Joel 2 - Tagbanwa

Kaꞌilangan singuliꞌan nga banar i kasalaꞌan ka mabut talaga i panriga it Ampuꞌang Diyus

¹ Ituy isiyurat it prupitaꞌ nga si Joel nga ipiyasurat it AMPUꞌANG DIYUS. “Eypan mi i taburi nga paꞌimbanda duꞌun it Sion nga ega basta-bastang mungsuꞌ nga piniliꞌ it AMPUꞌANG DIYUS. Yemegyeg kamu nga muꞌsa nga taga Juda, sabap talagang magꞌadeꞌdeng nay aldaw nga ipangukuman it imyu it AMPUꞌANG DIYUS.

² Itu nga aldaw, marurum baw ikasmek. Madlem i palinibut ka pangindelem na it matanip na nga apan nga magpalpay duꞌun it kabubukidan. Ega paytu nagꞌabut i atkaytu ngaytu garing paꞌ it tagnaꞌ, baw ega na gasiꞌ tu mabut paꞌ it sumaꞌup.

¹¹ Subung it pamsar it duldug i AMPUꞌANG DIYUS nga magsekat it mga ipagpataban ya ngaytung pakilaban it imyu. Baw mga magsunud ngaytu it mga sekat ya, talagang dakel nga banar baw ega babasta-bastaen. Ega talaga basta-basta baw kaiꞌiꞌlaman nga banar i aldaw ngaytu nga ipangukuman it AMPUꞌANG DIYUS it imyu. Ta siyuy makasagkaꞌ kaytu?”

¹² “Temed kayti na ngaytu,” maat it AMPUꞌANG DIYUS, “paꞌuliꞌan mi na aku baw magsinguliꞌ kamu it kamatuudan nga pagsinguliꞌ nga uyut i pagpuwasa, baw sumgaw kamu nga magkasmek kamu.”

¹³ Eeꞌ baꞌ, ega desang rasiken mi i pakayan mi nga maat tandaꞌ it kasmek, in daꞌga masmekan mi it kamatuudan i kasalaꞌan mi. Pasakep kamu siꞌ it AMPUꞌANG DIYUS mi, ka talagang masanguꞌ kanya baw subraꞌ nga maꞌildaw. Ega madali-daliꞌ kanya miseg baw ega magkaꞌugad-ugad i kararas yat imyu. Pirmi nga magꞌaꞌareg yay pasinsiya ya baw ega basta-basta manriga kanya.

Mabut i aldaw nga buwaten it Ampuꞌang Diyus, papasaruman ya it Espiritu Santo i katataawan

²⁸ “Mabut i aldaw,” maat it AMPUꞌANG DIYUS, “nga ildawan ku nay muꞌsang taw, nga masaruman na sira it Espiritu Santo ku. Bawnga kat panakem yat kanira, mampang i mga anak mi, babay, lalaki, it ipagpaꞌrut ku it katataawan. May ipanakem kut magugurang mi nga tagaynepen nirat magꞌigaꞌ. Baw iyan mangaꞌwaꞌen mi, may ipanakem kut kanira nga, lamang magsusulag, subung it pagtagaynepen nira.

²⁹ Eeꞌ baꞌ, kat iting timpu, talagang ildawan kuy maski mga uripen, babay, lalaki, nga pasaruman na sira gasiꞌ it Espiritu Santo ku.

³⁰ Baw may ipalteg ku nga mga tandaꞌanan nga kalililuꞌang mga bagay nga maltegan duꞌun it langit baw situt banwa. May maltegan nga duguꞌ, apuy baw maꞌpal nga tabuk.

³¹ Bawnga in magꞌaꞌabut nay ega basta-basta baw kaiꞌlaman nga aldaw nga ipangukuman it AMPUꞌANG DIYUS it katataawan, demlem nay aldaw. Iyan bulan, kat panleteg it taw, atnat duguꞌ.

^32a Temed yay matuud, maribri i kumpur magpaꞌildaw it aken,” maat it AMPUꞌANG DIYUS.