Josue 3 - Tagbanwa

Nandipag na duꞌut sang dipag it Jordan i mga Israelita

¹ Madelem-delem paꞌ, nasulag na si Josue baw muꞌsa ngayting mga Israelita. Gimnaring siꞌ sira duꞌut Sitim ngayti, naꞌaduꞌun na sirat kadanuman it Jordan. Pagkaꞌbut nira, ega dayun-dayun sirang dimnipag. Nagrenren sira daꞌan duꞌut tambing ya.

² Nagtaꞌlib i tulung aldaw nanlekep-lekep i mga pagbayaꞌen nira it mga kababala-balayan it kadakel ngayti.

³ Siyugidan niray kadakel ngayti nga magꞌaat, “Iyan basta maltegan mi nga pinirisiꞌen it mga sasirduti tami nga Levita i Kaban it Pakiꞌupakat it AMPUꞌANG DIYUS tami, mapanaw tami siꞌ yan nga muꞌsa.

⁴ Maꞌrutan ta nayan asat kanira in ari panawan tami, sabap egay maski siyu it aten nga nakapanaw it itung pagpanawan. Temed ayaw kamut pataked it magpipirisiꞌen ngayan it Kaban it Pakiꞌupakat. Pauꞌnaen mi sira it subrat tengaꞌ it sang kilumitru.”

⁵ Inaat ni Josue i kadakel ngayti, “Kaꞌilangan ipasiguru mi nay sadili mi duꞌun it AMPUꞌANG DIYUS, sabap dedelem muwat kanya it kalililuꞌang bagay nga maltegan mi yan nga kadakel.”

⁶ Pagꞌaldaw siꞌ, singkat na ni Josue i mga sasirduti. “Pirisiꞌnen mi na i Kaban it Pakiꞌupakat baw muꞌna kamu na kat kadakel ngaytu.” Egay beken, siyunud nira i inaat ngaytit kanira.

¹⁵ Ta, kat iting timpu, panagulyud na. Dakulaꞌ nga luyud it Jordan ngayti. Temed maski atkayti, pagkaꞌbut it mga sasirduti nga magpipirisiꞌen it Kaban ngaytit Pakiꞌupakat, magtegday i aꞌay nirang sang bali ka lumaꞌap na,

¹⁶ sakaling mindek i burus. Subuk may nakaꞌarbeng duꞌut dayaꞌ nga duꞌun it patuꞌ it lansangan it Adam nga duꞌun it tepad it lansangan it Sartan. Takaꞌ iyan danum nga kat laud nga ayun it subuk naꞌarbeng ngayti, sigi-sigi nagang burus ayun duꞌun it pagpangaranan ngaytit Patay nga Dagat nga duꞌut Araba seked it napra. Iyan napra na, nandipag nay mga Israelita ngayti. Adeꞌdeng na duꞌut Jerico i dinipagan nira.

¹⁷ Mga sasirduti ngayti nga mamagpipirisiꞌen it Kaban ngaytit Pakiꞌupakat, binwat nira, namagtindeg lamang sira duꞌun it tengaꞌ it pagpepraan ngayti mintras mamagpandipag i muꞌsang mga kaꞌibaan nira nga Israelita.