Jeremias 29 - Tagbanwa

Mabut i aldaw nga paꞌuliꞌen i mga Israelita garing duꞌun it Babilonia

¹⁰ Magꞌaat gasiꞌ it AMPUꞌANG DIYUS, “Magtaꞌlib i pitung puluꞌ nga taꞌun nga kaꞌlay mi it dadakepen duꞌun it Babilonia, ipalteg ku naga i ildaw ku it imyu. Tumanen ku naga i ipagsanggup ku ngaytut imyu nga paꞌuliꞌen ku naga kamu situt banwa mi ngaytu.

¹¹ Sabap pagꞌuꞌrutan ku nga lagi nga pabetang-betang ku ngaytu, talagang kat ikagayen mi, ega maat kat ikaranggaꞌ, isaꞌun mabgayan kamu it kagayenan nga pagꞌiꞌinawaren mi kat pagdadarapaꞌen.

¹² Kat timpu ngayan, mangabang kamu baw mandangep nga manalangin kamu na sinit aken, baw talagang sambungan ku yan kamu.

¹³ Tumulus kamu na in magꞌuꞌunu makilalaan mi aku, baw maparagan mi yan aku, basta kamatuudan i pagtulus mi, nga tingled i nakem.

¹⁴ Eeꞌ baꞌ, talagang maparagan mi yan aku,” maat it AMPUꞌANG DIYUS, “baw paꞌuliꞌen ku naga yan kamu nga nadakepan. Tingpeden ku kamu gumaring kat paꞌari-aring bangsa baw rugar nga subuk diyedegan ku it imyu, baw iꞌuliꞌ duꞌun it rugar nga pagtataꞌidan mi parabir kamu nadakepan.