Juan 11 - Tagbanwa

Miyatay i esang iba-iba ni Jesus nga si Lazaro

¹ May esang taw nga magsarut, pagpangaranan it ki Lazaro. Duꞌun i pagtataꞌidan yat Betania. Yamanay iba ya, duwa nga sulsug yang mga babay nga si Maria baw si Marta.

² Si Maria na ngayti, mabut i aldaw nga muꞌbuꞌ kanya it babangluun duꞌun it aꞌay it Ampuꞌan nga si Jesus bawnga tarapuwan yat buꞌuk ya. Ta it magsarut ngayti si Lazaro,

³ aypaꞌ binwat it duwa ngayting mga sulsug yang babay, may tiyaꞌeg nira nga paꞌaduꞌut ki Jesus, taban i ampang nira nga magꞌaat, “Ampuꞌan, magsarut i iba-iba mu nga pagmaꞌalen mu.”

⁴ Pagkatuturan duꞌut ki Jesus, maat ya, “Ega bayan kamataynen i baraꞌan it iyan nga sarut. Nagꞌabut lamang yan isaꞌun mabantug i Ampuꞌang Diyus baw sabap gasiꞌ it ikabantug it Anak it Ampuꞌang Diyus.”

⁵ Pagmaꞌalen talaga ni Jesus i namagsulsu-sulsugun ngayting tulu nga si Marta, si Maria baw si Lazaro na ngayti.

⁶ Temed maski naꞌrutan na ngayti ni Jesus nga magsarut si Lazaro, ega napanaw kanyang lagi, in daꞌga nakadwa paꞌ,

⁷ bawnga inaat yay mga alagad ya ngayti, “Paꞌaduꞌun tami siꞌ it Judea.”

⁸ “Aa bilaꞌ, Manigtulduꞌ,” maat it mga alagad ya ngayti. “Daꞌga baꞌ may kapira paꞌ kayti, pagkubatuun ka ngayat mga pagbayaꞌen tami nga mga Judio? Ta unuka kuꞌaduꞌun ka siꞌ?”

⁹ Tumubag si Jesus, maat ya, “Daꞌga baꞌ sang puluꞌ may duwang uras i sang aldaw? Ta simpri, iyan magpanaw it aldawun paꞌ, ega makataꞌkid sabap it magkalteg kanya kat eyag it aldaw.

¹⁰ Temed magkasampuk i magpanaw it delemen sabap it ega nay eyag ngayti.”

¹¹ Maat ya pang beken, “Magꞌigaꞌ i iba-iba tami nga si Lazaro. Paꞌaduꞌun aku ka sulagen ku kanya.”

¹² “Magayen yan, Ampuꞌan, nga magꞌigaꞌ kanya ka gumayen naga,” maat it mga alagad ya ngayti.

¹³ Tanu-tanud tu it mga alagad ya ngayti, paꞌaaten ni Jesus, igaꞌ nga matuud. Arit yay paꞌaaten ya, miyatay na si Lazaro.

¹⁴ Ta it ega magkasepsepan it mga alagad ya ngayti, iriyapar na ni Jesus, maat ya, “Miyatay na si Lazaro.

¹⁵ Temed sabap it imyu, masagya aku nga daꞌku duꞌun, isaꞌun pamayaꞌnen mi aku kat buwaten ku. Ta kayti paꞌaduꞌun tami nat kanya.”

¹⁶ Si Tomas nga panaꞌwag it kanya, Gambar, rimnarang na gasit mga kaꞌibaan ya ngayting mga alagad. Maat ya, “Mayaꞌ tami naga bayat kanya. Matay in matay, basta sang tamiyan.”

Si Jesus i manigꞌegen it paꞌuliꞌ baw puꞌun it kaꞌgenan

¹⁷ Pagꞌabut na Jesus duꞌun, naꞌrutan nira nga nakaꞌpat nay pagkalbeng it ki Lazaro.

¹⁸ May tulung kilumitru lamang i kaꞌalaid it Jerusalem duꞌut Betania ngayti,

¹⁹ baw dakel nga mga Judio i naꞌaduꞌun it kana Marta ngayti duwa ni Maria, ka magbanga-bangay it kanira sabap it sulsug nira ngayting natay.

²⁰ Pagkaꞌrut ni Marta it miyabut na si Jesus duꞌut Betania, simnusmu na kanya, temed si Maria, duꞌun nagat balay.

²¹ Mampang si Marta, maat ya, “Ampuꞌan, in beteꞌ situ ka lamang, ega natay i sulsug ku.

²² Temed maski atkayan na, magkaꞌrutan ku nga ibgay it Ampuꞌang Diyus i maski unu i angutun mu duꞌut kanya.”

²³ “Marta, maꞌgen naga bayat paꞌuliꞌ i sulsug mu ngayan,” maat ni Jesus.

²⁴ Katubag si Marta, maat ya, “Talagang magkaꞌrutan ku nga magꞌegen naga kanya kat umur it banwa in egnen siꞌ i kumpur miyatay.”

²⁵ Tubagen ni Jesus, maat ya, “Aku ngaytu i manigꞌegen it paꞌuliꞌ baw puꞌun it kaꞌgenan. Iyan magpamayaꞌ it aken, maski matay na kanya siguradung maꞌgen nagat paꞌuliꞌ.

²⁶ Baw in siyu nga kamatuudan i pamayaꞌ yat aken baw magpangaꞌgenan uyun it pamayaꞌ ya ngaytu, may kaꞌgenan ya talaga nga egay kaskedan. Ta unu, pagpamayaꞌnen muytu?”

²⁷ “Eeꞌ baꞌ, Ampuꞌan, talagang magpamayaꞌ akut imu, nga ikaw talagay Cristo ngayang isiyanggup nga Manriribring Adiꞌ. Ikaw nay Anak it Ampuꞌang Diyus ngayan nga pagsisiguruun nga paꞌasitut sinirungat langit.”

Timnuruꞌ i mga luwaꞌ ni Jesus

²⁸ Pagkaꞌampang kayti ni Marta, nagpaꞌuliꞌ na kanya duꞌut balay. Sininyasan ya si Maria bawnga kinidem-kideman ya nga magꞌaat, “Miyabut nay Manigtulduꞌ. Pagpaꞌaduꞌunun ka.”

²⁹ Pagkagneg ni Maria, timnindeg nga lagi ka napanaw na nga simnusmu it ki Jesus ngayti.

³⁰ (Siyusmu ka ega paꞌ nakaꞌbut si Jesus ngayti duꞌut lansangan nga banar, duꞌun pat siyusmuwan ngayti ni Marta it kanya.)

³¹ Diyasun si Maria it mga maꞌiba ya nga mga Judio ngayti nga magbanga-bangay it kanya duꞌut balay. Pagkalteg nirat atnang kelat it tindeg ni Maria bawnga nanliꞌwan, tanud nira paꞌaduꞌun kanyat lebeng ka sumgaw siꞌ duꞌun.

³² Pagꞌabut ni Maria duꞌut ki Jesus, nanluud kanya duꞌun it tepad it aꞌay ni Jesus bawnga miyampang kanya nga magꞌaat, “Ampuꞌan, in beteꞌ situ ka lamang, ega natay i sulsug ku.”

³³ Talagang rimnaꞌe-raꞌet i nakem ni Jesus baw nanrusarem i rupa ya, pagkalteg yat ki Maria ngayti nga magsugaw baw mga Judio ngayting kaꞌibaan ya nga mamagsugaw gasiꞌ.

³⁴ “Ari limbengan mit kanya?” maat ni Jesus. “Ampuꞌan,” maat nira, “mayaꞌ kat amen isaꞌun maltegan mu.”

³⁵ Timnuruy mga luwaꞌ ni Jesus.

³⁶ Pagkalteg it mga Judio ngayti, “Ungayan baꞌ,” maat nira, “talagang pagmaꞌalen ya si Lazaro.”

³⁷ Temed maat gasiꞌ it beken, “Nakapagayen kanyat beleg ngayti. Ta unuka ega nasegan-segan yay kamataynen it itung taw?”

Inggen ni Jesus it paꞌuliꞌ si Lazaro

³⁸ Rimnaꞌe-raꞌet siꞌ i nakem ni Jesus, pagꞌabut nira duꞌun it lebeng. Kubkub i inanuꞌan ngaytit miyatay bawnga limpenan it batu.

³⁹ Maat ni Jesus, “Awaꞌen mi i lepen ngayan nga batu.” “Bilaꞌ,” maat ni Marta ngayting sulsug it miyatay ngayti, “Ampuꞌan, mabuyuk na bayan ka nakaꞌpat nay pagpatay ya.”

⁴⁰ “Daꞌga baꞌ inaat kut imu,” maat ni Jesus, “nga in mamayaꞌ kat aken, maltegan mu in sang unuy kabantugan it Ampuꞌang Diyus?”

⁴¹ Pagkaꞌampang ya kayti, inawaꞌ niray maglelpen ngayti nga batu. Yimnaꞌngad si Jesus bawnga miyampang kanya nga magꞌaat, “Amaꞌ, magpasalamat akut imu ka pagtubagen mu aku.

⁴² Talagang magkaꞌrutan ku nga pirmi mu aku nga pagpapagnegan. Takaꞌ pagꞌampangen kuy atkaytu sabap it mga taw ngayni nga kaꞌibaan ku kayti, isaꞌun mamayaꞌ sira nga ikaw nga matuud i nagtaꞌeg it aken.”

⁴³ Pagkaꞌampang ya kayti, igiyaꞌuy ya nga magꞌaat, “Lazaro, manliꞌwan ka!”

⁴⁴ Egay beken, nanliꞌwan si Lazaro ngayti, pagbebedbedan nagat rambay i aꞌay baw alima ya, nga adat nira in ipaglebeng, baw pagbebegkesan nagat lages i rupa ya. Maat ni Jesus it kanira, “Pangawaꞌen mi i muꞌsa ngayan asat bilug ya, isaꞌun ega nay lesa-lesa ya.”

Namagꞌupa-upakaten i mga pagbayaꞌen it mga Judio it in magꞌuꞌunu maꞌimatay nira si Jesus

⁴⁵ Mga Judio ngayting mamagbanga-bangay it ki Maria, naltegan nira i binwat ngayti ni Jesus nga inggen ya siꞌ si Lazaro it paꞌuliꞌ. Aypaꞌ dakel siray namayaꞌ nat ki Jesus.

⁴⁶ Temed iyan beken, naꞌaduꞌun nga lagi it mga Pariseo ka nanugid it binwat ni Jesus ngayti.

⁴⁷ Aypaꞌ tiningped it mga pagbayaꞌen it sasirduti baw mga Pariseo i mga kaꞌibaan nira nga manigꞌukuman, mga kaꞌuyutan it Sanedrin. Pagkatingped nira, maat nira, “Unuytuy magayen nga buwaten tami, it dakel nang tandaꞌanan nga mga kalililuꞌang bagay i pagbuwaten it itung taw?

⁴⁸ In pabaya-bayaꞌan tami na lamang, mamayaꞌ nat kanya i muꞌsang taw. Ta, baraꞌan ya kayan, buwaten it mga Romano ngaytu, awaꞌan ta nat aten nga banwa baw tari-tariwanaken tami na.”

⁴⁹ Iyan ega magkaparagan nira in unuy magayeng buwaten, miyampang si Caifas, nga pagbayaꞌen nira it iting taꞌun. Maat ya, “Unu kamu nang mga taw?

⁵⁰ Ega baꞌ magkaꞌbut it pikiran mi. Simpri subrang magayen it aten, sang kataawan lamang i kaꞌilangan nga matay, bilang ganti it kadakel ta, ega gat sang kabanwaan i makuriꞌan.”

⁵¹ Temed ega kat sadili ya na lamang i inampang ya ngayti, in daꞌga piyaprupitaꞌ kanyat Ampuꞌang Diyus, ka si Caifas ngayti, Piyakamataꞌas nga Sasirduti it iting taꞌun. Nasugid ya ngayti nga kamataynen ni Jesus, mangganti it bangsat Judio.

⁵² Baw ega lamang bangsat Judio, in daꞌga isaꞌun mabwat sira nga sang siraan it matingped yang mga anak it Ampuꞌang Diyus nga gumaring kat paꞌari-aring rugar.

⁵³ Garing it iting aldaw, pagtulusun na nira in magꞌuꞌunu nira maꞌimatay si Jesus.

⁵⁴ Aypaꞌ it atkayti, ega na magpakilaꞌuk-laꞌuk si Jesus duꞌut iti nga mga Judio. Binwat ya, naꞌaduꞌun it Efraim, esang lansangan nga adeꞌdeng duꞌun it rugar nga kapupuyangtan. Duꞌun siꞌ kayti i tiyaꞌidan nira magꞌaꞌalagad.

⁵⁵ Magꞌadeꞌdeng siꞌ i pistaꞌ it mga Judio ngayting pagpangaranat Pistaꞌ it Tiyaꞌliban. Dakel nga taga prubinsiya nga naꞌaduꞌut Jerusalem parabir mabut i pistaꞌ, isaꞌun mabwat nira i mga kaꞌugaliꞌan nira nga panlimpiyuꞌ.

⁵⁶ Sigi nga panigmata nira temed egay naltegan nirang si Jesus. Aypaꞌ ka in duꞌun sirat Templo mamagtindeg-tindeg, yay buwat nira, ingku-ingkutun nga magꞌaat, “Unuy tandes mit imyu? Pakipistaꞌ naga kanya u ega?”

⁵⁷ Sabap ipiyagpaꞌimbanda it mga pagbayaꞌen it mga sasirduti baw mga Pariseo nga in siyu-siyuy magkaꞌrut it in ariyen si Jesus, kaꞌilangan itulduꞌ ya, isaꞌun madakep nira kanya.