Josue 1 - Tagbanwa

Mga ipiyagꞌaat it Ampuꞌang Diyus it ki Josue

¹ Iyan ega nay si Moises ngayti nga manigsirbi it AMPUꞌANG DIYUS, inaat it AMPUꞌANG DIYUS si Josue nga dati ngayting magtimbang-timbang it ki Moises, it iyan egen paꞌ. Si Josue ngayti, anak ni Nun.

² “Kayti,” maat it AMPUꞌANG DIYUS, “it ega nay si Moises nga manigsirbi ku, ikaw siꞌ i bayaꞌen it mga Israelita ngaytu. Magꞌali-alistu kamu na. Mandipag kamu na it danum it Jordan ka lumangbus kamu na duꞌun it banwa ngayan nga isiyanggup ku nga ibgay ku it imyu nga mga tungtung-inapuꞌ ni Israel.

³ Ka subung nat isiyanggup ku it ki Moises, talagang ibgay ku i kapuꞌsaan it banwa ngayan nga abutun mi.

⁴ Itu may itu i seked it banwa nga ibgay ku ngayan it imyu. Ayun kat nurti, Bukid it Libano. Ayun kat sur, iyan rugar nga kapupuyangtan. Ta, kat lebatan nga ayun, dakulang kadanuman it Eufrates, baw kat sedpan nga ayun, gumaring duꞌun it rugar it mga Heteo mabut duꞌun it pagpangaranan it Dagat Mediteraneo.

⁵ Daꞌka yan daꞌgen it maski siyu mintras egen ka, ka in magꞌuꞌunu tiyarima ku si Moises, atkayan naga i buwaten ku it imu. Talagang daꞌka pabaya-bayaꞌan ku u tananan.

⁶ Siguruun mu nga daꞌka gugumir-gumiren, magpakalalaki kang banar, ka ikaw siꞌ i manguꞌna it mga kadakel ngaytu it sakpen i banwa ngaytu nga ibgay kut imyu subung nat isiyanggup ku it mga kiyaꞌapuꞌ-apuꞌan mi.

⁷ Temed ta, yanayan, kaꞌilangan nga daꞌka gugumir-gumiren, magpakalalaki kang banar. Baw magꞌintur ka nga sunudun mut magayen i muꞌsang mga urdin ku ngayan nga ipiyaꞌyag baw ipiyakpet it imyu ni Moises nga manigsirbi ku. Ega mu pasyangan i kumpur mga inaat duꞌun, ka in mabwat mu gay atkaytu, siguradung purus magayen i lapusan it kumpur buwaten mu.

⁸ Ega mu lipa-lipaten, pagbasaen mu nga pirmi baw ipagpademdem duꞌun it kadakel i magsusurat na ngaytu nga mga urdin ku. Kaꞌilangan, iyan i pagpipikiren mu it delem-aldaw, isaꞌun masunud mut magayen i kumpur magbebtang duꞌun, ka in atkayan, siguradu yan nga manggayen i pangaꞌgenan mu baw magayen i lapusan it muꞌsang buwaten mu.

⁹ Kaꞌilangan dedemdemen mu nga pirmi i kumpur ipiyagsasar ku ngaytut imu nga daꞌka gugumir-gumiren, magpakalalaki kang banar. Daꞌka magmaiꞌlam baw ayaw kat alang-alang, ka aku nga AMPUꞌANG DIYUS mu i magtatarima it imu maski ari aduꞌunan mu.”

Ipiyataritid ni Josue i kadakel

¹⁰ Egay beken, singkat ni Josue i mga pagbayaꞌen it kadakel ngayting mga Israelita.

¹¹ Maat ya, “Kaꞌilangan taritiden mi i muꞌsang mga kaꞌibaan ta ngaytu. Iꞌaat mi it kanira nga magꞌitsu nga lagi it pangaꞌen, ka katlu kayti mandipag tami na it danum ngaytut Jordan ka sakpen tami nay banwa nga ipagbegay ngayat aten it AMPUꞌANG DIYUS.”