Levitico 10 - Tagbanwa

Kamaliꞌ i binwat it duwang anak ni Aaron duꞌut Tabirnakulu aypaꞌ nakabetang sira it maraꞌe-raꞌet

¹ May esang aldaw nga, duwang anak ni Aaron nga si Nadab baw si Abiu, binwat nira, minsiꞌ it mga berebtangan it apuy, inapuyan nira bawnga miyanteng it kamangyan duꞌut adapan it AMPUꞌANG DIYUS. Temed ega uyun kat ipiyagꞌurdin ya i pamwat nira it iti ngayti.

² Aypaꞌ may ipiyadiklap it AMPUꞌANG DIYUS nga apuy nga minimatay it kanira, it duꞌun paꞌ sirat adapan ya ngayti.

³ Inaat ni Moises si Aaron, “Itu i kaꞌulugan it inaat ngayan it AMPUꞌANG DIYUS, nga magꞌaat, ‘Dapat aku nga kilalaen nga mabantug baw ega babasta-bastaen it muꞌsa nga magpatpad situt aken. Dapat aku nga galangen it kadakel it taw.’” Ega nakariꞌe-riꞌeng si Aaron.

⁴ Aypaꞌ binwat ni Moises, ipiyatawag ya si Misael baw si Elzafan, nga mga anak ni Uziel nga amayan ni Aaron. Pagꞌabut nira, maat ya it kanira, “Daliꞌ mi na. Awaꞌen mi situt ega ngaytu basta-bastang rugar i mga miyatay ngaytung mga kamanaken mi. Tabanen mi duꞌut liꞌwan it pagbabalay-balayan ta ngaytu.”

⁵ Egay beken, siyunud nira i inaat ngayti ni Moises. Ipiyaliꞌwan i mga miyatay nga mamagpapakay naga it pakayan nira nga pakayan it sasirduti.