Jeremias 25 - Tagbanwa

Ipiyaꞌrut it Ampuꞌang Diyus nga rigaen ya i mga taga Juda nga dakepanen sira duꞌun it Babilonia, seledan it pitung puluꞌ nga taꞌun

¹ Iyan ikaꞌpat na nga taꞌun it pagꞌadiꞌ duꞌun it Juda it anak ngayti ni Josias nga si Joaquim, miyabut duꞌun it prupitaꞌ nga si Jeremias i ampang it Ampuꞌang Diyus pasar it mabetangan it muꞌsa nga mga taga Juda. (Iti nga timpu, uꞌnang taꞌun it pagꞌadiꞌ ni Nabucodonosor duꞌun it Babilonia.)

² Magꞌaat ni Jeremias it muꞌsa nga mga taga Juda ngayti baw taga Jerusalem,

³ “Seledan it duwang puluꞌ baw tulung taꞌun, garing paꞌ it ikasang puluꞌ baw tulung taꞌun it pagꞌadiꞌ duꞌun it Juda it anak ni Amon nga si Josias, pasigi nga ipagsugid kut imyu i ampang it AMPUꞌANG DIYUS, temed ega pagdenggen mi.

⁴ Ega gasiꞌ pagdenggen mi i ipagꞌaat it beken nga mga manigsirbi ya nga prupitaꞌ nga pasigi ya nga pagtaꞌgen asan it imyu.

⁵ Daꞌga baꞌ, ipagsugid nira nga basta indiꞌan mi ga i maraꞌe-raꞌet nga pangaꞌgenan mi baw mararaꞌway nga pagbuwaten mi, ipagsanggup it AMPUꞌANG DIYUS nga mangaꞌgenan kamu it egay katupusan kat banwa nga ipiyasubli yat mga kagiyaringanan mi seked it magtungtung-magꞌinapuꞌ?

⁶ Ipiyagꞌaat nira ngayan it imyu nga ayaw kamu it samba baw pagsirbi it mga pagbete-beteꞌen nga diyus. Ega beteꞌ paꞌisgen mi i AMPUꞌANG DIYUS it pagsamba mi it pagbete-beteꞌen nga diyus nga binwat lamang it alima mi. In beteꞌ nagpagneg kamu it kanya, siguradu nga ega yan rigaen ya kamu.

⁷ Temed, maat it AMPUꞌANG DIYUS it imyu, ‘Ega piyamayaꞌ mi i inampang ku. Piyaꞌiseg mi ga aku kat pagsamba mi it siyari mi lamang it buwat it sadili mi nga alima. Aypaꞌ ka yay tumaban it imyu kat panriga ku.’

⁸ Aypaꞌ ka ituy ipagꞌaat it imyu it AMPUꞌANG DIYUS, ‘Ta, sabap it daꞌkamu ngayan nagpagneg it aken,

⁹ taꞌgen ku i mga bangsa nga ayun duꞌun it nurti, kat panguꞌna it manigsirbi ku nga si Nabucodonosor. Rumpakan nira i itu nga bangsa baw muꞌsa gasiꞌ nga bangsa nga kat linibut. Talagang ranggaꞌen kut ranggaꞌ banar seked it kaꞌnu-kaꞌnu i mga itu ngaytu nga bangsa nga baraꞌan ya, ipagkaliluꞌ it pikir baw pagguꞌyasan it kumpur magkabaritaꞌ kaytu.

¹⁰ Talagang awaꞌen ku na i kukurisang it mga magkasagya baw kasagyaan nga pagsadu it mga magꞌasawa. Ega na talagay magnegan nga tingeg it gilingan baw ega na gasiꞌ i maltegan nga sayaꞌ it mga tidaw, ka ega nay taw-taawun.

¹¹ Magbaraꞌ na nga kantur-kantur na it naranggaꞌ i itu nga rugar. Talagang maꞌiꞌinglaꞌan i kumpur mabaritaꞌan it nabetangan ya. Baw iyan mga taw ya situ, sariyen nat uripen it adiꞌ it Babilonia it seledan it pitung puluꞌ nga taꞌun.

¹² Temed magtaꞌlib i pitung puluꞌ ngayti nga taꞌun, iyan siꞌ i giraen ku, adiꞌ ngaytu it Babilonia baw muꞌsang rugar it mga Caldeo ngaytu, sabap it karaꞌe-raꞌetan nira. Talagang ranggaꞌen ku nay iyan nga bangsa, baw seked it kaꞌnu-kaꞌnu daꞌsira na makatindeg.

¹³ Magꞌabut tu talaga kat iti nga bangsa i muꞌsa ngaytu nga inaat ku nga kuntraꞌ it kanira, muꞌsa nga magsusurat situt itu nga kasuratan nga ipiyasurat ku it prupitaꞌ ngaytu nga si Jeremias kuntraꞌ kat muꞌsa nga bangsa.

¹⁴ Talagang buwaten sira nga uripen it dakel na nga mga bangsa baw mga matanug nga adiꞌ. Tumbasan ku talaga sira uyun kat mga binwat nira.’”