Juan 13 - Tagbanwa

Inugasan ni Jesus i mga aꞌay it mga alagad ya

¹ Naꞌbut nay papuꞌun na it Pistaꞌ ngaytit Tiyaꞌliban. Si Jesus ngayti, magkaꞌrutan ya nang lagi nga naꞌbut nay timpu nga ilꞌid ya situt banwa ngaytu, ka muliꞌ na duꞌun it Amaꞌ ya. Talagang pagmaꞌalen yay mga alagad ya nga situt banwa ngaytu. Ta kayti, ipiyalteg ya na in sang unuy kadakulat pagmaꞌal ya ngayti it kanira.

² Itiyarakan nay pangiyapun na Jesus. Si Judas Iscariote ngayti nga anak ni Simon, piyanakman kanya nga lagi ni Satanas nga idagang ya si Jesus.

³ Urut talaga ni Jesus nga ibinggay nat kanya it Amaꞌ i muꞌsang pudir. Baw urut ya nga kanya, egay beken nga giyaringan ya, duꞌun it Ampuꞌang Diyus, baw duꞌun nagat Ampuꞌang Diyus i uliꞌan ya.

⁴ Aypaꞌ binwat ni Jesus it magꞌaꞌdung na sira ka kumaꞌen na, timnindeg kanya baw limbas yay panliꞌwan nga pakayan ya, bawnga miyanu kanyat tuwalya ka tiyapis ya.

⁵ Bawnga timinggis kanya it danum duꞌun it palangganaꞌ. Pagkatgis ya, kiyayaꞌmatan yat mugas i mga aꞌay it mga alagad ya ngayti, baw pagtarapuwan ya nat tuwalya ngayti nga tiyapis ya.

⁶ Iyan naꞌbut ya na si Simon Pedro, maat ni Simon Pedro ngayti, “Ampuꞌan, unuka atkayan nga ikaw i mugas it mga aꞌay ku?”

⁷ Katubag si Jesus, maat ya, “Ega magkasepsepan mu kayti i pagbuwaten ku ngaytu, temed in asan nat malangbu-langbusan masepsepan mu naga yan.”

⁸ Maat siꞌ ni Pedro ngayti, “Talagang subung bat ega bagay nga paꞌugasan ku it imu i aꞌay ku.” Maat siꞌ ni Jesus, “Temed in ega malimpiyuꞌ ku ikaw, siguradung daꞌka na alagad ku. Egay kabagiꞌan mu nga gumaring situt aken.”

⁹ Pagkagneg ni Pedro kayti, miyampang siꞌ kanya nga magꞌaat, “In atkayan palan, Ampuꞌan, magayen ku ega lamang desang aꞌay kuy ugasan mu. Pati alima baw ulu ku, ugasan mu naga gasiꞌ.”

¹⁰ Tubagen siꞌ kanya ni Jesus, maat ya, “Ega na kaꞌilangan nga ugasan pat muꞌsa i iyan nga naꞌugasan na, ka limpiyuꞌ na kanya. Aꞌay ya manay kaꞌilangan nga ugasan. Kamu, limpiyuꞌ na, temed ega limpiyuꞌ nga muꞌsa.”

¹¹ Sabap magkaꞌrutan ni Jesus in siyu i bayaꞌen it mga kuꞌimatay ngaytit kanya, aypaꞌ ka inaat yay atkayti, nga “limpiyuꞌ kamu na temed ega limpiyuꞌ nga muꞌsa.”

¹² Iyan naꞌugasan na ni Jesus i mga aꞌay it mga alagad ya ngayti, nagpakay na kanya it limbas ya ngayting pakayan ya, bawnga miyadung siꞌ duꞌut kanya ngayting pagꞌadungan. Bawnga miyampang kanya nga magꞌaat, “Ta unu, nasepsepan mi i binwat ku ngaytut imyu?

¹³ Pagtaꞌwagen mi aku nga Manigtulduꞌ baw Ampuꞌan. Tamaꞌ yan i panaꞌwag mi ngayat aken, ka talagang matuud.

¹⁴ Kayti it aku nga Ampuꞌan baw Manigtulduꞌ mi, miyugas it mga aꞌay mi, kaꞌilangan nga kamu, atkayan naga nga mugas it aꞌay it esa may esat imyu.

¹⁵ Sabap binggayan ku na kamu it alimbawa, isaꞌun atkaytu nagay imyu nga buwaten, binwat ku ngaytu.

¹⁶ Kamatuudan tu nga kamatuudan i pagꞌaaten ku ngaytu, nga iyan manigsirbi, ega mataꞌas paꞌ kanya it agalen ya. Baw iyan nga tiyaꞌeg lamang, ega mataꞌas paꞌ it nagtaꞌeg it kanya.

¹⁷ In magkasepsepan mi i itung mga bagay, basta buwaten mi lamang makasagya kamu yan.”

Ipiyaꞌrut ni Jesus nga idagang kanya it esa it mga alagad ya

¹⁸ Inaat paꞌ ni Jesus, “Egaytu kamu nga muꞌsa i pagpaꞌiguꞌan ku it pagꞌaaten ku ngaytu nga makasagya kamu, sabap magkakilalaan ku in unu nga mga taw i mga piniliꞌ ku. Temed atkaytuytu i piniliꞌ ku ka isaꞌun matuman i magbebtang duꞌun it kasuratang ampang it Ampuꞌang Diyus nga magꞌaat, ‘Karaꞌe-raꞌetan i itiyumbas it aken it taw nga siyakep kut pangaꞌen ku.’

¹⁹ Ipagꞌaat ku naytung lagi it imyu it ega paꞌ nagꞌabut, isaꞌun in magꞌabut na, pakimatuud kamu nga in siyu aku talaga.

²⁰ Kamatuudan talagay ipagꞌaat ku ngaytut imyu. Iyan magtanggap it pagtaꞌgen ku, aku i pagtanggapen ya. Baw iyan nga magtanggap it aken, pagtanggapen ya gasiꞌ i nagtaꞌeg it aken.”

²¹ Pagkaꞌampang ni Jesus kayti, subung it may ega magkabaraꞌan ya. Aypaꞌ iriyapar ya na, nga magꞌaat, “Kamatuudan tuy ipagꞌaat ku ngaytu, nga may esat imyu situ nga kanyay bayaꞌen it mga kuꞌimatay it aken.”

²² Nagseye-seyeken i mga alagad ya ngayti, ka egay uru-urut nira in siyu manggid it kanira i pagpaꞌiguꞌan yat iti nga inampang ya.

²³ Iyan esa nga alagad nga talagang pagmaꞌa-maꞌalen ni Jesus, magꞌaꞌdung duꞌun it tepad ya.

²⁴ Sininyasan kanya ni Simon Pedro nga ingkutun ya in siyu manggid i pagpaꞌiguꞌan ni Jesus it iti nga inampang ya.

²⁵ Ta egay beken, simnandir kanya duꞌun it ki Jesus ka miningkut, nga maat ya, “Ampuꞌan, siyu bay paꞌaaten mu ngayan?”

²⁶ Maat i tubag ni Jesus, “Iyan begayan kut idiꞌtil ku nga tinapay, yanayan yan.” Pagkadiꞌtil yat tinapay duꞌut sabaw nga duꞌut didiꞌtilan, ipiyakawaꞌ ya na duꞌut ki Judas ngayting anak ni Simon Iscariote.

²⁷ Pagkakawaꞌ ni Judas it tinapay ngayti, nagpasarum na duꞌut kanya si Satanas. Maat ni Jesus, “Ta, ereg-eregen mu nay kubwaten mu ngayan.”

²⁸ Mga beken ngayting kaꞌibaan nirat mamagkaꞌen, ega magkaꞌrutan nira in unuka inaat ni Jesus i atkayti.

²⁹ Sabap si Judas ngayti i magseskel it pirak nira, tanud niraytu, pagtaꞌgen si Judas it mangalang it kaꞌilangan nirat pistaꞌ, u pagtaꞌgen kanyat mamgay duꞌun it mga makukuriꞌ.

³⁰ Pagkakaꞌen ni Judas it ipiyakawaꞌ ngaytit kanya nga tinapay, napanaw na kanya. Delem na it iting uras.

Ipiyaꞌrut ni Jesus nga payluwan kanya ni Pedro

³¹ Pagkagaring ni Judas ngayti, miyampang siꞌ si Jesus. Maat ya, “Naꞌbut na nga matanyag nay kabantugan ku, aku nga Taga Langit nga Ipiyanganak it Taw, baw sabap it aken, matanyag gasiꞌ i kabantugan it Ampuꞌang Diyus.

³² Baw in sabap it aken, matanyag nay kabantugan it Ampuꞌang Diyus, kanya siꞌ i tumanyag it kabantugan ku nga Anak ya. Baw buwaten ya it kayti ngaytung lagi.

³³ Mga pagmaꞌalen nga bilang mga anak ku, dekeyeꞌ mana nga timpu nga iba mi paꞌ aku. Tegelen mi akut tulus temed, subung it ipiyagꞌaat kut mga kabilug mi nagang mga Judio i iꞌaat kut imyu kayti, nga daꞌkamu makaꞌaduꞌun it aduꞌunan ku.

³⁴ Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa.

³⁵ In magsigraras kamu, makilalaan it kadakel nga mga alagad ku kamu.”

³⁶ “Ay ari aduꞌunan mu, Ampuꞌan?” ingkut ni Simon Pedro. Tubagen ni Jesus, maat ya, “Duꞌun it aduꞌunan ku daꞌka kabayaꞌ it aken kayti, temed tumundug ka naga yan it aken asat malangbusan.”

³⁷ “Ampuꞌan, unuka daꞌku kabayaꞌ it imu kayti?” ingkut siꞌ ni Pedro. “Yay matuud, ibgay kuy ginawa ku sabap it imu!”

³⁸ Pagtubag siꞌ ni Jesus, maat ya, “Unu, ibgay mu talagay ginawa mu sabap it aken? Kamatuudan tuy iꞌaat kut imu, parabir tumaraꞌuk i manuk, tulu na nga paylu mu sabap it aken.”