Josue 6 - Tagbanwa

Diyaꞌeg it daꞌeg manuk i Jerico

¹ Ta, paribasay urut nat taga Jerico ngayti nga nakadipag nay mga Israelita, ipiyamagsiradu nira i kumpur puwirtaꞌan it siyudad ngayti. Egay makaliꞌwan u makasled nga maski siyu.

² Temed maat it AMPUꞌANG DIYUS it ki Josue ngayti, “Pagnegan muy aaten ku ngaytut imu. Talagang ipadaꞌeg kut imyu i Jerico ngaytu, pati adiꞌ ya baw mga bantug nga mga bilang sundaluꞌ ya.

³ Kayti buwaten mu, ikaw baw muꞌsang mga sundaluꞌ mu, limibut it Jerico it derengan i panaw. Buwaten mi tu it kaꞌsa it sang aldaw, seledan it enem nga aldaw.

⁴ Pitu nga kasasirdutiyan i pauꞌnaen mu kat Kaban it Pakiꞌupakat, nga teptep sirat taban nga taburi nga tanduk it tudu nga tupa i binwat. Kat ikapitung aldaw kapitu mi libutun i siyudad ngayan nga pagꞌeypan nat mga sasirduti i taba-taban nira ngayan nga taburi.

⁵ Bawnga pagkagneg mit ipadayuyung na nira it kaꞌsa nga dadakulaꞌen na, mangurisang kamu nga muꞌsa it pagꞌubsu-ubsun i gaꞌmaran mi. Dengan kayan, mamlad nayan i kutaꞌ. Ega nay seꞌanan mi nga muꞌsa it semled asat siyudad ngayan.”

⁶ Egay beken piyapaꞌaduꞌun ni Josue it kanya i mga sasirduti ngayti bawnga inaat ya sira. “Pirisiꞌnen mi siꞌ i Kaban it Pakiꞌupakat it AMPUꞌANG DIYUS. Muꞌna i pitung kasasirdutiyan nga may taban nga taburi.”

⁷ Bawnga inaat yay kadakel it mga taawan ya ngayti, “Mapanaw kamu na. Limibut kamu it siyudad ngayan. Pauꞌnaen mi kat Kaban it AMPUꞌANG DIYUS i mga tigauꞌna ngayan nga rangkap nga banar it basiꞌ.”

⁸ Aypaꞌ subung nat inaat ngayti ni Josue, namagꞌuꞌna na kat uꞌnaan it Kaban it Pakiꞌupakat i pitu ngayting kasasirdutiyan nga may taba-taban nga taburi, siging eyep nirat mamagpanaw ngayti.

⁹ Kat uꞌnaan it mga sasirduti ngayti i mga rangkap ngaytit basiꞌ nga tigauꞌna, baw kat giyaringan it Kaban ngaytit Pakiꞌupakat i mga rangkap it basiꞌ nga pangsauryan. Egay patpat it eyep it taburi ngayti.

¹⁰ Temed maat ni Josue it kadakel ngayti, “Iyan ayaw kamut pangurisang u ampang nga masked. Egay mampang seked it ega sinyasan ku kamu. Temed in may sinyas ku na, mangurisang nay kadakel.”

¹¹ Kat inaat ni Josue ngayti, ilinibut nirat siyudad ngayti it kaꞌsa i Kaban ngaytit Pakiꞌupakat it AMPUꞌANG DIYUS. Pagkalibut nira, namagꞌuliꞌ siꞌ duꞌut mga bala-balay nira.

¹² Pagꞌeyag siꞌ, nasulag it semkad si Josue. Pinirisiꞌen siꞌ it mga sasirduti i Kaban ngaytit Pakiꞌupakat.

¹³ Duꞌun sit uꞌnaan i pitu ngayting kasasirdutiyan nga egay patpat nirat eyep it taburi ngayting taba-taban nira. Duꞌun nagat uꞌnaan it pitu ngayting kasasirdutiyan i mga tigauꞌna nga rangkap it basiꞌ. Mga pangsauryan ngayti, duꞌun naga sira it giyaringan manggid it Kaban ngaytit Pakiꞌupakat. Sigi-siging patingeg it pagꞌeypan ngayti.

¹⁴ Linibut nira sit kaꞌsa i siyudad ngayti it ikadwa ngayting aldaw. Pagkalibut nira, namagꞌuliꞌ siꞌ sira duꞌun it mga bala-balay nira ngayti. Atkayti nay binwat nirat aldaw-aldaw seledan it enem nga aldaw.

¹⁵ Kat ikapitung aldaw, kukuꞌ-aldaw paꞌ namagbangun na sira bawnga linibut na nirat pitung libut i siyudad ngayti. Iti na ngayting aldaw inayaw nira nay pitung libut.

¹⁶ Iyan ikapitu nang libut nira, ipiyadayuyung nat kaꞌsa it diyadakulaꞌ it mga sasirduti ngayti. Simninyas na si Josue, dengan it sekat ya nga, “Sigi! Mangurisang nay kadakel! Ka ibinggay nat imyu it AMPUꞌANG DIYUS i siyudad ngaytu.

¹⁷ Kaꞌilangan, kapuꞌsaan it siyudad baw muꞌsa nga maparagan duꞌun antengen, ka ipasiguru nga kat AMPUꞌANG DIYUS na, nga ega na masalyaan ta. Iyan lamang i iribri, babay nga ipagpanulus yay bilug ya nga si Rahab baw muꞌsang mga kaꞌibaan ya asat seled it balay ya, sabap it panabang ya it mga piyasunda tami ngayan situ.

¹⁸ Iyan kuydaw kamut pisiꞌ it maski unung bagay duꞌun it seled ka talagang panyaꞌ. Basta misiꞌ kamu it maski unu, ikaꞌilang mi nayan, baw iyan i pasiꞌan-siꞌanan it talagang makuriꞌan i muꞌsang bangsa ta ngaytu nga Israel.

¹⁹ Temed muꞌsa nga bagay nga bulawan, pirak, tumbaga u basiꞌ i binwat, ipasiguru nga kat AMPUꞌANG DIYUS na yan. Kaꞌilangan idawaꞌ duꞌun it pagdawaꞌan it mga bagay nga kat AMPUꞌANG DIYUS.”

²⁰ Ta, egay beken, iyan ipiyadayuyung nat mga sasirduti it diyadakulaꞌ na, pagkagneg it kadakel ngayti, namagpangurisang na sira. Ta sakaling miyamlad nga muꞌsa i kutaꞌ ngayti it siyudad. Talagang magꞌaꞌamlad na. Aypaꞌ nagsigseled nat dumali-daliꞌ i kadakel, nakasled sirat egay seꞌan-seꞌan. Diyaꞌeg nira nga matuud i siyudad ngayti.

²¹ Piyangimatay nira i muꞌsang mga taw duꞌun it siyudad ngayti, babay, lalaki, gurang, mangaꞌwaꞌ, pati mga ayep, egay ipiyaꞌped nira, ka yanayti, panyaꞌ.

²² Maat ni Josue it duwa ngayti nga piyasunda ya, “Paꞌaduꞌun kamu na it balay it babay ngayang napaꞌabutan mi. Ipaliꞌwan mi kanya baw muꞌsang mga kabilug ya subung nat isiyanggup mi ngayat kanya.”

²³ Aypaꞌ naꞌaduꞌun na sira ka ipiyaliꞌwan nira na si Rahab, mga giyaringan ya baw muꞌsang mga kasulsugan baw mga kabilug ni Rahab ngayti. Bawnga piyabayaꞌ sirang muꞌsa duꞌun it adeꞌdeng it pamagbabalay-balayan ngaytit mga Israelita, takaꞌ daꞌsira nakapasagpun nga lagi.

²⁴ Siyuriban nira i siyudad ngayti baw inanteng i muꞌsa nga betang ya duꞌun. Yamanay ipiyaꞌped, mga bagay nga bulawan, pirak, tumbaga baw basiꞌ i binwat. Mga iti ngayti, idiyawaꞌ nira duꞌut pagpangaranan nirat darawaꞌan it manggad it AMPUꞌANG DIYUS.