Josue 8 - Tagbanwa

Ega nay nabwat it siyudad it Hai. Diyaꞌeg na

¹ Maat siꞌ it AMPUꞌANG DIYUS it ki Josue, “Ayaw ka it iꞌlam. Magpakalalaki ka lamang. Tingpeden mu siꞌ i muꞌsa nga mga taawan mu ka rumpakan mi siꞌ i siyudad it Hai. Mandaꞌeg kamu nayan. Ibgay ku nayat imyu i adiꞌ it Hai, pati mga taawan ya, lansangan baw rugar nira.

² In magꞌuꞌunuy binwat mi it Jerico, yanagay buwaten mi duꞌut Hai, takaꞌ mapakay kamu nang misiꞌ it rangpasen mi, mga ayep nira baw mga kusas nira. Magrigen-rigen kamu na. Takaꞌ pakibunuꞌ mi, kaꞌilangan aꞌakal. Patataguꞌ i beken kat talikudan nga ayun it siyudad nira, bawnga iyan beken, yanay bilang patiya-tiyaꞌ.”

³ Egay beken, inasikasu ni Josue i muꞌsang mga taawan ya ka rumpakan nira siꞌ i Hai. (Pagkalte-kalteg it mga sundaluꞌ it Hai it mga Israelita siꞌ ngayti, diyaliꞌan nira nga lagi ka pakibunuꞌan siꞌ. Nagbeteꞌ-beteꞌ i mga Israelita nga mamagꞌatras naga sira. Tanud it taga Hai, pagdaꞌgen siꞌ sira, aypaꞌ ka siging usig nira. Iyan alaid nay mamagꞌusig ngayti, namusut-busut i mga mamagpatataguꞌ ngayti nga mga taawan ni Josue. Siyuriban nira nay siyudad ngayti. Pagkalawag na Josue it may magtindeg nang tabuk, siyarunga na niray mamagꞌusig ngaytit kanira, ka yapay pakibunuꞌ nira.)

²⁴ Napatay it mga Israelita i muꞌsa nga mga sundaluꞌ it Hai ngayti nga miyusig it kanira. Bawnga sinled nira nay siyudad, piyangimatay nira i muꞌsa nga natuduꞌ duꞌun.

²⁵ Kat iti nga aldaw talagang piyuuꞌ nira i muꞌsang taw duꞌut Hai ngayti. Sang puluꞌ may duwang ribu i naꞌimatay nira.

²⁶ Sigi pang tutulduꞌ ni Josue it besak ya duꞌun it Hai ngayti seked it naꞌimatay na nirang muꞌsa i kumpur taw duꞌun.

²⁷ Bawnga riyangpasan na it mga Israelita i diyaꞌeg nira ngayti nga siyudad, mga ayep baw mga kusas, uyun kat ipiyagꞌaat ngaytit AMPUꞌANG DIYUS it ki Josue.

²⁸ Pagkapanrangpas nira, siyuriban ni Josue i Hai ngayti, baw piyataꞌnan lamang it ega nay mayaspayas seked it kaꞌnu-kaꞌnu, subung nat magkaltegan it kayti ngaytu.

²⁹ Ipiyagantung yay adiꞌ baw piyataꞌnan lamang i bilug ya duꞌut giyantungan ngaytit kanyang kayu seked it diminlem. Pagkasdep it aldaw, bawnga inawaꞌ i miyatay ngayti ka ibiyuntal na duꞌun it puwirtaꞌan it siyudad. Piyakanturan ni Josue it dakulaꞌ nang kantur it batu nga magkaltegan paꞌ duꞌun it seked kayti.

Duꞌut Bukid it Ebal i piyamasaan it urdin it Ampuꞌang Diyus

³⁰ Pagkatiwas it muꞌsa ngayti, nagpatindeg si Josue it papangantengan duꞌun it Bukid it Ebal ka sambaen nira i AMPUꞌANG DIYUS it bangsa nira nga Israel.

³¹ Mga batu nga ega lininuꞌ it panlilinuꞌ nga mga basiꞌ i giyamit ya duꞌun it binwat ngayting papangantengan, subung nat ipiyan-gun ni Moises ngayting manigsirbi it AMPUꞌANG DIYUS baw uyun naga kat magsusurat duꞌut mga kaꞌurdinan nira nga isiyurat ni Moises. Duꞌun it papangantengan ngayti, may inanteng nirang mga ramu-ramu nga ipagsamba duꞌun it AMPUꞌANG DIYUS. Baw binwat nira gasiꞌ i mga pasalamat nga pagsamba nga may pagꞌimatayen nagang mga ramu-ramu.