Jeremias 31 - Tagbanwa

Iyan baꞌgung pakiꞌupakat it Ampuꞌang Diyus kat katataawan

³¹ Magꞌaat paꞌ i AMPUꞌANG DIYUS, “Mabut i timpu nga pakiꞌupakat aku siꞌ it Baꞌgu nga Pakiꞌupakat duꞌun it Israel baw duꞌun it Juda.

³² Nga itu ngaytu nga pakiꞌupakat, ega na subung it pakiꞌupakat ku ngayti it mga kagiyaringanan nira, iyan ipiyaliꞌwan ku na sira kat pagkaꞌuripen nira duꞌun it Egipto. Ka tagnaꞌ ngayti nga ipiyakiꞌupakat ku, riyanggaꞌ nira maski namuyaan na niray kagayen it pangarigra ku it kanira, nga subung nat pangarigra it esang lalaki it pagraa-rarasan ya nga asawa.

³³ Itu siꞌ i ipakiꞌupakat ku it bangsa nga Israel kat pagdadarapaꞌen. Mga urdin ku, idawaꞌ ku na kat ulu nira baw ipatdek ku nang banar kat nakem nira. Simirbi sirang matuud it aken nga Ampuꞌang Diyus nira, baw arigraen ku sirang banar nga mga taawan ku.

³⁴ Ega na maat kaꞌilangan paꞌ nga itulduꞌ it maski siyu it mga kabanwa ya, u iꞌaat ya paꞌ it mga sulsug ya nga magꞌaat, ‘Kaꞌilangan nga kilalaen mu i AMPUꞌANG DIYUS.’ Sabap aku, makilalaan nira na nga muꞌsa, ega nay piniliꞌan, mataꞌas nga duguꞌ baw raꞌyat. Sabap ipasinsiya ku nat kanira i karaꞌe-raꞌetan nira baw talagang lipaten ku na i mga kasalaꞌan nira.”