Josue 9 - Tagbanwa

Liyuku it mga Gabaonita si Josue

³ Ta it atkayti, pagkabaritaꞌ it mga Heveo nga taga Gabaon it binwat ngayti ni Josue duꞌun it Jerico baw Hai,

⁴ minikir sira it in unuy buwaten nira nga ikaluku nirat ki Josue. Binwat nira, miyanut lagi-lagi nang banar nga papagbalunan nga sakuꞌ bawnga ipiyapirisiꞌen nirat mga kabayuꞌ nira nga asno. Beken nga pinirisiꞌen nira, dadanuman nga kulit nga matambelen na.

⁵ Nagtalumpaꞌ sira it mga lagi-lagi na baw malusutun na baw nagpakay sira it mga marasiken na. Nanggantil na baw pagꞌalamagen na i biyalun nira nga mga tinapay.

⁶ Namagpanaw sira nga paꞌaduꞌun it kana Josue nga duꞌut pamagbabalay-balayan nira ngayti nga duꞌut Gilgal. Pagꞌabut nira duꞌun, siyugi-sugid nira si Josue baw mga kaꞌibaan ya ngayti nga pagbayaꞌen it mga Israelita. Maat nira, “Kami ngaytu, alaid nga banwa i giyaringan namen ngaytu, ka napikir namen nga muꞌsa duꞌut ameng banwa, pakiꞌamigus it imyu.”

⁷ Temed katubag i mga pagbayaꞌen ngaytit mga Israelita, “Daꞌkami bayan pakiꞌamigus it imyu ka barang taga situ kamu naga.”

⁸ Nagpasanguꞌ-sanguꞌ sirat ki Josue nga maat nira, “Talagang matuud nga mga manigsirbi mi kami.” Iningkut sira ni Josue, “Ay siyu kamu baytung matuud? Ari talagay giyaringan mi kaytu?”

⁹ Magꞌaat i usay nira nga tubag nirat ki Josue ngayti, “Talagang garing kami baytu duꞌun it alaid nga banwa. Naꞌasitu kamit imyu sabap it nabaritaꞌan namen i pasar it AMPUꞌANG DIYUS mi nga subrang mabantug. Naꞌrutan namen i binwat ya duꞌun it Egipto.

¹⁰ Naꞌrutan namen gasiꞌ i binwat ya kat duwang adiꞌ nga Amorreo nga kat lebatan nga ayun it Jordan, ki Sehon nga adiꞌ it Hesbon baw ki Og nga adiꞌ it Basan nga takenaꞌ ya, duꞌun it Astarot.

¹¹ Aypaꞌ ka piyaꞌasitu kami it mga magu-magurang baw mga kabanwa namen. Paggaring namen duꞌut amen, ega tiyeꞌe-teꞌeng namen nga pagbalun ka isaꞌun kaꞌbut kami situ, isaꞌun masugid namen it imyu nga talagang matuud nga kami, mga manigsirbi mi. Sana mapakay gasit imyu nga magꞌupa-upakaten tami it magayen.

¹² Ka letganan mi na lamang i naꞌpedan nga balun namen ngaytu nga tinapay. Baꞌguytung nabilwat paggaring namen duꞌut amen temed kayti ungaytu na, nandedesenan nat atna baw pagꞌalamagen na.

¹³ Ta mga kulit gasiꞌ ngaytu nga dadanuman, baraꞌgu paytu it paggaring namen duꞌut amen. Ta ungayan na, ranggaꞌ na baw matambelen na. Ta pakayan namen ngaytu, ungaytu na, marasiken na, baw talumpaꞌ namen ngaytu, ungaytu na, malusut-lusutun na it kaꞌalaid it piyanawan.”

¹⁴ Siyukdanan it mga pagbayaꞌen ngaytit mga Israelita i pangaꞌen ngayting balun it mga taw ngayti. Temed ta, daꞌsira nagpamunaꞌaw duꞌun it AMPUꞌANG DIYUS it in unuy buwaten nira.

¹⁵ Aypaꞌ nagpakiꞌamigus nat kanira si Josue baw simnanggup nga daꞌsira imatayen. Simnanggup gasiꞌ i mga pagbayaꞌen it mga Israelita ngayti.

¹⁶ Tulung aldaw i nagtaꞌlib nga pagꞌubus-ubusun nirat upa-upakaten nira ngayti, naꞌrutan nat mga Israelita nga palan ega taga alaid nga banwa i iting mga taw. Taga duꞌun naga palan it iting banwa.

²² Pagkaꞌrut ni Josue, ipiyatawag ya i mga taga Gabaon ngayti. Pagꞌabut nira maat ya it kanira, “Unuka atkayan i binwat mi nga inambutan mi kami, nga maat mi taga alaid kamu nga banwa? Ari palan it taga situ kamu naga!”

²⁴ Katubag i mga taga Gabaon ngayti, maat nira, “Ta, binwat namen bay atkayan ka talagang natantuwan namen nga, iyan Ampuꞌang Diyus mi, ipiyagꞌurdin ya it manigsirbi ya nga si Moises nga bagiꞌ-bagiꞌen ya it imyu i itu nga banwa. Baw ega desang bagiꞌ-bagiꞌen, puuꞌun paꞌ i muꞌsa nga mga datiyan nga taga situ. Ta, it kayti nga situ kamu na, talagang magꞌiꞌlam kami nga banar, ka barang pati kami, puuꞌun mi gasiꞌ.

²⁵ Ta kayti, kagalang-galang it imyu, kamu na bayan i magpikir in may sanguꞌ mi nagat amen ngaytu. Ega naytuy pagꞌaaten namen daꞌga, ka kami ngaytu, kat pamegbeg mi na.”

²⁷ Ta, it atkayti, ega naga maat binwat it mga Israelita i mga taga Gabaon ngayti it maraꞌe-raꞌet, takaꞌ inuripen na nira. Manigpangayu na baw manigpanaꞌgeb na it paggamiten it mga Israelita in magsamba duꞌun it papangantengan it AMPUꞌANG DIYUS, in aring rugar i piliꞌen it AMPUꞌANG DIYUS nga patindegan it papangantengan ngayti. Naneꞌteꞌ nga atkayti i kabetangan nira seked it kayti ngaytu.