Josue 10 - Tagbanwa

Timneꞌyeng i aldaw isaꞌun makasigi i pandaꞌeg na Josue it mga Amorreo

¹ Nabaritaꞌan it adiꞌ nga si Adonizedec nga adiꞌ it Jerusalem nga diyaꞌeg baw siyuriban na ni Josue i siyudad it Hai. Nabaritaꞌan ya gasiꞌ i binwat ni Josue it adiꞌ baw muꞌsang taw nga taga Hai nga subung nagat binwat ya it adiꞌ duꞌut Jerico baw mga taw duꞌun. Naꞌrutan ya paꞌ gasiꞌ i binwat it mga taga Gabaon nga nagpakiꞌamigus baw mamagsasagpun nay beken duꞌun it mga Israelita ngayti.

² Masyadu nang iꞌlam it mga taga Jerusalem ngayti ka Gabaon ngayti, dakulaꞌ nga siyudad, nga esa it piyakadakulaꞌ nga siyudad nga may sadiling adiꞌ, subraꞌ pang dakulaꞌ it siyudad it Hai, baw mga ega babasta-bastaen i mga sundaluꞌ ya duꞌun.

³ Aypaꞌ binwat it adiꞌ ngayti nga si Adonizedec, may piyapanaw ya nga naꞌaduꞌun it adiꞌ it Hebron nga si Hoham, duꞌut adiꞌ it Jarmut nga si Piream, duꞌut ki Jafia nga adiꞌ it Laquis baw duꞌun it ki Debir nga adiꞌ it Eglon.

⁴ Maat i ipiyataban yang ampang duꞌun, “Kaꞌilangan namen talaga i tabang mi. Rumpakan tami i Gabaon sabap mga taw ya duꞌun, nagpakiꞌamigus nat kana Josue nga mga Israelita.”

⁵ Aypaꞌ nagꞌurunyun i lima ngayti nga mga adiꞌ it mga Amorreo. Kiyulung niray Gabaon ngayti bawnga piyakibunuꞌan na.

⁶ Ta it atkayti na, piyasugidan it taga Gabaon ngayti si Josue ngayting maglalangsan duꞌun it Gilgal, nga magꞌaat, “Ega naga beteꞌ pabayaꞌan mu kami nga kaꞌildaw-ildaw nga mga manigsirbi mu. Dumaliꞌ kamu sana it paꞌasinit amen ka tabangen kami naga. Iribri mi naga kami. Inugup kami na bayni it muꞌsang mga adiꞌ it mga Amorreo nga mga taga duꞌun it kamumungsuꞌan.”

⁷ Ta, egay beken, napanaw na na Josue garing duꞌut Gilgal ngayti ka tumabang, sang siraan it muꞌsang mga taawan ya nga uba-ubas na it pagbunuꞌ.

⁸ Maat it AMPUꞌANG DIYUS it ki Josue ngayti, “Ayaw kat iꞌlam. Talagang paꞌampuꞌun ku sira nga daꞌgen mi sirang muꞌsa. Maski esat kanira, ega yay makalaban it imyu.”

⁹ Napanaw na Josue it iti nga laging delem. Naglinag sirat panaw. Garing duꞌut Gilgal ngayti, inabutan nirang ega nakaꞌalistu i mga miyugup ngayti.

¹⁰ Binwat it AMPUꞌANG DIYUS, piyatarantaꞌ ya i mga inabutan ngayti pagkalteg nirat mga sundaluꞌ it Israel. Dakel sira i naꞌimatay it mga Israelita duꞌun it Gabaon ngayti. Tiyaraꞌusig nira i namagpalagyu, garing duꞌut Bet-horon miyabut duꞌun it Azeca baw duꞌut Maceda.

¹¹ Mintras magpalagyu i pagtataraꞌusigen ngayti it mga Israelita, piyaꞌuranan sira it AMPUꞌANG DIYUS it dadakulang bilugun it yilu. Dakel nga banar i miyatay. Dakel pat natay it basiꞌ it mga Israelita i natay it magtedag ngayti nga yilu nga subuk desen it batu.

¹² Kat iting aldaw nga piyapandaꞌeg it AMPUꞌANG DIYUS na Josue it mga Amorreo ngayti, nagpakisugi-sugid siꞌ si Josue it AMPUꞌANG DIYUS. Maat ya it pagdedngegen it kadakel ngayting mga Israelita, “Temeꞌyeng kang aldaw asat patuꞌ it Gabaon baw ikaw gasiꞌ bulan, temeꞌyeng ka gasiꞌ i imu asan it patuꞌ it Kelnaꞌ it Ayalon.”

¹³ Egay beken, timneꞌyeng nga matuud i aldaw, ega magliꞌi-liꞌid. Atnaga i bulan, seked it diyaꞌeg it mga Israelita i mga kalaban nira ngayti. Magsusurat tuy itung kaꞌulugan duꞌun it kasuratan ni Jaser. Timneꞌyeng i aldaw duꞌun it pagꞌaꞌanuꞌan ya, ega siminde-sindep. Aypaꞌ balit duwang aldaw i iting aldaw.

¹⁴ Talagang garing it tagnaꞌ pay banwa, ega pay nagꞌabut nga atkayting aldaw, baw seked kayti ega pay nagꞌabut nga atkayti gasiꞌ, nga subung ngaytut simnunud it taw i AMPUꞌANG DIYUS. Ka talagang piyapandaꞌeg yay mga Israelita ngayti.

Diyaꞌeg it mga Israelita i muꞌsang rugar nga kat sur nga ayun

⁴⁰ Garing it iting timpu diyaꞌeg ni Josue i muꞌsang rugar nga kat sur nga ayun, mga rugar nga duꞌun it kabubukidan, rugar nga Negeb, mga taga daranasan baw mga taga kamumungsuꞌan. Piyangimatay na Josue i mga adiꞌ duꞌun it iti nga mga rugar baw piyuuꞌ nira i muꞌsang sinakepan it mga adiꞌ ngayti, uyun duꞌun it ipiyagꞌurdin it AMPUꞌANG DIYUS it bangsa nira nga Israel. Talagang egay ipiyaꞌped nira.

⁴¹ Talagang diyaꞌeg na Josue i muꞌsa garing duꞌun it Cades-Barnea seked duꞌun it Gaza, baw muꞌsang rugar nga Gosen seked duꞌun it Gabaon nga ayun duꞌun it nurti.

⁴² Diyaꞌeg nira i muꞌsa ngayting mga adiꞌ baw mga kaꞌadiꞌan nira ngayti it kaꞌsa lamang nga panrumpak. Nabwat niray atkayti sabap, AMPUꞌANG DIYUS it bangsa nira nga Israel, pagtabangen ya sira talaga it magpakibunuꞌ.