Isaias 9 - Tagbanwa

Paꞌrut siꞌ it Ampuꞌang Diyus pasar it ipatindeg nga Manriribri

¹ Takaꞌ mabut i aldaw nga maꞌawaꞌ i kasmek it banwa nga nakabetang it kakuriꞌan. Tagnaꞌ, itiyalpak it Ampuꞌang Diyus kat kakuriꞌan i mga babanwaan nga susubliyen it kuyunang mga tungtung-inapuꞌ ni Zabulon nga ayun duꞌut dagat, baw susubliyen it kuyunang mga tungtung-inapuꞌ ni Neftali nga duꞌun it dipag it Jordan, rugar ngaytu nga Galilea na, nga kadaklan it taw ya, ega kat bangsa nga Israel. Temed mabut i timpu nga ibtang ya kat subraꞌ nga kabantugan i itu nga babanwaan.

² Naꞌlay na nga magpangaꞌgenan kat kadleman i mga taga Galilea ngaytu, temed inyagan na sirat eyag nga ega basta-basta. Subung sirat sinakepan it kamataynen ka egay inawar nira, temed kayti inyagan na sira.

⁶ Sabap ipiyanganak situt aten i esang waꞌwaꞌ. Ipiyagbegay i itung lalaki kat ikagayen tami. Kanya na i mamaalaꞌ it aten. Kanya ngaytu, kilalaen nga “Kalililuꞌan nga Manigpadisir,” “Ampuꞌang Diyus nga Gunaan,” “Amaꞌ tami nga Egay Pinꞌunan, Egay Kaskedan,” baw “Manigpamegbeg nga Magbegay it Kamatuudan nga Kaꞌimbengan.”

⁷ Talagang pasigi nga dumakel i masakep ya baw, kamatuudan nga kaꞌimbengan ngaytu nga taban ya, pasigi gasiꞌ nga ipapanaw ya seked it kaꞌnu-kaꞌnu. Sumubli kanya kat pagkaꞌadiꞌ ni David baw ipapaꞌgen ya it egay katupusan i pagꞌadiꞌ ya ngaytu it ega basta-bastang kataldengan baw kagayenan. Siguraduytu nga matuman, sabap ipiyabetang-betang nga lagi it AMPUꞌANG DIYUS nga landaw nga gunaan.