Juan 4 - Tagbanwa

Biyaraꞌan it pagpamsag na Jesus duꞌut Samaria

¹ Nabaritaꞌan it mga Pariseo nga subrang dakel i taw nga magkakabig baw magkabawtisan ni Jesus, dakel paꞌ it ki Juan.

² (Temed yan i kamatuudan, ega si Jesus i magbawtis, in daꞌga mga alagad ya ngayti.)

³ Pakaꞌrut ni Jesus kayti, liminꞌid kanya duꞌut Judea. Miyuliꞌ sirat mga alagad ya duꞌun it Galilea.

⁴ Temed kat panaw nira ngayti, kaꞌilangan nga mamsag duꞌun it Samaria.

⁵ Pagkaꞌbut duꞌut esang lansangan it Samaria nga pagpangaranan it Sicar, namagpaꞌna sira duꞌut liꞌwan it lansangan ngayti. Sicar ngayti, adeꞌdeng it ki Jose nga kabagiꞌan nga lugtaꞌ it amaꞌ nira nga si Jacob it timpu paꞌ nira.

⁶ Duꞌun kayti may tabud naga ni Jacob ngayti. Ta it nalpuꞌan na si Jesus it panaw, miyadung kanya duꞌun it tepad it tabud ngayti, beken it ababaꞌ nay aldaw.

⁷ May miyabut nga esang babay nga Samaritano ngayti nga magpanaꞌgeb. Inaat kanya ni Jesus, “Paꞌimnun mu daꞌan aku.”

⁸ (Egay duꞌun nga mga alagad ya ngayti, ka namagpangalang it makaꞌen duꞌun it lansangan.)

⁹ Kaꞌampang i babay ngayti nga Samaritano, maat ya, “Unuka magꞌangut kat danum nga imnun mu, it Judio ka, aku Samaritano?” (Ka iyan mga Judio, pagliꞌyan niray mga ipagkaꞌen baw ipagꞌinum it mga Samaritano.)

¹⁰ Mampang siꞌ si Jesus, maat yat babay ngayti, “In beteꞌ naꞌrutan mu lamang in magꞌuꞌunuy kadakulat ildaw nga ibgay it Ampuꞌang Diyus, baw in nakilalaan mu na in siyuy magꞌaat ngaytut imu, ‘Paꞌimnun aku,’ ikaw nay mangut situt aken isaꞌun mabgayan ka it egen nga danum nga magkabgay it kaꞌgenan.”

¹¹ Pagkagneg it babay ngayti, maat ya, “Agalen, ararem bay tabud ngaytu, baw subuk egay sasaklut mu. Ta ariyen yan i mapisiꞌan mut egen ngayan nga danum?

¹² Unu, makasubraꞌ ka paꞌ it kiyaꞌapuꞌ-apuꞌan tami nga si Jacob nga nagpasubli it amen it tabud ngaytu, tabud nagaytu nga pagsaꞌgeban it pagꞌimnun nira magꞌaꞌanak, pati mga ayep ya?”

¹³ Mampang siꞌ si Jesus, maat ya, “Iyan magꞌinum it itung danum, kumuꞌinum nagat sumaꞌup.

¹⁴ Temed iyan minum it danum ngayan nga ibgay ku, ega na kumuꞌinum pat sumaꞌup, ka subung naytut esang tumbud duꞌun it seled ya, nga magbegay it kaꞌgenan nga egay kaskedan.”

¹⁵ Maat siꞌ it babay ngayti, “Agalen, ta in atkayan, begayan mu akut danum ngayan nga pagsugiden mu, isaꞌun daꞌku na kumuꞌinum, sumuliꞌ-suliꞌ paꞌ situt tabud ngaytut magpanaꞌgeb.”

¹⁶ “Muliꞌ ka daꞌan,” maat ni Jesus, “ka pisiꞌen muy asawa mu.”

¹⁷ “Aa bilaꞌ,” maat it babay ngayti, “Agalen, ega baytuy asawa ku.” “Matuud yan,” maat ni Jesus, “i tubag mu ngayan nga egay asawa mu.

¹⁸ Sabap lima nang kalalakiyan i nakaꞌasawa it imu. Ta, yan kayti, lalaki mu lamang, ega asawa mu. Matuud yan i inaat mu ngayan.”

¹⁹ Maat i babay ngayti, “Agalen, prupitaꞌ ka baytu palan!

²⁰ Sikaytut itung mungsuꞌ i pagsambaan it mga kiyaꞌapuꞌ-apuꞌan tamit Ampuꞌang Diyus, temed maat mi nga mga Judio, duꞌun na lamang it Jerusalem i mapakay nga pagsambaan it Ampuꞌang Diyus.”

²¹ Tiyubag kanya ni Jesus, maat ya, “Sana Edeꞌ, pamayaꞌnen muy iꞌaat ku ngaytu. Magꞌaꞌabut nay timpu nga sambaen mi i Diyus Amaꞌ it ega lamang situt mungsuꞌ ngaytu u duꞌun it Jerusalem.

²² Talagang kamu nga mga Samaritano, ega magkakilalaan mi i pagsambaen mi. Temed kami nga mga Judio, magkakilalaan namen i pagsambaen namen, sabap iyan karibriyan, manggaring duꞌun it amen nga bangsa.

²³ Temed magꞌaꞌabut nay timpu, kayti na ngaytu, nga iyan mga maratuudan i pagsamba nirat Diyus Amaꞌ, sumamba na sirat tingled i nakem baw uyun kat kamatuudan nga garing duꞌut kanya, sabap itu talagay kaꞌirgan it Amaꞌ kat mga magsamba it kanya.

²⁴ Ka iyan Ampuꞌang Diyus, purus nakem yan, egay bibilug. Aypaꞌ kaꞌilangan nga sambaen kanya kat nakem baw kamatuudan.”

²⁵ Maat siꞌ it babay ngayti, “Magkaꞌrutan ku bayan, Agalen, nga paꞌasituy Manriribring Adiꞌ ngayting isiyanggup it Ampuꞌang Diyus, nga Cristo i panaꞌwag. Pagꞌabut ya situ, kanya i paꞌyag it aten it muꞌsa ngaytung mga bagay.”

²⁶ “Paꞌaaten mu ngayan, aku na ngaytu nga magpakisugi-sugid it imu kayti,” maat ni Jesus ngayti.

²⁷ Magꞌampang paꞌ si Jesus, miyabut nay mga alagad ya ngayti nga nangalang it pangaꞌen. Daꞌsira nakariꞌe-riꞌeng ka magpakisugi-sugid ngayti si Jesus it esang babay. Temed egay maski siyu it kanira nga miningkut it in unuy ireg ni Jesus ka in unuka magpakisugi-sugid kanyat babay.

²⁸ Binwat it babay ngayti, itiyuduꞌ ya nay sasaꞌgeban ya ka naꞌaduꞌun it lansangan. Inaat yay mga katataawan,

²⁹ “Daliꞌ mi na! Mayaꞌ kamut aken! May taw baꞌ duꞌun nga nakasugid yay kumpur nabwat ku. Barang yanayti i Cristo ngayang isiyanggup.”

³⁰ Pagkagneg nirat pagsugiden it babay ngayti, sang bulyugan sira nga taga lansangan i naꞌaduꞌut ki Jesus ngayti nga duꞌut tabud.

³¹ Pagkagaring it babay nga nanuturan ngayti duꞌun it lansangan, sigi na nga aat it ki Jesus it mga alagad ya ngayti, “Manigtulduꞌ, kumaꞌen ka nay imu.”

³² Temed maat gay tubag ya, “Aaꞌ, may pangaꞌen ku bayan nga ega magkaꞌrutan mi.”

³³ Aypaꞌ ka maamaatan i mga alagad ya ngayti, “Barang may timnaban it pangaꞌen situt kanya.”

³⁴ Pagkamuya ni Jesus kayti, maat yat kanira, “Iyan bay paꞌaaten ku ngayan nga pangaꞌen ku, sunudun kuy kaꞌirgan it nagtaꞌeg it aken it paꞌasitu baw tumanen i iyan nga ipagpabwat yat aken.

³⁵ Daꞌga baꞌ pagꞌaaten mi nga epat paꞌ nga bulan bawnga pakakayeg? Temed ituy ipagꞌaat kut imyu, kayti nga lagi kabilangan ya, papupgu naytu. Ka lawagen mi i bulyug-bulyug ngayan it taw nga magꞌelep situt aten. Sira ngaytu, kaꞌalimbawaan nira, luwak nga pupguun na.

³⁶ Aypaꞌ magayen in papuꞌun kamu na kayti it kumayeg. Nakasiguru talaga i ibgay it Ampuꞌang Diyus nga tumbas kat mga binwatan mi, nga papamayaꞌnen mit aken i mga taw isaꞌun makanira i kaꞌgenan nga egay kaskedan. Talagang ega basta-bastay kasagya it iyan manigkayeg, atnaga i nanguma.

³⁷ Ka sikaytu, matuud i pagsambatanen nga belag i manigꞌuma baw belag gasiꞌ i manigkayeg.

³⁸ Tiyaꞌeg ku kamu nga kaygen mi i ega kamuy nanguma. Beken i nagpakariga baw kamu i kumayeg it piyakarigaan nira.”

³⁹ Dakel nga mga Samaritano duꞌut iting lansangan i namayaꞌ it ki Jesus, sabap it ipagpamatuud it babay ngayti, nga yanayti maat ya, “Isiyugid yay kumpur nabwat ku.”

⁴⁰ Aypaꞌ pagꞌabut it mga Samaritano ngayti duꞌut ki Jesus, inupakat nira kanya nga patuluy daꞌan duꞌut kanira. Aypaꞌ ka nakadwa na Jesus duꞌun.

⁴¹ Dimnungag i namayaꞌ sabap it nakagneg nat panulduꞌ ya.

⁴² Maamaatan sirat babay ngayti, “Magpamayaꞌ kami na kayti, it ega lamang duꞌun it mga nasugid mu ngayti, in daꞌga duꞌun nat mga nagnegan namen ngaytu duꞌut kanya, natantuwan namen nga kanya na ngaytu i Manriribri it muꞌsang katataawan.”

Piyagayen ni Jesus i anak it esang taw nga mataꞌas i katengdanan ya

⁴³ Nakadwa na Jesus duꞌun, namagpanaw siꞌ. Nanlangbus na duꞌut Galilea nga diyakulaꞌan yang rugar.

⁴⁴ Naꞌaduꞌun kanya ka kanya nagay magpamatuud, nga magꞌaat, “Ega madaliꞌ nga pagkilalaen i pagkaprupitaꞌ it esang taw duꞌun it sadili ya nga rugar.”

⁴⁵ Temed paribasay dakel i mga taga Galilea nga nagpakipistaꞌ duꞌut Jerusalem, nga nakalteg it mga kalililuꞌang bagay nga binwat ni Jesus duꞌun, aypaꞌ ka pagꞌabut na Jesus duꞌut Galilea ngayti, inistimar kanyat magayen it mga taga duꞌun.

⁴⁶ Nagpaꞌuliꞌ naga kanyat sumaꞌup duꞌun it Cana, nga sakep nagat Galilea, nga duꞌun piyabalyu yang irimnun i danum it uꞌnang pagꞌaduꞌun ya. Duꞌut Capernaum, nga esa gasing lansangan nga sakep it Galilea, may esang taw nga mataꞌas i katengdanan ya. Magsarut it maꞌget i anak yang lalaki.

⁴⁷ Pagkaꞌrut it taw ngayti nga miyabut siꞌ si Jesus duꞌut Galilea nga garing duꞌut Judea, piyaꞌaduꞌunan yang lagi it Cana. Inupakat yang lumangbus duꞌut Capernaum ka pagꞌabangen yat darugmatayen nang anak ya.

⁴⁸ Inaat kanya ni Jesus, “In daꞌga palan makalteg kamu it mga tandaꞌanan nga kalililuꞌang bagay nga pagbuwaten ku, talagang daꞌkamu magpamayaꞌ.”

⁴⁹ Temed timnubag i taw ngayti nga maat ya, “Tabiꞌ lamang it imu, parabir matay i anak ku, duꞌun ta na.”

⁵⁰ Timnubag siꞌ si Jesus, “Maski bayan daꞌku na mayat imu, mindek na bay sarut it anak mu.” Namayaꞌ kanya nga lagi it inampang ngayti ni Jesus. Egay beken miyuliꞌ na.

⁵¹ Pagꞌaldaw, may nanusmu nat kanya nga mga manigsirbi ya, ka siyugidan nat mindek nay sarut it anak ya. Magayen na kanya.

⁵² Iningkut ya in kaꞌnu i pagpedek it sarut. Tubag nira, “Kat delem nga magkapuꞌun, minibwan nay ramig ya.”

⁵³ Natantuwan it amaꞌ ngayti nga iti nang uras i pagꞌaat ni Jesus it kanya, “Magayen nay anak mu.” Aypaꞌ kanya baw puꞌsa it pamalay-balay ya, namayaꞌ nat ki Jesus.

⁵⁴ Ituy ikadwang tandaꞌanan nga kalililuꞌang bagay nga binwat ni Jesus duꞌut Galilea. Binwat yaytu yan nagpaꞌuliꞌ siꞌ ngayti kanya nga garing duꞌut Judea.