Juan 21 - Tagbanwa

Dakel i napisiꞌ nga sedaꞌ kat keseg it guna ni Jesus

¹ Ega siꞌ naꞌlay, nagpakikita siꞌ si Jesus duꞌun it mga alagad ya ngayti, duꞌun it tambing it Lapnaw it Tiberias, magꞌaꞌatkaytu siꞌ i pakikita ya.

² Kaꞌsang tingped na Simon Pedro, si Tomas nga panaꞌwag it kanya, Gambar, si Natanael nga taga Cana nga sakep it Galilea, mga anak ni Zebedeo baw duwa paꞌ nga mga alagad,

³ “Aa daꞌga,” maat ni Simon Pedro it kanira, “manlugitem akuy aken.” “In atkayan,” maat nira, “mayaꞌ kami.” Namagpanaw na sira. Pagꞌabut nira, namagsakay na. Temed ta, maski sangbat, egay napisiꞌ nirat naꞌaldawan.

⁴ Iyan magpangeyag-eyag na, timnindeg si Jesus duꞌun it kaꞌigsan nga tambing it lapnaw ngayti. Temed ega nakilalaan it mga alagad ngayti nga si Jesus kanya.

⁵ Piyataꞌwagan sira ni Jesus, maat ya, “Mga Anak, daꞌga egay napisiꞌ mi nga sedaꞌ?” Nagdenga-denganen i tubag nira nga magꞌaat, “Daꞌga bay napisiꞌ namen.”

⁶ Maat ya sit kanira, “Iꞌlug mi i lambat mi asan it iwanan nga ayun it sakayan mi ngayan. Makapisiꞌ kamu yan.” Iꞌinlug nira na. Unupat ega na magkabatun nira ka punuꞌ nat siminled nga sedaꞌ.

⁷ Inaat si Pedro it alagad ngayti nga pagmaꞌalen ni Jesus, “Ampuꞌan bayan! Egay belag, talagang kanya!” Pagkagneg ni Simon Pedro ngayti, nagpakay kanya ka pagꞌaꞌawaꞌen yay pakayan ya. Bawnga nanugpa na duꞌut danum.

⁸ Iyan mga kaꞌibaan ya ngayting mga alagad, ipiyabnit nira nay sakayan ngayti, sigi nang rayak nirat lambat nga yanayti punuꞌ it sedaꞌ nga siminled, ka ega naga masyadu sirang alaid duꞌun it binit, mga siyam nga puluꞌ lamang nga mitru.

⁹ Pagkatingdal nira duꞌun it binit, letganan nira, may apuy nga may magꞌiꞌyaw na nga sedaꞌ baw may pirang batu nga tinapay nga magdadaꞌtun.

¹⁰ “Tumaban kamu sini,” maat ni Jesus, “it sedaꞌ ngayang napisiꞌ mi.”

¹¹ Miyapyat na si Simon Pedro ngayti duꞌun it sakayan bawnga giyuyud ya na duꞌun it tingdal i lambat ngayti nga punuꞌ it siminled nga dadakulang sedaꞌ. Kadakel it sedaꞌ ngayting siminled, sang gatus baw limang puluꞌ baw tulung batu. Maski atkayti nang kadakel it sedaꞌ, ega naga narasik i lambat ngayti.

¹² “Daliꞌ kamu na,” maat ni Jesus, “ka kumaꞌen tami daꞌat pangadedelman.” Egay nakaꞌurum mingkut nga maski siyu it kanira in siyu kanya, sabap urut na nira nga Ampuꞌan kanya.

¹³ Kiyuꞌmit ni Jesus i tinapay ngayti bawnga piyamgayan yay mga alagad ngayti. Bawnga sedaꞌ siꞌ ngayti i ipiyamgay ya.

¹⁴ Ituy ikatlu nga pakikita ni Jesus it mga alagad ya, pagkaꞌgen ya ngaytit paꞌuliꞌ.

Iningkut ni Jesus si Pedro sabap it pagkayli yat kanya

¹⁵ Pagkakaꞌen nira, iningkut ni Jesus si Simon Pedro. Maat ya, “Simon, nga anak ni Juan, unu pagkayliyan mu aku subraꞌ pat kanira nga kayli it aken?” “Eeꞌ, Ampuꞌan. Urut mu na nga may pagꞌireg kut imu,” maat i tubag ni Pedro. “Ta in atkayan,” maat ni Jesus, “arigraen mut magayen i mga uꞌuybun nga tupa ku.”

¹⁶ Iningkut kanya sit sumaꞌup ni Jesus. “Simon,” maat ya, “nga anak ni Juan, unu kamatuudan i kayli mu ngayat aken?” Tumubag siꞌ si Pedro, “Eeꞌ baꞌ, Ampuꞌan, magkaꞌrutan mu na nga may pagꞌireg kut imu.” “Ta in atkayan,” maat ni Jesus, “aypeten mut magayen i mga tupa ku.”

¹⁷ Tulung saꞌup i ingkut ngayti ni Jesus ngayting magꞌaat, “Simon nga anak ni Juan, unu talagang, kamatuudan i pagꞌireg mu ngayat aken?” Nasmek si Pedro kat ikatlu ngayting ingkut it kanya, nga magꞌaat, “Unu, pagꞌirgan mu aku?” Tumubag siꞌ si Pedro, maat ya, “Ampuꞌan, talagang magkaꞌrutan mu nay muꞌsang mga bagay. Urut mu na gasiꞌ in sang unuy pagꞌireg kut imu.” “Ta in atkayan,” maat siꞌ ni Jesus, “arigraen mut magayen i mga tupa ku.

¹⁸ Kamatuudang-kamatuudan i pagꞌaaten ku ngaytut imu, nga iyan mangaꞌwaꞌen ka paꞌ, pagsadiliyen muy panaꞌbit mu baw magpanaw ka it in ari ireg mu nga panawan. Temed in gurang ka na, ibtir mu i mga alima mu baw belag nay pasaꞌbit it imu, baw tabanen ka na duꞌun it ega ireg mung aduꞌunan.”

¹⁹ Inampang ni Jesus i atkayti ka bilang ipagpaꞌrut ya in magꞌuꞌunu-unu i kamataynen ni Pedro nga ikabantug it Ampuꞌang Diyus. Bawnga maat siꞌ ni Jesus, “Kaꞌilangan pagsunudun mu aku nga pirmi.”

²⁰ Nalingawan ni Pedro nga magdadasun it kanira i alagad ngayting pagmaꞌalen ni Jesus, kanya ngayti nga simnandir duꞌun it ki Jesus iyan magkaraꞌnen sira ngayti it pangiyapun, baw miningkut ngayti nga magꞌaat, “Ampuꞌan, siyu bay bayaꞌen ngayan it mga kuꞌimatay it imu?”

²¹ Pagkalteg it kanya ni Pedro ngayti, iningkut ya si Jesus, nga magꞌaat, “Ampuꞌan, unu gasiꞌ i mabetangan it itung taw?”

²² Katubag si Jesus, maat ya, “In ireg ku nga egen kanya seked it pamaꞌuliꞌ ku, unuy labe-labet mu? Kaꞌilangan magsunud kay imu it aken.”

²³ Ta sabap it iting inaat ya, nanlekep duꞌun it mga kasulsugan nirang magpamayaꞌ nga ega matay i iting alagad. Takaꞌ ega maat inaat ni Jesus nga ega na matay kanya, in daꞌga yanayti lamang i inaat, “In ireg ku nga egen kanya seked it pamaꞌuliꞌ ku, unuy labe-labet mu?”

Pangiyaꞌpusang sugi-sugid.

²⁴ Ta, itu nagang alagad nga dimnasun ngaytit kana Jesus duwa ni Pedro, magpamatuud kanya it muꞌsa ngaytu pasar it ki Jesus. Kanya naga gasiꞌ i simnurat it mga itu ngaytu. Talagang magkaꞌrutan namen nga matuud tuy ipagpamatuud ya ngaytu.

²⁵ May beken baw dakel paꞌ nga binwat ni Jesus. In beteꞌ isurat nga muꞌsa, pagsisiguruun ku nga ega kasadang it muꞌsang banwa nga situt sinirungat langit i kadakel it mga masuratan kaytu.