Lucas 14 - Tagbanwa

May piyagayen siꞌ ni Jesus kat Aldaw it Kapaꞌnaan

¹ Kaꞌsa siꞌ nga Aldaw it Kapaꞌnaan, inimbitar si Jesus nga duꞌun i kaꞌnan it balay it esang mataꞌas nga Pariseo. Ta, yan duꞌun na sirat balay, talagang pagniidan i mga pagbuwaten ni Jesus.

² May nagpatpad duꞌut ki Jesus nga esang taw nga sasarutun, nga sagpiꞌ it sarut ya ngayti, dakulang getek it mga aꞌay baw alima ya.

³ Aypaꞌ ka iningkut ni Jesus i mga Pariseo baw mga manigpaꞌyag it urdin. “Unu,” maat ya, “uyun kat urdin nga papdek it sarut in Aldaw it Kapaꞌnaan u ega?”

⁴ Temed daꞌgay riꞌe-riꞌeng it mga iningkut ya ngayti. Ta, binwat ni Jesus, singkel yay alima it magsarut ngayti ka piyagayen ya, bawnga piyapanaw ya na kanya.

⁵ Bawnga maat ni Jesus it kanira, “In beteꞌ may anak mi u bakaꞌ nga nakataptap duꞌut tabud, unu, ega abaten mi maski Aldaw it Kapaꞌnaan?”

⁶ Ingkut ngayti ni Jesus nga itiꞌen, ega naga natubag nira.

Magayeng adaten it magꞌimbitar baw pagꞌimbitaren kat pagkaraꞌnen

⁷ Namuyaan ni Jesus nga pagpiliꞌ-piliꞌen it mga inimbitar duꞌut pagkaraꞌnen ngayti i mga araꞌdungan nga pagpaꞌdungan it matataꞌas. Aypaꞌ ka nagꞌalimbawa kanya, nga magꞌaat,

⁸ “In beteꞌ may mimbitar it imu nga paragiꞌ it pagsadu, ega piliꞌen muy ega basta-basta nga araꞌdungan, ka barang may inimbitar nga mataꞌas pat imu.

⁹ Ta pagkaꞌanu kayan, melep asat imu i nangimbitar ngaytut imu, baw aaten ya ikaw, ‘Sigi, itung taw i paꞌdungun mu sikaytung araꞌdungan.’ Ta daꞌga, magꞌeya-eyaꞌ ka nga papaꞌugaden ka duꞌun it pagpaꞌdungat mga raꞌyat?

¹⁰ Yay magayen, in imbitaren ka, duꞌun ka madung it pagpaꞌdungan it mga raꞌyat. Ka in atkayan, pagꞌelep yan it nangimbitar, aaten ya ikaw, ‘Bilaꞌ, paꞌugad ka duꞌut ega ngayti basta-basta nga araꞌdungan.’ Ta, daꞌga, nabgayan ka it kabantugan it bilug kat adapan it mga inimbitar nga beken.

¹¹ Ka yay matuud, iyan mapiyataꞌas-taꞌas, buwaten kanya nga mababaꞌ. Baw iyan mapiyababaꞌ, iyan i buwaten nga mataꞌas.”

¹² Bawnga inaat ni Jesus i minimbitar ngaytit kanya. Maat ya, “Basta may pagkaraꞌnen mu, ega iyan i imbitaren mu, mga iba-iba, mga sulsug u beken nga kaduguꞌan mu, u mga manggaden nga kamalay. Ka simpri, belsen ka gasiꞌ nira it mimbitar. Ta daꞌga, natumbasan ka na.

¹³ Aypaꞌ in magꞌitsu ka it dakulaꞌ nga pagkaraꞌnen, yay imbitaren mu, mga makukuriꞌ, mga may mintirat bilug, mga pilay baw mga beleg.

¹⁴ Simpri egay makatumbas nirat imu. Aypaꞌ ka subraꞌ ka nga makasagya, ka Ampuꞌang Diyus i tumumbas it imu, asan it egnen ya nat paꞌuliꞌ i mga taw nga mataldeng kat panleteg ya.”

Dakulaꞌ siꞌ nga pagkaraꞌnen i piyaꞌalimbawaan ni Jesus

¹⁵ May esang kaꞌibaan ni Jesus it magkaꞌen duꞌun it papangaꞌnan nga miyampang, pagkagneg yat inaat ngayti ni Jesus. Maat yat ki Jesus ngayti, “Makasagya talagay taw nga makaparagiꞌ kat kasagyaan duꞌun it kaꞌadiꞌan it Ampuꞌang Diyus!”

¹⁶ Itiyubag ni Jesus, esang alimbawa, nga magꞌaat, “May esang taw nga nagpaꞌitsu it esang dakulaꞌ nga pagkaraꞌnen baw dakel i inimbitar ya.

¹⁷ Iyan naꞌbut nay ipagkaraꞌnen, singkat yay taraꞌgen ya nga pamaꞌrutan nay mga inimbitar ngayti. Sugidan sira nga paꞌaduꞌun na ka itsu nay muꞌsa.

¹⁸ Temed nanganya-kanyat alyus i piyamagpaꞌrutan ngayti. Maat it sang kataawan, ‘Nakaꞌalang aku baꞌ it lugtaꞌ. Ta, kaꞌilangan nga paꞌaduꞌun aku kayti. Kamu nay magkaꞌrut pasinsiya it aken.’

¹⁹ Maat i sang kataawan, ‘In yan, pasinsiyaen mi aku, ka sukdanan kut paguyud it tagduwa-duwa i sang puluꞌ nga kabakaꞌan nga naꞌalang ku.’

²⁰ Kat sang kataawan, maat ya, ‘Daꞌku bayan kapanragiꞌ ka yapay kaꞌubus it pagꞌasawa namen.’

²¹ Egay beken, miyuliꞌ nay taraꞌgen ngayti nga tiyaꞌeg. Yanayti isiyugid ya duꞌun it agalen ya. Ta unupat nangiseg na. Maat ya siꞌ it taraꞌgen ya ngayti, ‘Sigi, mapanaw ka naga. Paꞌaduꞌun kat mga karsadaꞌ it siyudad ngaytu baw yanay sariyen mut pabayaꞌ, mga makukuriꞌ, mga may mintirat bilug, mga beleg baw mga pilay.’

²² Pagkaꞌuliꞌ it taraꞌgen ngayti, maat ya, ‘Agalen, piyamayaꞌ ku nay itiyaꞌeg mu ngayat aken, temed marugar ga lamang i papangaꞌnan.’

²³ ‘Ta sigi,’ maat it agalen ya ngayti, ‘paꞌaduꞌun kat mga dalan kat liꞌwan it siyudad baw duꞌun it mga kumbu-kumbuꞌ it mga kaꞌildaw-ildaw. Regesen mu nay mga taw nga, maski magpangangaliꞌ sira, temed paꞌasitu naga isaꞌun mapnuꞌ i balay ku ngaytu.’

²⁴ Paꞌugdun nga inaat ya, ‘Ka matuud i iꞌaat ku nga egay maski sang kataawan nga mga miyalyus ngayting inimbitar nga makasukdan it ipiyaꞌitsu ku ngaytu nga pangaꞌen.’”

Ega mapakay nga alagad ni Jesus i taw nga ega ipasakep yay maski unu nga pagrarasan ya duꞌun it ki Jesus ngayti

²⁵ Ta it dakel na talaga nga pagtaw i magdasun-dasun it ki Jesus, siyarunga ya sira baw miyampang, nga magꞌaat,

²⁶ “Iyan kupasakep it aken, ega mapakay kanya nga alagad ku basta magkasubraꞌ pat pagmaꞌal yat aken i pagmaꞌal yat kanyang giyaringan, asawa, mga anak, mga sulsug, baw maski kanyang sadili nga kaꞌgenan ka subrang pagrarasan ya.

²⁷ Baw in siyu nga ega pasaꞌnen yay kanyang krus ka sumunud nat aken, talagang ega mapakay kanya nga alagad ku.

²⁸ Ka in beteꞌ may esat imyu nga magrima-rima it patindeg it dakulang balay, daꞌga baꞌ kuwintaꞌen ya daꞌan i magastuꞌ ya, in unu tama-tamaꞌ na nga kapaꞌman ya i dawaꞌ ya nga pirak?

²⁹ Ka barang yanay seked, desang makapatindeg. Ega makapaꞌman ya. Ta daꞌga, buwaten na kanya nga kasesleman it kada makalteg.

³⁰ Maamaatan yan sira, ‘Bilaꞌ, desang suꞌag it langit!’ Aypaꞌ iyan kupasakep it aken, pikiren mi daꞌan it magayen.

³¹ Ka subung gasit esang adiꞌ nga kupanrumpak duꞌun it ipiyagkaꞌadiꞌ ya. Daꞌga baꞌ, adalan ya daꞌat magayen in unu, sang puluꞌ nga ribu nga mga sundaluꞌ ya, unu kaya nga ipadarugpaꞌ it duwang puluꞌ nga ribu nga taawan it kurumpakan ya ngayti?

³² Ta simpri, in ega kaya ya, imbis nga manrumpak, yanay papaꞌaduꞌunun ya, pakiꞌupakat nga magꞌamigus.

³³ Aypaꞌ pikiren mit magayen bawnga buwaten i dapat mi nga buwaten. Ka basta ega magkatananan it esang taw i maski unu nga pagrarasan ya, ka ipasakep ya nat aken, ega mapakay kanya nga alagad ku.”

³⁴ Maat pay paꞌugdun ni Jesus, “Iyan kupasakep it aken temed ega ipasakep yat aken i muꞌsa ya, subung kanya it asin nga ega na mapalaꞌ. Ka asin, dakulay pakinabang ya. Temed in ega na mapalaꞌ, magꞌuꞌunu paꞌ mapapalaꞌ it sumaꞌup?

³⁵ Talagang ega nay pakinabang ya, ka maski ipatabaꞌ it lugtaꞌ ega na mapakay. Aypaꞌ ibuntal na lamang. Ta, it pagꞌargan it talinga, ipagpagneg, kaꞌilangan nga pagnegan mit magayen i pagꞌaaten ku ngaytu.”