Josue 4 - Tagbanwa

Piyakaꞌarandeman nga binwat sabap it nanuꞌu-tuꞌugan i piyandipagan nira

¹ Iyan nakadipag nang muꞌsa i kadaklan ngayti, inaat it AMPUꞌANG DIYUS si Josue, nga magꞌaat,

² “Miliꞌ ka it sang puluꞌ may duwang kalalakiyan, nga sang kataawan kat kada sang kuyunan nga mga tungtung-inapuꞌ ni Israel.

³ Papisiꞌen mu sira it taga sangbat nga batu duꞌun it tengaꞌ ngayti nga pamagtitindegan it mga sasirduti. Pirisiꞌnen nira seked duꞌun it pagbalay-balayan mi it mabway ngayang delem.”

⁴ Ta, tiningped na ni Josue i piniliꞌ ya nga sang puluꞌ may duwa nga kalalakiyan,

⁵ bawnga inaat ya, “Paꞌuliꞌ kamu daꞌan duꞌun it pamagtitindegan ngaytit mga sasirduti ka kumuꞌmit kamu it taga sangbat it imyuy batu, ka papatu-patuꞌan mi i sang puluꞌ may duwa nga kuyunan tami nga mga tungtung-inapuꞌ ni Israel.

⁶ Buwaten tami tuy mga batu ngaytu nga piyakaꞌarandeman it nagpasar ngaytu kat mata mi kayti nga binwat it AMPUꞌANG DIYUS. Bawnga kat mga pagdadarapaꞌen nga timpu, in beteꞌ ingkutun kamu it mga kaꞌanak-anakan mi in unuytu nga mga batu, itu nagay ituturan mit kanira.

⁷ Ituturan mi nga naꞌarbeng i burus it danum baw napra i duꞌut tenga-tengaꞌ it danum it Jordan, iyan idinipag i Kaban it Pakiꞌupakat it AMPUꞌANG DIYUS. Ka mga batu ngayang iyanꞌen, magpademdem yan it mga Israelita seked it magtungtung-magꞌinapuꞌ it pagpandipag tami ngaytut danum it Jordan.”

⁸ Egay beken, siyunud it sang puluꞌ ngayti may duwa i itiyaꞌeg ngaytit kanira ni Josue. Uyun it ipiyagꞌaat ngaytit AMPUꞌANG DIYUS it ki Josue, nanguꞌmit sirat batu duꞌut tengaꞌ ngaytit Jordan, nga papatu-patuꞌ it sang puluꞌ baw duwang kuyunan nga mga tungtung-inapuꞌ ni Israel. Pinirisiꞌen niray mga batu ngayti seked duꞌun it piyagbalay-balayan nira siꞌ,

⁹ bawnga idiyaꞌtun nira duꞌun. Ipiyagruknu-ruknuꞌun ni Josue i sang puluꞌ may duwa ngayting batu nga ipiyapisiꞌ ya ngayti duꞌun it piyamagtindegan it mga sasirduti nga magpipirisiꞌen it Kaban ngaytit Pakiꞌupakat. Duꞌun paꞌ it seked kayti i iting mga batu.

¹⁰ Duꞌun lamang mamagtitindeg i mga sasirduti ngayti it tengat napraan ngayti nga sang peꞌtek nga danum it Jordan, seked it nabwat nga muꞌsa i kumpur ipiyagꞌaat ngaytit AMPUꞌANG DIYUS it ki Josue. Siyunud ni Josue i muꞌsa, uyun kat ipiyagꞌaat nagat kanya ni Moises it iyan egen paꞌ. Ereg-ereg i dipag it kadakel ngayti.

¹¹ Iyan nakadipag nay muꞌsa, yapay dipag it mamagpipirisiꞌen ngayti it Kaban it Pakiꞌupakat. Pagkalankan sit panaw nira, sira nagay kat uꞌnaan it kadaklan ngayti.

¹² Iyan i magdadasun it kanirang banar, mga lalaki nga kat mga kuyunang mga tungtung-inapuꞌ ni Ruben, ni Gad baw sang lubuk nga kuyunang mga tungtung-inapuꞌ ni Manases. Rangkap sira it basiꞌ ka tumabang it pakibunuꞌ uyun duꞌun it isingkat naga ni Moises.

¹³ May epat nga pulung ribu i kadakel it mga lalaki ngayti nga rangkap it basiꞌ nga napanaw nga nandipag kat adapan it AMPUꞌANG DIYUS, nanguꞌnat kadakel ngayti it naꞌaduꞌun nat daranasan it Jerico.

¹⁴ Kat iting aldaw binwat it AMPUꞌANG DIYUS si Josue nga ega babasta-bastaen kat mata it kadakel ngayti, aypaꞌ ka mintras egen si Josue, paggalangen kanya it mga kaꞌibaan ya ngayti, subung nagat paggalang nira it ki Moises.

Yapaꞌ murus i danum, nakadipag nay namagtindeg ngayting mga sasirduti

¹⁵ Iyan duꞌun pay mga sasirduti it pagtitindegan nira ngayti, ipiyagꞌaat siꞌ it AMPUꞌANG DIYUS it ki Josue,

¹⁶ “Aaten mu nay mga sasirduti ngayting magpipirisiꞌen it Kaban it Pakiꞌupakat nga dimipag na siray kanira.”

¹⁷ Egay beken, siyunud ni Josue i ipiyagꞌaat ngaytit kanya it AMPUꞌANG DIYUS.

¹⁸ Desang nakatingdal i mga sasirduti ngayti, magbubunakur siꞌ i burus. Nagꞌuliꞌnan siꞌ i kaꞌararem ya nga nanlapayan ngayti.

May binwat ni Josue nga piyakaꞌarandeman

¹⁹ Pagpandipagan ngayti it mga Israelita duꞌut danum it Jordan ngayti, ikasang puluꞌ nga aldaw it uꞌnang bulan it taꞌun. Duꞌut Gilgal nga kat lebatan nga ayun it Jerico i piyamagpakabratan nirat mga bala-balay nira.

²⁰ Duꞌun na kayti ipiyaruknuꞌ-ruknuꞌ ni Josue i sang puluꞌ may duwa ngayting batu nga ipiyapisiꞌ ya ngayti duꞌut Jordan.

²¹ Pagkaꞌman maat ya it kadakel ngayting mga Israelita, “Kamu nga mga giyaringan, in ingkutun kamu it mga anak mi in unuy kasasiyan it itu ngaytung mga batu,

²² egay beken nga ituturan mit kanira, in daꞌga aaten mi, ‘Pagpepraan i piyanawan it bangsa nga Israel, pagpandipag it danum it Jordan.’

²³ Sabap kat adapan mi, piyapraan it AMPUꞌANG DIYUS mi i Jordan ngaytu seked it nakadipag kamu nang muꞌsa. Binwat ya ngaytu it Jordan, subung naga it binwat ya duꞌun it dagat nga pagpangaranan it Madarag nga Dagat, pagpandipag tami ngayan duꞌun.

²⁴ Binwat yay atkaytu isaꞌun makilalaan it muꞌsang mga bangsa i keseg it guna it AMPUꞌANG DIYUS baw galangen mi kanya it may iꞌlam it egay katupusan.”