Juan 9 - Tagbanwa

Piyagayen ni Jesus i esang lalaki nga sekad ya, beleg

¹ Kaꞌsang magpanaw si Jesus, may napsagan ya nga beleg nga lalaki. Sekad yay beleg ya ngayti.

² Iningkut kanyat mga alagad ya ngayti, maat nira, “Manigtulduꞌ, siyu manggid i may kasalaꞌan ka sumakit i itung taw, beleg na? Unu kanya u mga giyaringan ya?”

³ Katubag si Jesus, maat ya, “Simnakit kanya nga beleg, ega sabap may kasalaꞌan ya u mga giyaringan ya, in daꞌga isaꞌun lamang matanyag kat bilug ya i guna it Ampuꞌang Diyus.

⁴ Kaꞌilangan kita, buwaten tami i mga ipagpabwat it Ampuꞌang Diyus, kanya nga nagtaꞌeg ngaytit aken it paꞌasitu. Kaꞌilangan buwaten tami mintras egen tami paꞌ ka yay subuk aldawun. Sabap in patay na, ega nay rugar nga muwat, kabilangan ya delemen na. Ta, siyu pay makabwat? Daꞌga ega na?

⁵ Kabilangan ku, piyakatidaw. Baw kaꞌlay ku ngaytu situt banwa, magsisigi nga pagꞌeyagan kuy pikiran it mga taw.”

⁶ Pagkaꞌampang ni Jesus kayti, mimbur kanya duꞌut lugtaꞌ. Piyabaraꞌ yang rusuꞌ i imburan ya ngayti, bawnga ipiyaꞌid ya duꞌun it mata it beleg ngayti.

⁷ Pagkapaꞌid ya, maat ya, “Panaw, manraꞌmus ka duꞌut danum ngayting pagpangaranat Libtung it Siloe.” (Ireg sugiden it Siloe ngayti, tiyaꞌeg.) Namayaꞌ i beleg ngayti. Pagꞌuliꞌ ya duꞌut balay ya, magkalteg na kanya.

⁸ Pagkalteg it mga kamalay ya baw beken paꞌ nga nakalteg it kanya iyan magpaꞌildaw-ildaw paꞌ, maat nira, “Daꞌga baꞌ yanayay beleg ngayan nga magpaꞌildaw-ildaw?”

⁹ “Aaꞌ yanayan bayan!” maat it beken. “Bilaꞌ, ega!” maat i beken. “Nakaslun lamang bayay rupa ya.” Temed maat i lalaki ngayti, “Aku na ngaytu baytu!”

¹⁰ “Ta magꞌuꞌunu ka nakalteg? Unuka daꞌka na beleg?” maat it mga taw ngayti.

¹¹ Katubag i lalaki ngayti, “Iyan taw ngayan nga pagpangaranat ki Jesus, binwat ya, nagbuwat it rusuꞌ bawnga ipiyaꞌid ya situt mga mata ku ngaytu. Pagkapaꞌid ya, inaat ya aku, ‘Panaw, manraꞌmus ka duꞌut Siloe.’ Piyamayaꞌ kuy inaat ya ngaytit aken. Naꞌaduꞌun aku bawnga nanraꞌmus. Pagkaraꞌmus ku, ta, atkaytu na, nga magkalteg aku na.”

¹² “Ta ariyen nayan kanya?” ingkut nira siꞌ. “Taꞌway in nagpaꞌunu na,” maat i tubag ya.

Siyumarya it mga Pariseo i beleg ngayti in magꞌuꞌunu-unu i binwat ni Jesus

¹³ Piyabayaꞌ nira duꞌut mga Pariseo i beleg ngayti nga piyagayen ni Jesus.

¹⁴ Aldaw it Kapaꞌnaan i pagbuwat ni Jesus it atkayti nga minwat it rusuꞌ baw nagpagayen it kanya.

¹⁵ Siyumarya kanya it mga Pariseo it in magꞌuꞌunu magkalteg na kanya. “Ta yanayan baꞌ,” maat ya, “piyaꞌidan yat rusuꞌ i mga mata ku ngaytu, bawnga nanraꞌmus aku. Ta atkaytu na nga magkalteg aku na.”

¹⁶ Maat i beken nga mga Pariseo ngayti, “Talagang ega garing duꞌun it Ampuꞌang Diyus i iyang taw, sabap it ega pagꞌintindiyen yay Aldaw it Kapaꞌnaan ngaytu.” Temed beken, magꞌaat gasiꞌ nga magꞌuꞌunu makabwat it atkaytung mga tandaꞌanan nga kalililuꞌang bagay i esang makasalaꞌan? Sikayti ega siꞌ magparag-paragen sira it pagsugiden.

¹⁷ Aypaꞌ ka siyumarya nira sit sumaꞌup i taw ngayting beleg. “Ta ikaw,” maat nira, “it magkalteg ka na sabap, maat mu, piyagayen ka ni Jesus ngayti, ta, unuy masugid mu pasar it kanya?” “Aaꞌ,” maat i tubag ya, “esa bayan kanyang prupitaꞌ.”

¹⁸ Ega magpamayaꞌ i mga pagbayaꞌen ngaytit mga Judio nga beleg kanya it tagnaꞌ paꞌ bawnga piyagayen, aypaꞌ ka ipiyatawag niray mga giyaringan ya.

¹⁹ Pagꞌabut, iningkut nira nga magꞌaat, “Unuytu, anak mi i itung taw, baw unu, pagsakit ya, beleg nga matuud? Ta unuka kayti ega na beleg kanya?”

²⁰ Katubag i mga giyaringan ya ngayti, maat nira, “Talagang anak namen baytung matuud, baw talagang pagsakit ya beleg nang lagi.

²¹ Temed ega magkaꞌrutan namen in unuka magkalteg na kanya kayti, baw ega gasiꞌ magkaꞌrutan namen in siyuy nagpagayen ngaytit kanya. Magayen kanya nay ingkutun mi, tutal ega na waꞌwaꞌ kanya. Makasugid ya nayan it magayen i pasar it bilug ya.”

²² Atkayti i pangampang it mga giyaringan ya ngayti ka magꞌiꞌlam sirat mga pagbayaꞌen ngaytit mga Judio, sabap may piyagꞌunyunan it mga Judio ngayti nga in siyu-siyuy liꞌwanan it si Jesus na ngayti i Cristo nga Manriribring Adiꞌ ngayang isiyanggup, awaꞌen na duꞌut papagsambaan nira. Ega na uyut it pagkaJudio.

²³ Aypaꞌ ka atkayti i tubag it mga giyaringan ya ngayti, nga magꞌaat, “Tutal ega na waꞌwaꞌ kanya. Kanya nay ingkutun mi.”

²⁴ Aypaꞌ ka ipiyatawag nira siꞌ i beleg ngayti, ka iningkut nira siꞌ nga magꞌaat, “Kayti pagdedngegen kat Ampuꞌang Diyus. Aypaꞌ isugid muy kamatuudan, ka urut namen nga makasalaꞌan i iyang taw.”

²⁵ Katubag siꞌ kanya, nga magꞌaat, “Ta ega bayan magkaꞌrutan ku in makasalaꞌan kanya baw ega. Basta iyan lamang i magkaꞌrutan ku, talagang beleg aku temed kayti magkalteg aku na. Daꞌku na beleg.”

²⁶ “Ta unuy binwat it taw ngayti it imu? Magꞌuꞌunu piyagayen ya ikaw?”

²⁷ Tumubag siꞌ kanya, maat ya, “Isiyugid ku na it imyu. Ega lamang pagpagnegan mi. Ta unuka ireg mi siꞌ nga magnegan it sumaꞌup? Unu, ireg mi gasiꞌ nga mabwat kamu nga mga alagad ya?”

²⁸ Diniyampaꞌ nira na kanya, maat nira, “Ikaw bay alagad ya! Amen bilaꞌ, mga alagad kami ni Moises!

²⁹ Ka magkaꞌrutan namen nga piyakisugidan it Ampuꞌang Diyus si Moises, temed iyan nga taw, ega magkaꞌrutan namen in ari piyandungwatan ya kayan.”

³⁰ Katubag siꞌ i beleg ngayti, maat ya, “Talagang kalililuꞌan yan, nga ega magkaꞌrutan mi in ari giyaringan ya kayan, takaꞌ piyagayen ya aku nga kayti daꞌku na beleg.

³¹ Daꞌga baꞌ magkaꞌrutan ta nga ega pagtubagen it Ampuꞌang Diyus i mga makasalaꞌan, temed pagtubagen yay iyan nga magsamba it kanya it may galang baw magsunud it mga kaꞌirgan ya?

³² Ka garing paꞌ it amulaꞌ pay banwa, ega pay nakapagayen it beleg nga sekad ya, kayti mana.

³³ Talagang egay mabwat it iyan nga taw nga mga atkaytu in daꞌga talagang garing kanya duꞌun it Ampuꞌang Diyus.”

³⁴ Kaꞌampang siꞌ i mga Pariseo ngayti, maat nira, “Ipiyanganak ka nga makasalaꞌan nga banar. Kayti ikaw pay manulduꞌ it amen!” Pagkaꞌampang nira kayti, inimugaw na nira.

Mga ega mamayat ki Jesus, subuk mableg sira

³⁵ Nabaritaꞌan ni Jesus nga taw ngayting beleg nga piyagayen ya, inimugaw nat mga Pariseo. Pagkaparag ni Jesus it kanya, iningkut ya nga magꞌaat, “Unu, magpamayaꞌ ka it kanya nga Taga Langit nga Ipiyanganak it Taw?”

³⁶ Katubag i lalaki ngayti, maat ya, “Ay siyu bayan kanya, Agalen ku? Isugid mut aken isaꞌun mapamayaꞌ ku kanya.”

³⁷ “Ta nakitaan mu nang lagi,” maat ni Jesus ngayti, “baw magpakisugi-sugid nat imu kayti.”

³⁸ Yamanay naꞌampang it lalaki ngayti, maat ya, “Magpamayaꞌ aku nat imu, Ampuꞌan.” Bawnga nanluud kanya ka siyamba ya na si Jesus ngayti.

³⁹ Miyampang siꞌ si Jesus, maat ya, “Limnampud aku situt banwa isaꞌun ukumanan i katataawan. Iyan mga beleg, makalteg sira, baw iyan nga magkalteg na, subuk mableg sira.”

⁴⁰ Nagnegan tu it mga Pariseo nga duꞌun it tepad nira i iti nga inampang ni Jesus, aypaꞌ miningkut sirang lagi, nga magꞌaat, “Siguru daꞌkami baytu uyut it mga beleg ngayan nga paꞌaaten!”

⁴¹ Tiyubag sira ni Jesus, nga magꞌaat, “In beteꞌ uyut kamu nagat mga beleg ngayan, maꞌawaꞌ i kasalaꞌan mi nga ipagkaꞌukuman it imyu. Temed it paꞌaaten mi nga magkalteg kamut magayen, aypaꞌ ka asan pat imyu i kasalaꞌan mi.”