamagꞌinum-inum, mamagpangalang-alang baw mamagdagang-dagang, mamagpanluwa-luwak baw mamagpatindeg it mga balay.

²⁹ Temed iyan aldaw nga nakalꞌid na si Lot duꞌut Sodoma ngayti, miyuran na nga yay magtedag nga garing duꞌut langit, apuy baw asupri, nga ituy miyansur it kanirang muꞌsa.

³⁰ Atkayan naga yan i ipaꞌuliꞌ situ it Taga Langit nga Ipiyanganak it Taw.

³¹ Kat iyan nga aldaw, iyan duꞌun it mapatag nga atep it balay ya, ega na semled paꞌ duꞌun it balay ka mamisiꞌ it mga betang. Baw iyan duꞌun it uma, ega na muliꞌ nga mamisiꞌ paꞌ it maski unu. Sabap kat aldaw ngayting itiꞌen, ega nay pagꞌargan it mga betang.

³² Dedemdemen mi i nabetangan it asawa ni Lot.

³³ Ka iyan magraras nga banar it kaꞌgenan ya ngaytu kayti, maꞌlam nagaytu asat kanya. Temed iyan temeꞌteꞌ it aken, maski maat ikagtas nat ginawa ya, makanya talagay kaꞌgenan nga ega basta-basta.

³⁴ Matuud talagay iꞌaat kut imyu nga kat pamaꞌuliꞌ ku situ, mapinpin nay mga taw. In delemen i iꞌabut ku, barang may duwang kataawan nga nagꞌulid temed in ega nagsubung sira nga taawan ku, matuduꞌ i esa, esa lamang i pisiꞌen.

³⁵ In aldawun i iꞌabut ku, barang may duwa nga nagsaꞌud i maglebek, temed in ega nagsubung sira nga taawan ku, matuduꞌ i esa, esa lamang i pisiꞌen.

³⁶ Subung naga i duwang kataawan nga magbuwat duꞌun it uma. Basta ega nagsubung sira nga taawan ku, matuduꞌ i esa, esa lamang i pisiꞌen.”

³⁷ Pagkagneg it mga alagad, miningkut sira, nga magꞌaat, “Ta ari yan, Ampuꞌan?” Katubag si Jesus, “Maat i sambatan, ‘In ariyen i miyatay, duꞌun naga yan magtingped-tingped i mga tarwangin.’”