Josue 7 - Tagbanwa

Kasalaꞌan ni Acan

¹ Temed ega piyamayaꞌ it Israel i ipiyagꞌurdin ngaytit AMPUꞌANG DIYUS nga ega misiꞌ it maski unu duꞌut Jerico ngayti nga ipiyasiguru nga panyaꞌ. Sabap simnalya si Acan nga anak ni Carmi baw apuꞌ ni Zabdi, nga apuꞌ-tuꞌud kanya ni Zera nga nanggaring-garing kat kuyunan nga mga tungtung-inapuꞌ ni Juda. Ka limnimat-limat kanya it pirang mga bagay ngayti nga panyaꞌ na. Aypaꞌ ka inisgan it AMPUꞌANG DIYUS i mga Israelita ngayti.

² Ta, binwat siꞌ ni Josue, may piyapanaw ya nga sumunda it siyudad it Hai, nga kat lebatang ayun it Betel nga adeꞌdeng duꞌun it Bet-aven.

³ Pagkaꞌuliꞌ nira, maat nirat ki Josue ngayti, “Ega na kaꞌilangan nga paꞌaduꞌun paꞌ nga muꞌsa. Siguru duwa u tulung ribu nga kataawan i pasulungun mu duꞌut siyudad ngaytit Hai, tamaꞌ na. Ega riga-rigaen nga muꞌsa ka ega naga dadaklan i taw ya duꞌut iting siyudad.”

⁴ Aypaꞌ tulung ribu lamang i mga Israelita ngayti nga simnulung duꞌut Hai. Temed ta, egay nabwat nira. Talagang diyaꞌeg sirat mga taga Hai ngayti.

⁵ Tiyaraꞌusig sira garing duꞌun it puwirtaꞌan it siyudad ngayti miyabut duꞌun it pagripkan it batu nga pagpangaranan it Silyar. Lamang namagꞌatras i mga Israelita ngayti, tulung puluꞌ baw enem i nagnis it kanira nga napatay iyan magpanadsad na sira. Aypaꞌ ka talagang piyamagtalawan na sira.

⁶ Piyanrarasik ni Josue i pakayan ya kat kadakulat kasmek yat nabetangan nira ngayti. Binwat ya, kiminleb kanya duꞌun it sarungaan it Kaban ngaytit Pakiꞌupakat it AMPUꞌANG DIYUS. Inanuꞌan ya it kapu-kapu i pati ulu ya. Kaꞌibaan ni Josue it kiminleb i mga pagbayaꞌen it mga Israelita ngayti. Duꞌun sira seked it nakasdep nay aldaw.

⁷ Miyampang si Josue nga magꞌaat, “AMPUꞌANG DIYUS namen, nga magbebegbeg it muꞌsa, unuka piyapandipag mu paꞌ kami it danum it Jordan in ipadaꞌeg mu naga lamang kami it mga Amorreo? Magayen paꞌ siguru in daꞌkami na lamang nagpaꞌugad-ugad duꞌun it sang dipag it Jordan.

⁸ Unu nay buwaten ku kayni it miyatras na ngaytu kat mga kalaban nira i mga Israelita ngaytu?

⁹ Pagkabaritaꞌ kaytu it mga Cananeo baw beken nga mga taw nga taga sinit ining banwa, daꞌga buwaten nira, pagtarabangan nira na kamit muuꞌ sinit sinirungat langit? Unu nay buwaten mu kayan nga isaꞌun makapatindeg nagay mabantug nga ngaran mu?”

¹⁰ Tumubag i AMPUꞌANG DIYUS, maat ya, “Timindeg ka. Unuka kiminleb ka nat atna? Magkaꞌrutan mu, may napuꞌnan yan.

¹¹ Yay matuud, talagang nagkasalaꞌan tuy bangsa ngaytu nga Israel. Ega siyunud niray ipiyagꞌurdin kut kanira. Minsiꞌ sirat ipiyagꞌaat ku nga panyaꞌ, bilang tiyakaw nira, bawnga idiyawaꞌ na nga uyut it mga betang nirang lagi, isaꞌun ega na mabisik-bisikan.

¹² Aypaꞌ ka ega kaya nira nga dumarugpaꞌ it mga kalaban nira, nga yan i ipagpalagyu nira. Ka yay ukuman ku, marway na daꞌgen sira. Talagang ega nayan tabangen ku kamu basta ega ipalbaw baw antengen mi i kumpur asan it imyu nga ipiyagꞌaat ku nga panyaꞌ.

¹³ Sigi, timindeg ka na, ka aaten muy kadakel nga ipasiguru nira i sadili nira duꞌun it aken, ka madap sirat aken dedelem. Sabap ituytu i ipagsugid kut kanira kayti, aku nga AMPUꞌANG DIYUS it bangsa mi nga Israel. May esat imyu nga timnaguꞌ it mga bagay nga ipiyagꞌaat ku ngayan nga panyaꞌ. Yay matuud, daꞌkamu mandaꞌeg it mga kalaban mi mintras ega yan naꞌawaꞌ situt imyu i panyaꞌ ngayang mga bagay.

¹⁴ Aypaꞌ dedelem kaꞌilangang madap kamut aken, kada sang kuyunang mga tungtung-inapuꞌ ni Israel. Iyan kuyunan nga itulduꞌ kut imu, buwaten mu, ipapinpin muy kada sang kaꞌanak-anakan. Bawnga iyan kaꞌanak-anakan nga itulduꞌ ku, ipapinpin i mga sang anakan. Bawnga atkayan naga seked it mataw nay taw.

¹⁵ Iyan maꞌanuꞌat mga bagay ngaytu nga panyaꞌ, kaꞌilangan nga antengen. Egay ipaꞌped, puꞌsa sirang sang anakan, pati mga karbet nira. Ka ega ipiyagalang ya i pakiꞌupakat it AMPUꞌANG DIYUS. Dakulaꞌ tu nga kaꞌeꞌyaꞌan it bangsa mi nga Israel i binwat ya ngaytu.”

¹⁶ Pagꞌeyag it aldaw nasulag it semkad si Josue bawnga piyapagtalingbes yat madap it kanya i muꞌsang mga Israelita ngayti kat kanya-kanyang kuyunan. Matukasiꞌan, kuyunang mga tungtung-inapuꞌ ni Juda.

¹⁷ Tiyaꞌwag i kumpur tungtung-inapuꞌ ni Juda, lumbaw kat pintuꞌan, kaꞌanak-anakan ni Zera. Tiyaꞌwag i kaꞌanak-anakan ngayti ni Zera, matukasiꞌan, kaꞌanakan ni Zoldi.

¹⁸ Egay beken, tiyaꞌwag i kaꞌanakan ni Zoldi ngayti, malbawan si Acan ngayti nga anak ni Carmi, apuꞌ ngayti ni Zoldi nga anak ni Zera.

¹⁹ Pagkaꞌanu kayti inaat ni Josue si Acan ngayti, “Dunguꞌ, kayti kat adapan ka it AMPUꞌANG DIYUS it Israel. Kaꞌilangan isugid mu i kamatuudan. Egay itaguꞌ mu nga maski unu. Unu nga matuud i binwat mu?”

²⁰ Katubag si Acan, “Talagang nagkasalaꞌan akung matuud duꞌun it AMPUꞌANG DIYUS it bangsa tami ngaytung Israel.

²¹ Sabap kat mga bagay nga narangpas ku duꞌun it Jerico nga maat antengen, may naltegan ku nga talagang piyakamagayeng gulamen nga garing duꞌun it Babilonia. Baw may walung kilu i pirak baw sang turung i bulawan nga siguru adeꞌdeng it duwang kilu i beꞌgat ya. Pinsiꞌ kuy mga iti ngayti bawnga ilimbeng ku na duꞌun it pagbabala-balayan ku ngayti. Ipiyabuliꞌ ku i pirak ngayti.”

²² Pagkagneg ni Josue kayti, may piyapalagyu ya nga paꞌaduꞌut bala-balay ngayti ni Acan. Maglelbeng nga matuud duꞌun i gulamen baw bulawan ngayti baw duꞌut buliꞌ nga matuud i pirak.

²³ Tiyaban nirang muꞌsa duꞌut ki Josue nga magꞌelat, sang siraan it kaꞌibaan nira ngayting mga Israelita. Ipiyarada niray muꞌsa ngayti nga bilang ipiyagꞌintergaꞌ duꞌun it AMPUꞌANG DIYUS.

²⁴ Bawnga tiyaban ni Josue baw kadakel ngayti si Acan, uyut i pirak, gulamen baw bulawan ngayti nga sang turung. Duꞌun it kelnaꞌ nga pagpangaranan it Kelnaꞌ it Kakuriꞌan i tiyabanan. Talagang egay ipiyaꞌped kat pamalay-balay ya, ka asawa ya, mga anak nira, muꞌsang mga ayep nira, bakaꞌ, kabayuꞌ nga asno, tupa, muꞌsang mga karbet nira, pati balay nira ngayti nga magkapuru-purun, ipiyaꞌuyut nga muꞌsa.

²⁵ Mampang si Josue ngayti, maat ya, “Iyan palan, piyakuriꞌan mu kami. Aypaꞌ kayti ikaw siꞌ i pakuriꞌan it AMPUꞌANG DIYUS.” Bawnga biyatu na nira si Acan, pati asawa baw mga anak ya ngayti, nga yapaꞌ paskedan ka natay na. Bawnga inanteng sira nga muꞌsa, uyut i muꞌsa gasiꞌ ngayti nga tiyaban duꞌun.

²⁶ Pagkatiwas kiyanturan nirat batu, nga duꞌun paꞌ it seked kayti i mga iting batu. Yapay miyulibas i ereꞌeret nga iseg it AMPUꞌANG DIYUS. Garing it itiꞌen ngayti, Kelnaꞌ nat Kakuriꞌan i ipiyangaran sikayting rugar.